Quanto de pi vedemo le qualità de una persona, de pi la cognossemo. Cossita, la nostra amicìssia con ela la deventa cada volta pi granda. Dela stessa maniera, quanto de pi savemo dele qualità de Geovà, de pi lo cognossemo e la nostra amicìssia con lu la resta cada volta pi granda. Dio el ga tante qualità, ma ghen’è quatro de lore che se vede de pi: el so poder, el so saver, la so giustìssia e el so amor.

“Ò, Sovrano Signor Geovà! Ti te ghè fato el cielo e la tera par meso del to grando poder.” — GEREMIA 32:17.

Quel che Dio el ga creà el prova che lu el ga tanto poder. Par esémpio, quando te sì fora de casa nte un giorno caldo, cossa che te senti nela to pele? El caldo del Sol. Ma in verità, ti te senti un poco del poder de Dio. E quanta forsa galo el Sol? I dise che el caldo ntel sentro del Sol l’è de 15 milioni de gradi. A cada secondo, vien fora del Sol una forsa come se la fusse de milioni de bombe nuclear.

Ma el nostro Sol l’è pìcolo se comparà con milioni de stele che ghen’è. Par esémpio, ghen’è una stela che la ze pròpio granda. I sientisti i dise che la ze 1.700 volte pi granda che el Sol. Se questa stela la fusse ntel posto del Sol, la Tera e altri pianeti, come Marte e Giupiter, i ghe staria rento. Cossita capimo meio quel che Geremia el volea dir quando el ga dito che Geovà Dio el ga fato i cieli e la Tera col so grando poder.

 Come che el poder de Dio el pol giutarne? La vita dele persone la depende de quel che Dio el ga creà, come el Sol e le altre robe che ghen’è qua nela Tera. Anca, Dio el dopera el so poder par giutar cada persona. Come? Quando Gesù l’era qua nela Tera, Dio el ghe ga dato poder par far miràcoli. La Bìblia la dise: “Adesso i orbi i ghe vede, i soti i camina, i leprosi i ze stati curadi, i sordi i scolta, i morti i ze stati ressussitadi e i poareti i ze drio scoltar le bone notìssie.” (Mateo 11:5) Ma cossa che Dio el fà par noantri ancoi? La Bìblia la mostra che “lu el dà poder a quel che l’è straco”. Anca la dise che “quei che i speta in Geovà i gavarà forsa nantra volta”. (Isaia 40:29, 31) Anca el pol darne “el poder che l’è pi grando del normal” par giutarne a infrontar le dificoltà dela vita. (2 Corinti 4:7) Come l’è bel esser amigo de un Dio che el dopera el so grando poder par giutarne!

“Quante le ze le to òpere, ò Geovà! Te ghè fato tuto col to grando saver”. — SALMO 104:24.

De pi che imparemo de quel che Dio el ga creà, de pi restemo maraveiadi col so saver. Ghen’è fin un tipo de stùdio, ciamà biomimètica, che i sientisti i fà studi dela creassion de Geovà par far robe someiante. Pol esser de una pìcola roba fin un avion.

El esémpio pi maraveioso del saver de Dio l’è el nostro corpo. Par esémpio la vita la scomìnsia con una sèlula fecondada, che la ga tute le informassion che la ga de bisogno. Questa sèlula la se spartisse in tante altre sèlule someiante. Ma nel tempo giusto, lore le deventa tanti tipi de sèlule difarente, come le sèlule del sangue, dei nervi e dei ossi. Poco tempo dopo, vien fora i òrgani che i scomìnsia a laorar e sol nove mesi dopo, quela sèlula la deventa un picinin con bilioni de sèlule. Par quela, tanti i ze de acordo con quel che un scritor dela Bìblia el ga dito: “Mi te lodo parché mi son stà fato de maniera maraveiosa, de una maniera tanto bela.” — Salmo 139:14.

Come che el saver de Dio el pol giutarne? El nostro Creador el sa quel che ghemo de bisogno par esser felici. Lu el dopera el so saver e la so cognossensa par darne consili par meso dela Bìblia. Par esémpio, la Bìblia la dise: “Seité . . . perdonarve del tuto un al altro.” (Colossensi 3:13) Sarà che questo consìlio l’è bon? Sicuro che si! Peschise le mostra che se perdonemo ghemo un sono meio, ghemo una pression del sangue meio, ghemo manco rìscio de gaver depression o altre malatie. Dio l’è come un bon amigo che se preocupa con noantri e ne dà sempre boni consili. (2 Timòteo 3:16, 17) Saria bel gaver un amigo cossita, mia vera?

“Geovà el ama la giustìssia.” — SALMO 37:28.

Dio sempre el fà quel che l’è giusto. La Bìblia la dise: “El vero Dio mai el fà robe rugne, el Tuto Poderoso mai el fà robe sbaliade!” (Giò 34:10) I so  giulgamenti i ze giusti, par quela el salmista el ga dito: ‘Te giulgarè i pòpoli con giustìssia.’ (Salmo 67:4) Persone che le fà finta esser quel che no le ze no le pol imbroiar a Geovà, parché lu “el vede el cuor”. (1 Samuel 16:7) Geovà el sa sempre quala che la ze la verità e i so giulgamenti i ze sempre giusti. Anca, Dio el vede le ingiustìssie e le robe rugne che ghen’è nel mondo e el ga prometesto che i rugni “i sarà finidi fora”. — Proverbi 2:22.

Ma Geovà no l’è un giuis rugno che sol vol castigarne. Lu el perdona i sbali dele persone. La Bìblia la dise che “Geovà l’è misericordioso e el ga compassion” fin coi rugni, se lori i se ciama grami. Questa la ze la vera giustìssia! — Salmo 103:8; 2 Piero 3:9.

Come che la giustìssia de Dio la pol giutarne? Dio no’l fà difarensa intrà una persona e nantra. El apòstolo Piero el ga dito: “Dio el trata compagno tute le persone. Alora no importa de ndove che lore le ze, parché lu el aceta tute le persone che lo rispeta e le fà quel che l’è giusto.” (Ati 10:34, 35) Questo vol dir che no importa la nostra rassa, de ndove semo, se semo studiadi o nò, se semo importanti o nò, noantri podemo esser amighi de Dio e servirlo.

Dio el vol che capimo come che lu el fà le robe de maniera giusta. Par quela, el ne ga dato una cossiensa. La Bìblia la dise che la cossiensa la ze come una lege ‘scrita nel cuor’ che ‘la mostra se quel che femo l’è giusto o sbalià’. (Romani 2:15) Come che questo ne giuta? Quando la nostra cossiensa la ze ben trenada, ela la ne giuta a no far robe sbaliade. E se sbaliemo, la ne motiva a ciamarse grami e coreger quel che ghemo fato. Sicuro che capir come che Dio l’è giusto ne giuta tanto e restemo pi darente de lu!

“Dio l’è amor.” — 1 GIOANI 4:8.

Dio el mostra el so poder, so saver e la so giustìssia, ma la Bìblia no la dise che lu l’è poder, saver o giustìssia. La Bìblia la dise che lu l’è amor. Parché? Podemo capirlo cossita: Dio el pol far le robe parché el ga poder. La giustìssia e el so saver i guida quel che lu el fà. Ma l’è el amor che lo motiva a far le robe. Tuto quel che lu el fà l’è con amor. Vedemo arquanti esempi.

Dio no’l ga creà tuto parché ghe manchea qualcossa. El amor lo ga motivà a crear persone nela Tera e àngeli in cielo, e lu el tende de tuti lori. L’è stà anca par amor che lu el ga parecià la Tera par esser un bel posto de star par le persone. Lu el seita mostrar amor a tuti, “parché lu el fà vegner el sol sora i rugni e sora i boni e el fà piover sora i giusti e sora i ingiusti”. — Mateo 5:45.

Geovà el ne vol tanto ben e “el ga misericòrdia”. (Tiago 5:11) Lu el ghe piase de tuti quei che i vol cognosserlo e rivarse darente de lu. Dio l’è atento a cada persona. E ‘lu el tende de ti’. — 1 Piero 5:7.

Come che el amor de Dio el pol giutarne? Pensa in come che l’è bel quando va do el Sol e come che l’è bel veder un toseto drio rider. E che bel saver che la to fameia la te vol ben! Sarà che ghemo bisogno de queste robe par viver? Nò. Ma te sì de acordo che queste robe le fà la nostra vita pi bela, mia vera?

Ma Geovà el ne mostra amor de nantra maniera: par meso dela orassion. La Bìblia la ne dise: “No sté preocuparve de gnente, ma domandé el aiuto de Dio in tute le cose par meso de orassion e sùpliche, insieme a ringrassiamento.” Dio l’è come un pare amoroso e lu el vol darne el so aiuto par dàrghene fora cole nostre preocupassion, fin quele che nissuni i sa. Se femo questo, Geovà, con tuto el so amor, el ne promete che el ne dà la so pace “che la ze pi granda de quel che podemo capir”. — Filipensi 4:6, 7.

Spetemo che questa pìcola spiegassion sora le qualità de Dio, el so poder, so saver, giustìssia e amor, te gàpia giutà a capir come che Geovà l’è. Ghemo caro che te seiti a leder par saver quel che Dio el ga belche fato par ti e anca quel che el farà. Cossita te pol cognosserlo meio.