LESSION 5
Parché che Dio el ga creà la Tera?
1. Parché che Dio el ga creà la Tera?
Geovà el ga fato la Tera par i òmini. Ela la ze la nostra casa. Dio el ga creà el primo omo e la prima dona nte un bel giardin ciamà giardin del Èden. Geovà el volea che Adon e Eva e i so fioi i vivesse qua ntela Tera par sempre. (Gênesis 2:15-17) Geovà el ga creà i àngeli par viver ntel cielo. — Jó 38:4, 7. — Ledi Salmo 37:29; 115:16.
Ntel scomìnsio, sol quela parte dela tera ndove Adon e Eva i stea l’era un paradiso. Lori i gavaria fioi e impieniria la Tera. Le persone le ndaria far de tuta la Tera un paradiso. (Gênesis 1:28) La Tera mai la sarà destruta. Ela la sarà sempre la nostra casa. — Ledi Salmo 104:5.
Varda el vídeo Parché che Dio el ga creà la Tera?
2. Parché che ancoi la Tera no la ze un paradiso?
Parché Adon e Eva i ga desobedio a Dio, par quela Geovà li ga paradi fora del giardin del Èden. Lori i ga perso el Paradiso. De quel tempo fin ancoi, mai pi ga esistio un posto compagno. La Bìblia la dise che la Tera la ze piena de persone rugne. — Jó 9:24. — Ledi Gênesis 3:23, 24.
Sarà che Geovà el ga desistio de dar un paradiso par le persone viver? Nò! Lu l’è Tuto Poderoso e el farà quel che el ga dito. (Isaías 45:18) Le persone le ndarà viver par sempre ntel Paradiso ntela Tera, come gavea de esser del scomìnsio. — Ledi Salmo 37:11, 34.
3. Come che la Tera la sarà un Paradiso?
El Rè Gesù el governarà la Tera. Lu ndarà meter Sàtana in preson par mila ani. La Bìblia la dise che, in una guera ciamada Armagedon, Gesù e i so àngeli i ndarà destruser tuti quei che no i obedisse a Dio. Ma quei che i obedisse a Dio no i sarà destruti parché Gesù el tenderà de lori. Lori i viverà par sempre ntel Paradiso qua ntela Tera. — Ledi Apocalipse 20:1-3; 21:3, 4.
4. Quando che Dio el finirà col sofrimento?
Quando che Dio el finirà cola perversità e el sofrimento? Gesù el ga dato un “segnal” par giutar le persone a saver quando che el fin el saria darente. El mondo ancoi l’è tanto pericoloso e tuto quel che l’è drio suceder el mostra che semo ntel tempo del fin. — Ledi Mateus 24:3, 7-14, 21, 22.
Del cielo, Gesù el governarà la Tera durante mila ani e lu el finirà con tuto el sofrimento. (Isaías 9:6, 7; 11:9) Lu el finirà par sempre coi pecati de quei che i ama a Dio. Geovà ndarà doperar Gesù par finir cole malatie, cola morte e nissuni pi deventarà vècio. — Ledi Isaías 25:8; 33:24.
5. Chi che ndarà viver ntel Paradiso?
Ntel Salon del Regno, te cognosserè persone che le ama a Dio e che le vol imparar a far la so volontà
Quei che i obedisse a Dio i ndarà viver ntel Paradiso. (1 João 2:17) Gesù el ga mandà i so dissìpoli ndar in serca dele persone che le vol imparar sora Dio e insegnarghe a far la volontà de Dio. Ancoi milioni de persone le ze drio imparar cossa far par gaver la aprovassion de Dio. (Sofonias 2:3) Ntei Saloni del Regno dele Testimònie de Geovà, queste persone le impara adorar a Dio e esser meio sposi, spose, genitori e fioi. Lori i resta contenti cole bone notìssie che i cata ntela Bìblia. — Ledi Miqueias 4:1-4.
