Naa Mudzimu U Fhethu Hoṱhe?
Bivhili i a fhindula
Mudzimu u a kona u vhona zwithu zwoṱhe na u ita zwithu huṅwe na huṅwe hune a funa. (Mirero 15:3; Vhaheberu 4:13) Naho zwo ralo, Bivhili a i funzi uri Mudzimu u fhethu hoṱhe—kha zwithu zwoṱhe. Nṱhani hazwo, i funza uri ndi muthu nahone u na fhethu hune a dzula hone.
Tshivhumbeo tsha Mudzimu: Mudzimu ndi muthu wa lwa muya. (Yohane 4:24) Vhathu a vha koni u mu vhona. (Yohane 1:18) Mabono a re Bivhilini nga ha Mudzimu a mu sumbedza sa ane a tou vha na hune a dzula hone. Ha vhuyi a sumbedzwa sa ane a dzula fhethu hoṱhe.—Yesaya 6:1, 2; Nzumbululo 4:2, 3, 8.
Hune Mudzimu a dzula hone: Mudzimu u dzula fhethu ha lwa muya, ho fhambanaho na hune tsiko ya dzula hone. Mudzimu u na ‘khuluṋoni yawe ngei ṱaḓulu.’ (1 Dzikhosi 8:30) Bivhili i amba nga tshiitea tshe khatsho zwivhumbiwa zwa muya zwa “ḓa u ima phanḓa ha Yehova,” a zwine zwa sumbedza uri Mudzimu u na hune a dzula hone.—Yobo 1:6.
Arali Mudzimu e si fhethu hoṱhe, naa u na ndavha na nṋe nga ho livhaho?
Ee. Mudzimu u na ndavha vhukuma na vhathu. Naho Mudzimu a tshi dzula fhethu ha lwa muya, u a vhona vha re ḽifhasini vhane vha ṱoḓa u mu takadza nga ngoho nahone u a vha lwela. (1 Dzikhosi 8:39; 2 Koronika 16:9) Ṱhogomelani nḓila ine Yehova a sumbedza ngayo uri u na ndavha na vhashumeli vhawe vha fulufhedzeaho:
Musi ni tshi rabela: Yehova u a pfa thabelo yaṋu zwenezwo musi ni tshi khou rabela.—2 Koronika 18:31.
Musi no tsikeledzea: “Yehova u sendela ha vha dzimbilu dzo vunḓekanaho, u tshidza vha mimuya yo huvhalaho.”—Psalme ya 34:18.
Musi ni tshi ṱoḓa vhulivhisi: Yehova u ḓo ni ‘ṋea ṱhalukanyo na u ni funza” a tshi shumisa Ipfi ḽawe, Bivhili.—Psalme ya 32:8, NW.
Mazwifhi nga ha u vha fhethu hoṱhe
Mazwifhi: Mudzimu u fhethu hoṱhe.
Ngoho: Mudzimu ha dzuli kha ḽifhasi. (1 Dzikhosi 8:27) Ndi ngoho uri dziṋaledzi na yoṱhe iṅwe tsiko zwi “amba vhurena ha Mudzimu.” (Psalme ya 19:1) Naho zwo ralo, Mudzimu ha dzuli vhukati ha tsiko yawe, u fana na musi muoli a sa ḓidzhenisi kha zwe a ola. Naho zwo ralo, tshifanyiso tshi nga ri vhudza zwiṅwe zwithu nga ha muoli watsho. Nga hu fanaho, shango ḽi ri vhudza nga ha ‘pfaneleo dzi sa vhonali’ dza Musiki dzi ngaho maanḓa, vhuṱali na lufuno.—Vharoma 1:20.
Mazwifhi: Mudzimu u fanela u vha fhethu hoṱhe u itela u ḓivha zwithu zwoṱhe na u sumbedza maanḓa awe mahulu.
Ngoho: Muya mukhethwa wa Mudzimu ndi maanḓa awe a shumaho. A tshi shumisa muya wawe mukhethwa, Mudzimu u a kona u vhona na u ita tshiṅwe na tshiṅwe, huṅwe na huṅwe, nga tshifhinga tshiṅwe na tshiṅwe, a sa vhonali.—Psalme ya 139:7.
Mazwifhi: Psalme ya 139:8 i ri gudisa uri Mudzimu u fhethu hoṱhe nga u amba uri: “Ndá gonya hangei makoleni, ndi yo’ wana Ú hone; ndá tsela vhudzula-vhafu, na henengei ndi huné wa vha hone-vho.”
Ngoho: Lwonolwu Luṅwalo a lu khou amba nga ha hune Mudzimu vha hone. I ri gudisa nga vhurendi uri a hu na fhethu hune ha vha kule hune Mudzimu a nga kundelwa u ri lwela.
a Samusi zwo ṅwalwa Bivhili, dzina ḽa Mudzimu ndi Yehova.
You May Also Like
NGUDO DZI RE BIVHILINI
Naa Mudzimu U Hone?
Ṱhogomelani vhuṱanzi vhu sumbedzaho uri u tenda kha Mudzimu zwi a pfala.
MBUDZISO DZA BIVHILI DZO FHINDULWA
Muya Mukhethwa Ndi Mini?
Bivhili i amba uri muya mukhethwa wa Mudzimu ndi “zwanḓa” zwawe nahone zwenezwo zwi a pfala.
NGA HA RIṊE
Humbelani U Dalelwa
Haseledzani mbudziso i bvaho Bivhilini kana ni gude zwo engedzeaho nga ha Ṱhanzi dza Yehova.