Gudani Kha Ipfi Ḽa Mudzimu

Mudzimu Ndi Nnyi?

Yeneyi thero i haseledza nga ha mbudziso dze na vhuya na ḓivhudzisa dzone nahone i ḓo sumbedza hune na wana hone phindulo Bivhilini yaṋu. Ṱhanzi dza Yehova vha ḓo takalela u haseledza dzenedzo phindulo na inwi.

1. Mudzimu ndi nnyi?

Mudzimu wa ngoho ndi we a sika zwithu zwoṱhe. Bivhilini u vhidzwa “Khosi ya kale na kale,” zwine zwa amba uri ha na mathomo nahone a nga si vhe na magumo. (1 Timotheo 1:17) Samusi Mudzimu e ene Muthomi wa vhutshilo, ri fanela u gwadamela ene fhedzi.—Vhalani Ndzumbululo 4:11.

2. Mudzimu u na muvhili wa mufuda-ḓe?

Mudzimu ndi muya nahone a hu na o no mu vhonaho. Zwenezwo zwi amba uri tshivhumbeo tshawe a tshi fani na tsha zwivhumbiwa zwi re kha ḽifhasi. (Yohane 1:18; 4:24) Vhumuthu ha Mudzimu vhu vhonala kha zwithu zwe a zwi sika. Sa tsumbo, musi ri tshi elekanya nga ha zwithu zwo fhamba-fhambanaho zwe a zwi sika sa mitshelo na maluvha, ri ṱhogomela lufuno na vhuṱali zwa Mudzimu. Vhuhulwane ha fhethu hoṱhe vhu sumbedza uri Mudzimu u na maanḓa.—Vhalani Vha-Roma 1:20.

Ri nga guda zwinzhi nga zwine Mudzimu a vha zwone Bivhilini. Sa tsumbo, i ri vhudza nga ha zwine Mudzimu a vha zwone, zwine a zwi funa, zwine a si zwi fune, nḓila ine a fara ngayo vhathu na nḓila ine a aravha ngayo kha zwiimo zwi sa fani.—Vhalani Psalme ya 103:7-10.

3. Naa Mudzimu u na dzina?

Yesu o ri: “Khotsi-ashu wa ṱaḓulu! dzina ḽau ḽi khethwe.” (Mateo 6:9) Naho Mudzimu e na madzina zwao manzhi, u na dzina ḽithihi fhedzi. Ḽi vhidzwa nga nḓila dzo fhamba-fhambanaho kha luambo luṅwe na luṅwe. Nga Luvenḓa ḽi pfi “Yehova.”—Vhalani Psalme ya 83:18.

Dzina ḽa Mudzimu ḽo bviswa Bivhilini nnzhi nahone ha dzheniswa madzina zwao a ngaho Murena kana Mudzimu. Fhedzi musi Bivhili i tshi ṅwalwa, dzina ḽa Mudzimu ḽo vha ḽi tshi bvelela khayo lu ṱoḓaho u vha 7 000. Yesu o ita uri dzina ḽa Mudzimu ḽi ḓivhiwe nga u ḽi shumisa musi a tshi ṱalutshedza vhathu Ipfi ḽa Mudzimu. O thusa vhathu uri vha ḓivhe Mudzimu.—Vhalani Yohane 17:26.

 4. Naa Yehova u a ri londa?

Yehova u sumbedza uri u na dzangalelo kha riṋe nga u thetshelesa thabelo dzashu nga tsha vhukoma. (Psalme ya 65:2) Naa tshengelo yo ḓalaho nga u rali i sumbedza uri Mudzimu ha ri londi? Vhaṅwe vhathu vha humbula uri Mudzimu u tendela uri ri shengele nga ṅwambo wa uri u vha a tshi khou ri linga, fhedzi zwenezwo a si ngoho. Bivhili i ri: “Mudzimu u kule na zwivhi.”—Yobo 34:10; vhalani Yakobo 1:13.

Mudzimu o ṋea muthu tshirunzi na mbofholowo ya u ḓikhethela. Naa ri a takalela uri ri na mbofholowo ya u ḓikhethela arali ri tshi ṱoḓa u shumela Mudzimu? (Yoshua 24:15) Tshengelo i engedzea nga ṅwambo wa uri vhathu vhanzhi vha itela vhaṅwe zwithu zwivhi. Yehova u a vhaisala musi a tshi vhona vhathu vha tshi haṱulana nga nḓila i songo teaho.—Vhalani Genesi 6:5, 6.

Hu si kale Yehova u ḓo shumisa Yesu u itela u fhelisa tshengelo na vhane vha i vhanga. Zwa zwino, Yehova u na tshiitisi tshavhuḓi tsha u tendela tshengelo i tshi vha hone lwa tshifhinganyana. Ngudo i tevhelaho i ḓo ṱalutshedza zwine zwa ita uri Mudzimu a tendele tshengelo.—Vhalani Yesaya 11:4.

5. Mudzimu u ṱoḓa ri tshi ita mini?

Yehova o ri sika ri na vhukoni ha u mu ḓivha na u mu funa. U ṱoḓa ri tshi guda ngoho nga hae. (1 Timotheo 2:4) Arali ri tshi guda Bivhili, ri nga kona u ḓivha Mudzimu sa Khonani.—Vhalani Mirero 2:4, 5.

Samusi Yehova o ri ṋea vhutshilo, ri fanela u mu funa u fhira muthu naho e ufhio. Ri nga sumbedza Mudzimu uri ri a mu funa nga u amba nae nga thabelo na u ita zwine a ṱoḓa. (Mirero 15:8) Yehova u ṱoḓa ri tshi fara vhaṅwe vhathu nga nḓila ya lufuno.—Vhalani Marko 12:29, 30; 1 Yohane 5:3.

U itela u wana mafhungo o engedzeaho, sedzani ndima ya 1 kha bugu Bivhili I Funza Mini Zwa Vhukuma? yo gandiswaho nga Ṱhanzi dza Yehova.

[Tshifanyiso kha siaṱari 17]

Naa hu na tshiitisi tsha u tendela tshengelo i tshi vha hone lwa tshifhinganyana?