Hai. Bivhili i amba uri ri tea u rabela Mudzimu fhedzi dzinani ḽa Yesu. Yesu o vhudza vhafunziwa vhawe uri: “Inwi-ha ni tshi rabela ni ri: ‘Khotsi ashu wa ṱaḓulu, dzina ḽau kha ḽi vhe ḽikhethwa.’” (Mateo 6:9, Bivhili Khethwa) Ho ngo vhudza vhafunziwa vhawe uri vha rabele vhakhethwa, vharuṅwa kana muṅwe muthu.

 Zwiṅwe hafhu, Yesu o vhudza vhatevheli vhawe uri: “Nḓila ndi Nṋe; ndi Nṋe ngoho; ndi Nṋe vhutshilo; a hu na ane a nga swika ha Mudzimu Khotsi arali a songo dzhena nga Nṋe.” (Yohane 14:6; Bivhili Khethwa) Ndi Yesu fhedzi o ṋewaho ndugelo nga Mudzimu ya u ri ambelela.—Vhahevheru 7:25.

Ndi nga rabela Mudzimu nda rabela na vhakhethwa?

 Kha Milayo ya Fumi, Mudzimu o ri: “Nṋe, Murena, Mudzimu wau ndi Mudzimu a re na vivho.” (Ekisoda 20:5; NAB) Mudzimu u na vivho nga nḓila-ḓe? Ṱhaluso i re magumoni a siaṱari ya yeneyi ndimana kha New American Bible i amba uri u “ṱoḓa u tshi ḓikumedza tshoṱhe khae.” Mudzimu u ṱoḓa ri tshi ḓikumedza tshoṱhe khae, u gwadamela ene na u rabela ene fhedzi.—Yesaya 48:11.

 Ri vhaisa mbilu ya Mudzimu musi tshis rabela muṅwe muthu, vhakhethwa kana vharuṅwa. Musi muapostola Yohane a tshi lingedza u gwadamela muruṅwa, o mu thivhela, a ri: “U songo ralo! ndi̗ mulanda nga iwe, ndi̗ muṅwe nga vharathu vhau vha re na vhuṱanzi ha Yesu. Rabela Mudzimu!” (Nzumbululo 19:10; Bivhili ya 1936)