Muṅwe muswa ane a pfi Will o ri: “Ni nga borea musi ni tshi vhala Bivhili arali ni sa ḓivhi nḓila yo teaho ine na tea u i vhala ngayo.”

Naa ni a ṱoḓa u ḓivha tshiphiri tshine tsha ḓo ni thusa uri ni ḓiphiṋe musi ni tshi vhala Bivhili? Heyi thero i ḓo ni thusa.

•  Itani uri Maṅwalo a vhe na vhutshilo

•  Itani ṱhoḓisiso!

•  Zwine vhaṅwe vhaswa vha amba

Ivhani tshipiḓa tsha zwine na khou zwi vhala. Ni nga zwi ita nga heyi nḓila:

1. Nangani mafhungo a Bivhili ane na khou ṱoḓa u guda nga hao. Ni nga nanga mafhungo a tshiṅwe tshi itea Bivhilini kana tshiṅwe tshipiḓa tsha Evangeli kana ḽinwe ḽa matambwa a muvhalo wa Bivhili a re kha jw.org.

2. Vhalani eneo mafhungo. Ni nga a vhala ni noṱhe kana na a vhalela nṱha na khonani dzaṋu kana na vha muṱani wahaṋu. Muṅwe a nga vhala tshipiḓa tsha muanetsheli, vhaṅwe vha vhala zwiṅwe zwipiḓa.

3. Lingedzani zwi tevhelaho:

   • Olani zwifanyiso zwine zwa sumbedza zwine zwa khou itea. Kana ni ole zwifanyiso zwi sumbedzaho zwiitea nga u tevhekana hazwo. Ni ṅwale maipfi ane a ṱalusa zwine zwa khou itea.

   • Ṅwalani fhasi. Musi ni tshi vhala nga ha muthu a fhulufhedzeaho, ṅwalani nga ha zwine a vha zwone, zwe a zwi ita na nḓila ye a fhaṱutshedzwa ngayo.

   • Itani uri zwine na khou zwi vhala zwi nge mafhungo. Ambani nga ha eneo mafhungo ni tshi sedza zwithu nga mavhonele a vhabvumbedzwa vho fhamabanaho. Ni nga vhudzisa na mbudziso kha vhe na vha nanga uri vha vhe vhatambi-dendele na dziṱhanzi.

   • Arali muṅwe mubvumbedza o ita phetho i si yavhuḓi, humbulani nga ha zwe zwa vha zwi tshi ḓo vha zwo itea arali o ita phetho yavhuḓi. Sa tsumbo, haseledzani nga ha musi Petro a tshi landula Yesu. (Marko 14:66-72) Petro o vha a tshi nga vha o ita mini kha honovhu vhuimo?

   • Arali ni tshi zwi takalela, lingedzani u ḓiṅwalela ḽitambwa ḽanu ḽo thewa kha mafhungo a re Bivhilini. Ni katela na zwe na zwi guda kha eneo mafhungo.​—Vharoma 15:4.

Arali na ṱolisisa mafhungo nga vhuronwane, ni nga fukula madzanga o dzumbiwaho. Ni nga guda zwithu zwa ndeme vhukuma kha ipfi ḽithihi kana mavhili a re kha mafhungo a Bivhili ane na khou vhala nga hao.

Sa tsumbo, vhambedzani Mateo 28:7 na Marko 16:7.

•   Ndi ngani Marko o amba uri Yesu u ḓo ḓivhonadza kha vhafunziwa vhawe “na Petro”?

• Thuso: Marko o vha e siho musi zwi tshi ambiwa; zwi vhonala uri u vhudzwa nga Petro.S

• Dzanga ḽo dzumbamaho: Ndi ngani Petro o khuthadzwa nga u pfa uri Yesu u khou ṱoḓa u dovha a mus vhona? (Marko 14:66-72) Yesu o zwi sumbedza hani uri u khonani ya vhukuma ya Petro? Ni nga edzisa hani Yesu na u vha khonani ya vhukuma kha vhaṅwe?

Ni ḓo ḓiphiṋa nga u vhala Bivhili arali na ita uri Maṅwalo a vhe na vhutshilo na u ita ṱhoḓisiso.