Bivhili a i ambi uri Mudzimu o thoma lini u sika fhethu hoṱhe kana uri zwo dzhia tshifhinga tshingafhani. I amba uri: “U rangani Mudzimu o sika ḽiṱaḓulu na ḽifhasi.” (Genesi 1:1) Bivhili a i ambi uri “u rangani” ndi lini. Fhedzi zwiitea zwo ṅwaliwaho kha Genesi zwi ita uri u rangani hu vhe musi “maḓuvha” a rathi a tsiko a sa athu thoma.

•  Maḓuvha a rathi a tsiko ndi maḓuvha a re na awara dza 24?

•  Ho itea mini nga maḓuvha a rathi a tsiko?

•  Mafhungo a re kha Genesi a a tendelana na saintsi?

•  Ḓuvha, ṅwedzi na dziṋaledzi zwo sikwa lini?

•  U ya nga Bivhili, ḽifhasi ḽi na miṅwaha mingana ḽo sikwa?

 Hai. Bivhilini, ipfi “ḓuvha” ḽi nga ambela kha zwifhinga zwo fhambananaho zwi tshi ya nga mafhungo. Sa tsumbo, kha iṅwe ndimana zwo dzhia ḓuvha ḽithihi u sika zwithu.—Genesi 2:4.

 Mudzimu o shandula ḽifhasi ḽe ḽa vha ḽo “ṱanganana ḽi si na tshithu,” ḽa vha pulanete ine zwithu zwi tshilaho zwa kona u tshila khayo. (Genesi 1:2) A sika zwithu zwi tshilaho kha ḽifhasi. Bivhili i amba nga zwigwada zwa rathi zwa zwiitea nga maḓuvha a tsiko.

• 

   Ḓuvha ḽa u thoma: Mudzimu o ita uri hu vhe na tshedza ḽifhasini, zwa ita uri hu kone u vha na masiari na vhusiku.—Genesi 1:3-5.

• 

   Ḓuvha ḽa vhuvhili: Mudzimu o vhumba tshikhala, a fhandekanya maḓi a re nṱha hatsho na a re fhasi hatsho.—Genesi 1:6-8.

• 

   Ḓuvha ḽa vhuraru: Mudzimu o ita uri hu vhe na shango. A medza na zwimela.—Genesi 1:9-13.

• 

   Ḓuvha ḽa vhuṋa: Mudzimu o sika ḓuvha, ṅwedzi na dziṋaledzi uri zwi vhonetshele ḽifhasi.—Genesi 1:14-19.

• 

   Ḓuvha ḽa vhuṱanu: Mudzimu o sika khovhe na zwiṋoni.—Genesi 1:20-23.

• 

   Ḓuvha ḽa vhurathi: Mudzimu o sika zwipuka na vhathu.—Genesi 1:24-31.

 Nga murahu ha ḓuvha ḽa vhurathi, Mudzimu o awela kha mishumo yawe kana kha u sika.—Genesi 2:1, 2.

 A si uri mafhungo a re Bivhilini nga ha u sikwa ha ḽifhasi a ṱalutshedza zwidodombedzwa zwoṱhe zwa saintsi. Nṱhani hazwo, a ṱalutshedza tsiko nga nḓila ine na vhavhali vha zwifhingani zwa Bivhili vha kona u pfesesa nḓila ye Mudzimu a sika ngayo zwithu nga u tevhekana. Mafhungo a tsiko ha hanedzani na zwa saintsi. Robert Jastrow ane a vha muḓivhi wa saintsi ya zwithu zwa tshikhalani o ṅwala uri: Zwidodombedzwa zwo fhambana, fhedzi mafhungo a re Bivhilini nga ha nḓila ye vhutshilo ha vha hone ngayo a a tendelana na mafhungo a vho gudelaho saintsi ya zwithu zwa tshikhalani; zwiitea zwi ri swikisaho kha u sikwa ha muthu zwo itea nga u ṱavhanya nga tshifhinga tsho teaho.”

 Ḓuvha, ṅwedzi na dziṋaledzi zwo vha zwi tshipiḓa tsha “ḽiṱaḓulu” ḽo sikwaho “u rangani.” (Genesi 1:1) Fhedzi tshedza tshazwo tsho vha tshi sa vhonetsheli ḽifhasini ngauri mufhe wo tangaho ḽifhasi wo vha wo denyefhala. (Genesi 1:2) Naho ho vha hu na tshedzanyana nga ḓuvha ḽa u thoma, zwo vha zwi sa konadzei u ḓivha uri tshedza tshi khou bva tshi ngafhi. Nga ḓuvha ḽa vhuṋa, mufhe wo vha wo no sekena. Bivhili i ri ḓuvha, ṅwedzi na dziṋaledzi zwo mbo ḓi thoma u ‘vhonetshela ḽifhasi,’ zwine zwa sumbedzisa uri muthu a re ḽifhasini o vha a tshi nga kona u vhona tshenetshi tshedza.—Genesi 1:17.

 Bivhili a i ambi uri ho no fhela miṅwaha mingana ḽifhasi ḽo sikwa. Genesi 1:1 i amba uri fhethu hoṱhe, u katela na ḽifhasi ḽashu zwo vha na mathomo. Zwenezwi a zwi hanedzani na zwine zwa ambiwa nga vha saintsi nga ha uri ḽifhasi ḽi na miṅwaha mingana ḽo sikwa.