Anca se quei 70 dissìpoli no i era mia nela Sena del Signor, no ghemo mia de pensar che lori i gavea abandonà a Gesù o che i gavea fato qualcossa de sbalià. Invesse, podemo capir che Gesù sol el volea esser insieme dei so apòstoli in quela sena.

Quei 70 i era dissìpoli de Gesù, compagno ai so 12 apòstoli. Prima, Gesù el ga scoliesto 12 òmini come apòstoli intrà i so dissìpoli. (Luc. 6:12-16) Lu l’era nela Galilea quando ‘el ga scoliesto i Dódese’ e ‘li ga mandadi predicar el Regno de Dio e curar le persone’. (Luc. 9:1-6) Dopo un tempo, nela Giudea, lu el ga ‘scoliesto altri 70 dissìpoli e li ga mandadi predicar de due in due’. (Luc. 9:51; 10:1) Cossita capimo che Gesù el gavea dissìpoli in arquanti posti ndove se predichea le bone notìssie.

I giudei che i era deventadi dissìpoli de Gesù ancora i gavea de far la selebrassion dela Pàscoa tuti i ani. Fursi, lori i fea questa selebrassion insieme dele so fameie. (Esó. 12:6-11, 17-20) Un tempo prima che Gesù el morisse, lu e i so apòstoli i ze ndati a Gerusalen. Ma lu no’l ga mia ciamà i so dissìpoli dela Giudea, Galilea e dela Perea par far una granda selebrassion dela Pàscoa. Cossita capimo che Gesù el volea star insieme sol dei so apòstoli par far la Pàscoa. Lu el ga dito ai so 12 apòstoli: “Gavea tanto caro de magnar questa Pàscoa con valtri vanti de sofrir.” — Luc. 22:15.

Parché che Gesù el volea selebrar la Pàscoa sol coi so 12 apòstoli? Pensemo sora questo. Lu el ndaria morir come el ‘Piegoreto de Dio che el finisse coi pecati del mondo’. (Gio. 1:29) Gesù el ndaria morir in Gerusalen, ndove le persone le ndea par far sacrifissi a Dio. E quando i giudei i fea la Pàscoa, lori i se ricordea de quel che Geovà el gavea fato par liberarli del Egito. Ma el sacrifìssio che Gesù el ndaria far el saria tanto pi meio parché el ndaria liberar tute le persone del pecato e dela morte. (1 Cor. 5:7, 8) Par causa dela morte de Gesù, i 12 apòstoli i scominsiaria le prime congregassion. (Efe. 2:20-22) L’è par quela che la Bìblia la dise che la Gerusalen de sora la ga ‘12 sassi’ coi ‘nomi dei 12 apòstoli del Piegoreto’. (Apo. 21:10-14) Cossita capimo che Geovà el ndaria doperar quei apòstoli par far la so volontà. Alora, semo boni de capir parché che Gesù el volea esser insieme de lori nela so ùltima Pàscoa e nela Selebrassion che el faria dopo, o sia, la Sena del Signor.

Anca se i 70 e altri dissìpoli no i fusse mia nela Sena del Signor, quel che Gesù el ga fato ndaria giutar anca a lori. Parché? Tuti i dissìpoli che i saria untadi dopo anca i podaria far parte del acordo par un Regno che Gesù el ga parlà ai so apòstoli in quela note. — Luc. 22:29, 30.