1. Cossa che fursi ga sucedesto quando te ghè scominsià a parlar ai altri sora la Bìblia?

PROA ricordarte de quando te ghè scominsià a studiar la Bìblia e te ghè capio che l’era la verità. Te ghè visto che l’era tanto fàcile de capir e creder in quel che te eri drio studiar. Alora, te ghè pensà che tuti i volaria imparar sora queste robe. Te eri sicuro che quel te eri drio imparar el giutaria tuti a esser pi felici e a gaver una bela speransa. (Sal. 119:105) Alora, te ghè scominsià a parlar tanto contento sora la Bìblia ai to amighi e ala to fameia. Ma fursi no te spetei mia che tanti no i te badaria.

2-3. Cossa che quasi tuti del tempo de Gesù i pensea de lu?

² Noantri belche saveino che tante persone no le volaria scoltarne. Questo ga sucedesto anca con Gesù. Anca che el fesse tanti miràcoli che i mostrea che el gavea el aiuto de Dio, tante persone no le ga volesto scoltarlo. Par esémpio, Gesù el ga ressussità Làsaro. Gnanca i nemighi de Gesù i podea dir che quel miràcolo no’l gavea sucedesto. Anca cossita, i lìderi giudei de quel tempo no i ga credesto che lu l’era el Messia. Lori i ga anca volesto copar Làsaro e Gesù. — Gioani 11:47, 48, 53; 12:9-11.

³ Gesù el savea che quasi tuti no i ndaria acetarlo come el Messia. (Gioani 5:39-44) Lu el ga dito a arquanti dissìpoli de Gioani Batista che quei che no i gavesse dubi sora lu i saria felici. (Mat. 11:2, 3, 6) Ma parché tante persone no le credea che lu l’era el Messia?

4. Cossa che ndaremo imparar in questo stùdio?

 ⁴ Nei due primi studi de questa revista, ndaremo risponder a queste domande: ‘Parché che arquante persone no le ga credesto in Gesù? Parché che ancoi tante persone no le vol scoltar le Testimònie de Geovà? Parché che ghemo bisogno de una fede forte par seitar a ndar drio a Gesù?’

5. Parché che fursi tante persone no le ga credesto che Gesù l’era el Messia?

⁵ Tante persone le savea che Gesù el fea miràcoli e l’era un bon maestro. Ma lore le pensea che Gesù l’era sol un fiol de un marangon. E tante no le ga credesto in lu parché l’era vegnesto de Nasarè, che no la era una cità importante. Anca Natanael, che dopo l’è deventà un dissìpolo de Gesù, el ga dito: “Pol vegner qualcossa bona de Nasarè?” (Gioani 1:46) Pol esser che a Natanael no ghe piasesse la cità che Gesù el vivea, o che el se ricordesse dela professia de Michea 5:2 che dise che el Messia el ndaria nasser in Belen, e nò in Nasarè.

6. Cossa che gavaria giutà le persone a esser sicure che Gesù l’era el Messia?

⁶ Cossa che la Bìblia la dise? La Bìblia belche la parlea de tante professie sora el Messia. Ma el profeta Isaia el ga dito che i nemighi de Gesù no i volaria cognosser la stòria del Messia. (Isa. 53:8) Par esémpio, la Bìblia la disea che el Messia el saria dissendente de Davi e el ndaria nasser in Belen. (Luc. 2:4-7) Come savemo, Gesù l’è pròpio nassesto in Belen de acordo con Michea 5:2. Alora, se le persone le fusse in serca de cognosser ben la vita de Gesù e la so stòria, lore le saria bone de capir che lu l’era el Messia. Ma lore no le ga fato questo, par quela, no le ga credesto in lu.

7. Parché che tanti no i vol servir a Geovà ancoi?

⁷ Sarà che la medèsima roba la sucede ancoi? Si, parché quasi tuti i servi de Geovà i ze persone sémplisse. Alora, arquanti i pensa che lori i ga poco stùdio e che no i ze importanti. (Ati 4:13) Tanti i pensa che i servi de Geovà no i pol insegnar sora la Bìblia parché no i ga fato una università sora le religion. Altri i dise che le Testimònie de Geovà la ze una religion dei Stati Unidi. Ma se ndemo in serca, vederemo che sol 1 de cada 7 Testimònie de Geovà la ze dei Stati Unidi. Altri i dise che no credemo in Gesù, che semo persone rugne, che spartimo le fameie e che no insegnemo quel che la Bìblia la dise. Quei che i scolta queste persone e no i va in serca de cognosser la verità, no i vol scoltar i servi a Dio.

8. De acordo con Ati 17:11, cossa che le persone le ga de far par capir chi che i ze i servi de Geovà ancoi?

⁸ Cossa che pol giutar le persone a capir chi che i ze i servi de Geovà? Le persone le ga de ndar in serca par capir se qualcossa la ze giusta o nò. Quel che ga scrito el Vangelo de Luca l’è un bel esémpio, parché l’è ndato in serca par saver come che le robe le gavea pròpio sucedesto del scomìnsio. Lu el volea che le persone le fusse sicure de quel che le imparea sora Gesù. (Luc. 1:1-4) Anca i giudei dela cità de Berea i fea come Luca. Quando lori i ga scoltà le bone notìssie sora Gesù, lori i ze ndati studiar le Scriture Ebraiche par veder se quel che i gavea scoltà l’era pròpio la verità. (Ledi Ati 17:11. *) Anca ancoi le persone le ga de far questo. Lore le ga de capir se quel che ghe insegnemo l’è de acordo cola Bìblia o nò. Le persone le ga anca de studiar sora la stòria del pòpolo de Geovà dei nostri giorni. Cossita,  gnanca una roba che le persone le parle contra el pòpolo de Dio, la ndarà farle gaver dubi.

9. Cossa che ga sucedesto quando Gesù no’l ga fato quel che le persone le spetea?

⁹ Quel che Gesù el insegnea l’era de maraveiarse e le persone le gavea de esser sicure che lu l’era el Messia par causa de questo. Ma lore le spetea ancora de pi. Lore le volea che el fesse vegner do una prova dal cielo par mostrarghe che l’era el Messia. (Mat. 16:1) Fursi lore le spetea questo parché no le capia ben el testo de Daniel 7:13, 14, e anca no l’era la ora giusta par Geovà realisar questa professia. Ma come Gesù no’l ga fato quel che lore le spetea par provarghe che l’era el Messia, no le ga credesto in lu. — Mat. 16:4.

10. Come che Gesù el ga realisà quel che Isaia el gavea dito?

¹⁰ Cossa che la Bìblia la dise? El profeta Isaia el ga dito che el Messia no’l ndaria ‘osar, e gnanca el ndaria far che i altri i scoltesse la so voce nela strada’. (Isa. 42:1, 2) Gesù el ga realisà questa professia. Lu no’l ga volesto farse veder ai altri. Par esémpio, lu no’l ga fato su qualche témpio, no’l ga metesto su le robe che i lìderi religiosi i doperea e gnanca el spetea che le persone lo ciamesse par nomi importanti. Quando Erode el podea mandar coparlo, Gesù no’l ga volesto far un miràcolo par farse veder a lu. (Luc. 23:8-11) Noantri savemo che Gesù el ga fato arquanti miràcoli, ma la roba pi importante par lu la era predicar le bone notìssie. Lu el ga dito ai so dissìpoli: “Mi son vegnesto par far questo.” — Mar. 1:38.

11. Parché che tanti ancoi no i vol scoltarne?

¹¹ Sarà che la medèsima roba la sucede ancoi? Si. Ale persone ghe piase vardar ciese pròpio grande e con tante robe rento che le costa tanto, lìderi religiosi che i ga nomi importanti e selebrassion che lore gnanca le sa parché che le fà. Ma le persone che le va a queste ciese le impara poco e gnente sora Dio e le so promesse. Ma questo no sucede nel Salon del Regno. Par esémpio, quei che insegna  no i mete su robe difarente dei altri e gnanca i ze ciamadi par nomi importanti. E quel che se impara l’è tuto de acordo cola Bìblia. I Saloni del Regno i ze posti neti, sémplissi e rento no ghen’è robe che le costa massa. Anca cossita, le persone no le vol scoltarne parché le pensa che la nostra maniera de adorar a Dio la ze massa sémplisse e parché quel che insegnemo no l’è quel che le vol scoltar.

12. De acordo con Ebrei 11:1, 6, come che podemo gaver una fede forte?

¹² Cossa che pol giutarne a no gaver mai dubi? Le selebrassion che no le ze de acordo cola Bìblia le pol esser bele, ma no le fà deventar pi forte la nostra fede. El apòstolo Paolo el ga dito ai cristiani de Roma che la fede la va drio a quel che se scolta, e quel che se scolta vien del Cristo. (Rom. 10:17) Cossa ghemo de far par gaver una fede forte? Ghemo de studiar la Parola de Dio e cognosser la verità sora lu, parché sensa fede no podemo far quel che ghe piase a Dio. Alora, no ne ocore veder un grando miràcolo par esser sicuri che quel che imparemo l’è la verità. Invesse, ghemo de studiar ben la Bìblia. Cossita, gavaremo una fede pi forte e no gavaremo pi dubi. — Ledi Ebrei 11:1, * 6. *

13. Parché che tanti no i ga credesto che Gesù l’era el Messia?

¹³ Le persone no le ga credesto che Gesù l’era el Messia par causa de tante robe. (Mat. 11:16-19) Par esémpio, Gesù el ga dito ai so dissìpoli che no i gavea bisogno de far el gegiun intanto che el fusse vivo. Alora, lori no i fea el gegiun come le altre persone. Par quela, i dissìpoli de Gioani Batista i ze restadi spaventadi. (Mat. 9:14-17) I farisei e altri nemighi no i ga credesto in Gesù parché lu no’l fea le medèsime robe che lori e no’l ndea drio  ale so tradission. Lori i ze restadi inrabiadi parché Gesù el ga guario arquante persone nel sabo. (Mar. 3:1-6; Gioani 9:16) Lori anca i gavea orgòlio de dir che i rispetea la lege del sabo, ma i pensea che no l’era sbalià vender nel témpio. Gesù li ga condanadi par causa de questo e lori i ze restadi pròpio inrabiadi. (Mat. 21:12, 13, 15) E quando Gesù l’era drio predicar nte una sinagoga in Nasarè, le persone le ze restade cative parché lu el ghe ga dito che no le gavea fede e le era egoìste come i israeliti. — Luc. 4:16, 25-30.

14. Parché che Gesù el ga condanà tante tradission?

¹⁴ Cossa che la Bìblia la dise? Geovà el ga doperà el profeta Isaia par dir che el pòpolo el parlea e el ghe dea onor cola so boca, ma el so cuor l’era pròpio distante de lu e la adorassion che i fea la era de acordo cola lege dei òmini. (Isa. 29:13) Alora, Gesù el podea condanar le robe che le persone le fea parché no le era de acordo cola Bìblia. Le persone che le pensea che le tradission le era pi importante che la Bìblia, le era drio abandonar a Geovà e al Messia.

15. Parché che tanti i resta disgustadi cole Testimònie de Geovà?

¹⁵ Sarà che la medèsima roba la sucede ancoi? Si. Tanti i resta disgustadi cole Testimònie de Geovà parché no le fà feste e selebrassion che no le ze de acordo cola Bìblia. Par esémpio, lore no le fà feste nei giorni che se fà i ani e gnanca de Nadal. Lore anca no le va ale selebrassion che le dà onor al paese e no le stà drio ale tradission nei velori che no le ze de acordo cola Bìblia. Par quela che tante persone le resta inrabiade cole Testimònie de Geovà. Queste persone le pensa che le ze drio piaserghe a Dio. Ma le ze sbaliade, parché le va drio a quel che i altri i dise invesse de far quel che Dio el dise. — Mar. 7:7-9.

16. Cossa ghemo de far par no gaver mai dubi, e cossa no volemo mai far? (Sal. 119:97, 113, 163-165)

¹⁶ Cossa che pol giutarne a no gaver mai dubi? Ghemo de amar a Geovà, le so lege e i so prinsipi. (Ledi Salmo 119:97, * 113, * 163-165. *) Se femo questo, mai ndaremo far qualcossa che no ghe piase a Dio e gnente ndarà esser pi importante che el nostro amor par Geovà.

17. Cossa che arquanti i spetea che Gesù el fesse?

¹⁷ Arquanti giudei i era drio sofrir tanto parché i era soto el governo de Roma. Lori i volea che el Messia el ghe desse suito la libertà de questo governo. Ma quando i ga volesto che Gesù el deventesse rè, lu no’l ga acetà. (Gioani 6:14, 15) Ma altre persone, come i sasserdoti, le ricevea autorità dei romani. Alora, lore le gavea paura che Gesù el parlesse de nantro governo che no l’era Roma. Par causa de questo, tanti giudei no i ga credesto che Gesù l’era pròpio el Messia.

18. Che professie sora el Messia le persone no le ga volesto saver?

¹⁸ Cossa che la Bìblia la dise? Tante professie le disea che el Messia el gavaria la vitòria come gueriero. Ma altre le disea che prima el gavaria de morir par i nostri pecati. (Isa. 53:9, 12) Alora, parché i giudei i era drio spetar che el Messia el fesse arquante robe che no’l ndaria mia far? Parché i volea finir fora suito coi so problemi. Alora, no i volea saver  de professie che no le prometesse questo. — Gioani 6:26, 27.

19. Parché che tanti no i vol imparar sora Geovà ancoi?

¹⁹ Sarà che la medèsima roba la sucede ancoi? Si. Par esémpio, tanti no i vol imparar sora Geovà parché noantri no se metemo nela polìtica. Lori i dise che gavarìssino de scòlier una persona par governar. Ma savemo che, se scoliemo una persona come governante, saremo drio abandonar a Geovà. (1 Sam. 8:4-7) Le persone fursi le pensa che gavarìssino de far su scole, ospedai e altre robe par giutar le persone. Quando lore le vede che, invesse de risolver suito i problemi dele persone, noantri predichemo, lore no le vol imparar sora Geovà.

20. De acordo con Mateo 7:21-23, quala che la ze la roba pi importante par noantri?

²⁰ Cossa che pol giutarne a no gaver mai dubi? La roba pi importante che ghen’è la ze far el laoro che Gesù el ne ga comandà. (Mat. 28:19, 20) No ghemo de proar finir fora coi problemi che ghen’è nel mondo. Noantri amemo le persone e ne despiase vederle patir. Ma savemo che giutemo pròpio le persone quando ghe parlemo sora el Regno e ghe giutemo a esser amighe de Geovà. — Ledi Mateo 7:21-23. *

21. Cossa che ghemo de sforsarse par far?

²¹ Noantri ghemo studià che le persone no le ga credesto che Gesù l’era el Messia par causa de quatro robe, e che queste le sucede anca ancoi. Ma ghemo de star atenti anca a altre robe. Nel pròssimo stùdio, ndaremo imparar sora altre quatro robe che le pol farne gaver dubi. Alora, sfòrsate tanto par gaver sempre una forte fede e mai assar de ndar drio a Gesù.