1, 2. Ndi mini zwine zwa ita uri vhathu vha si fane na zwipuka?

MALUVHI a muthu o khethea. Sa tsumbo, vhathu vha na vhukoni ha u guda luambo. Nahone luambo lu ita uri ri kone u vhala, u ṅwala, u amba na u pfesesa zwine ra zwi pfa. Lu dovha lwa ita uri ri vhe na vhukoni ha u rabela na u imbela Yehova dzithendo. Zwenezwi zwithu zwoṱhe zwi ita uri ri fhambane na zwipuka. Vhorasaintsi a vha koni u pfesesa nga vhuḓalo nḓila ine vhuluvhi ha kona ngayo u ita zwenezwi zwithu zwi mangadzaho.

² Vhukoni hashu ha u amba ndi tshifhiwa tshi bvaho ha Yehova. (Psalme ya 139:14; Nzumbululo 4:11) O dovha a ri ṋea tshiṅwe tshifhiwa tshine tsha ita uri ri si fane na zwipuka. Vhathu vho sikwa nga ‘tshifanyiso tsha Mudzimu.’ Ri na mbofholowo ya u ḓikhethela. Nahone ri nga khetha u shumisa luambo u itela u shumela Yehova na u mu renda.—Genesi 1:27.

3. Yehova o ri ṋea mini u itela uri ri ṱalifhe?

³ Yehova o ri sumbedza nḓila ya u mu shumela na u mu renda nga u ri ṋea Bivhili. Bivhili yoṱhe kana zwipiḓa zwayo zwi  wanala nga nyambo dzi fhiraho 2 800. Musi ri tshi elekanya nga ha zwine Bivhili ya zwi amba, ri nga thoma u humbula nga nḓila ine Mudzimu a humbula ngayo. (Psalme ya 40:5; 92:5; 139:17) Nahone mahumbulele a Yehova a a ri ṱalifhisa na u ri livhisa vhutshiloni vhu sa fheli.—Vhalani 2 Timotheo 3:14-17.

4. U elekanya zwi amba mini, nahone ndi mbudziso dzifhio dzine ra ḓo dzi haseledza?

⁴ U elekanya zwi amba u livhisa ṱhogomelo kha tshiṅwe tshithu, u humbula nga ho dzikaho na nga vhuronwane nga hatsho. (Psalme ya 77:12; Mirero 24:1, 2) Ri vhuyelwa vhukuma musi ri tshi elekanya nga ha zwine ra zwi guda nga ha Yehova na Yesu. (Yohane 17:3) Kha ino thero ri ḓo fhindula mbudziso dzi tevhelaho: Ri nga vhala hani nga nḓila ine ya ita uri zwi ri lelutshele u elekanya? Ri nga elekanya nga ha mini? Nahone ndi mini zwine zwa nga ri thusa u elekanya tshifhinga tshoṱhe na u ḓiphina ngazwo?

5, 6. Ndi mini zwine zwa ḓo ni thusa u humbula na u pfesesa zwine na khou vhala?

⁵ Naa no no vhuya na ṱhogomela uri hu na zwithu zwine na nga zwi ita ni sa humbuli nga hazwo, zwithu zwi ngaho u fema, u tshimbila kana u ṋamela baisigira? Zwi ṱungufhadzaho ndi uri nga zwiṅwe zwifhinga, ni nga vhala ni sa khou humbula. Khamusi ni nga thoma u humbula nga ha zwiṅwe zwithu musi ni tshi khou vhala. Ni nga thivhela hani zwenezwi? Ndi zwa ndeme u livhisa ṱhogomela kha zwine na khou zwi vhala na u humbula zwine zwa amba zwone. Nga zwenezwo, musi ni tshi swika magumoni a phara kana tshiṱohwana kha khandiso, imaninyana ni elekanye nga ha zwe na zwi vhala. Humbulani nga ha zwe na zwi guda nahone ni ite vhungoho ha uri no zwi pfesesa.

⁶ Vhorasaintsi vho wana uri zwo leluwa u humbula tshiṅwe tshithu musi ri tshi tshi vhalela nṱha. Musiki washu u a ḓivha zwenezwi nahone ndi ngazwo o vhudza Yoshua uri a “elekanye” nga ha bugu ya Mulayo, zwine zwa amba u i vhalela nṱha. (Vhalani Yoshua 1:8.) U vhalela nṱha Bivhili zwi ḓo dovha zwa ni thusa u livhisa ṱhogomelo na u humbula nga ho engedzeaho.

7. Ndi tshifhio tshifhinga tshavhuḓi tsha u elekanya nga ha Bivhili? (Sedzani tshifanyiso tsha u thoma.)

⁷ Zwi ṱoḓa vhuḓidini ho engedzeaho u elekanya na u livhisa ṱhogomela kha zwine ra zwi guda. Ndi ngazwo zwi zwavhuḓi u elekanya nga tshifhinga tshine na vha ni songo neta ngatsho nahone ni fhethu hu si na phosho, hu si na zwithu zwinzhi zwine zwa nga ni thithisa. Mupsalme Davida o elekanya musi a tshi karuwa vhusiku. (Psalme ya 63:6) Naho Yesu o vha o fhelela, o khetha u elekanya na u rabela e fhethu hu si na phosho.—Luka 6:12.

8. (a) Ri nga elekanya nga ha mini? (b) Yehova u ḓipfa hani musi ri tshi vhudza vhaṅwe nga hae?

⁸ Kha zwiṅwe zwine na zwi vhala Bivhilini, hu na zwiṅwe zwithu zwine na nga  elekanya nga hazwo. Sa tsumbo, musi ni tshi vhona tsiko yavhuḓi ya Yehova, imaninyana nahone ni ḓivhudzise uri, ‘Zwenezwi zwi ngudisa mini nga ha Yehova?’ Mahumbulele o raloho a ḓo ni sudzulusela u livhuha Yehova nga thabelo. Nahone arali ni na vhaṅwe, ni ḓo ṱoḓa u vha vhudza nḓila ine na ḓipfa ngayo nga hazwo. (Psalme ya 104:24; Mishumo 14:17) Yehova u a ṱhogomela na u takala musi ri tshi elekanya, u rabela na u vhudza vhaṅwe nga hae. Bivhili i ri khwaṱhisedza uri: ‘Ho ṅwalwa bugu ya u eletshedza vha ofhaho Yehova, na vha sá hangwi dzina ḽawe.’—Maleaxi 3:16.

9. (a) Paulo o vhudza Timotheo uri a elekanye nga ha mini? (b) Ri nga elekanya nga ha mini musi ri tshi lugiselela vhuḓinḓa hashu?

⁹ Muapostola Paulo o vhudza Timotheo uri a elekanye nga ha nḓila ine zwine a zwi amba, vhuḓifari hawe na zwine a zwi funza zwa kwama ngayo vhaṅwe. (Vhalani 1 Timotheo 4:12-16.) Na inwi ni nga elekanya nga ha zwenezwi zwithu. Sa tsumbo, ni ṱoḓa tshifhinga tsha u elekanya musi ni tshi lugiselela pfunzo ya Bivhili. Humbulani nga ha mugudiswa waṋu nahone ni lingedze u wana mbudziso kana tsumbo ine ya nga mu thusa u ita mvelaphanḓa. Musi ni tshi lugiselela pfunzo dzaṋu dza Bivhili nga yeneyi nḓila, lutendo lwaṋu lu a khwaṱha nahone ni vha mugudisi wa Bivhili wa khwine na a fhiseaho. Ni ḓo dovha na vhuyelwa musi ni tshi elekanya ni sa athu u ya tshumeloni ya tsimu. (Vhalani Esera 7:10.) Khamusi ni nga vhala ndima kha bugu ya Mishumo u itela uri ni fhisee nga ho engedzeaho vhuḓinḓani. Ni  nga dovha na elekanya nga ha ndimana dza Bivhili dze na dzudzanya u dzi shumisa ḽeneḽo ḓuvha na khandiso dze na dzudzanya u dzi tshimbidza. (2 Timotheo 1:6) Humbulani nga ha vhathu vha tsimuni na nga zwine na nga zwi amba zwine zwa nga vha ita uri vha vhe na dzangalelo. Musi ni tshi lugiselela nga yeneyi nḓila, ni ḓo kona u shumisa Bivhili nga hu bvelelaho ni tshi huwelela kha vhaṅwe.—1 Vhakorinta 2:4.

10. Ndi zwifhio zwiṅwe zwithu zwavhuḓi zwine ra nga elekanya nga hazwo?

¹⁰ Ndi zwifhio zwiṅwe zwine ra nga elekanya nga hazwo? Arali na ṅwala notsi nga tshifhinga tsha nyambo ya khagala, maguvhanganoni na mabuthanoni, ḓiṋeeni tshifhinga tsha u dzi vusulusa. Musi ni tshi ita nga u ralo, ḓivhudziseni uri, ‘Ndo guda mini kha Ipfi ḽa Mudzimu na ndangulo yawe?’ Ni nga dovha na elekanya nga ha zwidodombedzwa zwi re kha magazini wa ṅwedzi muṅwe na muṅwe wa Tshiingamo na Awake! na kha khandiso dzo bvaho zwenezwino buthanoni. Musi ni tshi vhala tshenzhelo i re kha Yearbook, imaninyana ni humbule nga hayo nahone i kwame mbilu yaṋu. Musi ni tshi vhala khandiso dzashu, zwi nga vha zwavhuḓi uri ni talele mbuno dza ndeme kana u ṅwala notsi nga matungo. Zwenezwi zwi ḓo ni thusa musi ni tshi khou lugiselela u ita lwendo lwa u vhuyelela, lwendo lwa vhulisa kana u ṋekedza nyambo. Zwa ndeme vhukuma, musi ni tshi ima na elekanya nga ha zwine na khou zwi vhala, ni vha ni tshi khou ita uri zwine na khou vhala zwi kwame mbilu yaṋu. Ni dovha na wana tshifhinga tsha u rabela u itela u livhuha Yehova zwithu zwavhuḓi zwine na khou zwi guda.

11. Ndi ifhio khandiso ya ndeme vhukuma ine ra fanela u elekanya nga hayo, nahone u ita zwenezwi zwi ḓo ni thusa hani? (Dovhani ni sedze ṱhaluso i re magumoni a siaṱari.)

¹¹ Bivhili ndi khandiso ya ndeme vhukuma ine ra fanela u elekanya nga hayo. Fhedzi ni ḓo ita mini arali ḽiṅwe ḓuvha na sa tendelwa u vha na Bivhili? * (Sedzani ṱhaluso i re magumoni a siaṱari.) A hu na muthu ane a nga ni thivhela u elekanya nga ha zwithu zwe na zwi rwela ngomani, u fana na maṅwalo ane na a takalela kana nyimbo dza Muvhuso. (Mishumo 16:25) Nahone muya wa Mudzimu u ḓo ni thusa u humbula zwithu zwe na zwi guda, zwine zwa ḓo ni thusa u dzula ni tshi fulufhedzea.—Yohane 14:26.

12. Ndi ifhio iṅwe nḓila ine na nga dzudzanya ngayo muvhalo waṋu wa Bivhili wa ḓuvha ḽiṅwe na ḽiṅwe?

¹² Ndi ifhio iṅwe nḓila ine na nga dzudzanya ngayo muvhalo waṋu wa Bivhili wa ḓuvha ḽiṅwe na ḽiṅwe? Maṅwe maḓuvha kha vhege, khamusi ni nga vhala na u elekanya nga ha muvhalo wa Bivhili wa  Tshikolo tsha Vhuḓinḓa ha lwa Ṱaḓulu wa vhege iṅwe na iṅwe. Nga maṅwe maḓuvha ni nga vhala Evangeli ya Mateo, Marko, Luka na Yohane nahone na elekanya nga ha zwe Yesu a zwi amba na u zwi ita. (Vharoma 10:17; Vhaheberu 12:2; 1 Petro 2:21) Ri dovha ra vha na khandiso dzine dza ṱalusa zwiitea zwa vhutshilo ha Yesu nga u tou tevhekana hazwo. Yeneyi khandiso i nga ni thusa u vhuyelwa nga ho engedzeaho musi ni tshi vhala Evangeli.—Yohane 14:6.

13, 14. Ndi ngani zwi zwa ndeme vhukuma u dzula ri tshi elekanya nga ha Yehova na Yesu, nahone zwenezwi zwi ḓo ri ṱuṱuwedza u ita mini?

¹³ U elekanya nga ha Yehova na Yesu zwi nga thusa muthu uri a vhe Mukriste o vhibvaho na u vha na lutendo lwo khwaṱhaho. (Vhaheberu 5:14; 6:1) Muthu ane a sa fhedze tshifhinga tshinzhi a tshi khou humbula nga ha Yehova Mudzimu, a nga xelelwa nga vhushaka hawe nae nga zwiṱuku nga zwiṱuku kana mafheleloni a mu landula. (Vhaheberu 2:1; 3:12) Yesu o sevha uri arali ra sa pfa kana u ṱanganedza Ipfi ḽa Mudzimu “nga mbilu yavhuḓi” a ri nga ‘ḽi vhulungi.’ Nṱhani hazwo, ri nga “tsikeledzwa nga mbilaelo, lupfumo, na madakalo a vhutshilo” nga hu leluwaho.—Luka 8:14, 15.

¹⁴ Nga zwenezwo, kha ri bvele phanḓa ri tshi elekanya nga ha Bivhili na u ḓivha Yehova khwine. Zwenezwi zwi ḓo ri ṱuṱuwedza u edzisa pfaneleo dzawe na vhumuthu hawe nga ho fhelelaho. (2 Vhakorinta 3:18) Ri nga bvela phanḓa ri tshi guda zwo engedzeaho nga ha Khotsi ashu wa ṱaḓulu na u mu edzisa u ya nga hu sa fheli. Yeneyo ndi ndugelo i sa vhambedzwi na tshithu!—Muhuweleli 3:11.

15, 16. (a) No vhuyelwa hani nga u elekanya nga ha Yehova na Yesu? (b) Ndi ngani nga zwiṅwe zwifhinga zwi tshi nga konḓa u elekanya, fhedzi ndi ngani ri tshi fanela u dzula ri tshi lingedza?

¹⁵ U elekanya nga ha Yehova na Yesu zwi ni thusa u dzula ni tshi fhisetshela ngoho. U fhisea haṋu hu ḓo ṱuṱuwedza vhahaṋu na vhathu vhane na ṱangana navho tshumeloni ya tsimu. Nahone musi ni tshi elekanya nga zwe Yehova a ni itela zwone nga u ni ṋea tshiṱhavhelo tshi rengululaho tsha Yesu, ni ḓo bvela phanḓa ni tshi dzhiela nṱha vhushaka haṋu ha tsini na Mudzimu. (Vharoma 3:24; Yakobo 4:8) Wahashu Mark ane a bva Afurika Tshipembe we a fhedza miṅwaha miraru e dzhele nga nṱhani ha lutendo lwawe, o ri: “U elekanya zwi nga vhambedzwa na lwendo lu takadzaho. Musi ri tshi bvela phanḓa na u elekanya nga ha zwithu zwa lwa muya, ri wana zwithu zwiswa nga ha Yehova Mudzimu washu. Nga zwiṅwe zwifhinga musi ndi tshi ḓipfa ndo kulea nungo kana u vhilaela nga ha vhumatshelo, ndi dzhia Bivhili nahone nda elekanya nga ha mafhungo a re kha Luṅwalo. Ndi vhona zwi tshi nkhuthadza vhukuma.”

¹⁶ Zwi a konḓa u wana tshifhinga tsha u elekanya nga ha Bivhili ngauri vhutshilo ha ḽino shango ho ḓala zwithithisi. Wahashu Patrick ane a bva Afurika o ri: “Muhumbulo wanga u nga fhethu ha u vhulungela milaedza, hune ha vha na  zwidodombedzwa zwo fhamba-fhambanaho, zwa ndeme na zwi si zwa ndeme zwine zwa ṱoḓa u dzudzanywa ḓuvha ḽiṅwe na ḽiṅwe. Musi ndi tshi ṱolisisa muhumbulo wanga, kanzhi ndi wana mahumbulele a tsikeledzaho nahone ndi fanela u rabela Yehova nga hao, ndi sa athu u elekanya nga muhumbulo wo tshaho. Naho u ita ngauralo zwi tshi nga dzhia tshifhinganyana ndi sa athu u thoma u elekanya nga ha thero dza lwa muya, ndi ḓipfa ndi tsini-tsini na Yehova. Zwenezwi zwi ita uri ndi tshe muhumbuloni na u pfesesa ngoho khwine.” (Psalme ya 94:19) Vhukuma, ri vhuyelwa nga nḓila nnzhi musi ri tshi vhala na u elekanya nga ha Bivhili ḓuvha ḽiṅwe na ḽiṅwe.—Mishumo 17:11.

17. Ni wana hani tshifhinga tsha u elekanya?

¹⁷ Vhaṅwe vha vhala, u elekanya na u rabela nga matsheloni. Vhaṅwe vha ita zwenezwo nga tshifhinga tsha zwiḽiwa zwa nga masiari. Khamusi tshifhinga tshaṋu tshavhuḓi tsha u vhala Bivhili ndi nga madekwana kana ni sa athu u eḓela. Vhaṅwe vha takalela u vhala Bivhili nga matsheloni na musi vha sa athu u eḓela. (Yoshua 1:8) Tshithu tsha ndeme ndi u ‘shumisa tshifhinga tshaṋu nga vhuṱali,’ zwine zwa amba u sa fhedza tshifhinga kha zwithu zwi si zwa ndeme u itela uri ni kone u elekanya nga ha Ipfi ḽa Mudzimu ḓuvha ḽiṅwe na ḽiṅwe.—Vhaefesa 5:15, 16.

18. Ndi mini zwine Bivhili ya zwi fulufhedzisa vhane vha elekanya nga ha Ipfi ḽa Mudzimu ḓuvha ḽiṅwe na ḽiṅwe na vhane vha shumisa zwine vha zwi guda?

¹⁸ Bivhili i fulufhedzisa uri Yehova u ḓo fhaṱutshedza vhoṱhe vhane vha elekanya nga ha Ipfi ḽawe na vhane vha lingedza vhukuma u shumisa zwe vha zwi guda. (Vhalani Psalme ya 1:1-3.) Yesu o ri: “Hu takala vhane vha pfa ipfi ḽa Mudzimu nahone vha tevhedza zwine ḽa zwi amba!” (Luka 11:28) Fhedzi zwa ndeme vhukuma, u elekanya nga ha Ipfi ḽa Yehova ḓuvha ḽiṅwe na ḽiṅwe zwi ḓo ri thusa u ita zwithu nga nḓila ine ya mu hulisa. Musi ri tshi ita zwenezwi, Yehova u ḓo ri lambedza nga dakalo zwino na nga vhutshilo vhu sa fheli shangoni ḽawe ḽiswa.—Yakobo 1:25; Nzumbululo 1:3.