“Vhathu vha khou ita zwithu zwinzhi zwine khou tshinyadza ḽifhasi nga nḓila khulwane vhukuma. Zwi ḓo ita uri ḓorobo khulwane dzi dzhene maḓini. Hu ḓo vha na mufhiso u sa a thu vhonwa. Maḓumbu a ofhisaho. U ṱahela ha maḓi hu ḓo engedzea. Miṅwe mifuda ya zwipuka na zwimela a i tsha ḓo vha hone. Zwenezwi a si ngano kana muḽoro. Zwenezwi ndi zwine saintsi ya ri vhudza uri zwi do itea arali mivhuso ya sa shandula nḓila ine ya shumisa ngayo muḓagasi na zwiṅwe.”—Ndi maipfi o ambiwaho nga António Guterres ane a vha secretary-general wa United Nations, kha muvhigo wa dzi 4 dza April 2022 we wa vha u tshi khou amba nga ha nḓila ine mivhuso ya khou shela mulenzhe ngayo kha tshanduko ya mupo.

 “Vhorasantsi vha khou amba hu tshe nga phanḓa uri miṅwahani i si gathi i ḓaho, thaidzo dzine dza vhangwa nga tshanduko ya mupo dzi ḓo kwama fhethu ha 423 ho tsireledzwaho zwipuka na miri ngei Amerika samusi zwi tshi kwamea nga u engedzea ha mufhiso. Zwenezwi zwithu zwi tshuwisaho zwine zwa khou itea nga u tou tevhekana zwi ri humbudza nga ha zwe Bivhili ya dzula yo amba hu tshee nga phanḓa: Mulilo, miḓalo na u ṋokuluwa ha matombo a ice hune ha ita uri lwanzhe lu halifhe lu tshinyadze.”—“Flooding Chaos in Yellowstone, a Sign of Crises to Come,” The New York Times, 15 June 2022.

 Naa ri nga kona u wana thandululo ya thaidzo dza mupo dza ḽino shango? Arali zwi tshi konedzea, ndi nnyi ane a ḓo dzi tandulula? Kha ri pfe uri Bivhili i ri mini?

 Bivhili i amba uri Mudzimu u ḓo “fhelisa vha tshinyadzaho ḽifhasi.” (Nzumbululo 11:18) Yeneyi ndimana ya Bivhili i ri gudisa zwithu zwiraru:

1.  1. Uri vhathu vha ḓo tshinyadza ḽifhasi.

2.  2. Uri u tshinyadzwa ha ḽifhasi hu ḓo swika hune ha ḓo fhela.

3.  3. Mudzimu ndi ene a ḓo tandulula thaidzo dza u tshinyadzwa ha mupo, hu si vhathu.

 Bivhili i amba uri ‘ḽifhasi ḽi ḓo dzula ḽi hone lini na lini.’ (Muhuweleli 1:4) Vhathu vha ḓo dzula khaḽo lwa tshoṱhe.

•   “Vho lugaho vha ḓo vha vhaṋe vha ḽifhasi, vha ḓo dzula khaḽo lini na lini.”—Phisalema 37:29.

 Shango ḽashu ḽi ḓo dovha ḽa vha ḽavhuḓi.

•   Hu ḓo takala soga na shango, na midavhi ya soga i ḓo takala ya ḓala maluvha.”—Yesaya 35:1.