1. Come podemo esser felici?

 GEOVÀ el vol che semo felici. Savemo de questo parché la alegria la fà parte del fruto del spìrito santo. (Gàl. 5:22) Come la Bìblia la dise che ghen’è de pi felicità in dar, semo felici quando femo el nostro meio par predicar e par giutar i altri. — Ati 20:35.

2-3. (a) De acordo con Gàlati 6:4, che due robe pol giutarne a seitar contenti nel laoro a Geovà? (b) Cossa che ndaremo veder in questo stùdio?

² El apòstolo Paolo el ga dito che ghen’è due robe che pol giutarne a seitar felici. (Ledi Gàlati 6:4. b) La prima roba la ze de far el nostro meio a Geovà. Sicuro che se semo drio far el nostro meio, restaremo contenti. (Mat. 22:36-38) La seconda roba la ze de no far comparassion coi altri. Fursi ghemo una bona salute, stùdio e arquante bele abilità, ma tuti noantri ghemo de ringrassiar a Geovà par quel che semo boni de far. Ghemo de ricordarse che tuto quel che ghemo e che savemo far i ze presenti de Geovà. Ma quando vedemo che un fradel l’è pi bravo che noantri nela predicassion, ghemo de restar contenti che lu l’è drio farlo par lodar a Geovà, e nò par farse veder. Se pensemo cossita, ndaremo imparar del bel esémpio dei altri invesse de far competission.

³ In questo stùdio, ndaremo veder cossa che podemo far se restemo desanimadi parché no semo boni de  far quel che volarìssino a Geovà. Ndaremo anca veder come podemo doperar le nostre abilità nel laoro a Geovà e come el esémpio dei altri el pol giutarne a farlo.

4. Cossa che pol assar arquanti fradei desanimadi? Parla de un esémpio.

⁴ Arquanti no i ze boni de far quel che ghe piaseria a Geovà par via de una malatia o dela so età. Varda el esémpio de Carol. Ela la era drio servir ndove ghen’era de pi bisogno. Lì, la gavea 35 studi e la era drio giutar tante persone a batesarse. Sicuro che la era drio laorar tanto par Geovà. Ma dopo de un tempo, la ze restada malada e ghe ga tocà restar quasi sempre casa. Ela la ga dito: “Mi sò che par via dela me malatia no son pi bona de laorar come i altri. Par quela, me sento che no son una bona serva de Geovà come lori. Mi resto tanto disgustada parché seito a pensar in quel che me piaseria far. No l’è mia fàcile ndar avanti.” Carol ancora la vol far el so meio a Geovà e questo l’è pròpio bon. Podemo esser sicuri che Geovà el dà tanto valor a quel che la ze bona de far.

5. (a) Cossa ghemo de ricordarse se pensemo che femo massa poco par Geovà? (b) De acordo coi ritrati, come che un fradel el ga fato sempre el so meio a Geovà?

⁵ Fursi anca ti te senti desanimà parché no te sì bon de far quel che te piaseria a Geovà. Fursi te te domandi: ‘Cossa che Geovà el vol che mi fao?’ Geovà el vol che te fae el to meio. Metemo dir che una sorela de 80 ani la ze disgustada parché no la ze bona de far quel che la fea quando la gavea 40 ani. E anca che la sìpia drio far el so meio, la pensa che Geovà no l’è mia contento. Ma sarà che l’è pròpio cossita? Nò, parché la ga fato el so meio nel passà e la ze ancora drio farlo. Alora, cossa ghemo de far se scominsiemo a pensar che femo massa poco par Geovà? Ghemo de ricordarse che l’è lu che el dise se quel che femo l’è bon o nò. Alora se femo el nostro meio, podemo esser sicuri che Geovà el resta tanto contento!” — Vedi anca Mateo 25:20-23.

6. Cossa che podemo imparar col esémpio de Maria?

⁶ L’è pi fàcile che se sentimo felici quando pensemo in quel che podemo far invesse de quel che no semo boni de far. Varda el esémpio de una sorela de nome Maria. Ela no la ze bona de far tanto nela predicassion parché la ga una malatia. Nel scomìnsio, la restea tanto disgustada e la pensea che no la era bona de far pi gnente. Alora la ga scominsià a giutar una sorela che la gavea de restar sempre in leto. Maria la ga dito: “Noantri predicheino par telèfono e scriveino carte. Tute le volte che noantri laoreino insieme, mi restea tanto contenta de giutarla.” Cossa che imparemo col esémpio de Maria? Ndaremo esser pi contenti se pensemo in quel che podemo far, invesse de quel che no semo boni. Adesso, ndaremo veder cossa podemo far se ghemo una abilità o se podemo laorar de pi par Geovà.

7. Che consìlio el apòstolo Piero el ga dato?

⁷ Nela prima carta che Piero el ga scrito, lu el ga incoraià i fradei a doperar le so abilità par incoraiar un al altro. Piero el ga dito: “Cada un el ga de doperar la abilità che Dio el ghe ga dato  par servir ai altri. Cossita, valtri ndaré doperar ben la bontà imèrita che Dio el mostra.” (1 Pie. 4:10) No ghemo de assar de doperar le nostre abilità parché pensemo che i altri i va restar desanimadi o con invìdia. Se fessino cossita, assarìano de far el nostro meio a Geovà.

8. De acordo con 1 Corinti 4:6, 7, parché che no ghemo de doperar le nostre abilità par farse veder?

⁸ L’è vera che ghemo de doperar le nostre abilità par servir a Geovà. Ma no ghemo mia de doperarle par farse veder. (Ledi 1 Corinti 4:6, 7. c) Metemo dir che te sì bravo de scominsiar studi bìblichi. Alora, te ghè de doperar ben questa abilità sensa farte veder. Imagina che te sì nela predicassion, e te ghè scominsià a studiar la Bìblia con una persona. Te sì premoso de contar ai fradei che i ze drio predicar insieme. Ma vanti che te parli, nantra sorela la conta che la ze stata bona de assar una revista con una persona. Cossa saria meio che te fessi? Fursi saria meio che te parlessi del to stùdio nantra ora. Le vera che te ndarissi incoraiar i fradei, ma no te vol far la sorela pensar che te ghè fato un laoro meio che ela. Alora, se te assi par parlar nantro giorno, te ndarè mostrar bontà. Ma ricòrdate che no te ghè de fermarte de scominsiar studi biblichi. Te ghè questa bela abilità e Geovà el vol che te la doperi!

9. Come ghemo de doperar le nostre abilità?

⁹ Ghemo de ricordarse che le nostre abilità le ze un presente de Geovà. Par quela, ghemo de doperarle par incoraiar i fradei e nò par farse veder. (Fil. 2:3) Cossita, ndaremo restar contenti parché saremo drio doperar la nostra forsa e abilità par lodar a Geovà e nò par proar mostrar che semo meio che i altri.

10. Parché che no ghemo de far comparassion?

¹⁰ Cossa pol suceder se femo comparassion? Ndaremo pensar che femo arquante robe meio che i altri. Metemo dir che un fradel l’è tanto bravo par far discorsi. Ma dopo quando lu l’è drio vardar el discorso de nantro fradel, lu el scomìnsia a pensar che l’è pi bravo che questo  fradel. L’è vera che questo fradel no l’è tanto bravo de far discorsi, ma el trata tanto ben i fradei e l’è bravo de predicar e insegnar i so fioi. Noantri volemo dar tanto valor a tuti i fradei che i dopera le so abilità par servir a Geovà e giutar un al altro.

11. Parché volemo sforsarse par far compagno a Gesù?

¹¹ No ghemo mia de far comparassion coi altri, ma podemo imparar tanto del esémpio de servi fedeli de Geovà. E el meio esémpio che ghen’è l’è de Gesù Cristo. Anca se lu el fusse perfeto, podemo imparar tanto dele so bele qualità e dele robe che el fea. (1 Pie. 2:21) Quando se sforsemo tanto par far compagno a Gesù, deventemo bravi servi de Geovà e insegnemo cada volta meio.

12-13. Cossa imparemo del esémpio de Davi?

¹² Nela Bìblia, ghen’è tanti bei esempi che podemo far compagno. (Ebr. 6:12) Un de questi esempi l’è del rè Davi. Geovà el ga dito sora lu: “Lu l’è un omo che el assa el me cuor contento.” (Ati 13:22) Ma come Davi no l’era perfeto, el ga fato bruti pecati. Alora, parché che ancora podemo dir che lu l’è un bel esémpio? Parché quando Davi l’è stà dissiplinà, lu el ga capio che el gavea fato una roba tanto bruta, e el se ga ciamà gramo. Par quela che Geovà lo ga perdonà. — Sal. 51:3, 4, 10-12.

¹³ Quando studiemo sora quel che ga sucedesto con Davi, podemo domandarse: ‘Cossa che mi fao quando qualchedun el me dà un consìlio? Son de acordo che go sbalià? O ghe dao la colpa ai altri o proo spiegar parché che go fato quel lì? Me sforso par no far i medèsimi sbali?’ Podemo farse domande cossita e tante altre quando semo drio studiar sora servi de Dio del passà. Par esémpio: ‘Sarà che mi son drio infrontar un problema compagno de lori? Che qualità lori i ga mostrà? Come posso far compagno a lori?’

14. Come che el esémpio dei nostri fradei pol giutarne?

¹⁴ Noantri anca podemo imparar tanto del esémpio de tuti i fradei dela congregassion. Fursi, un fradel l’è drio tribolar nela scola parché i so coleghi i vol che el fae qualcossa de sbalià, la so fameia la  proa intrigarlo de servir a Geovà o l’è drio infrontar un problema de salute. Che qualità che lu l’è drio mostrar che te volarissi far compagno? Sicuro che el esémpio dei nostri fradei ndarà giutarne a saver cossa far par infrontar i nostri problemi. Restemo tanto contenti de gaver intrà de noantri bei esempi cossita. — Ebr. 13:7; Tiago 1:2, 3.

15. Che consìlio de Paolo pol giutarne anca ancoi?

¹⁵ Noantri ghemo de sforsarse par viver in pace e union con tuti nela congregassion. Varda el esémpio dei primi dissìpoli de Gesù. Lori i gavea abilità e i fea laori difarenti nela congregassion, ma no i fea competission intrà de lori. (1 Cor. 12:4, 7-11) Paolo el ga incoraià i efesi a sforsarse par esser bravi fradei. Lu el ga dito: ‘Quando cada parte la laora polito, la giuta a far cresser el corpo.’ (Efe. 4:1-3, 11, 12, 16) I fradei che i ga fato cossita i ga giutà la congregassion a viver in pace e union. Sicuro che vedemo fradei cossita anca nele congregassion de ancoi.

16. Cossa volemo sforsarse par far? (Ebrei 6:10)

¹⁶ Invesse de far comparassion coi altri, sfòrsate par far compagno al esémpio de Gesù e de servi fedeli de Geovà del passà e de ancoi. Se te seiti a far el to meio, te pol esser sicuro che Geovà el resta tanto contento e che ‘lu no l’è mia ingiusto par desmentegarse del to laoro’. (Ledi Ebrei 6:10. d) Par quela, seita a servir a Geovà contento!