Ma Geovà el vol che spetemo con passiensa fin che lu el fae tuto quel che el ga prometesto. Parché che el vol che spetemo con passiensa? Cossa pol giutarne a esser felici intanto che spetemo?

PARCHÉ CHE GEOVÀ EL VOL CHE SPETEMO CON PASSIENSA?

La Bìblia la dise: “Ma Geovà l’è drio spetar con passiensa par giutarve e el ndarà agir par mostrarve misericòrdia. Parché Geovà l’è un Dio de giustìssia. Quei che i speta in lu i ze felici.” (Isa. 30:18) Isaia el gavea scrito queste parole par i giudei che i fea sol quel che i volea lori. (Isa. 30:1) Ma queste parole le ga dato speransa ai giudei fedeli e le pol dar speransa anca ai servi fedeli de ancoi.

Noantri ghemo de spetar con passiensa, parché anca Geovà l’è drio spetar. Lu el ga belche dessidio quando el va finir con questo mondo bruto, e l’è drio spetar la ora giusta. (Mat. 24:36) In quel giorno, tuti i saverà che le robe che Sàtana el ga dito sora Geovà le era tute busie. Dopo, Geovà el finirà fora con Sàtana e tuti quei che i ghe va drio e el gavarà misericòrdia de noantri.

Alora, pol esser che Geovà no’l finissa cole nostre dificoltà adesso. Anca cossita, lu el promete che podemo esser felici intanto che spetemo. El profeta Isaia el ga dito che podemo esser felici intanto che ne toca spetar una roba che volemo tanto. (Isa. 30:18) a Ma come? Ndemo veder quatro robe che pol giutarne.

COME TE POL ESSER FELICE INTANTO CHE TE SPETI?

Pensa nele robe bone che te ghè nela vita. Anca se el rè Davi el ga visto tante robe brute nela vita, lu el ga dito: “Resta sito davanti de Geovà e speta premoso el so aiuto. No stà restar disgustà quando qualchedun l’è bon de far le  robe rugne che el gavea in testa.” (Sal. 37:7, 35) Davi el ga fato pròpio cossita. Lu el pensea tanto sora la speransa de salvassion e le benedission che Geovà ghe gavea dato. (Sal. 40:5) Anca noantri ghemo de far come Davi. Invesse de vardar le robe brute che sucede, ghemo de pensar nele robe bone che ghemo nela vita. Cossita, sarà pi fàcile spetar fin che Geovà el fae quel che el ga prometesto.

Loda sempre a Geovà. El scritor del Salmo 71, che credemo che el sìpia Davi, el ga dito a Geovà: ‘Mi vao seitar a spetar. Vao lodarte cada volta de pi.’ (Sal. 71:14) Come che Davi el lodea a Geovà? Lu el parlea de Dio ai altri e el cantea par lu. (Sal. 71:16, 23) Alora, compagno a Davi, se lodemo a Geovà, anca noantri podemo esser felici intanto che spetemo. Come podemo lodarlo? Podemo parlar de lu nela predicassion e quando discoremo coi altri e quando cantemo càntichi. Alora, nela pròssima volta che te canti càntichi, proa star atento ala létera e pensa come el càntico el te incoraia.

Assa che i fradei e le sorele i te incoraie. Quando Davi el ga infrontà dificoltà, lu el ga dito a Geovà che el saria bon de spetar insieme a quei che i fusse leai. (Sal. 52:9) Quando noantri stemo insieme coi nostri fradei nele riunion, predicassion e par divertirse, podemo incoraiarse un al altro. — Rom. 1:11, 12.

Fà pi forte la to speransa. Salmo 62:5 dise: ‘La me speransa la vien de lu. Par quela che son drio spetar sol lu.’ Noantri ghemo de esser pròpio sicuri dela nostra speransa. L’è ancora pi importante se fà belche ani che semo drio spetar le promesse de Geovà. Noantri ghemo de esser sicuri che le ndarà realisarse, anca se ne toca spetar de pi. Cossa pol giutarne a far pi forte la nostra speransa? Studiar la Parola de Dio, le professie e le qualità de Geovà e veder come tute le parte dela Bìblia le ze de acordo una colaltra. (Sal. 1:2, 3) Noantri anca ghemo de seitar a domandar che Geovà el ne dae spìrito santo par far pi forte la nostra amicìssia con lu intanto che spetemo. — Giuda 20, 21.

Compagno a Davi, sìpia sicuro che Geovà el protege, el tende e el mostra amor leal a tuti quei che lo speta. (Sal. 33:18, 22) Alora, seita a vardar le robe bone che te ghè nela vita, loda sempre a Geovà, assa che i fradei i te incoraie e fà pi forte la to speransa. Cossita, te sarè bon de spetar con passiensa fin che Geovà el fae tuto quel che el ne ga prometesto!