1-2. Parché che el libro de Apocalisse l’è importante par noantri?

 METEMO dir che te sì drio vardar i ritrati che un amigo tuo el ga. Fursi ghen’è tanti ritrati de persone che no te cognossi mia. Ma te resti contento quando te vedi che te sì nte un de lori. Alora, te proi ricordarte quando e ndove questo ritrato l’è stà fato, e chi che le ze le persone insieme. Questo ritrato l’è tanto importante par ti.

² Compagno a questo ritrato, el libro de Apocalisse l’è tanto importante par noantri. Prima, parché questo libro l’è stà fato par noantri. Apocalisse 1:1 dise: “Rivelassion che Dio el ga dato a Gesù Cristo par mostrar ai so schiavi le robe che le ga de suceder presto.” Alora, questo testo el mostra che el libro de Apocalisse l’è stà scrito par i servi de Geovà. Par quela che i servi de Geovà ancoi belche i savea che i ndaria veder le professie de Apocalisse realisarse e che i ndaria far anca parte de questo. Alora, l’è come se tuti i servi de Dio i fusse nel ritrato.

3-4. (a) Quando che le professie de Apocalisse le ga scominsià a realisarse? (b) Cossa che ghemo de far?

³ El libro de Apocalisse l’è anca tanto importante parché semo drio viver nel tempo che le so professie le ze drio realisarse. Come cossita? El apòstolo Gioani el ga dito: “Par ispirassion mi son stà nel giorno del Signor.” (Apo. 1:10) Gioani el ga scrito queste parole intorno del ano 96 dopo de Cristo. Alora, ancora ndaria méterghe tanto tempo fin el ‘giorno del Signor’. (Mat. 25:14, 19; Luc. 19:12) Le professie dela Bìblia le mostra che el giorno del Signor el ga scominsià in 1914 quando  Gesù l’è deventà Rè nel cielo. Dopo de quel ano, le professie de Apocalisse sora el pòpolo de Dio le ga scominsià a realisarse. Adesso, semo belche drio viver nel “giorno del Signor”!

⁴ Alora come semo drio viver nte una època tanto importante, ghemo de scoltar el consìlio de Apocalisse 1:3. Questo testo el dise: “Felice l’è quel che lede cola voce alta le parole de questa professia e felici i ze quei che i scolta e i obedisse le robe che le ze scrite rento, parché el tempo marcà l’è darente.” Par quela che ghemo de ‘leder in voce alta’, ‘scoltar le parole de questa professia’ e ‘obedirle’. Ma che parole le ze queste che ghemo de obedir?

5. Come che el libro de Apocalisse el ne giuta a capir che l’è tanto importante adorar a Geovà dela maniera giusta?

⁵ El primo capìtolo de Apocalisse el mostra che Gesù el sa de tute le robe che sucede nele congregassion. (Apo. 1:12-16, 20; 2:1) Lo savemo par meso de quel che el ga dito ale sete congregassion nela Àsia. Lu el ga dito a quei fradei del primo sècolo cossa che i gavaria de far par adorar a Geovà dela maniera giusta. Quel che Gesù el ga dito a lori pol giutarne fin ancoi. Parché? Parché Gesù, che el ga autorità nela congregassion, el sa tuto quel che l’è drio suceder e come la ze la nostra amicìssia con Geovà. Lu el ne dà protession, bei consili e el ne dise quel che ghemo de far par seitar a far Geovà contento. Che consili lu el ga dato nel libro de Apocalisse che anca noantri ghemo de meter in pràtica?

6. (a) De acordo con Apocalisse 2:3, 4, cossa che ga sucedesto coi fradei dela congregassion in Èfeso? (b) Cossa che imparemo?

⁶ Ledi Apocalisse 2:3, 4. * Ghemo de seitar a amar a Geovà come ameino nel scomìnsio. Quel che Gesù el ga parlà ala congregassion de Èfeso el mostra che lori i seitea a servir a Geovà con perseveransa anca se i gavesse tante dificoltà. Ma no i gavea pi el amor par Geovà che i gavea nel scomìnsio. Alora, lori i gavea de tornar a gaverlo. Sol cossita Geovà el restaria contento cola adorassion che i dea a lu. Cossa che imparemo? Ghemo de perseverar parché amemo tanto a Geovà. Geovà el varda nò sol quel che femo, ma anca parché che lo femo. Geovà el vol che lo adoremo parché lo amemo tanto e parché demo valor a tuto quel che lu el fà par noantri. Se lo servimo cossita, lo femo contento. — Pro. 16:2; Mar. 12:29, 30.

7. (a) De acordo con Apocalisse 3:1-3, cossa l’era drio suceder coi fradei de Sardes? (b) Cossa che ghemo de far?

⁷ Ledi Apocalisse 3:1-3. * Ghemo de seitar a far el nostro meio a Geovà. I fradei dela congregassion in Sardes i gavea belche fato tanto nel laoro a Geovà, ma no i era pi drio farlo. Par quela che Gesù  el ga dito che lori i gavea de desmissiarse. Cossa che imparemo? Anca che Geovà no’l ndarà mai desmentegarse de quel che ghemo belche fato a lu, no ghemo de assar de far el nostro meio anca adesso. (Ebr. 6:10) L’è vera che fursi no semo boni de far a Geovà quel che feino una volta. Anca cossita, volemo seitar a sforsarse par far el nostro meio adesso nel laoro a Geovà. Cossita, saremo boni de restar desmissiadi fin ala fin. — 1 Cor. 15:58; Mat. 24:13; Mar. 13:33.

8. Cossa imparemo de quel che Gesù el ga dito ai fradei de Laodiceia?

⁸ Ledi Apocalisse 3:15-17. * Ghemo de seitar a adorar a Geovà de tuto el nostro cuor. Quel che Gesù el ga dito ala congregassion de Laodiceia ga mostrà che lori i gavea metesto el laoro a Geovà in secondo posto nela vita. Par quela che Gesù el ga dito che lori era ‘pori òmini e poareti’. Lori i gavea de tornar a adorar a Geovà de tuto el cuor. (Apo. 3:19) Cossa che imparemo? Se no semo pi drio servir a Geovà de tuto el cuor, ghemo de dar pi valor a quel che lu el fà par noantri. (Apo. 3:18) No volemo doperar massa del nostro tempo par gaver una vita bona e assar el laoro a Geovà in secondo posto.

9. Cossa che ghemo imparà con quel che Gesù el ga dito ale congregassion de Pèrgamo e Tiatira?

⁹ No ghemo mai de ndar drio a quel che i apòstati i dise. Gesù el ga lodà arquanti fradei de Tiatira parché lori no i ze ndati drio a quel che Sàtana el insegna e lu li ga incoraià a seitar a creder in quel che l’è vero. (Apo. 2:24-26) Ma Gesù el ga dito che arquanti fradei de Pèrgamo i era drio far un bruto sbàlio parché i era drio insegnar robe che le podaria finir cola union dela congregassion. (Apo. 2:14-16) Par quela che Gesù el ga dito che i fradei che i ndea drio a questi apòstati i gavea de ciamarse grami. Cossa che imparemo? No ghemo mai de ndar drio a quel che i apòstati i dise. Ghemo de star pròpio atenti parché lori i fà finta de creder nela Bìblia, ma no i fà quel che la  dise. (2 Tim. 3:5) Alora, ghemo de studiar tanto la Bìblia par esser boni de mai ndar drio a quel che i apòstati i dise. — 2 Tim. 3:14-17; Giuda 3, 4.

10. Cossa che ancora podemo imparar de quel che Gesù el ga dito ai fradei de Pèrgamo e Tiatira?

¹⁰ Ghemo de star distante e odiar tuto quel che l’è imoral. Gesù el ga anca dito che i fradei de Pèrgamo e Tiatira i era drio acetar robe imorai. (Apo. 2:14, 20) Cossa che imparemo? Anca se semo drio servir a Geovà fà tanti ani e ghemo arquanti privilegi, no ghemo mai de pensar che Geovà el ndarà acetar el nostro laoro a lu se femo robe imorai. (1 Sam. 15:22; 1 Pie. 2:16) Le persone del mondo le ze drio far robe cada volta pi sbaliade, ma Geovà el speta che i so servi i fae sempre quel che l’è giusto. — Efe. 6:11-13.

11. Cossa che ghemo imparà fin adesso? (Vedi anca el quadro “ Che robe ghemo imparà?”)

¹¹ Cossa che ghemo imparà fin adesso? Ghemo visto che l’è tanto importante adorar a Geovà dela maniera giusta. Ghemo anca imparà che se semo drio far qualcossa sbaliada, ghemo de suito fermarse de farla par assar Geovà contento. (Apo. 2:5, 16; 3:3, 16) Vedemo adesso che nantra roba Gesù el ga dito ale congregassion.

12. Cossa che podemo imparar con quel che Gesù el ga dito ai fradei de Smirna e Filadèlfia? (Apocalisse 2:10)

¹² Ndemo veder adesso quel che Gesù el ga dito ale congregassion de Smirna e Filadèlfia. Lu el ga dito che i fradei no i gavea de spaurarse quando i nemighi i ghe vegnesse contra, parché Geovà el ndaria benedirli se i seitesse fedeli. (Ledi Apocalisse 2:10; * 3:10) Cossa che imparemo? Che i nemighi i ne vegnerà contra e che ghemo de esser pareciadi. (Mat. 24:9, 13; 2 Cor. 12:10) Parché che l’è importante ricordarse de questo?

13-14. Cossa che l’è drio suceder coi servi de Geovà dopo che Sàtana e i so demoni i ze stati paradi via del cielo?

¹³ Apocalisse dise che i nemighi de Dio i vegneria contra i so servi nel “giorno del Signor”, o sia, nei nostri giorni. Parché? Apocalisse capìtolo 12 dise che dopo che Gesù l’è deventà Rè, lu el ga fato guera contra Sàtana e i so demoni. (Apo. 12:7, 8) E Mighel, o sia, Gesù Cristo, el ga  vinsesto la guera e el ga parà via Sàtana e i demoni qua ala Tera. Par quela che vedemo tanto sofrimento e robe brute ancoi. (Apo. 12:9, 12) Cossa che l’è drio suceder coi servi de Dio par via de questo?

¹⁴ El libro de Apocalisse el dise che, come Sàtana no’l pol pi ndar là su nel cielo, lu el mostra tuta la so ràbia ai untadi de Dio qua nela Tera. Questi untadi i ze qua in nome del Regno de Dio e i ga el laoro de dar testimònio sora Gesù. (Apo. 12:17; 2 Cor. 5:20; Efe. 6:19, 20) Come questo l’è drio suceder?

15. (a) Chi che le ze le “due testimònie” del capìtolo 11 de Apocalisse? (b) Cossa che ga sucedesto con lore?

¹⁵ Sàtana el ga doperà i nemighi de Dio par ndar contra i fradei untadi che i tendea del laoro dei servi de Dio qua nela Tera. El libro de Apocalisse el dise che “due testimònie”, che le ze i untadi, le saria morte. * (Apo. 11:3, 7-11) Quando questo ga sucedesto? In 1918, quando oto de questi fradei i ze stati condanadi de maniera ingiusta a restar tanti ani in preson. Tanti i ga pensà che el laoro che questi fradei untadi i era drio far l’era finio.

16. (a) Cossa che ga sucedesto in marso de 1919? (b) Cossa che Sàtana no’l se ga mia fermà de far?

¹⁶ La professia del capìtolo 11 de Apocalisse anca la ga dito che le “due testimònie” suito le tornaria a viver. E questa professia la se ga realisà manco de un ano dopo che questi fradei untadi i ze stati metesti in preson. In marso de 1919, lori i ze stati liberadi dela preson, e dopo, le autorità le ze tornade indrio dele acusassion che le gavea fato contra de lori. Alora, questi fradei suito i ze tornadi a tender del laoro de predicar e insegnar. Ma sarà che Sàtana el se ga fermà de ndar contra i servi de Dio? Nò, lu l’è drio farlo cada volta de pi. (Apo. 12:15) Par quela, ne ocore gaver perseveransa e fede in Geovà. — Apo. 13:10.

17. Cossa che dele volte giuta el pòpolo de Dio?

¹⁷ El capìtolo 12 de Apocalisse dise che “la tera” la ndaria mandar do “el rio”, o sia, la perseghission. (Apo. 12:16) Questo  vol dir che el pòpolo de Dio el gavaria el aiuto de qualchedun che no’l imaginea. E l’è pròpio questo che l’è drio suceder ancoi. Dele volte, qualche parte del mondo de Sàtana le giuta el pòpolo de Dio. Par esémpio, tante volte i tribunai i desside che i fradei i pol gaver la libertà par adorar e servir a Geovà. Alora i fradei i dopera questa libertà par far el so meio nel laoro a Geovà. (1 Cor. 16:9) Che laoro l’è questo?

18. Qual che l’è el laoro pi importante che ghemo de far ancoi?

¹⁸ Gesù el ga dito che i servi de Geovà i ndaria predicar le bone notìssie in tuta la Tera vanti del fin. (Mat. 24:14) Ma lori i gavaria el aiuto de un o de arquanti àngeli. Questi àngeli i ga “bone notìssie eterne par proclamar a quei che i vive nela tera, a cada nassion, tribo, léngua e pòpolo”. — Apo. 14:6.

19. Che nantra roba parlemo ale persone?

¹⁹ I servi de Dio i predica le bone notìssie, ma anca i giuta i àngeli a far el laoro che l’è in Apocalisse capìtoli 8 al 10. In questo laoro, i àngeli i dise che sucederà arquante robe brute a quei che no i vol servir a Dio. Par quela, quel che le Testimònie de Geovà le parla ale persone l’è come “sassi de graniso e fogo” parché le parla che Dio el ndarà giulgar el mondo rugno de Sàtana. (Apo. 8:7, 13) Le persone le ga de saver che l’è darente e che le ga de far i cambiamenti nela so vita par salvarse nel Armagedon. (Sof. 2:2, 3) Ma come no ghe piase quel che le scolta, ne ocore coraio par parlarghe. E nela granda tribolassion, gavaremo de parlarghe sora el giulgamento che Geovà el ghe darà. — Apo. 16:21.

20. Cossa che ndaremo imparar nei pròssimi due studi?

²⁰ Noantri ghemo de seitar a obedir a quel che dise in Apocalisse parché le so professie le ze drio realisarse ancoi e noantri femo parte de lore. (Apo. 1:3) Ma come podemo seitar a predicar con coraio e perseverar quando i nemighi i ne vien contra? Nei pròssimi due studi, ndaremo imparar robe che le ne darà de pi coraio. Prima, ndaremo imparar quel che el libro de Apocalisse el parla sora i nemighi de Dio, e dopo che benedission noantri gavaremo se seitemo fedeli.