1. Cossa che te ghè imparà sora Geovà?

QUANDO semo nassesti, fursi i nostri genitori i era belche Testimònie de Geovà. Alora, i ne ga insegnà che l’è stà Geovà che el ga creà tute le robe. Lori i ne ga insegnà anca sora le so bele qualità e che el vol che vivemo felici nel Paradiso. — Gén. 1:1; Ati 17:24-27.

2. Cossa che arquanti i pensa sora quei che i crede nte un Creador?

² Tanti no i crede in Dio e manco ancora che l’è stà lu che el ga creà tute le robe. Lori i crede che la vita la ga scominsià ela sola e che le robe le ze deventade pin pian quel che ghen’è adesso. Arquanti de lori i ze studiadi e fursi i dise che i ga prove che la Bìblia la ze sbaliada. Fursi anca i dise che quei che i crede che Dio el ga fato tute le robe i ze ignoranti, stùpidi e bauchi.

3. Parché che ghemo de seitar a far pi forte la nostra fede?

³ Noantri podemo scominsiar a gaver dubi che Geovà el ga creà le robe par causa de quel che tanti studiadi i parla. Ghemo de domandarse: ‘Mi credo che Dio el ga creà le robe sol parché go scoltà questo o parché go studià?’ (1 Cor. 3:12-15) Ghemo de seitar a far pi forte la nostra fede anca se servimo a Geovà fà tanti ani. Cossita no saremo imbroiadi par quei che no i crede nela Bìblia. (Col. 2:8; Ebr. 11:6) Par giutarne a far pi forte la nostra fede, ndaremo risponder ale domande: (1) ‘Parché che tanti no i crede che ghen’è un Creador?’ (2) ‘Come che te pol far pi forte la to fede nel Creador?’ e (3) ‘Come che te pol seitar a gaver una forte fede?’.

4. De acordo con Ebrei 11:1, cossa che ze la vera fede?

⁴ Arquanti i pensa che fede vol dir creder nte una roba sensa gaver prove. Ma la Bìblia la dise che questa no ze la vera fede. (Ledi Ebrei 11:1. *) Quando una persona la ga fede nte una roba, l’è parché ghen’è prove. Par esémpio, le prove le mostra che ghen’è un Dio che l’è Geovà, che ghen’è Gesù e un Regno. (Ebr. 11:3) Un studioso che l’è Testimònia de Geovà, el ga dito: “La nostra fede la resta pi forte anca par causa de quel che i studiosi i parla.”

5. Parché che tanti no i crede che l’è stà Dio che el ga fato tute le robe?

⁵ Fursi te te domandi: ‘Ma se ghen’è tante prove che l’è stà Dio che el ga creà tuto, parché che tanti no i crede in questo?’ Parché tanti no i ga mai studià le prove che ghen’è. Varda el esémpio de Robert, che ancoi l’è Testimònia de Geovà. Lu el ga dito: “Mi no credea che Dio el ga creà tute le robe parché no lo go mai imparà nela scola. Sol quando el gavea de pi de 20 ani, le Testimònie de Geovà le me ga giutà a capirlo, e me parea pròpio giusto e fàcile de creder.” * — Varda el quadro “ Cossa che i genitori i ga de far?”

6. Parché che arquanti no i crede in Dio?

⁶ Arquanti no i crede in Dio parché i dise che i crede sol in quel che i vede.  Ma come che i fà creder in tante robe che no i vede, come par esémpio, el vento? Parché i ga prove che ghen’è el vento. E la fede che la Bìblia la parla la ze compagna. Noantri credemo che ‘una roba la ze vera, anca se no la vedemo, par causa dele prove che ghen’è’. (Ebr. 11:1) Ma ghe vol tempo e sforso par studiar le prove che ghen’è. E tanti no i vol farlo e cossita i pol pensar che no ghen’è Dio.

7. Sarà che tuti i studiosi no i crede che Dio el ga creà tute le robe? Spiega.

⁷ Robert che ghemo parlà vanti e altri studiosi, fursi no i credea che Dio el ga creà tuto parché no i lo ga imparà nela università. Ma arquanti de lori i ga studià le prove che Dio el ga creà la Tera, e i ga scominsià a cognosser a Geovà e a amarlo. E noantri ghemo de far la medèsima roba. No vol dir se ghemo poco o tanto stùdio,  ghemo de far pi forte la nostra fede in Geovà. *

8-9. (a) Cossa che ndaremo imparar adesso? (b) Parché che ghemo de imparar de pi sora quel che Dio el ga creà?

⁸ Come podemo esser sicuri che Dio el ga creà tute le robe? Ndaremo veder quatro robe che pol giutarne a far questo.

⁹ Impara de pi sora tuto quel che Dio el ga creà. Noantri ghemo de seitar a vardar e a imparar de pi sora le bèstie, le piante e le stele. (Sal. 19:1; Isa. 40:26) Cossita, saremo pi sicuri che Geovà el ga creà tute le robe. Noantri podemo anca leder le publicassion dela organisassion de Geovà che parla sora le robe che lu el ga creà. Fursi, pensemo che l’è fadiga capir arquanti artìcoli, ma no ghemo mia de desister de lederli. Ghemo de sforsarse par capir tuto quel che podemo. E no ghemo de desmentegarse de veder nantra volta i vìdei che ghen’è nel site jw.org sora la creassion che ghemo bio nei ùltimi congressi.

10. Parla de un esémpio che prova che ghen’è un Creador che el ga fato tute le robe. (Romani 1:20)

¹⁰ Quando vardemo la creassion, ghemo de pensar cossa che la ne insegna sora Geovà. (Ledi Romani 1:20. *) Par esémpio, del Sol vien el caldo che ghemo de bisogno par viver qua nela Tera. Ma anca vien fora una forsa che la ze tanto pericolosa par noantri. Alora, cossa che ne dà protession? Intorno dela Tera, ghen’è el gàs osònio, che no’l assa mia questa forsa far mal ale persone. Se el Sol el fà vegner fora de pi de quela forsa pericolosa, questa protession anca la resta pi forte. No te sì de acordo che ghen’è un Creador che el ga fato questa roba e che el te vol tanto ben e el ga tanto saver?

11. Come te pol far pi forte la fede nel Creador? (Vedi el quadro “ Robe che le pol giutarte a far pi forte la to fede.”)

¹¹ Se te vol far pi forte la to fede nel Creador, va nel Índice das Publicações da Torre de Vigia e nel jw.org. Te pol anca vardar i vìdei e artìcoli che ghen’è nela sèrie “Qualchedun lo ga fato?” Questi artìcoli e vìdei i ze pìcoli, ma te pol imparar bele robe sora quel che Dio el ga creà. Lori anca i mostra esempi de robe che tanti studiosi i proa far compagno de quele che Dio el ga creà.

12. Cossa che ghemo de far quando semo drio leder la Bìblia?

¹² Stùdia la Bìblia. El studioso che ghemo parlà prima no’l credea che qualchedun el ga creà tute le robe. Ma dopo de un tempo, lu el ga scominsià a creder. Lu el ga dito: “La me fede la ze restada pi forte par causa de quel che go imparà dela creassion, ma anca par causa del me stùdio dela Bìblia.” Fursi te cognossi tanto dela Bìblia, ma te toca seitar a studiarla par far pi forte la to fede che Geovà el ga creà tute le robe. (Giosuè 1:8; Sal. 119:97) Quando te sì drio studiar, proa capir ben la stòria che te sì  drio leder. Daghe atension ale professie, e come che una parte dela Bìblia la ze de acordo cole altre. Cossita, te sarè ancora pi sicuro che la Bìblia la ze la Parola de Dio e che Geovà el ga creà tute le robe con tanto amor e sabedoria. * — 2 Tim. 3:14; 2 Pie. 1:21.

13. Che bel consìlio la Bìblia la ne dà?

¹³ Quando te sì drio studiar la Bìblia, proa capir come che i so consili i pol giutarte. Par esémpio, fà tanti ani che l’è stà scrito nela Bìblia che quei che i va drio ai soldi no i ze felici e i sofre. (1 Tim. 6:9, 10; Pro. 28:20; Mat. 6:24) Sarà che questo consìlio l’è bon anca par noantri ancoi? Un libro che el parla sora quel che le persone le ze drio far ancoi el dise: “Quasi sempre le persone che le va drio ai soldi le ze pi disgustade e le resta pi desanimade. L’è pi fàcile che la persona che la vol sol gaver soldi la gàpia de pi problemi de salute.” Alora, l’è sicuro che quel che la Bìblia la dise pol giutarne ancoi. Proa anca pensar in altri consili dela Bìblia che i te ga belche giutà. Cossita, semo boni de capir che quel che Geovà el dise l’è el meio par noantri. Se semo boni de capir questo, volaremo sempre domandarghe aiuto vanti de far qualcossa. (Tiago 1:5) Cossita, noantri saremo pi felici. — Isa. 48:17, 18.

14. Cossa che podemo imparar sora Geovà quando studiemo la Bìblia?

¹⁴ Stùdia la Bìblia par cognosser a Geovà. (Gioani 17:3) Quando te studi la Bìblia, te ndarè cognosser ancora de pi a Geovà e ale so qualità che te ghè belche visto nela creassion. Imparar sora le qualità de Geovà ndarà giutarte a esser pròpio sicuro che ghen’è un Creador che el ga fato tuto. (Éso. 34:6, 7; Sal. 145:8, 9) Cossita, la to fede e el to amor par Dio i restarà ancora pi forti e te deventarè ancora pi amigo de lu.

15. Parché che l’è bon parlar ai altri sora quel che te credi?

¹⁵ Giuta i altri a capir parché te credi in Dio. Metemo dir che una persona la te fà una domanda sora Dio che no te sè risponder. Alora, te pol catar la risposta nele nostre publicassion o domandar el aiuto de un bravo predicador. Dopo, parla cola persona che la te ga fato la domanda. (1 Pie. 3:15) E se ela no la crede in quel che ghe spieghemo? Anca cossita, podemo restar contenti parché quel che ghemo studià ga fato pi forte la nostra fede. Cossita, no ndaremo drio ai studiosi che no i crede che Dio el ga creà tute le robe.

16. Cossa ndarà suceder se no femo la nostra fede cada volta pi forte?

¹⁶ Ghemo de ricordarse che la fede la vol dir creder in robe che no le vedemo. L’è tanto fàcile desmentegarse de quel che no vedemo. Par quela che Paolo el ga dito che l’è fàcile cascar nela tràpola de no gaver una forte fede. (Ebr. 12:1) Alora, anca se servimo a Geovà fà tanti ani, ghemo de seitar a far pi forte la nostra fede. Come podemo farlo? — 2 Tes. 1:3.

17. Cossa che ghemo de far par gaver una forte fede?

¹⁷ Prima, te ghè de domandar sempre a Geovà el so spìrito santo. Parché? Parché el spìrito santo ne giuta a gaver la fede.  (Gàl. 5:22, 23) Alora, se no ghemo el spìrito santo de Geovà, no gavaremo gnanca fede che el ga creà tute le robe. Se seitemo a domandar che Geovà el ne dae spìrito santo, lu el ndarà risponderne. (Luc. 11:13) Podemo anca domandar che Dio el ne dae pi fede. — Luc. 17:5.

18. De acordo col Salmo 1:2, 3, che grando presente ghemo ancoi?

¹⁸ Secondo, fà sempre el to stùdio dela Parola de Dio. (Ledi Salmo 1:2, 3. *) Quando questo Salmo l’è stà scrito, pochi israeliti i gavea in man la Lege de Dio. I rè e i sasserdoti i gavea la Lege, e lori gavea de riunir tuti i òmini, done, tosatei e foresti, che i era de star in Israel, par scoltar la Lege de Dio a cada 7 ani. (Deu. 31:10-12) Anca nel tempo de Gesù, pochi i gavea le Scriture in man e quasi tute le restea nele sinagoghe. Ma ancoi, quasi tute le persone le ga una parte o tuta la Bìblia. Questo l’è un bel presente de Geovà. Come che podemo mostrar che demo tanto valor ala Bìblia?

19. Cossa che ne ocore far par gaver sempre una forte fede?

¹⁹ Noantri mostremo che demo valor ala Bìblia quando la ledemo sempre. Mai ghemo de pensar: “Vao studiar la Bìblia quando go tempo.” Invesse, ghemo de torse el tempo par leder e studiar la Bìblia e seitar a farlo. Cossita, gavaremo sempre una forte fede.

20. Cossa che ghemo de far?

²⁰ Tanti studiosi no i ga fede nela Parola de Dio. Ma noantri ghemo fede nela Bìblia. (Mat. 11:25, 26) La Bìblia la ne giuta a capir parché che ghen’è tanti problemi e a saver cossa che Geovà el ndarà far par risolverli. Alora, fà pi forte la to fede e giuta i altri a creder che ghen’è un Creador. (1 Tim. 2:3, 4) Seita a spetar el giorno che le parole de Apocalisse 4:11 le ndarà realisarse: “Degno te sì, Geovà, nostro Dio, de ricever la glòria . . . parché te ghè creà tute le robe.”