Zwiimo zwi tsikeledzaho zwi nga ri kwama nga nḓila i si yavhuḓi. Ri nga dzula ri tshi humbula nga hazwo tshifhinga tshoṱhe, zwa ri kula nungo nahone zwa kwama mavhonele ashu nga ha vhutshilo. Khosi Davida wa ngei Isiraele ḽa kale o kwamiwa vhukuma nga thaidzo nnzhi dze a ṱangana nadzo. O sedzana hani nadzo? Kha psalme ine ya kwama maḓipfele, Davida o fhindula a ri: “Ndi vhidzelela Yehova nga ipfi ḽanga; ndi lilela Yehova nga ipfi ḽanga. Tshililo tshanga ndi tshi shulula phanḓa ha Yehova, ndi mu vhudza zwe nda khakhedzwa ngazwo’. Muya wanga u tshi vhó ṋoka, tendá Iwe U tshi ḓivha kutshimbilele kwanga.” Vhukuma, nga u ḓiṱukufhadza Davida o rabela Mudzimu uri a mu thuse.—Ps. 142:1-3.

Kha iṅwe psalme, Davida o imba a ri: “Tshiné nda tshi humbela ha Yehova ndi tshithihi tshiné nda tshi lila: ndi u dzula nḓuni ya Yehova maḓuvha oṱhe a vhutshilo hanga, na u vhona madzanga a Yehova, na u linda pfamo yawe.” (Ps. 27:4) Davida o vha e si Mulevi, fhedzi edzani u mu vhona nga maṱo a muhumbulo o ima nnḓa ha muṱa mukhethwa tsini na nnḓu ya mulanga ye ya vha i tshisima tsha vhurabeli ha ngoho nga tshenetsho tshifhinga. Mbilu ya Davida yo vha yo ḓala ndivhuho lwe a vha a tshi ṱoḓa u fhedza maḓuvha awe oṱhe henengei o sedza “madzanga a Yehova.”

Ipfi “madzanga” ḽi tshimbidzana na vhuimo kana pfaneleo ya “u vha na vhukonani kana u takadza maḓipfele, zwipfi kana muhumbulo.” Tshifhinga tshoṱhe Davida o vha a tshi livhuha ndugiselelo ya Mudzimu ya u mu gwadamela. Ndi zwavhuḓi u ḓivhudzisa uri: ‘Naa ndi ḓipfa nga nḓila ye Davida a ḓipfa ngayo?’

Misini yashu, a zwi ṱoḓei uri ri ye kha tshiṅwe tshifhaṱo u itela uri ri kone u amba na Yehova. Nṱhani hazwo, hu na thembele khulwane ya Mudzimu ya muya—ndugiselelo khethwa ya vhurabeli ha ngoho. * Arali ra dzhiela nṱha yeneyi ndugiselelo, na ri riṋe ri ḓo kona u “vhona madzanga a Yehova.”

Ṱhogomelani aletare ya tsimbi-tswuku ya u fhisa zwidzimu ye ya vha i tsini na muṋango wa nnḓu ya mulanga. (Ek. 38:1, 2; 40:6) Aletare yo vha i tshi fanyisela uri Mudzimu o ḓiimisela u ṱanganedza vhutshilo ha Yesu sa tshiṱhavhelo. (Vhaheb. 10:5-10) Edzani u humbula uri zwenezwo zwi amba mini kha riṋe! Muapostola Paulo o ṅwala uri: “Ro pfumedzanywa na Mudzimu nga lufu lwa Murwa wawe zwiḽa ri tshee maswina awe.” (Vharoma 5:10) Musi ri tshi vha na lutendo kha malofha a Yesu o shululwaho, ri nga takalela u vha khonani dza Mudzimu dzine a dzi ṱanganedza na u dzi fulufhela. Nga zwenezwo, ri kona u ‘pfana na Yehova.’—Ps. 25:14.

Nga nṱhani ha uri ro ‘hangwelwa zwivhi,’ ri a ‘homoloswa nga Yehova.’ (Mish. 3:19) Vhuimo hashu vhu fana na ha tshivhotshwa tshine tsha ḓisola nga nṱhani ha mishumo yatsho ya tshifhingani tsho fhiraho, nahone tsha ita tshanduko khulwane musi tsho lindela thambo. Musi muhaṱuli ane a pfela vhuṱungu a tshi vhona zwenezwi, u sudzuluselwa u phumula milandu ya onoyu munna—a phumula tshigwevho tshawe tsha lufu. Tshenetsho tshivhotshwa tshi ḓipfa tsho vhofholowa nahone tsho takala vhukuma! U fana na onoyo muhaṱuli, Yehova u ṱanganedza vhathu vhane vha rembuluwa nahone u bvisa tshigwevho tshavho tsha lufu.

Maṅwe masia a vhurabeli ha ngoho e Davida a a ṱhogomela nḓuni ya Yehova ndi u kuvhangana ha magogo a Vhaisiraele ngae, u vhalwa khagala na  u ṱalutshedzwa ha Mulayo, u fhiswa ha zwioro, na musi vhotshifhe na Vhalevi vha tshi ita tshumelo khethwa. (Ek. 30:34-38; Num. 3:5-8; Doit. 31:9-12) Enea masia a vhurabeli ha ngoho ngei Isiraele ḽa kale a na ane a fana nao musalauno.

Misini yashu, u fana na kale, “a si u naka na u ḓifha mukomana na murathu vhó dzula vhé vhathihi!” (Ps. 133:1) Hu na nyengedzeo khulwane kha ‘vhatendi nga riṋe vhoṱhe.’ (1 Pet. 2:17) Miṱanganoni yashu, Ipfi ḽa Mudzimu ḽi a vhalwa nahone ḽa ṱalutshedzwa. A tshi shumisa ndangulo yawe, Yehova u a ri laya. Hu na zwiḽiwa zwinzhi zwa muya zwine zwa wanala khandisoni zwine ra nga zwi shumisa kha pfunzo ya muthu nga eṱhe kana ya muṱa. Muṅwe a re muraḓo wa Tshigwada tshi Langaho o amba uri: “U elekanya nga ha Ipfi ḽa Yehova, u humbulisisa nga zwine ḽa amba zwone, na u ṱoḓa u ṱalukanya na u pfesesa zwo ita uri ndi vhe na lupfumo luhulwane lwa muya nahone ndi fushee.” Ndi ngoho uri ‘nḓivho i ḓo ri takadza.’—Mir. 2:10.

Ṋamusi, thabelo dzi ṱanganedzeaho dza vhashumeli vha Mudzimu dzi ya kha Yehova ḓuvha ḽiṅwe na ḽiṅwe. Kha Yehova, thabelo dzo raloho dzi fana na munukhelelo wa zwioro. (Ps. 141:2) Zwi takadza lungafhani u ḓivha uri Yehova Mudzimu u a ri takalela musi ri tshi amba nae nga thabelo nga u ḓiṱukufhadza!

Mushe o rabela a ri: “Vhuthu ha Yehova Mudzimu washu, vhu livhane na riṋe. Mishumo ya zwanḓa zwashu U i tonde.” (Ps. 90:17) Musi ri tshi shuma vhuḓinḓani hashu nga u fhisea, Yehova u fhaṱutshedza mushumo washu. (Mir. 10:22) Ri nga kha ḓi vha ro thusa vhaṅwe uri vha gude ngoho. Khamusi ro konḓelela vhuḓinḓani lwa miṅwaha minzhi hu sa londwi u sa vha na dzangalelo ha vhathu, u sa vha na mutakalo wavhuḓi, maḓipfele o vhaisalaho kana u tovholwa. (1 Vhathes. 2:2) Naho zwo ralo, naa a ri athu u vhona “madzanga a Yehova” nahone ra vhona uri Khotsi ashu wa ṱaḓulu u takalela vhukuma vhuḓidini hashu?

Davida o imba a ri: “Hayani hanga na thakha yanga ndi Yehova; mukovhe wanga u bva zwanḓani zwawe. Ndo nangelwa fhethu ho nakaho.” (Ps. 16:5, 6) Davida o vha a tshi dzhiela nṱha “thakha” yawe zwine zwa vha u vha na vhushaka havhuḓi na Yehova na ndugelo ya u mu shumela. U fana na Davida, ri sedzana na vhuleme, fhedzi ri na phaṱhutshedzo nnzhi vhukuma dza lwa muya! Nga zwenezwo-ha, kha ri bvele phanḓa ri tshi takalela vhurabeli ha ngoho nahone ri dzule ri tshi dzhiela nṱha thembele ya Yehova ya muya.