Naa ni nga si tende uri Yesu o vha e Mufunzi muhulu we a vhuya a tshila kha ḽifhasi? Ni nga kha ḓi vha no no lingedza u edzisa dziṅwe nḓila dze a vha a tshi funza ngadzo, dzi ngaho u shumisa dzimbudziso na zwifanyiso. Nga zwenezwo, naa no vhuya na zwi ṱhogomela uri o vha a tshi anzela u vhambedza musi a tshi funza?

Vhathu vhanzhi vha a vhambedza musi vha tshi amba. Khamusi na inwi ni a zwi ita ni sa zwi ṱhogomeli. Ni nga kha ḓi ri: “Hu pfi mitshelo yoṱhe yo vhibva; fhedzi heyi a i athu vhibva.” Kana, “O vha e ṅwana a re na ṱhoni, fhedzi zwino ndi muthu wa vhathu.”

Kha mafhungo a ngaho eneo, ni thoma na amba mbuno kana muhumbulo; nga murahu na vhambedza nga u shumisa mibulo i ngaho fhedzi, huno, nṱhani hazwo, kana kha ḽiṅwe sia. Kana ni nga vhambedza nga u engedza mafhungo kana u ombedzela mbuno. Musi ni tshi amba nga yeneyo nḓila, zwi pfala zwi zwa nzulele nahone zwi nga thusa vhaṅwe uri vha pfesese zwine na khou zwi amba.

Naho u vhambedza zwi songo ḓowelea kha dziṅwe nyambo kana mvelele, ndi zwavhuḓi u dzhiela nṱha ndeme yazwo. Ndi ngani? Ngauri ri wana zwithu zwinzhi zwi tshi vhambedzwa Ipfini ḽa Mudzimu ḽo hevhedzwaho. Yesu o vhambedza zwithu zwinzhi. Humbulani nga hezwi: “Ni songo humbula uri ndo ḓela u fhelisa Mulayo . . . [Fhedzi] ndo ḓa u ḓadzisa, hu si u fhelisa.” “No zwi pfa uri ho ambiwa ha pfi: ‘U songo ṱonḓola.’ Fhedzi ndi a ni vhudza uri muṅwe na muṅwe ane a dzulela u lavhelesa mufumakadzi . . . ” “No zwi pfa uri ho pfi: ‘Ḽiṱo nga ḽiṱo, ḽiṋo nga ḽiṋo.’ Huno nṋe ndi ri: Ni songo hanedza muvhi, fhedzi muṅwe na muṅwe ane a ni vhanda kha shama ḽa tsha u ḽa, ni mu ṋekedze na ḽiṅwe.” “A hu na ane a funga luvhone a lu dzumba kana a lu vhea fhasi ha tshirundu, fhedzi u lu vhea kha tshiṱomambone, uri lu vhonetshele vhane vha dzhena.”—Mat. 5:17, 27, 28, 38, 39; Luka 11:13.

Hu na u vhambedza hu fanaho kha dziṅwe bugu dza Bivhili. Hu nga ni thusa u pfesesa mbuno kana u ombedzela nḓila ya khwine ya u ita zwiṅwe zwithu. Arali ni mubebi, livhisani ṱhogomelo kha u vhambedza hu tevhelaho: “Vhokhotsi, ni songo sinyusa vhana vhaṋu, fhedzi bvelani phanḓa ni tshi vha alusa nga u vha laya na u vha ṱuṱuwedzela zwa Yehova.” (Vhaef. 6:4) Arali muapostola Paulo o vha o sokou ṅwala uri khotsi (kana mme) u fanela u alusa ṅwana nga ndayo ya Mudzimu, zwenezwo zwo vha zwi tshi ḓo vha zwi vhuṱali na ngoho. Naho zwo ralo, muhumbulo u a pfesesea zwavhuḓi musi hu na u vhambedza hune ha ri, ‘ni sa vha sinyusi, fhedzi ni tshi vha alusa nga u vha laya na u vha ṱuṱuwedzela zwa Yehova.’

Nga murahu kha yeneyo ndima, Paulo o ṅwala uri: “A ri khou lwa na ṋama na malofha, fhedzi ri khou lwa . . . na mimuya mivhi i re ṱaḓulu.” (Vhaef. 6:12) Honoho u vhambedza khamusi hu ni thusa u pfesesa uri ni na nndwa khulwane. A si nndwa ya vhathu; fhedzi ni khou lwa na mimuya mivhi.

Kha yeneyi bugu ya Bivhili ya Vhaefesa, ni ḓo wana maṅwalo manzhi e Paulo a vha a tshi khou vhambedza khao. U humbula nga ha zwenezwi zwi ḓo ri thusa uri ri pfesese zwine Paulo a khou zwi amba na nḓila ine ra nga zwi shumisa ngayo.

Ni nga kha ḓi takalela u ṱolisisa mutevhe wa tshati i tshimbidzanaho na tshenetshi tshiṱoho na u vhambedza hune na nga hu wana kha Vhaefesa ndima ya 4 na 5. Musi ni tshi vhala u vhambedza huṅwe na huṅwe, humbulani nga ha vhutshilo haṋu. Ḓivhudziseni uri: ‘Mavhonele anga ndi afhio zwa vhukuma? Ndi aravha hani musi ndi kha honoho vhuimo kana vhu fanaho? Vhaṅwe vha ḓo humbula uri ndi fanelwa nga u vhambedza hufhio?’ Arali u vhambedza zwa ni thusa u vhona uri hu na zwine na fanela u shumela khazwo, lingedzani u ita zwenezwo. Itani uri honoho u vhambedza hu ni thuse.

Kana ni nga shumisa tshati ine ya tshimbidzana na tshenetshi tshiṱoho kha vhurabeli ha muṱa. Tsha u thoma, miraḓo yoṱhe ya muṱa waṋu i nga vhala honoho u vhambedza. Nga murahu, muṅwe wa vhoiwe a nga amba tshipiḓa tsha u thoma tsha u vhambedza, a ṋea vhaṅwe muṱani tshifhinga tsha uri vha kone u humbula mbuno yo redzwaho kha tshipiḓa tsha vhuvhili. Zwenezwo zwi nga ita uri hu vhe na khaseledzo yavhuḓi ya muṱa ya nḓila ine na nga shumisa ngayo tshipiḓa tsha vhuvhili nga vhuḓalo. Vhukuma, u ṱolisisa honoho u vhambedza zwi nga thusa vhaṱuku na vhahulwane uri vha tovhole vhuḓifari ha Vhukriste muṱani na huṅwe fhethu.

Musi ni tshi thoma u ṱhogomela ndeme ya u vhambedza, zwi ḓo ni lelutshela u zwi vhona Bivhilini, nahone ni nga wana zwi tshi thusa vhukuma vhuḓinḓani haṋu ha Vhukriste. Sa tsumbo, ni nga amba zwi tevhelaho kha ṋemuḓi: “Vhathu vhanzhi vha amba uri muthu muṅwe na muṅwe u na muya u sa fi, fhedzi ṱhogomelani uri Ipfi ḽa Mudzimu ḽi ri mini.” Kana musi ni kha pfunzo ya Bivhili, ni nga kha ḓi vhudzisa uri: “Vhathu vhanzhi vha humbula u nga Mudzimu na Yesu ndi muthu muthihi; fhedzi ndi mini zwe ra zwi guda Bivhilini? Nahone ndi mini zwine na zwi tenda?”

Vhukuma, Maṅwalo a na u vhambedza hunzhi hu funzaho, hune ha nga ri thusa u tshimbila nḓilani ya Mudzimu. Nahone ni nga shumisa u vhambedza u itela u thusa vhaṅwe uri vha ḓivhe ngoho ya Bivhili.