1. De acordo con Mateo 28:18-20, cossa che Gesù el ga mandà i so dissìpoli far?

DOPO de esser ressussità, Gesù el se ga fato veder ai so dissìpoli nela Galilea. Lu el gavea una roba tanto importante par dirghe. Quel che lu el ga dito l’è in Mateo 28:18-20. — Ledi. *

2. Che domande ndaremo veder?

² Anca ancoi ghemo de obedir a questo comandamento che Gesù el ga ne dato. Alora, ndemo veder tre domande sora questo. Prima, sarà che basta sol insegnar ale persone le lege de Dio? Seconda, come che tuti nela congregassion i pol giutar a un studiante? Tersa, come che podemo giutar ai nostri fradei che i se ga fermà de predicar?

3. Cossa che ghemo de ricordarse sora el comandamento de Gesù?

³ Noantri capimo quel che Gesù el ne ga domandà de far. Noantri ghemo de insegnar ai altri i so comandamenti.  Ma noantri ghemo de ricordarse de una roba tanto importante. Gesù no’l ga dito: ‘Gavé de insegnarghe tuto quel che mi ve go ordinà.’ Ma lu el ga dito: ‘Gavé de insegnarghe a obedir a tuto quel che mi ve go ordinà.’ Alora, no ghemo sol de dir a un studiante cossa che el ga de far, ma ghemo anca de mostrar come che el pol meter in pràtica. (Ati 8:31) Parché?

4. Cossa che pol giutarne a capir meio quel che vol dir insegnar a obedir?

⁴ Ma cossa che vol dir insegnar a obedir? Noantri podemo capir cossa che questo vol dir quando pensemo nte un maestro de una scola che insegna a guidar el auto. Prima, lu el insegna ala persona sora le lege de trànsito. Ma el sarà bon de insegnar la persona a meter in pràtica queste lege se el fà anca nantra roba. Cossa? El maestro el ga de veder la persona guidar el auto e mostrarghe cossa che ela la ga de far. Cossa che imparemo de questo esémpio?

5. (a) De acordo con Gioani 14:15 e 1 Gioani 2:3, cossa che ghemo de giutar i nostri studianti a far? (b) Come che podemo giutar i nostri studianti a meter in pràtica quel che lori i impara?

⁵ Quando noantri femo studi bìblichi, giutemo le persone a cognosser le lege de Geovà. Ma ghemo de bisogno de far ancora nantra roba. Ghemo de giutar i nostri studianti a meter in pràtica quel che lori i ze drio imparar. (Ledi Gioani 14:15; * 1 Gioani 2:3. *) Par meso del nostro esémpio, podemo giutar i nostri studianti a veder come meter in pràtica quel che lori i impara dela Bìblia. Cossita lori i saverà quel che i ga de far nela scola, nel laoro e nela diversion. Noantri podemo anca parlarghe sora come un prinsìpio bìblico el ne ga protegesto o el ne ga giutà a far una bona dessision. Podemo anca far orassion insieme coi nostri studianti e domandar a Geovà che li giute col so spìrito santo. — Gioani 16:13.

6. Cossa che ancora podemo far par giutar i nostri studianti a obedir ai comandamenti de Gesù?

⁶ Cossa che ancora podemo far par giutar i nostri studianti a obedir ai comandanti de Gesù? Noantri ghemo de giutarli a gaver voia de giutar anca i altri a esser dissìpoli de Gesù. Ma arquanti studianti i ga paura de far questo laoro. Alora, ne ocore gaver passiensa par giutarli a cognosser de pi sora la Bìblia. Quando i studianti i scomìnsia a amar quel che i ze drio imparar, i gavarà voia de parlar ai altri. Come che podemo giutarli a gaver questo amor?

7. Cossa che podemo far par giutar el nostro studiante quando el scomìnsia a predicar?

⁷ Par esémpio, te pol domandar al to studiante: “Come quel che te ghè imparà nela Bìblia te ga giutà a gaver una vita meio? Cossa che te cati, sarà che le altre persone anca le ga bisogno de imparar sora la Bìblia? Cossa che te pol far par giutarle?” (Pro. 3:27; Mat. 9:37, 38) Alora te pol mostrar al to studiante i foieti dele Prinsipai Publicassion e Vìdei par Insegnar. Dopo àssalo scòlier quei che el podaria darghe ai so parenti, amighi e a qualchedun che el laora insieme. L’è importante anca mostrar come che el pol dar questi foieti de maniera amorosa. Quando lu el scomìnsia a predicar, te ghè de ndar insieme con lu. — Ecl. 4:9, 10; Luc. 6:40.

8. Parché che l’è importante i nostri studianti amar a Geovà e ale persone? (Vedi anca el quadro “ Come che podemo giutar i nostri studianti a amar cada volta de pi a Geovà?”.)

⁸ Gesù el ne ga dito par insegnar i altri a “obedir a tuto quel” che lu el ne ga ordinà. Questo vol dir obedir ai due comandamenti pi importanti, de amar a Dio e al pròssimo. Alora se el studiante el ama a Dio e ale persone, lu el sarà bon de predicar. (Mat. 22:37-39) Se el so amor el deventa cada volta pi forte, lu el gavarà cada volta manco paura de predicar. (Sal. 18:1-3; Pro. 29:25) El quadro che ghen’è in questo stùdio el mostra cossa che podemo far par giutar el studiante a amar de pi a Geovà. Ma la congregassion anca la pol giutar a far questo. Come?

9. Come che una persona la pol imparar a guidar meio?

⁹ Adesso, pensemo nantra volta nela persona che la ze drio imparar a guidar. Intanto che ela la ze drio guidar col maestro dela so banda, come che ela la pol imparar? Una maniera la ze scoltar el so maestro e nantra la ze star atenta a come che le altre persone le guida el auto. Par esémpio, el maestro el pol mostrar el esémpio de una persona che la assa nantri auti ndar davanti e el pol anca mostrar el esémpio de una persona che la mete la luce pi bassa par no intrigar ai altri. Questi esempi i giuta tanto la persona a meter in pràtica quel che ela la ze drio imparar.

10. Cossa che ndarà giutar un studiante a deventar un dissìpolo?

¹⁰ El studianti el pol imparar tanto anca par meso del esémpio de quei che i serve a Geovà. Ma cossa che pol giutarlo a far questo? Ndar ale riunion. Parché? Parché nele riunion, el impara tanto sora Geovà, el fà pi forte la so fede e el so amor par lu e el cognossi ai fradei. (Ati 15:30-32) Pol esser che el studiante el cognossa fradei che i ga infrontà le medèsime robe che lu. E anca el va veder el amor che ghen’è intrà i fradei. Ndemo veder arquanti esempi.

11. Che esempi i studianti i pol veder nela congregassion e come che questi esempi i pol giutarghe?

¹¹ Par esémpio, pol esser che una studiante la ga de slevar fioi ela sola. Alora, nel Salon del Regno, ela la cognosse una sorela che la infronta la medèsima dificoltà. Sicuro che veder questa sorela ndar ale riunion coi so fioi pìcoli, ndarà incoraiar tanto a questa studiante. Proa anca pensar nte un studiante che no l’è mia bon de fermarse de doperar sigri. Alora lu el cognosse un fradel che el ga bio la medèsima dificoltà e che l’è stato bon de infrontarla. El fradel el parla al studiante che lu l’è stato bon de far questo parché el ama tanto a Geovà. (2 Cor. 7:1; Fil. 4:13) Alora, el fradel el dise: “Anca ti te pol fermarte!”. Cossita, el studiante gavarà pi confiansa che anca lu el sarà bon de fermarse. O proa imaginar una gióvena che la ze drio studiar la Bìblia e la cognosse una gióvena che la serve a Geovà e che la ze tanto contenta. L’è sicuro che la volerà saver parché che la sorela la ze tanto contenta.

12. Parché che podemo dir che tuti nela congregassion i pol giutar un studiante a deventar un dissìpolo de Cristo?

¹² Quando el studiante el vede el bel esémpio dei fradei dela congregassion, lu el impara cossa vol dir amar a Dio e ai altri. (Gioani 13:35; 1 Tim. 4:12) Come  ghemo belche parlà, i studianti i impara quando i vede che altri i infronta le medèsime robe che lori. Cossita, lori i ze boni de capir che anca lori i sarà boni de cambiar quel che bisogna par seghir a Cristo. (Deu. 30:11) Tuti nela congregassion i pol giutar un studiante a deventar un dissìpolo de Cristo. (Mat. 5:16) E ti, cossa te sì drio far par giutar i studianti che i va nele to riunion?

13-14. Cossa che Gesù el ga fato quando i so apòstoli i lo ga abandonà?

¹³ Noantri volemo giutar anca i inativi a tornar a predicar e far dissìpoli. Quando noantri pensemo in cossa Gesù el ga fato quando i so apòstoli i era desanimadi, questo ne giuta a saver cossa far.

¹⁴ Un pochetin vanti dela so morte, tuti i so apòstoli i lo ga “abandonà e i ga scampà via”. (Mar. 14:50; Gioani 16:32) Ma cossa che Gesù el ga fato? Poco tempo dopo dela so ressuression, Gesù el ga dito a arquante dele so seghidore: ‘No sté gaver paura! Ndé e parlé questo ai me fradei.’ (Mat. 28:10a) I apòstoli i ga abandonà a Gesù, ma ancora cossita lu el ga seità a ciamarli de ‘me fradei’. Gesù no’l ga mia desistio de lori, invesse li ga tratadi con misericòrdia e li ga perdonadi. — 2 Rè 13:23.

15. Cossa che noantri sentimo par quei che i ze inativi?

¹⁵ Noantri anca ghemo tanta preocupassion con quei che i ze inativi. Lori i ze i nostri fradei e noantri li amemo! Noantri se ricordemo de tuto quel che lori i ga fato par Geovà. (Ebr. 6:10) Noantri ghemo caro che lori i torne ala congregassion! (Luc. 15:4-7) Come noantri podemo far come Gesù e mostrar che i inativi i ze tanto importanti par noantri?

16. Come che mostremo che i fradei inativi i ze importanti par noantri?

¹⁶ Convida i inativi par le riunion. Gesù el ga incoraià i so apòstoli quando li ga convidà par una riunion. (Mat. 28:10b; 1 Cor. 15:6) L’è sicuro che Gesù l’è restà tanto contento quando lori i ga acetà el so convite. Se i nostri fradei inativi no i ze drio ndar ale riunion, noantri podemo far come Gesù. Ghemo de ricordarse che fursi bisogna convidarli arquante volte fin che lori i acete el convite. Come Gesù, noantri ndaremo restar tanto contenti se el inativo el aceta el nostro convite! — Vedi anca Mateo 28:16 e Luca 15:6.

17. Cossa che ghemo de far quando un inativo el va nte una riunion?

¹⁷ Riceve i inativi con amor. Gesù l’è ndato parlar coi so dissìpoli e el ga tratà lori con amor quando li ga catadi. (Mat. 28:18) Cossa che noantri podemo far quando un inativo el riva nel Salon del Regno? Ghemo de ndar saludarlo. Fursi noantri restemo preocupadi sora cossa che ndemo parlar a lori. Alora, noantri podemo dirghe che semo tanto contenti de véderli.

18. Come che podemo giutar ai nostri fradei inativi?

¹⁸ Incoraia e giuta ai inativi. I dissìpoli de Gesù i pensea che lori no i saria boni de predicar in tuto el mondo. Ma Gesù el ga dito a lori: “Sarò insieme con valtri tuti i giorni.” (Mat. 28:20) Sarà che questo ga giutà i so dissìpoli? Sicuro che si, parché poco tempo dopo, lori i era drio “insegnar e predicar le bone notìssie”. (Ati 5:42) Ghemo de mostrar ai inativi che noantri ndaremo giutarli. Fursi lori i  pensa che no i ze boni de tornar a predicar. Alora, noantri ghemo de mostrar a lori che ndaremo giutarli. Quando lori i scomìnsia a predicar, podemo ndar insieme. Sicuro che lori i ndarà restar tanto contenti col nostro aiuto. Quando noantri li assemo sicuri che ghe volemo tanto ben, ndaremo giutar a lori, ma anca a tuta la congregassion.

19. Cossa che noantri volemo e parché?

¹⁹ Noantri ghemo de seitar a predicar e insegnar le persone a seghir a Gesù fin el final del sistema de robe. (Mat. 28:20; vedi el Glossário, “Final do sistema de coisas”.) Alora, noantri volemo doperar el nostro tempo, la nostra forsa e quel che ghemo par giutar a quei che i ga la “giusta disposission par la vita eterna”. (Ati 13:48) Parché? Parché quando femo questo, semo drio seghir el esémpio de Gesù. Lu el ga dito: “El me alimento l’è far la volontà de quel che el me ga mandà e finir la so òpera.” (Gioani 4:34; 17:4) Alora, noantri volemo finir el laoro che Gesù el ne ga dato e volemo che anca quei che i era inativi i seite a far questo laoro con noantri. — Gioani 20:21; Mat. 24:13.

20. De acordo con Filipensi 4:13, parché che semo sicuri che saremo boni de finir questo laoro?

²⁰ Sicuro che no l’è fàcile de far el laoro che Gesù el ne ga dato, ma noantri no semo soli parché Gesù el ga prometesto che el saria con noantri. Quando noantri femo dissìpoli, “laoremo insieme con Dio” e con Gesù. (1 Cor. 3:9; 2 Cor. 2:17) Questo ne assa sicuri che podemo finir questo laoro. Sensa dùbio, l’è un grando privilègio far questo! — Ledi Filipensi 4:13. *