Yesu o vhudza vhafunziwa vhawe a ri: “Ni ḓo vha ṱhanzi dzanga . . . u swika magumoni a ḽifhasi.” (Mishumo 1:8) Ṱhanzi dza Yehova ṋamusi vha khou ita wonoyo mushumo nga u fhisea. Fhedzi hu na fhethu hunzhi u katela na fhethu hu re na vhathu vhanzhi, hune vhathu vha hone a vha athu ḓivhadzwa mafhungo maḓifha. Kha maṅwe mashango hu na Ṱhanzi dzi si gathi. (Mateo 9:37, 38) Ndi mini zwine ra khou zwi ita u itela uri ri swikelele vhathu vhanzhi nga hune zwa nga konadzea ngaho?

 U itela u thetshelesa ndaela ya Yesu, Komiti ya Tshumelo ya Tshigwada tshi Langaho ya Ṱhanzi dza Yehova i rumela vharumiwa fhethu hu re na ṱhoḓea u mona na shango. Zwazwino hu na vharumiwa vha 3 090 u mona na shango ḽoṱhe. a Vhunzhi havho vho gudiswa tshikoloni tsha Bivhili, tshi ngaho Tshikolo tsha Vhahuweleli vha Muvhuso (SKE). Vharumiwa vho ḓiimisela u ṱutshela mahaya avho, vha pfulutshela kha maṅwe mashango. Nga nṱhani ha uri vhenevho vharumiwa vho vhibva nahone vha na tshenzhelo, vha thusa u phaḓaladza mafhungo maḓifha na u vhetshela vhafunziwa vhaswa tsumbo yavhuḓi.

 Ofisini iṅwe na iṅwe ya davhi, hu na Ofisi ya vha re Tshumeloni yo Khetheaho ine ya shuma na Komiti ya Davhi u itea u ṱhogomela ṱhoḓea dza vharumiwa, dzi ngaho u vha ṱoḓela fhethu havhuḓi hune vha ḓo dzula hone, u ṱhogomela mutakalo wavho na u vha ṋea tshelede nyana ine ya ḓo vha thusa kha zwine vha zwi ṱoḓa. Nga ṅwaha wa tshumelo wa 2020, Ṱhanzi dza Yehova vho shumisa tshelede i ṱoḓaho u vha R 373 432 950. u itela u ṱhogomela vharumiwa. Ri livhuwa dzenedzi ndugiselelo ngauri dzi thusa vharumiwa uri vha livhise ṱhogomelo kha mushumo wavho wa u ḓivhadza mafhungo maḓifha, khathihi na u khwaṱhisa zwivhidzo zwine vha vha khazwo.

 Vharumiwa vho thusa hani kha mushumo wa u ḓivhadza mafhungo maḓifha? Vho-Frank Madsen vhane vha vha muraḓo wa Komiti ya Davhi ḽa Malawi, vho ri: “Nga nṱhani ha uri vharumiwa vha na tshivhindi na vhukoni, vho thusa zwivhidzo uri zwi kone u huwelela mafhungo maḓifha tsimuni dzine dza konḓa, u fana na tsimu dzi re na zwifhaṱo zwine magethe a hone a dzula o valiwa na tsimu dzine vhathu vha amba luambo lwa maṅwe mashango. Vhuḓidini vhune vha vhu ita ha u guda luambo lwa henefho na mvelele zwi ṱuṱuwedza vhaṅwe nahone vha thusa vhaswa uri na vhone vha ṱoḓe u vha tshumeloni ya tshifhinga tshoṱhe. Ri livhuwa Yehova nge a ri ṋea vhenevha vharumiwa.”

 Muṅwe muraḓo wa Komiti ya Davhi o ri: “Vharumiwa vha sumbedza vhuṱanzi ha uri vhathu vha Yehova vha na vhuthihi shangoni ḽoṱhe. Na vhathu vhane vha si vhe Dziṱhanzi vha a kona u zwi vhona uri a ro ngo fhandekanywa nga mvelele, fhedzi ro thuswa nga zwine Bivhili ya zwi funza uri ri vhe na vhuthihi shangoni ḽoṱhe.”

 Vharumiwa vha thusa hani vhahuweleli vha re tshivhidzoni tshine vha vha khatsho? Paulo a bvaho ngei Timor-Leste, u livhuwa vharumiwa vhe vha rumelwa tshivhidzoni tsha hawe. U ri: “Hune ra dzula hone hu a fhisa nga maanḓa. Naho vhenevho vharumiwa vha tshi bva fhethu hune ha rothola, a vha tendeli mutsho u tshi vha thivhela u ya u ḓivhadza mafhungo maḓifha. Vha dzula vha hone muṱanganoni wa tsimu nga matsheloni. Kanzhi ndi a vha vhona nga masiari vha tshi khou ya kha vhathu vhane vha guda navho hu tshi khou fhisa nga maanḓa na nga madekwana. Vho thusa vhathu vhanzhi uri vha ḓivhe ngoho u katela na nṋe. Vha khou shumisa vhutshilo havho hoṱhe u itela u shumela Yehova nga u fhisea nahone zwenezwo zwi ṱuṱuwedza tshivhidzo tshoṱhe uri tshi shumele Yehova nga vhuḓalo.”

 Ketti ane a vha muvulanḓila wa tshifhinga tshoṱhe ngei Malawi, u amba nḓila ye vhavhingani vha vharumiwa vha thusa ngayo muṱa wawe, o ri: “Musi vhavhingani vha vharumiwa vha tshi swika tshivhidzoni tsha hashu, ho vha hu nṋe fhedzi Ṱhanzi muṱani wanga. Fhedzi vhenevho vhavhingani vho ntikedza nga maanḓa nahone vha fhedzisela vhe khonani dzashu dza tsini. Tsumbo yavho yavhuḓi yo thusa vhana vhanga uri vha vhone uri u shumela Yehova zwi ita uri ri takale na u fushea vhutshiloni. Nga nṱhani ha ṱhuṱhuwedzo yavho yavhuḓi, vhana vhanga vhararu vha vhasidzana ndi vhavulanḓila vha tshifhinga tshoṱhe nahone munna wanga o no thoma u ya miṱanganoni.”

 Tshelede ya u ṱhogomela vhenevha vharumiwa i bva ngafhi? I bva kha tshelede ine ya ṋeelwa kha mushumo wa shango ḽoṱhe. Kanzhi hu ṋeelwa hu tshi shumisa donate.jw.org. Ri a dzhiela nṱha yeneyi miṋeelo ine vhathu vha i ita zwi tshi bva mbiluni.