1, 2. Parché la Bìblia la è un emossionante regalo de Dio?

COME ti te senti quando un amigo el te dà un regalo? Ti te resti tanto contento de saver che el se ga ricordà de ti. Alora, dopo de ringrassiarlo, te ghè una voia de verder suito el regalo.

² La Bìblia la è un regalo de Dio. La ne dà informassion che no catemo in nissun altro posto. Par esémpio, la Bìblia la dise che Dio el ga creà i cieli, la Tera, el primo omo e la prima dona. La ne dà principi che i pol giutarne quando gavemo problemi. Anca imparemo come Dio el compirà el so propòsito de far dela Tera un posto meio par viver. La Bìblia la è pròpio un emossionante regalo!

3. Cossa ti te impari quando te studi la Bìblia?

³ Se ti te seiti studiar la Bìblia, te ndarè imparar che Dio el vol esser to amigo. Quanto de pi te impari sora Lu, tanto de pi forte sarà la to amicìssia con Geovà.

4. Che informassion sora la Bìblia te ciama atension?

⁴ La Bìblia la è stata tradusida intorno de 2.800 léngue e milioni de còpie le ze state stampade. De pi de 90 par sento dele persone le pol leser la Bìblia nela so léngua. E tute le stimane de pi de 1 milion de persone le riceve una Bìblia. Sicuro che no ghen’è un libro compagno la Bìblia.

5. Parché se pol dir che la Bìblia la è “inspirada da Dio”?

 ⁵ La Bìblia la è “inspirada da Dio”. (Lesi 2 Timóteo 3:16.) Ma arquanti i pensa: ‘Se i òmini i ga scrito la Bìblia, come la pol esser de Dio?’ La Bìblia la risponde: “I òmini i ga parlà dala parte de Dio intanto che el spìrito santo li condusia.” (2 Pedro 1:21) Femo un esémpio: la nona la domanda ala so neoda par scriver un messàgio. Elo de chi sto messàgio? Dela nona, nò dela so neoda. Dela medèsima maniera, el Autor dela Bìblia l’è Dio, nò i òmini che Lu el ga doperà par ­scriver i so pensieri. La Bìblia la è pròpio “la parola de Dio”. —1 Tessalonicenses 2:13; vedi la Nota Final 2.

6, 7. Parché se pol dir che tute le parti dela Bìblia le ze d’acordo?

⁶ Se ga doperà de pi de 1.600 ani par scriver la Bìblia. I so scritori i ga vivesto in tempi difarenti. Arquanti i era studiadi e altri nò. Par esémpio, un l’era dotor, altri i era coloni, pescadori, pastori, profeti, giuisi e rè. Ancora cossita, tute le parte dela Bìblia le ze d’acordo. No la dise una roba in una parte e nantra roba in nantra parte. *

⁷ El scomìnsio dela Bìblia el spiega come i ga scominsià i problemi ntel mondo. El fin dela Bìblia el dise come Geovà ndarà risolver sti problemi e el tornarà la Tera un paradiso. La Bìblia la parla sora tanti mila ani de stòria e la mostra che el propòsito de Dio ndarà realisarse.

8. Che esempi i mostra che la Bìblia la è d’acordo cola siensa?

⁸ La Bìblia no la è stata scrita par insegnar siensa o par esser doperada come un libro de scola, ma quando la parla sora temi sientìfichi la è sempre esata. Questo l’è quel che se speta de un libro che l’è de Dio. Par esémpio, ntel libro de Levìtico Dio el ga dato istrussion sora come i israeliti i podea finir cola trasmission dele malatie. Queste robe le ze state scrite tanto tempo vanti che i òmini i scoprisse che le bactèrie e i vìrus i causa malatie. La Bìblia la insegna nantra verità: la tera la stà su nel gnente. (Jó 26:7) E quando tute le persone le credea che la tera la era  piana, la Bìblia belche la disea che la era tonda. —Isaías 40:22.

9. Cossa la onestà dei scritori dela Bìblia la ne giuta a capir?

⁹ Quando la Bìblia la parla de stòria, la è sempre esata. Ma tanti libri de stòria no i ze esati parché i so scritori no i ze stati onesti. Par esémpio, tante volte no i ga contà i fracassi che el so pòpolo el ga bio ­ntela guera. Invesse, i scritori dela Bìblia i ze stati onesti fin quando i ga scrito sora i fracassi de Israel. I ga scrito anca sora i so sbali. Par esémpio, ntel libro de Nùmeri, Moisè el dise che el ga fato un bruto sbàlio e par quel Dio lo ga dissiplinà. (Números 20:2-12) La onestà dei scritori dela Bìblia la è una prova che la Bìblia la vien pròpio da Dio. Par quela podemo fidarse dela Bìblia.

10. Parché i consili dela Bìblia i ze boni fin ancoi?

¹⁰ La Bìblia la è “inspirada da Dio e ùtile par insegnar, par coreger, par indrissar le cose, par dissiplinar nela giustìssia”. (2 Timóteo 3:16) Sicuro che i consili dela Bìblia i ze boni fin ancoi. Geovà l’è el nostro Creador, par quel Lu el capisse ben i nostri pensieri e i nostri sentimenti. Lu el ne cognosse meio che noantri stessi e el vol la nostra felicità. Dio el sa quel che l’è bon e quel che l’è mal par noantri.

11, 12. (a) Che boni consili Gesù el ga dato nei capìtoli 5 a 7 de Mateo? (b) Che altre robe podemo imparar dela Bìblia?

¹¹ Nei capìtoli 5 a 7 de Mateo, Gesù el ga dato tanti boni consili sora come esser felici, darse ben coi altri, far orassion e come considerar i soldi. El ga dato  sti consili 2.000 ani indrio, ma ancora i ga la medèsima forsa e valor pràtico.

¹² Ntela Bìblia, Geovà anca el ne insegna principi che i ne giuta a gaver una fameia felice, a esser boni laoradori e a viver in pace con tuti. I principi bìblichi i pol sempre giutarne no importa chi semo, ndove semo drio viver o qual sia el problema che gavemo. —Lesi Isaías 48:17; vedi la Nota Final 3.

13. Cossa Isaia el ga dito che sucederia cola cità de Babilònia?

¹³ Tante professie dela Bìblia le ze belche sucedeste. Par esémpio, Isaia el ga profetisà che Babilònia la saria destruta. (Isaías 13:19) E la professia la è sucedesta cossita come el ga parlà. La cità la gavea la protession de grandi portoni e de un rio. Ma Isaia el ga predito che el rio el restaria vodo e i ­portoni i restaria verti. I nemighi i ndaria rento dela cità sensa barufar. Isaia anca el ga profetisà el nome de quel che el conquistaria Babilònia: Ciro. —Lesi Isaías 44:27–45:2; vedi la Nota Final 4.

14, 15. Come la è sucedesta la professia de Isaia?

¹⁴ Dusento ani dopo che la professia la è stata scrita, un esèrcito el se ga parecià par atacar Babilònia. Chi l’era el comandante de sto esèrcito? Ciro, el rè dela Pèrsia, pròpio come la professia la gavea dito. L’era tuto a posto par suceder la altra parte dela ­professia.

¹⁵ Quela note i abitanti de Babilònia i era drio far festa. Lori i se sentia sicuri parché i gavea la protession dei grandi portoni e del rio. Fora dela  cità, Ciro e el so esèrcito i gavea desvià le aque par sbassar el rio. Cossita, lori i ze stati boni traversarlo. Ma come el esèrcito el podaria ndar rento dela cità? I portoni i ze restadi verti, giusto come la professia la gavea dito. Cossita i nemighi i ga conquistà la cità sensa barufar.

16. (a) Cossa Isaia el ga profetisà sora el futuro de Babilònia? (b) Come savemo che la professia de Isaia la se ga realisada?

 ¹⁶ Isaia el ga profetisà che nissuni mai pi ndaria viver in Babilònia. El ga scrito: “No sarà mai pi abitada, no sarà mai pi un posto par viver de generassion in generassion.” (Isaías 13:20) Come la se ga realisada? Ntel posto ndove la era Babilònia, intorno de 80 km al sud de Bagdad, Iraq, le ze solche rovine. Fin ancoi, nissuni i vive là. Geovà el ga scoà via Babilònia “cola scoa dela destrussion”. —Isaías 14:22, 23. *

17. Parché podemo creder in tute le promesse de Dio?

¹⁷ Podemo creder in quel che la Bìblia la dise sora el futuro parché tante professie le se ga realisade. Podemo esser sicuri che  Geovà ndarà realisar la so promessa de far dela Tera un paradiso. (Lesi Números 23:19.) Noantri gavemo la speransa dela “vita eterna che Dio, che no’l pol dir busie, el ga promesso tanto tempo indrio”. —Tito 1:2. *

18. Cossa Paolo el ga scrito sora “la parola de Dio”?

¹⁸ Gavemo imparà che no ghen’è nantro libro compagno la Bìblia. La è armoniosa, e mai la sbàlia quando la parla sora la siensa o la stòria. La Bìblia anca la dà boni consili e la parla de tante professie che le ze belche sucedeste. Ma la fà ancora de pi. El apòstolo Paolo el ga scrito: “La parola de Dio la è viva e la ga poder.” Cossa vol dir questo? —Lesi Hebreus 4:12.

19, 20. (a) Come la Bìblia la pol giutarte a saver che tipo de persona pròpio ti te sì? (b) Come ti te pol dimostrar che te sì grato a Dio che te ga dato la Bìblia?

¹⁹ La Bìblia la pol cambiar la to vita. La te giuta a saver che tipo de persona pròpio ti te sì e a capir i to pensieri e sentimenti pi ìntimi. Par esémpio, noantri pensemo che amemo a Dio. Ma par provar sto amor, ne toca praticar quel che la Bìblia la dise.

²⁰ Sicuro che la Bìblia la è de Dio. Lu el vol che ti te la lesi, la studi e la ami. Seita studiar la Bìblia e cossita te dimostri che te sì grato a Dio. Alora te ndarè capir el propòsito de Dio par la umanità. Ntel pròssimo capìtolo, ndemo imparar de pi sora sto propòsito.