STÙDIO 19
CÀNTICO 6 “El cielo el proclama la glòria de Dio”
Fà compagno ai àngeli fedeli
“Lodé a Geovà, tuti valtri àngeli soi.” — SAL. 103:20.
COSSA CHE NDAREMO IMPARAR?
Ndaremo veder come che podemo gaver bele qualità compagno ai àngeli fedeli.
1-2. (a) Che difarensa ghen’è intrà noantri e i àngeli? (b) Che robe ghemo compagno ai àngeli?
FEMO parte dela granda fameia de Dio. Insieme de noantri, ghemo i nostri cari fradei e sorele de tuto el mondo e anca milioni de àngeli fedeli nel cielo. (Dan. 7:9, 10) Quando pensemo nei àngeli, vedemo che semo tanto difarenti de lori. Par esémpio, Geovà li ga creadi tanto tempo vanti de crear el primo omo e la prima dona. (Giò 38:4, 7) Difarente de noantri che semo imperfeti, i àngeli i ze puri, santi e tanto poderosi. — Luc. 9:26.
2 Ma ghen’è tante robe compagne intrà noantri e i àngeli. Par esémpio, podemo gaver le medèsime bele qualità che Geovà e ghemo libertà de far le nostre dessision. Compagno ai àngeli, anca ghemo nomi, personalità e responsabilità difarente un del altro. E come lori, noantri ghemo de adorar a Geovà. — 1 Pie. 1:12.
3. Cossa che podemo imparar coi àngeli fedeli?
3 Come semo compagni ai àngeli de arquante maniere, el so esémpio pol incoraiarne e insegnarne tanto. In questo stùdio, ndaremo imparar sora arquante bele qualità dei àngeli fedeli. Ndaremo imparar sora la so umiltà, el so amor par le persone, la so perseveransa e el sforso che lori i fà par giutar la congregassion a seitar pura.
I ÀNGELI I ZE ÙMILI
4. (a) Come che i àngeli i mostra che i ze ùmili? (b) Parché che i àngeli i ze ùmili? (Salmo 89:7)
4 I àngeli fedeli i ze ùmili. Anca se i ze tanto poderosi e i ga tanta sabedoria, lori i ze obedienti a Geovà. (Sal. 103:20) Sempre che Geovà el ghe domanda de far un laoro, lori no i proa farse veder gnanca i se sprosia del so poder. Invesse, i àngeli i seita a obedir a Geovà contenti, anca se nissun sa el so nome. a (Gén. 32:24, 29; 2 Rè 19:35) Lori mai i aceta el onor che l’è de Geovà. Ma parché che i àngeli i ze ùmili cossita? Parché lori i ama tanto a Dio e i ga un grando rispeto par lu. — Ledi Salmo 89:7. b
5. Come che un àngelo el ga mostrà umiltà quando el ga dato un consìlio a Gioani? (Varda anca la ilustrassion.)
5 Vedemo adesso quel che ga sucedesto con un àngelo e el apòstolo Gioani intorno del ano 96. Questo àngelo, che no savemo mia el nome, el ga mostrà a Gioani tante robe de maraveiarse nte una vision. (Apo. 1:1) Cossa che Gioani el ga fato? Lu el se ga indenocià par adorar quel àngelo. Alora, presto quel àngelo ghe ga dito: ‘Stà atento! No stà far cossita! Mi son sol un schiavo come ti e i to fradei. Adora a Dio!’ (Apo. 19:10) Quel àngelo l’è stà pròpio ùmile e no’l volea mia ricever glòria o onor. Invesse, lu el ga dito che Gioani el gavaria de adorar a Geovà, Dio. E quando el àngelo el ga dato questo consìlio a Gioani, lu no’l ga mia parlà come se el fusse pi importante che lu. Anca se quel àngelo el fusse fedele a Geovà fea tanti ani e el fusse tanto pi poderoso che Gioani, lu el ga dito che lori due i era schiavi. Quel àngelo el savea che Gioani l’era pròpio spaventà con quela vision. Alora, lu el ghe ga dato un consìlio con bontà, invesse de dirghe su.
El àngelo el ga mostrà che l’era ùmile quando el ga parlà con Gioani (Varda el paràgrafo 5.)
6. Come che podemo esser ùmili compagno ai àngeli?
6 Come che podemo esser ùmili compagno ai àngeli? Come lori, noantri volemo far el nostro meio a Geovà sensa farse veder o sprosiarse par causa dele nostre abilità. (1 Cor. 4:7) Mai ndaremo pensar che semo meio che i nostri fradei e sorele sol parché servimo a Geovà fà tanti ani o parché ghemo qualche laori importanti. Invesse, ne ocore ricordarse che quanto de pi responsabilità ghemo, pi ghemo de esser ùmili e laorar come schiavi par i nostri fradei. Compagno ai àngeli, no volemo mia che i altri i pense che semo pi importanti che lori. (Luc. 9:48) Pitosto, volemo sempre laorar par giutarli.
7. Come che podemo mostrar umiltà quando ne ocore dar un consìlio a qualchedun?
7 Noantri anca podemo mostrar che semo ùmili quando ghe demo un consìlio par qualchedun, sia un fradel o un fiol. L’è vera che dele volte, ghemo de parlar neto scieto, ma podemo podemo dar el consìlio con tanta bontà, compagno el àngelo el ga parlà con Gioani. Cossita, no assaremo nissun desanimà. Se no pensemo che semo meio dei altri, daremo boni consili con rispeto e amor. — Col. 4:6.
I ÀNGELI I AMA LE PERSONE
8. (a) De acordo con Luca 15:10, come che i àngeli i mostra che i ama le persone? (b) Come che i àngeli i ne giuta a far el laoro de predicassion? (Varda anca la ilustrassion.)
8 I àngeli i ne ama tanto e i vede tuto quel che sucede con noantri. Par esémpio, lori i resta tanto contenti quando una persona che la ga fato un bruto pecato la se ciama grama o quando qualchedun impara la verità e desside adorar a Geovà. (Ledi Luca 15:10. c) I àngeli anca i ne giuta tanto nela predicassion. (Apo. 14:6) Come cossita? Anca se lori no i parla cole persone, lori i pol giutarne a catar quei che i vol imparar la verità. No podemo mia dir giusto quando che un àngelo el ne ga giutà a catar una persona, parché Geovà el dopera anca el so spìrito santo par giutarne. (Ati 16:6, 7) Ma podemo esser sicuri che i àngeli i laora tanto par giutarne quando semo nela predicassion. Alora, quando te parli ai altri sora le bone notìssie del Regno, te pol esser sicuro che i àngeli i sarà dela to banda par giutarte. — Varda el quadro “ Geovà el ga rispondesto la so orassion”. d
Un fradel e una sorela i ze drio tornar casa dopo la predicassion. Alora, la sorela la vede una tosa tanto desanimada. La sorela la se ricorda che i àngeli i pol giutarne a catar quei che i ga bisogno de aiuto. Par quela, ela la va parlar cola tosa. (Varda el paràgrafo 8.)
9. Come che podemo amar le persone compagno ai àngeli?
9 Come che podemo amar le persone compagno ai àngeli? Quando una persona la torna a servir a Geovà, ghemo restar contenti compagno ai àngeli. Podemo saludarla, dir che la amemo tanto e che semo pròpio contenti de saver che la ze tornada a servir a Geovà. (Luc. 15:4-7; 2 Cor. 2:6-8) E anca podemo ndar drio al esémpio dei àngeli quando femo el nostro meio nela predicassion. (Ecl. 11:6) Nantra roba che podemo far la ze giutar i nostri cari fradei e sorele a ndar predicar. Par esémpio, podemo convidar quei che i ga pena scominsià a predicar par laorar insieme de noantri e giutar quei che i ze pi veci o maladi a ndar ala predicassion.
10. Cossa che te pol imparar col esémpio de Sara?
10 E se no semo mia boni de far tuto quel che volarìssino par Geovà? Ancora cossita, podemo catar fora maniere de laorar insieme dei àngeli. Varda quel che ga sucedesto con Sara, e una sorela dela Ìndia che la ga laorà come pioniera par intorno de 20 ani. De colpo, ela la ze restada malada e no la era pi bona levarse su del so leto. Sara la ze restada pròpio desanimada! Ma la so letura dela Bìblia e i so cari fradei e sorele la ga giutada a restar contenta nantra volta. Alora, ela la ga catà fora maniere difarente de predicar. Come Sara no la era bona sentarse par scriver carte, ela la ga seità a predicar par meso del telèfono. Tante dele so vìsite ghe mandea el nùmero de telèfono de altre persone che fursi le volaria studiar la Bìblia. Cossita, in poco tempo, Sara la gavea 70 studi dela Bìblia. Ela la gavea tanti studi che ghe ga tocà domandar che altri fradei e sorele insegnesse la Bìblia a quele persone. Arquanti de questi studianti i ze belche drio ndar ale riunion! Sicuro che i àngeli i resta tanto contenti de laorar insieme con Sara e con altri fradei e sorele che i se sforsa de far el so meio nela predicassion.
I ÀNGELI I MOSTRA PERSEVERANSA
11. Come che i àngeli fedeli i mostra perseveransa?
11 I àngeli fedeli i ze un bel esémpio de perseveransa. Fà miliari de ani che lori i ze drio veder sofrimento e tante robe sbaliade nel mondo. I àngeli anca i ga visto quando Sàtana e arquanti àngeli rugni i se ga rebelà contra Geovà. (Gén. 3:1; 6:1, 2; Giuda 6) La Bìblia anca la parla de un àngelo che el ga bio de lotar contra un demònio par tanti giorni. (Dan. 10:13) E de quando Adon e Eva i ga pecà fin ancoi, i àngeli i ga visto che sol poche persone le ga volesto obedir a Geovà. Ancora cossita, questi bravi àngeli leai i ga seità a servir a Geovà con tanta alegria. Lori i sa che Geovà el ndarà finir fora con tuto quel che l’è sbalià nela ora giusta.
12. Cossa che pol giutarne a perseverar?
12 Come che noantri podemo perseverar compagno ai àngeli? Noantri vedemo suceder tante robe sbaliade ancoi e fursi infrontemo perseghission. Ma, compagno ai àngeli, ‘no desistimo de far quel che l’è bon’ e savemo che Geovà el ndarà finir fora con tuto quel che l’è sbalià nela ora giusta. (Gàl. 6:9) E Geovà el ga prometesto che el ndaria giutarne a perseverar. (1 Cor. 10:13) Alora, prega a Geovà e domanda che lu el te dae spìrito santo par gaver alegria e pace. (Gàl. 5:22; Col. 1:11) E se te sì drio infrontar perseghission, fìdate in Geovà e no stà mia gaver paura. Invesse, ricòrdate che lu sempre el ndarà giutarte e darte forsa. — Ebr. 13:6.
I ÀNGELI I GIUTA LA CONGREGASSION A SEITAR PURA
13. Che laoro importante i àngeli i ga? (Mateo 13:47-49)
13 In questi ùltimi giorni, Geovà el ga dato un laoro tanto importante ai àngeli. (Ledi Mateo 13:47-49. f) Arquante persone le ga volesto imparar la verità, le ga dessidio servirlo e le seita leal, ma altre le abandona a Geovà. Quando questo sucede, i àngeli i ga el laoro de “spartir i rugni dei giusti”. Cossita, lori i giuta la congregassion a seitar pura. Ma no vol mia dir che no ghemo mia problemi nela congregassion gnanca che quei che i se ferma de servir a Geovà mai pi i podarà tornar a adorarlo. Ancora cossita, podemo esser sicuri che i àngeli i laora tanto par giutar la congregassion a seitar pura.
14-15. Come che podemo giutar la congregassion a seitar pura compagno i àngeli i fà? (Varda anca la ilustrassion.)
14 Come che podemo far compagno ai àngeli e giutar la congregassion a seitar pura? Ghemo de sforsarse de far cada volta pi forte la nostra amicìssia con Geovà. Par quela, ne ocore seitar atenti a quei che scoliemo par esser nostri amighi e star sempre distante de quel che pol rovinar la nostra amicìssia con lu. (Sal. 101:3) Podemo anca giutar i nostri fradei e sorele a seitar fedeli se savemo che lori i ga fato un bruto pecato. Come li amemo, ndaremo incoraiarli a parlar coi ansiani. E se no i ghe parla mia, ghemo de noantri ndar parlar coi ansiani. Sicuro che volemo che quel fradel o sorela gàpia el aiuto che ghe ocore pi presto che se pol. — Tia. 5:14, 15.
15 Ma arquanti fradei e sorele che i ga fato un bruto pecato i ze stati cavadi via dela congregassion. Alora, noantri ‘assemo de star insieme de lori’. g (1 Cor. 5:9-13) Questa orientassion la giuta la congregassion a seitar pura. E quando assemo pròpio de star insieme de quei che i ze stati cavadi via, ghe mostremo tanta bontà. Parché? Parché quando noantri obedimo a Geovà, podemo giutarli a ciamarse grami e tornar a servir a Dio. Se lori i fà cossita, noantri restaremo pròpio contenti, insieme a Geovà e ai àngeli. — Luc. 15:7
Cossa ne ocore far se ghemo savesto che un fradel el ga fato un bruto pecato? (Varda el paràgrafo 14.) h
16. Come che te pol far compagno ai àngeli?
16 L’è pròpio bel veder che Geovà el ne giuta a imparar sora i àngeli e el ne assa laorar insieme de lori. E volemo sforsarse de far compagno ai àngeli. Come? Ghemo de esser ùmili, perseverar, mostrar amor ale persone e sforsarse de giutar la congregassion a seitar pura. Se femo compagno ai àngeli fedeli, anca noantri podaremo esser parte dela fameia de Geovà par sempre!
CÀNTICO 123 De volentiera obedimo a Geovà e ala organisassion
a Ghen’è tanti milioni de àngeli. Ma la Bìblia la parla del nome de sol due àngeli, che i ze Mighel e Gabriel. — Dan. 12:1; Luc. 1:19.
b (Salmo 89:7) Dio l’è tanto rispetà nela assemblea dei santi. Par tuti quei che i ze intorno a lu l’è grandioso e lori i lo rispeta tanto.
c (Luca 15:10) Mi ve digo che anca i àngeli de Dio i resta contenti quando una persona che la ga fato un pecato la se ciama grama.”
d Te pol imparar sora altre stòrie cossita nel Índice das Publicações da Torre de Vigia nel assunto “Anjos” e “orientação angélica (exemplos)”.
e Arquanti nomi i ze stati cambiadi.
f (Mateo 13:47-49) “Anca, el Regno del cielo l’è come una rede de un pescador che la ze stata butada nel mar e che la ga tolto su pessi de tuti i tipi. 48 Quando la ze restada piena, i pescadori i la ga portada nela praia, i se ga sentà e i ga metesto i pessi boni in seste, ma quei rugni i ga butà via. 49 Sarà cossita nel fin del sistema de robe. I àngeli i ndarà via e i ndarà spartir i rugni dei giusti.
g Come ghemo visto nel Relatòrio del Corpo Governante (2024) — n.º 2, quando una persona che la ze stata cavada via dela congregassion la va nte una riunion, i fradei e sorele i pol dessider se i ndarà saludarla o nò.
h ILUSTRASSION: Una sorela la ghe dise ala so amiga che la ga de ndar parlar coi ansiani. Dopo un tempo, come la vede che so amiga no la ze ndata, la va ela.
