1. Che paure arquanti i ga?

 TE GHÈ belche infrontà qualche roba che te ga fato sentir paura? Ndemo veder quel che ga sucedesto con arquanti fradei. Nestor e la so dona Maria i volea tanto servir nte un posto che ghen’era bisogno de aiuto nela predicassion. * Lori sol i saria boni de farlo se i vivesse con manco robe e manco soldi. Ma i gavea paura de farlo e no esser contenti. Isaac l’è de star nte un paese che i fradei no i ze mia lìberi par adorar a Geovà. Par quela, lu el gavea paura che el governo el vegnesse contra lu. Ma lu el gavea ancora de pi paura de quel che podaria suceder quando la so fameia la savesse che lu l’era deventà una Testimònia de Geovà. Valèria la ga savesto che la gavea un càncaro tanto bruto. Ela la ga bio tanta paura de morir parché no la era bona de catar un dotor che el fesse la so operassion sensa doperar sangue.

2. Parché che ghemo de imparar a dàrghene fora cole nostre paure?

² Te ghè belche sentio paure come questi fradei? Se no semo boni de dàrghene fora cole nostre paure, podemo far robe sbaliade che le ndarà intrigar la nostra amicìssia con Geovà. E l’è pròpio questo che Sàtana el vol. Lu el dopera le nostre paure par farne desobedir ale lege de Geovà o par fermarne de predicar. (Apo. 12:17) Ma come che podemo protegerse de Sàtana, che l’è pròpio rugno e el ga tanto poder?

3. Cossa che pol giutarne a dàrghene fora cole paure?

³ Ghemo de esser sicuri che Geovà el ne ama e che el ndarà sempre giutarne. Cossita, saremo boni de dàrghene fora  cole nostre paure. (Sal. 118:6) Varda el esémpio del scritor del Salmo 118. Lu el ga infrontà arquante brute robe. Lu el gavea tanti nemighi e arquanti de lori i era tanto poderosi (versìcoli 9 e 10). Dele volte, lu el restea tanto ansioso (versìcolo 13). Lu anca l’è stà dissiplinà par Geovà (versìcolo 18). Ma quando lu l’era drio infrontar tute queste robe, el ga cantà: “Mi no gavarò paura.” Parché che el se sentia cossita? Parché el savea che anca se Geovà lo gavesse dissiplinà, lu lo amea tanto. Lu el savea che el saria bon de infrontar tute le dificoltà, parché Geovà el ndaria sempre giutarlo. — Sal. 118:29.

4. Che paure saremo boni de dàrghene fora se credemo che Geovà el ne ama?

⁴ Noantri ghemo de creder del tuto che Geovà el ne ama. Se semo sicuri de questo, saremo boni de dàrghene fora (1) cola paura de no esser boni de dar quel che la nostra fameia la ga de bisogno par viver (2) cola paura de quel che le persone le pol farne e (3) cola paura dela morte. I fradei che ghemo parlà nel primo paràgrafo i ze stati boni de dàrghene fora con queste paure parché i era sicuri che Geovà li amea.

5. Che robe pol assar un paron de fameia con paura? (Vedi el ritrato dela prima pàgina.)

⁵ I paroni de fameia i sa che Geovà el speta che lori ghe dae ala so fameia quel che la ga de bisogno par viver. (1 Tim. 5:8) Se te sì un paron de fameia, fursi te ghè bio paura de restar sensa laoro nela pandemia dela COVID-19. Pol esser che te ghè pensà che no te sarissi pi bon de dar de magnar ala to fameia, de pagar el afito dela casa e altri dèbiti. E se te ghè perso el to laoro, fursi te ghè bio paura de no catar nantro. O pol esser che te ghè bio paura de viver con manco robe e manco soldi come Nestor e Maria. Sàtana el ga belche doperà queste paure par fermar arquanti de servir a Geovà.

6. In cossa Sàtana el vol che credemo?

⁶ Sàtana el vol che credemo che Geovà no’l ne ama e che no’l ndarà giutarne a dar quel che la nostra fameia la ga de bisogno par viver. Se credessino in questo, podarissino fin far qualcossa sbaliada sol par no perder el laoro.

7. De cossa che Gesù el ne assa sicuri?

⁷ Gesù l’è la persona che cognosse de pi el so Pare, Geovà. Gesù el ga dito in Mateo 6:8: ‘El vostro Pare el sa dele robe che valtri gavé de bisogno vanti de domandarghe.’ Alora, Gesù el sa che Geovà el vede e che sempre el dà quel che ghemo de bisogno. Geovà l’è el Paron dela fameia, e tuti i so servi i fà parte de questa fameia. Alora, podemo esser sicuri che lu el ndarà far quel che l’è scrito in 1 Timòteo 5:8.

8. (a) Cossa che pol giutarne a dàrghene fora cola paura de no dar ala nostra fameia quel che la de bisogno? (Mateo 6:31-33) (b) De acordo col ritrato, come che podemo far compagno ai fradei che i ze drio portar de magnar a una sorela?

⁸ Quando semo sicuri che Geovà el ama a noantri e ala nostra fameia, saremo anca sicuri che el ne darà tuto quel che ghemo de bisogno par viver. (Ledi Mateo 6:31-33. *) Geovà el vol tanto tender de noantri, e lu l’è la meio persona par farlo. Parché che podemo dirlo? Lu el ne ga belche  dato la Tera e tante bele robe par godersela. (Gén. 2:9) E ancoi, Geovà el ne dà quel che ghemo de bisogno par viver. Alora, anca che ghemo poco, sol ghemo quel che ne ocore parché Geovà l’è drio tenderne. (Mat. 6:11) Ma ghemo de ricordarse anca de nantra roba. Anca se ghemo de assar de far arquante robe parché ghemo dessidio viver con manco soldi, quel che Geovà pol darne adesso e nel futuro l’è tanto meio. Nestor e Maria i se ga sentio pròpio cossita. — Isa. 65:21, 22.

9. Cossa che imparemo del esémpio de Nestor e Maria?

⁹ Nestor e Maria, che i ze de star nela Colómbia, i gavea una bela casa e un bon laoro. Lori i ga dito: “Penseino de viver con manco soldi e manco robe par far de pi par Geovà, ma gaveino paura de no esser felici.” Cossa che li ga giutà a dàrghene fora con questa paura? Pensar in tute le volte che Geovà ghe gavea belche mostrà el so amor. Cossita, lori i ze restadi ancora pi sicuri che Geovà el ndaria sempre tenderli. Alora, lori i ga assà i so boni laori, i ga vendesto la casa e i ze ndati de star nte un posto del paese che gavea bisogno de aiuto nela predicassion. Cossa che ga sucedesto dopo de questo? Nestor el ga dito: “Noantri ghemo visto che quel che dise in Mateo 6:33 l’è pròpio vero, parché Geovà el ne ga sempre dato quel che gaveino de bisogno. E adesso, semo tanto pi felice.”

10. Parché che arquante persone le ga paura una del’altra?

¹⁰ Dopo che Adon e Eva i ga desobedio a Geovà, le persone le ze drio far robe tanto brute una al’altra. (Ecl. 8:9) Par esémpio, tanti i dopera la autorità che i ga par tratar mal i altri. Arquante persone le fà tante robe brute una al’altra, i gióveni nela scola i ghe dise su un ai altri e ghen’è tanta violensa anca rento casa. Par quela che le persone le ga paura una del’altra. Sàtana l’è drio doperar questa paura par farne desobedir a Dio. Ndemo veder come.

11, 12. Come che Sàtana el dopera la paura dele persone par proar intrigarne de servir a Geovà?

¹¹ Sàtana el dopera la paura che podemo gaver dele persone par fermarne de predicar e de obedir a Geovà. Par esémpio, Sàtana el dopera arquanti governi par proar intrigarne de predicar e de adorar a Geovà. (Luc. 21:12; Apo. 2:10) Tante persone  le parla busie dele Testimònie de Geovà e par via de questo, tanti i ne dise su o i ne trata mal. (Mat. 10:36) Ma no ghemo de restar spaventadi. Parché? Parché questo ga scominsià a suceder ancora nela època dei primi dissìpoli. — Ati 5:27, 28, 40.

¹² Sàtana el dopera anca nantra roba par farne gaver tanta paura. Arquanti che i desside deventar Testimònie de Geovà, i ga paura de quel che le persone dela so fameia le ndarà pensar. Lori i vol tanto che queste persone le cognossa e le ame a Geovà. Alora, i resta tanto disgustadi quando le parla mal de Geovà e dei fradei. L’è vera che arquante volte le persone dela fameia che ghe vegnea contra le ze deventade Testimònie de Geovà. Ma cossa gheto de far se lore no le vol pi vederte o parlar con ti?

13. Come che esser sicuri che Geovà el ne ama tanto ndarà giutarne se la nostra fameia la ne abandona? (Salmo 27:10)

¹³ Le parole del Salmo 27:10 pol darne tanto consolo. (Ledi. *) Pol esser che la nostra fameia la ne abandone. Ma se noantri se ricordemo che Geovà el ne ama tanto, gavaremo forsa par dàrghene fora con questa dificoltà e saremo sicuri che Geovà el ndarà benedirne. Lu el ndarà darne quel che ghemo de bisogno par viver, giutarne a esser felici e a seitar a esser so amighi. Isaac, che ghemo parlà prima, el ga capio pròpio questo.

14. Cossa che imparemo col esémpio de Isaac?

¹⁴ Isaac l’è deventà una Testimònia de Geovà anca che el savesse che el governo no le assea lìbere par predicar e adorar a Geovà. Cossa che ga giutà Isaac a dàrghene fora cola paura? Capir che Geovà lo amea tanto. Lu el ga dito: “Mi go bio paura parché i governi i ne vegnea contra de pi de quel che pensea. Ma mi gavea ancora de pi paura de quel che la me fameia la ndaria pensar de mi. Mi gavea paura de disgustar a me pare, che no l’era Testimònia de Geovà, e che la me fameia no la me rispetesse pi.” Ma Isaac l’era sicuro che Geovà sempre el tende de quei che lu el ama. Lu el ga dito: “Mi go pensà come che Geovà el gavea belche giutà arquanti fradei che i ga infrontà brute dificoltà. Par esémpio, quando ghe ga mancà soldi, quando le persone li ga tratà mal e quando i ga infrontà  altre robe. Mi savea che se mi seitesse a servir a Geovà, lu ndaria benedirme. Mi go sentio el aiuto de Geovà quando son stà metesto in preson arquante volte e quando go ciapà bote.” Geovà l’è deventà un Pare par Isaac e i fradei i ze deventadi la so fameia.

15. Parché che ghemo paura dela morte?

¹⁵ La Bìblia la dise che la morte la ze un nemigo. (1 Cor. 15:25, 26) Fursi ghemo paura dela morte quando ghemo de infrontar una bruta malatia o quando savemo che qualchedun dela nostra fameia l’è malà. Ma parché che ghemo paura dela morte? Parché Geovà ne ga fato cola voia de viver par sempre. (Ecl. 3:11) Magari l’è bon gaver un poco de paura de morir parché questo pol protegerne. Par esémpio, la ne giuta a scòlier ben quel che ndaremo magnar, a far esersissi, a ndar al dotor quando semo maladi e a no far gnente che mete in rìscio la nostra vita.

16. Come che Sàtana el dopera la paura che ghemo de morir?

¹⁶ Sàtana el sa che ghe demo tanto valor ala nostra vita. Par quela, lu el dise che ndaremo far de tuto no morir, anca assar de esser amighi de Geovà. (Giò 2:4, 5) Sicuro che lu l’è sbalià! Ma savemo che Sàtana el pol doperar arquante robe par proar coparne. Par quela lu el dopera la paura che ghemo de morir par farne abandonar Geovà. (Ebr. 2:14, 15) Par esémpio, Sàtana el pol doperar arquante persone par vegner contra noantri e dirne che le ndarà coparne se seitemo leai a Geovà. Pol esser che Sàtana anca el proe farne desobedir a Dio quando semo maladi. Fursi i dotori o quei dela nostra fameia i dise che ghemo de acetar sangue o nantro tratamento che no l’è mia de acordo con quel che la Bìblia la dise.

17. De acordo con Romani 8:37-39, parché che no ne ocore gaver paura dela morte?

¹⁷ Nissun vol morir. Ma se questo sucede, semo sicuri che Geovà el ndarà ricordarse de noantri e el seitarà a amarne. (Ledi Romani 8:37-39. *) Quando more un amigo de Geovà, lu el se ricorda de questa persona come se la fusse viva. (Luc. 20:37, 38) Lu l’è premoso de ressussitarla. (Giò 14:15) Savemo che Geovà el ga dato la vita del so Fiol par noantri poder viver par sempre. (Gioani 3:16) Alora, savemo che lu el ne ama e el ne tenderà. Par quela, quando semo drio infrontar una bruta malatia o qualche roba che pol coparne, podemo domandar che Geovà el ne dae consolo, sabedoria e la so forsa. Adesso, vederemo el esémpio de Valèria e el so omo, che i ga fato pròpio questo. — Sal. 41:3.

18. Cossa che imparemo del esémpio de Valèria?

¹⁸ Quando Valèria la gavea 35 ani, la ga savesto che la gavea un bruto càncaro che poche persone lo gavea. Ma el amor che la gavea par Geovà la ga giutà a dàrghene fora cola paura de morir. Ela la ga dito: “La nostra vita la ga cambià de colpo quando ghemo savesto che mi gavea questo bruto càncaro. Mi gavea de far una operassion che no la era fàcile, e mi podaria morir. Mi go parlà con tanti dotori, ma gnanca un de lori el volea far la operassion sensa doperar el sangue. Mi gavea tanta paura de morir, ma no volea desobedir a Geovà e  acetar sangue. Me ga giutà tanto ricordarme dele volte che Geovà el me ga mostrà che el me ama. E in quela època, anca mi podea mostrar che lo amea. Alora quando el dotor el me parlea una roba che no la era tanto bona, mi gavea ancora de pi voia de lotar contra Sàtana e assar Geovà contento. Dopo de un tempo, mi son stata bona de far la operassion sensa doperar sangue. Anca se ancoi mi seito a gaver i problemi de salute, Geovà el ga sempre tendesto de noantri. Par esémpio, un final de stimana vanti de mi saver la malatia che gavea, ghemo studià nela riunion un artìcolo che el parlea sora come infrontar con coraio le dificoltà. * Questo artìcolo el ne ga giutà tanto e lo ghemo ledesto tante volte. Leder artìcoli cossita, ndar ale riunion e ala predicassion ne ga giutà a sentirse in pace, tranquili e far bone scólie.”

19. Cossa che suito ndarà suceder?

¹⁹ Col aiuto de Geovà, tuti noantri semo drio infrontar le dificoltà e ndar contra el Diaol. (1 Pie. 5:8, 9) Suito Geovà el ndarà dir che Gesù e i untadi i finissa fora con tuti i problemi che ghen’è par via del Diaol. (1 Gio. 3:8) Alora, no ghen sarà pi gnente che ndarà far i servi de Dio gaver paura. (Isa. 54:14; Mic. 4:4) Ma fin che questo no sucede mia, ghemo de dàrghene fora cole nostre paure.

20. Cossa che ndarà giutarne a dàrghene fora cole nostre paure?

²⁰ Ghemo de seitar a esser cada volta pi sicuri che Geovà el ne ama e el ne protege. Podemo farlo quando parlemo ai altri sora come Geovà el ga protegesto i so servi nel passà e come el ne ga belche giutà a infrontar le nostre dificoltà. Cossita, col aiuto de Geovà, podaremo dàrghene fora cole nostre paure! — Sal. 34:4.