1. Sito sicuro che semo nei “ùltimi giorni”? Parché?

 SE TE sì nassesto dopo del ano de 1914, alora te ghè sempre vivesto nei “ùltimi giorni”. (2 Tim. 3:1) Gesù el ga dito cossa ndaria suceder in questi ùltimi giorni: guere, mancansa de magnar, teremoti, brute malatie, aumento de quel che l’è contra la lege e che le nassion le gavaria òdio par i servi de Geovà. (Mat. 24:3, 7-9, 12; Luc. 21:10-12) Noantri ghemo belche visto queste robe e anca vedemo che le persone le ze pròpio come el apòstolo Paolo el ga scrito in 2 Timòteo capìtolo 3. (Varda anca el quadro “ Come le persone le ze ancoi”.) Noantri che adoremo a Geovà semo sicuri che semo drio viver ntei “ùltimi giorni”. — Mic. 4:1.

2. Che domande ghemo de farse?

² De 1914 in qua se ga passà tanti ani, alora semo drio viver nei ùltimi dei “ùltimi giorni”. Come el fin l’è cada volta pi darente l’è importante farse queste domande: ‘Cossa che ndarà suceder nel fin dei ùltimi giorni? Cossa che Geovà el vol che femo intanto che spetemo?’

3. De acordo cola professia de 1 Tessalonissensi 5:1-3, che anunsi le nassion le ndarà far?

³ Ledi 1 Tessalonissensi 5:1-3. El apòstolo Paolo el ga parlà sora “el giorno de Geovà”. Questo giorno scomìnsia quando i governi i va contra Babilònia, la Granda, che la ze tute le religion false e el finirà nel Armagedon. (Apo. 16:14, 16; 17:5) Vanti de tuto questo suceder, le nassion le ndarà far el anùnsio: “Vivemo in pace e sensa paura!” Arquanti governi nel mondo i dopera parole cossita quando i ga una bona relassion coi altri paesi. b Ma la Bìblia la dise che el anùnsio che lori i ndarà far l’è tanto difarente. Parché? Parché arquante persone le ndarà pensar che i governi i ze stati boni de far che el mondo sìpia deventà un posto par viver sensa paura. Ma invesse, questo sarà el scomìnsio dela granda tribolassion e, de colpo, vegnarà sora lori una destrussion. — Mat. 24:21.

4. (a) Cossa che no savemo sora el anùnsio? (b) Cossa che belche savemo sora el anùnsio?

⁴ Ghen’è arquante robe sora questo anùnsio che no savemo. Par esémpio, cossa che ndarà motivar le nassion a far questo anùnsio? Come che el sarà fato? Sarà sol una dechiarassion o arquante? Noantri no saremo mia imbroiadi parché belche spetemo che vegna questo anùnsio, parché savemo che i governi no i ze boni de portar pace nel mondo e savemo che quando el anùnsio el sarà fato “el giorno de Geovà” el va scominsiar!

5. De acordo con 1 Tessalonissensi 5:4-6, cossa che gavemo de far par esser pronti par “el giorno de Geovà”?

⁵ Ledi 1 Tessalonissensi 5:4-6. Paolo el ga dito cossa che gavemo de far par esser pronti par “el giorno de Geovà”, come el ga scrito: “No stemo mia dormir compagno ai altri, ma ghemo de restar desmissiadi e atenti.” Par esémpio, no podemo ‘mai far parte del mondo’. (Gioani 15:19) Par far cossita, mai ghemo de meterse in assunti de polìtica, parché se nò, no saremo neutri. Noantri savemo che sol el Regno de Dio el portarà la pace in tuto el mondo.

6. Cossa che ghemo de far adesso e parché?

⁶ No ghemo de star sol noantri atenti, ma ghemo de giutar i altri a imparar cossa che la Bìblia la dise sora el futuro. E ghemo de farlo adesso e gaverlo sempre in mente parché dopo che scomìnsia la granda tribolassion no ghen sarà pi tempo par le persone par dessider de servir a Geovà. Par quela che l’è importante predicar adesso! c

7. Cossa che Geovà el vol che femo ancoi?

⁷ Tuti noantri gavemo de ver “sempre tanto da far nel laoro del Signor”. (1 Cor. 15:58) L’è questo che Geovà el vol che noantri femo nel poco tempo che ghe manca vanti che riva el so giorno. Quando Gesù el ga dito cossa che ndaria suceder nei ùltimi giorni, anca el ga dito cossa che noantri gavarìssino de far: ‘Che in tute le nassion le bone notìssie le ga de esser predicade prima.’ (Mar. 13:4, 8, 10; Mat. 24:14) Alora, gàpia sempre in mente che tute le volte che te predichi te sì drio far parte de una professia dela Bìblia!

8. Come che savemo che el laoro de predicassion l’è drio ndar avanti ben?

⁸ Noantri savemo che el laoro de predicassion l’è drio ndar avanti ben parché sempre pi persone le vol imparar sora le bone notìssie del Regno. E in tuto el mondo ghen’è cada volta pi predicadori. Par esémpio, nel ano de 1914 ghen’era 5.155 predicadori in 43 paesi. Ancoi, ghen’è 8,5 milioni de predicadori in 240 paesi. Ma el laoro no l’è gnancora finio! Gavemo de seitar a predicar a tute le persone che sol el Regno de Dio el finirà coi problemi dela umanità. — Sal. 145:11-13.

9. Fin quando ghemo de seitar predicar?

⁹ Noantri ghemo de seitar predicar fin che Geovà el ne dise de fermarse. No savemo mia quanto tempo le persone le ga ancora par cognosser a Geovà e a Gesù. (Gioani 17:3) Ma savemo che vanti che riva la granda tribolassion, “tuti quei che i ga la giusta disposission par la vita eterna” i pol acetar le bone notìssie del Regno. (Ati 13:48) Ma come che podemo giutar queste persone intanto che ghen’è tempo?

10. Cossa che Geovà el ne dà par insegnar la verità ale persone?

¹⁰ Par meso dela so organisassion Geovà el ne dà tuto quel che ne ocore par insegnar la verità ale persone. Par esémpio, tute le stimane nele riunion in meso de stimana, imparemo cossa dir nela prima vìsita e dopo nela pròssima vìsita, come insegnar la Bìblia ale persone a anca come doperar le Prinsipai publicassion e vìdei par insegnar. Noantri imparemo a . . .

•   scominsiar una ciàcola

•   far che le persone le gàpia interesse

•   far che le persone le gàpia voia de imparar de pi

•   insegnar la verità par meso del stùdio dela Bìblia

•   convidar le persone a ndar rento el nostro site e nel Saloni del Regno

 Saver che ghen’è publicassion e vìdei par insegnar no basta, ghemo de doperarle. d Proa pensar, se te ghè bio una bona ciàcola con qualchedun e dopo te ghe assi un foieto o una revista, lu el gavarà qualcossa par leder fin che te torni la pròssima volta. Cada un de noantri ga la responsabilità de far el so meio nela predicassion tuti i mesi.

11. Parché che l’è stà fato el Corso dela Bìblia par meso dela internet?

¹¹ Nantra maniera che Geovà l’è drio giutar le persone a imparar la verità l’è col Corso dela Bìblia par meso dela internet, nel jw.org. Parché che l’è stà fato questo corso? Tuti i mesi miliari de persone in tuto el mondo le ze drio ndar in serca de saver quel che la Bìblia la dise par meso dela internet. Fursi te sì drio parlar con qualchedun che pol gaver qualcossa che lo intriga de acetar un stùdio dela Bìblia. Alora, te pol mandarghe el link o mostrarghe el corso par meso dela internet. Lì el catarà arquante verità dela Parola de Dio. e

12. Cossa che se pol imparar nel Corso dela Bìblia par meso dela internet?

¹² El corso dela Bìblia spiega sora la Bìblia, chi che la ga scrita, persone del passà che ga la so stòria nela Bìblia e cossa che la Bìblia la insegna sora el futuro. E anca te pol imparar:

•   Come la Bìblia la pol giutar le persone

•   Chi che l’è Geovà, Gesù e i àngeli

•   Parché Dio el ga fato le persone

•   Parché ancoi ghen’è tanto sofrimento e brute robe

 E ancora spiega come che Geovà el ndarà . . .

•   finir col sofrimento e la morte

•   far che i morti i torne a viver

•   meter el Regno de Dio nel posto de tuti i governi rugni che ghen’è ancoi

13. Se una persona la fà un corso dela Bìblia par meso dela internet, no ocore pi studiar la Bìblia con una Testimònia de Geovà?

¹³ El corso dela Bìblia par meso dela internet giuta le persone a voler imparar ancora de pi. Nel fin de cada lession ghen’è un link ndove la persona la pol domandar una vìsita de una Testimònia de Geovà par studiar insieme. Alora, se una persona la fà un corso par meso dela internet, ghe ocore anca de un aiuto de una Testimònia de Geovà par capir la Bìblia. E tanti i ze drio far cossita. Par esémpio, tuti i giorni ricevemo de pi de 230 domande de studiar la Bìblia de persone de tuto el mondo. Alora, l’è sicuro che studiar la Bìblia insieme de una Testimònia de Geovà l’è tanto importante e l’è pròpio quel che Gesù ne ga dato la oportunità de far!

14. (a) De acordo cole parole de Gesù in Mateo 28:19, 20, che sforso gavemo de far? (b) Parché che far questo l’è tanto importante?

¹⁴ Ledi Mateo 28:19, 20. Quando insegnemo la Bìblia ale persone gavemo de sforsarse par “far dissìpoli” e ‘insegnarghe a obedir tuto quel che Gesù el ghe ga ordinà.’ Gavemo de giutar le persone a capir che l’è tanto importante scòlier de servir a Geovà e restar dela banda del so Regno. Se i vol restar vivi nel giorno de Geovà ghemo de giutarli a meter in pràtica tuto quel che i ga imparà e a dedicarse a Geovà par meso del batésimo. — 1 Pie. 3:21.

15. Cossa che no gavemo de far e parché?

¹⁵ Come ghemo belche visto el giorno de Geovà l’è darente. Par quela, no gavemo de seitar insegnar la Bìblia a persone che no le vol cambiar par servir a Geovà. (1 Cor. 9:26) El nostro laoro l’è importante e gavemo poco tempo! A tante persone ghe ocore ancora imparar sora el Regno vanti che sìpia massa tardi.

16. De acordo con Apocalisse 18:2, 4, 5, 8, cossa che tuti i veri cristiani i ga de far? (Vedi anca la nota.)

¹⁶ Ledi Apocalisse 18:2, 4, 5, 8. Questi versìcoli i mostra nantra roba che Geovà el vol de quei che i lo adora. Tuti i veri cristiani i ga de assar ciaro che no i fà pi parte de Babilònia, la Granda. Pol esser che una persona che la ze drio studiar la Bìblia, vanti la fea parte dela religion falsa, la vedea i so culti, fea parte, laorea o giutea nele robe che la ciesa la fea e anca ghe dea soldi par giutarla. Ma se el studiante el vol scominsiar predicar, prima el ga de assar ciaro che no’l fà pi parte dela religion falsa. Lu el gavaria de scriver una carta par dir che no ze pi insieme e gnanca fà parte de qualcossa che la ciesa la fà. El ga de far la medèsima roba se el fà parte de qualche assossiassion che fà parte dela Babilònia, la Granda. f

17. Che laoro i cristiani no i ga de far e parché?

¹⁷ I veri cristiani no i ga de far gnanca un laoro che l’è insieme o fà parte de Babilònia, la Granda. (2 Cor. 6:14-17) Par esémpio, un cristiano mai ndaria laorar par una impresa o acetar far un laoro nte un posto che l’è doperà par la religion falsa. Se un cristiano el laora par conta mai el ndaria acetar o ndar in serca de un laoro che fusse insieme o che giutesse Babilònia, la Granda. Parché che ne toca far cossita? Parché par Geovà queste religion le ze impure. Alora, no volemo mia far parte de so insegni falsi e robe sbaliade che lori i fà. — Isa. 52:11. g

18. Come che un fradel el ga obedio cossa che la Bìblia la dise col so laoro?

¹⁸ Ani indrio, un ansiano che el gavea el so pròpio laoro come marangon, l’è stà ciamà par far un pìcolo laoro nte una ciesa dela so cità. El omo che lo ga ciamà savea che el fradel no ndaria acetar, ma ancora cossita el ga proà parché el gavea tanto bisogno. El fradel no’l ga acetà parché el gavea ben in mente cossa che la Bìblia la dise sora far laori cossita. Stimane dopo, l’è vegnesta fora una foto nel giornal dela cità de nantro marangon drio picar su una crose nela ciesa. Se quel ansiano el gavesse acetà quel laoro, fursi el saria vegnesto fora lu in quela foto. Alora, podemo imaginar come questo sporcaria el nome de Geovà e come Lu el se gavaria sentio.

19-20. (a) Cossa che ghemo imparà fin adesso? (b) Cossa che ndaremo imparar?

¹⁹ De acordo cola professia dela Bìblia la pròssima roba pi importante che ndarà suceder l’è el anùnsio che le nassion ndarà dir che “vivemo in pace e sensa paura”. Ma Geovà el ga insegnà a noantri che i governi no i sarà mia boni de giutar el mondo a viver in pace. Alora, cossa che ghemo de far vanti che vegna questo anùnsio e la destrussion de colpo? Geovà el vol che gavemo tanto de far nel laoro de predicassion e de far dissìpoli, e anca de star distante dele religion false. Par quela, no gavemo de esser insieme, giutar e gnanca far un laoro par Babilònia, la Granda.

²⁰ Nei ùltimi dei “ùltimi giorni” ghen sarà altre robe importante che rivarà. E Geovà el vol che noantri femo anca altre robe. Nel pròssimo artìcolo ndaremo imparar cossa che sucederà, che altre robe che ghemo de far e come pareciarse par quel che presto ndarà suceder.