1. Parché che l’è bon discorer coi nostri fradei sora come semo deventadi Testimònie de Geovà?

 “COME che te ghè cognossesto a Geovà?” Sicuro che te ghè belche contà a qualchedun come che te sì deventà una Testimònia de Geovà. L’è tanto bon saver come che i nostri fradei i ga cognossesto a Geovà e contarghe come che noantri lo ghemo cognossesto. (Rom. 1:11) Quando femo cossita, se ricordemo che la verità dela Bìblia la ga tanto valor. Restemo anca pi sicuri che volemo viver de una maniera che ghe piase a Geovà. — 3 Gio. 4.

2. Cossa che ndaremo imparar in questo stùdio?

² Questo stùdio el ndarà giutarne a ricordarse parché che ghemo tanto amor ale verità dela Bìblia, e come che podemo mostrarlo. Cossita, daremo ancora pi valor a quel che Geovà el ga fato par giutarne a cognosser le verità dela Bìblia, e gavaremo de pi voia de insegnarle anca ai altri. — Gioani 6:44.

3. Parché che amemo tanto le verità dela Bìblia?

³ Amemo tanto le verità che imparemo nela Bìblia parché le vien de Geovà e noantri lo amemo tanto. Par meso dela Bìblia, imparemo che Geovà l’è el Tuto Poderoso e che l’è un Pare che el ne ama tanto e che el vol tenderne. (1 Pie. 5:7) Nela Bìblia, imparemo che Dio el ga tanta misericòrdia, compassion, passiensa, amor leal e che el ama la giustìssia. (Éso. 34:6; Isa. 61:8) Noantri anca imparemo che Geovà el sofre quando el ne vede tribolar e che l’è premoso de finir fora con tuto el sofrimento. (Ger. 29:11) Sicuro  che le verità dela Bìblia le ne fà amar ancora de pi a Geovà.

4-5. Parché che Paolo el ga dito che la nostra speransa la ze come una àncora?

⁴ Noantri anca amemo le verità dela Bìblia parché le ne dà speransa par el futuro. E Paolo el ga mostrà come questa speransa la ze tanto importante par noantri. Lu el ga dito: “Ghemo questa speransa sicura e firme che la ze come una àncora par la ànima.” (Ebr. 6:19) Come cossita? Una àncora la ze bona de tegner una barca nel posto giusto in meso una tempesta. La nostra speransa la ze come una àncora parché la ne giuta a restar tranquili e firmi in meso i problemi.

⁵ Paolo l’era drio parlar dela speransa che i untadi i ga de viver nel cielo. Ma la speransa de viver par sempre la ze una àncora anca par quei che i ndarà viver nela Tera. (Gioani 3:16) Sicuro che questa speransa la ne giuta a viver meio belche adesso.

6-7. Come che le verità dela Bìblia sora el futuro le ga giutà Ivone?

⁶ Varda quel che ga sucedesto con una sorela che la ga nome Ivone. Quando la era pìcola, la gavea tanta paura dela morte parché gnancora la savea la verità sora Geovà. Una volta la ga ledesto una roba che la disea: “Rivarà el giorno che no ghen sarà doman.” Ivone la ga dito: “Mi no ero pi bona de dormir ala note parché seitea a pensar sora el futuro. Mi me domandea: ‘Sarà che la vita la ze sol questo? Parché che mi son qua?’ Mi no volea morir!”

⁷ Dopo de un tempo, quando Ivone la era una gióvena, la ga scominsià a studiar cole Testimònie de Geovà. Come che el stùdio dela Bìblia la ga giutada? Ela la ga dito: “Mi go imparà che podea viver par sempre nte un paradiso qua nela Tera. Ancoi mi son bona de dormir de note e no me preocupo pi col futuro e cola paura de morir.” Ivone la ama le verità dela Bìblia e ghe piase tanto de parlar ai altri sora la speransa che la ga par el futuro. — 1 Tim. 4:16.

8-9. (a) Cossa che el omo dela ilustrassion de Gesù el ga fato quando el ga catà un tesoro? (b) Cossa che le verità dela Bìblia le ze par ti?

⁸ La Bìblia anca la parla sora le bone notìssie del Regno de Dio. Gesù el ga dito che queste verità sora el Regno le ze come un tesoro sconto. In Mateo 13:44, lu el ga dito: “El Regno dei cieli l’è come un tesoro sconto nel campo che un omo lo ga catà e lo ga sconto nantra volta. L’è restà tanto contento che l’è ndato e el ga vendesto tute le robe che el gavea e el ga comprà quel campo.” Anca che questo omo no l’era drio ndar in serca de questo tesoro, quando lo ga catà, el ga vendesto tute le so robe par gaverlo. Parché? Parché lu el savea che questo tesoro el gavea de pi valor che tute le altre robe che lu el gavesse.

⁹ Sicuro che anca ti te dè tanto valor ale verità dela Bìblia. Par via de quel che imparemo, ghemo la alegria de servir a Geovà cola speransa de viver par sempre e esser governadi par el so Regno. No ghen’è gnente nel mondo che ga de pi valor che questo. Par quela, la roba pi importante par noantri la ze la nostra amicìssia con Geovà e saver che semo drio assarlo contento. — Col. 1:10.

10-11. Parché che Michael el ga cambià tanto la so vita?

¹⁰ Tanti fradei ghe ga tocà assar indrio arquante robe par servir a Geovà. Par esémpio, fursi i ga assà indrio un bel  laoro, i se ga fermà de voler esser siori o i ga cambià tanto la so maniera de viver par servir a Geovà. L’è stà questo che ga sucedesto col fradel Michael. Quando lu l’era gióveno, ghe piasea tanto de far karaté. Lu el ga dito: “Mi me sforsea tanto par seitar a gaver un corpo bel e forte. Dele volte, mi pensea che nissun podea vinserme.” Ma dopo che Michael el ga scominsià a studiar la Bìblia, el ga imparà che Geovà el òdia la violensa. (Sal. 11:5) Michael anca el ga dito: “I fradei che i me ga insegnà la Bìblia mai i me ga dito che me tochea fermarme de far karaté. Lori sol i parlea quel che la Bìblia la insegna.”

¹¹ Par via de quel che Michael l’era drio imparar dela Bìblia, el so amor par Geovà l’era drio restar cada volta pi forte. Lu l’è restà maraveià de imparar sora la misericòrdia che Geovà sempre el mostra ai so servi. Dopo de un tempo, lu el ga capio che el gavea de far una scòlia importante nela so vita. Lu el ga dito: “Mi savea che saria pròpio difìcile fermarme de far karaté. Ma mi volea tanto assar Geovà contento e ero sicuro che la me amicìssia con lu la era la roba pi importante par mi.” Michael el ga cambià tanto la so vita parché el savea che le verità dela Bìblia le gavea tanto valor. — Tiago 1:25.

12-13. Come che le verità dela Bìblia le ga giutà Mayli?

¹² Noantri anca amemo le verità dela Bìblia parché le ze come una làmpada che la slusa nel scuro. Questa ilustrassion la ne giuta a capir che quel che la Bìblia la dise ga tanto valor. (Sal. 119:105; Efe. 5:8) Mayli del Aserbagion la dà tanto valor ala Parola de Dio. So pare l’era mussulmano e so mare la era giudea. Mayli la ga dito: “Mi go sempre credesto in Dio, ma no ero bona de capir arquante robe. Mi me domandea: ‘Parché che Dio el ga creà le persone? Parché che una persona la sofre tuta la vita e dopo che la more la seita a sofrir nel inferno?’ Le persone le disea che tute le robe le sucede come Dio el vol, alora mi me domandea: ‘Sarà che l’è Dio che el ne fà sofrir? Sarà che lu ghe piase de veder le persone sofrir?’”

¹³ Mayli la ga seità a ndar in serca dele risposte par le so domande. Dopo de un tempo, la ga scominsià a studiar la Bìblia e la ze deventada una Testimònia de Geovà. Ela la ga dito: “Le risposte dela Bìblia le me ga giutà a esser una persona pi contenta e a gaver pace.” Compagno a Mayli, noantri ringrassiemo tanto a Geovà, parché el ne “ga ciamà del scuro par la so maraveiosa luce”. — 1 Pie. 2:9.

14. Come che podemo amar ancora de pi le verità dela Bìblia? (Vedi anca el quadro “Le verità dela Bìblia le ze anca come . . .”)

¹⁴ Questi esempi i mostra che le verità dela Bìblia le ga tanto valor, e sicuro che te te ricordi de tanti altri esempi. Ma, par amar cada volta de pi le verità dela Bìblia, te ghè de seitar a studiarla. Cossita, te ndarè veder che le ga tanto valor e te ndarè amarle ancora de pi. Alora, te sarè cada volta pi bon de meter in pràtica quel che te impari nela Parola de Dio.

15. Come che podemo mostrar che amemo le verità dela Bìblia?

¹⁵ Come ghemo visto, ghemo de studiar sempre la Bìblia e le publicassion dela organisassion. Cossita, mostremo che amemo le verità dela Bìblia. Alora, anca se servimo a Geovà fà tanti ani, ancora podemo imparar tanto dela Bìblia. La prima  revista La Sentinela la ga dito che le verità dela Bìblia le ze come i fiori in meso la peste, che la saria le busie sora Dio. Alora ne toca far sforso par catar i fiori. Questa revista anca la ga dito: “Ancora che te gàpie catà un fior dela verità, no stà fermarte de ndar in serca de altri. Sfòrsate par catar altre verità.” L’è vera che ghe vol sforso, ma queste verità le ga tanto valor par noantri.

16. Come che te piase studiar la Bìblia? (Proverbi 2:4-6)

¹⁶ Arquante persone no ghe piase leder e studiar. Ma Geovà el vol che seitemo a ndar in serca dele verità che ghen’è nela so Parola. (Ledi Proverbi 2:4-6. b) E noantri imparemo tante bele robe se seitemo a farlo. Varda el esémpio del fradel Corey. Quando el lede la Bìblia, lu el stùdia un versìcolo ala volta. Corey el ga dito: “Se el versìcolo el ga una nota, mi la ledo. Proo sempre leder i testi che i ze rifarensa e cossa le publicassion le  dise sora quel versìcolo. Cossita, mi sempre imparo tanto quando ledo la Bìblia.” Quando se sforsemo de studiar la Bìblia, mostremo che ghe demo tanto valor ale so verità. — Sal. 1:1-3.

17. Come che podemo esser sicuri che semo drio meter in pràtica quel che imparemo? (Tiago 1:25)

¹⁷ Studiar le verità dela Bìblia l’è tanto importante. Ma ghemo anca de meter in pràtica quel che imparemo par esser felici del bon. (Ledi Tiago 1:25. c) Ma come che podemo esser sicuri che semo drio meter in pràtica quel che imparemo? Un fradel el ga dito che podemo pensar sora le robe che semo belche drio far e quele che ne ocore far meio. El apòstolo Paolo el ga dito che anca se semo belche drio far una roba bona, ghemo de sforsarse par farla ancora meio. — Fil. 3:16.

18. Parché che seitemo a meter in pràtica quel che imparemo?

¹⁸ La nostra vita la resta tanto meio se seitemo a far quel che imparemo dela Bìblia. Par esémpio, semo felici, giutemo i nostri fradei e assemo Geovà contento. (Pro. 27:11; 3 Gio. 4) Alora, tuti noantri volemo sforsarse tanto par amar le verità dela Bìblia e meterle in pràtica nela nostra vita.