1, 2. (a) Vhathu vhanzhi vha ṱalusa hani muthu o bvelelaho vhutshiloni? (b) Ni nga ḓivha hani uri ni na mavhonele afhio nga ha u bvelela vhutshiloni?

U BVELELA vhutshiloni zwi amba mini? Arali na nga vhudzisa vhathu mbudziso yeneyi, ni ḓo wana phindulo dzi sa fani na luthihi. Sa tsumbo, vhathu vhanzhi vha amba uri muthu a re na tshelede nnzhi, vhuimo ha nṱha, kana o funzeaho ndi ene o bvelelaho. Vhaṅwe vha amba uri vho bvelela musi vhe na vhushaka havhuḓi na vhaṅwe—nḓila ine vha pfana ngayo na mashaka, khonani, kana vhane vha shuma navho. Vhashumeli vha Mudzimu vha nga kha ḓi katela na vhuḓifhinduleli vhune vha vha naho tshivhidzoni, kana zwe vha zwi swikelela vhuḓinḓani.

² U itela u ḓivha nḓila ine na dzhia ngayo u bvelela vhutshiloni, ṅwalani fhasi madzina a vhathu vha si gathi vhane na vhona u nga vho bvelela—vhane na vha tama na u vha ṱhonifha. Ndi pfaneleo ifhio i fanaho ine vha vha nayo? Naa vhoṱhe vho pfuma kana ndi vhaḓivhalea? Naa ndi vha vhuimo ha nṱha? Phindulo dzaṋu dzi nga dzumbulula zwi re mbiluni yaṋu, nahone zwi nga ṱuṱuwedza zwine na zwi khetha vhutshiloni, na zwipikwa zwine na zwi tovhola.—Luka 6:45.

3. (a) Yoshua o vha a tshi fanela u ita mini u itela uri nḓila dzawe dzi vulee? (b) Ndi mini zwine ra ḓo zwi haseledza zwino?

³ Ri fanela u vhilaelela nḓila ine Yehova a dzhia ngayo u bvelela vhutshiloni, nga ṅwambo wa uri ndi zwa ndeme uri ri takalelwe ngae. Musi a tshi ṋea Yoshua mushumo wa ndeme wa u ranga phanḓa Vhaisiraele uri vha ye u dzhena Shangoni ḽo Fulufhedziswaho, Yehova o mu vhudza uri a vhale Mulayo wa Mushe “masiari na vhusiku,” na uri a u tevhedze nga vhuronwane. Mudzimu o mu khwaṱhisedza a ri: “Ndi hone dzinḓila dzaṋu dzi tshi ḓo vulea; ndi hone U tshi ḓo ita zwi ḓivhaleaho.” (Yosh. 1:7, 8) Ri a zwi ḓivha uri Yoshua o bvelela vhukuma. Hu pfi mini nga riṋe? Ri nga ita hani uri mavhonele ashu a u bvelela a fane na a Mudzimu? U itela u pfesesa zwenezwi, kha ri haseledze nga ha vhanna vhavhili vhe vha bulwa Bivhilini.

4. Ndi ngani hu tshi nga ambiwa uri Salomo o vha o bvelela vhukuma?

⁴ Salomo o bvelela vhukuma vhutshiloni hawe. Ndi ngani? Ndi nga nṱhani ha uri o fhedza miṅwaha yo vhalaho a tshi ofha na u ṱhonifha Yehova, we a mu fhaṱutshedza zwihulu. Humbulani uri musi Yehova a tshi vhudza Salomo uri a ite khumbelo, Salomo o humbela vhuṱali ha u ranga phanḓa lushaka. Nga nṱhani ha zwenezwo, Mudzimu o mu fhaṱutshedza nga vhuṱali na lupfumo. (Vhalani 1 Dzikhosi 3:10-14.) Vhuṱali hawe “ho vha hu tshi fhira vhuṱali ha vhoṱhe vho dzulaho thungo ya Vhubvaḓuvha, na hoṱhe vhuṱali ha Vha-Egipita.” Dzina ḽa Salomo “ḽo vha ḽi tshi ḓihwa thungo dzoṱhe kha tshakha dzoṱhe.” (1 Dzikh. 4:30, 31) Musuku we a vha a tshi u wana nga ṅwaha muthihi wo vha u na tshileme tshi fhiraho thani dza 25, une nga tshelede ya ṋamusi wa vhidza bilioni nnzhi vhukuma. (2 Koron. 9:13) O vha o ṱalifha vhukuma musi a tshi shumisana na maṅwe mashango, o fhaṱa zwithu zwinzhi zwavhuḓi, a dovha a vha na vhuṱali kha zwa vhubindudzi. Vhukuma, musi a tshi ita zwi takadzaho Mudzimu, Salomo o bvelela vhukuma vhutshiloni.—2 Koron. 9:22-24.

5. Salomo o ita phetho ifhio nga ha vhane Mudzimu a vha dzhia sa vho bvelelaho vhutshiloni?

⁵ Zwe Salomo a zwi ṅwala buguni yawe ya Muhuweleli zwi sumbedza uri o vha e na mavhonele avhuḓi nga ha u bvelela hawe. O vha a sa humbuli uri vhapfumi na vhaḓivhalea ndi vhone fhedzi vhane vha nga bvelela na u wana dakalo vhutshiloni. O ri: “Zwine nṋe nda zwi ḓivha ndi uri, a hu na tshi fhirisaho u takala ha muthu, na u ita zwivhuya misi a tshee hone; hone, ndi tshifhiwa tsha Mudzimu muthu a tshi ḽa a tshi nwa, a tshi vhona zwivhuya nga mishumo yawe yoṱhe.” (Muh. 3:12, 13) Nahone o zwi ṱhogomela uri muthu ane a takalelwa nga Mudzimu na a re na vhushaka havhuḓi nae, ndi ene ane a ḓiphina nga zwifhiwa zwenezwi. Salomo o dovha a ri: “Kha ri pfe-ha fhungo ḽine ḽa vunḓa oṱhe, ngeḽi: Ofha Mudzimu U tevhedze milayo yawe; ndi zwone zwo fanelaho vhathu vhoṱhe.”—Muh. 12:13.

6. Tsumbo ya Salomo i ri thusa hani u pfesesa zwine u bvelela vhutshiloni zwa vha zwone zwa vhukuma?

⁶ Salomo o fhedza miṅwaha minzhi a tshi ofha Mudzimu. Bivhili i ri: “O vha a tshi funa Yehova, a tevhedza dzindaelo dza Davida khotsi-awe.” (1 Dzikh. 3:3) Naa a ni dzhii zwenezwo sa u bvelela zwa vhukuma vhutshiloni? Salomo o vha a tshi livhiswa nga Mudzimu, nahone o fhaṱa thembele ya manaka-naka u itela vhurabeli ha ngoho, a ṅwala na bugu tharu dza Bivhili. Naho ri sa ḓo kona u ita zwi fanaho, tsumbo ya Salomo ya musi a tshi kha ḓi fulufhedzea kha Mudzimu i fanela u ri sumbedza nḓila ine ra nga kona u vhona zwine zwa ḓo ita uri ri bvelele vhutshiloni, na u ri thusa uri ri zwi swikelele. Malugana na ḽeneḽi fhungo, ri fanela u humbula uri Salomo o vha o hevhedzwa musi a tshi ṅwala uri u vha na lupfumo, vhuṱali, bvumo na maanḓa—zwithu zwine vhathu vhanzhi ṋamusi vha zwi dzhia zwi mutheo wa u bvelela vhutshiloni—zwi tou vha mahandana. U tovhola zwenezwi zwithu “ndi u pandamedza muya.” Naa no no zwi ṱhogomela uri vhathu vhane vha funesa lupfumo a vha fushei nga zwine vha vha nazwo, nahone vha ṱoḓa lwo engedzeaho? Vha anzela u vhilaela nga zwine vha si vhe nazwo. Zwiṅwe hafhu, lupfumo lwavho lu fheleledza lu tshi ḽiwa nga vhaṅwe.—Vhalani Muhuweleli 2:8-11, 17; 5:10-12.

7, 8.  Salomo ho ngo fulufhedzea hani, nahone ho vha na mvelelo dzifhio?

⁷ Salomo o fheleledza a si tsha thetshelesa Mudzimu. Ipfi ḽa Mudzimu ḽi ri: “Misi Salomo ó no kalaha vhasadzi vhawe vha ungeledza mbilu yawe, a tevhela midzimu i sili, mbilu yawe i si tsha nambatela Yehova vhunga mbilu ya khotsi yawe Davida. . . . Salomo a ita zwe zwa vhifhela Yehova, a si tsha tevhela Yehova nga mbilu yoṱhe vhunga Davida khotsi yawe.”—1 Dzikh. 11:4-6.

⁸ Zwenezwo a zwo ngo takadza Yehova na luthihi, nahone o vhudza Salomo a ri: “Ndi ḓo U dzhiela vhuhosi nda vhu ṋea mulanda wau nga u’ . . . wa si tevhedze mulanga we nda vhofha na’we na fhungo ḽe nda U laya.” (1 Dzikh. 11:11) Zwo vha zwi tshi pfisa vhuṱungu!  Salomo o vha o bvelela kha zwithu zwinzhi, fhedzi nga u ya ha tshifhinga ho ngo takadza Yehova. Salomo ho ngo tsha bvelela vhutshiloni ngauri ho ngo bvela phanḓa a tshi ita zwithu zwa ndeme vhukuma vhutshiloni hawe—zwine zwa vha u fulufhedzea kha Mudzimu. Muṅwe na muṅwe washu u fanela u ḓivhudzisa uri, ‘Naa ndo ḓiimisela u guda kha zwe zwa itea vhutshiloni ha Salomo uri na nṋe ndi bvelele?’

9. U ya nga mavhonele a shango, naa Paulo o vha a tshi dzhiiwa sa muthu o bvelelaho vhutshiloni? Ṱalutshedzani.

⁹ Vhutshilo ha muapostola Paulo ho vha ho fhambana tshoṱhe na ha Khosi Salomo. Paulo ho ngo tshila vhutshilo ha u kapula mapfura nga lebula pfamoni kana u ḓiphina nga u ḽa na u nwa na mahosi. Nṱhani hazwo, o sedzana na zwifhinga zwi konḓaho zwa u vha na nḓala, ḓora, phepho, na tsiku. (2 Vha-Kor. 11:24-27) Musi o no ṱanganedza Yesu sa Messia, Paulo ho ngo tsha vha na vhuimo ha nṱha vhurerelini ha Tshiyuda. Nṱhani hazwo, vharangaphanḓa vha vhurereli ha Tshiyuda vho vha vha tshi mu vhenga. O valelwa dzhele, a rwiwa nga zwimebi, nga ṱhamu, na u kanḓiwa nga matombo. Paulo o amba uri ene na Vhakriste ngae vho semiwa, vha tovholwa, na u tshinywa madzina. O ri vho dzhiiwa sa mathukhwi a shango na tshikha ya zwithu zwoṱhe.—1 Vha-Kor. 4:11-13.

10. Ndi ngani zwi tshi vhonala u nga Paulo o tamba nga tshibuli tsha u bvelela vhutshiloni?

¹⁰ Musi a tshee muswa a tshi kha ḓi pfi Saulo, muapostola Paulo o vha a tshi vhonala sa muthu ane a ḓo bvelela. O bebelwa muṱani wa vhaḓivhalea, a gudiswa nga mugudisi a ṱhonifheaho ane a pfi Gamaliele. Nga murahu o ṅwala a ri: “Ndo vha ndo tou bvelela phanḓa kha Vhu-Yuda, nda fhira vhanzhi vha thangá yanga.” (Vha-Gal. 1:14) Saulo o vha a tshi kona u amba zwavhuḓi Luheberu na Lugerika, e mudzulapo wa Roma, nahone zwenezwo zwo ita uri a wane ndugelo dzavhuḓi dze dza vha dzi tshi tamiwa nga vhanzhi. Arali Paulo a vhe o bvela phanḓa a tshi tovhola bvumo ḽeneḽo ḽa shango, o vha a tshi nga ṱhonifhea vhukuma na u vha muḓivhalea. Nṱhani hazwo, o khetha buḓo ḽe vhaṅwe vhathu, u katela na mashaka awe vha vhona ḽi ḽa vhutsilu. Ndi ngani?

11. Ndi zwifhio zwithu zwe Paulo a vha a tshi zwi dzhia zwi zwa ndeme, o vha e na tshipikwa tshifhio, nahone ndi ngani?

¹¹ Paulo o vha a tshi funa Yehova nahone a tshi ṱoḓa u ṱanganedzwa ngae, u fhira u vha mupfumi kana u vha na bvumo phanḓa ha vhathu. U vha na nḓivho yo teaho ya mafhungo-ngoho, zwo ita uri Paulo a dzhiele nṱha tshiṱhavhelo tshi rengululaho, vhuḓinḓa ha Vhukriste, fulufhelo ḽa u tshila ṱaḓulu—zwithu zwine shango ḽa zwi nyadza. Paulo o vha a tshi zwi ḓivha zwe Sathane a zwi amba nga ha vhathu. Sathane o amba uri a nga kona u ita uri vhathu vha shandukele Mudzimu. (Yobo 1:9-11; 2:3-5) Hu sa londwi milingo ye Paulo a sedzana nayo,  o vha o ḓiimisela u fulufhedzea kha Mudzimu na u konḓelela vhurabelini ha ngoho. Ndi tshipikwa tshine vhathu vhanzhi shangoni vhane vha ṱoḓa u bvelela vha si vhe natsho.

12. Ndi ngani no khetha u vhea fulufhelo ḽanu kha Mudzimu?

¹² Naa no ḓiimisela u fana na Paulo? Naho u dzula u tshi fulufhedzea vhutshiloni zwi sa leluwi, u fhaṱutshedzwa na u ṱanganedzwa nga Yehova ndi zwone zwine zwa ita uri muthu a bvelele zwa vhukuma vhutshiloni. (Mir. 10:22) Ri a vhuyelwa zwa zwino, nahone u ḓo ri fhaṱutshedza na tshifhingani tshi ḓaho. (Vhalani Marko 10:29, 30.) Nga zwenezwo, ri na tshiitisi tshi pfalaho tsha u vha na fulufhelo, hu si kha ‘lupfumo lu sí na halwo, fhedzi ri fulufhela Mudzimu, ané a ri kumedza zwoṱhe lwa u tou pfumisa, uri ri ḓifhelwe ngazwo.’ Ri ‘ḓi-kuvhanganyela zwiné zwa ḓo ita thikho yavhuḓi ya matshelo, uri ri wane vhutshilo vhu re vhutshilo nangoho.’ (1 Tim. 6:17-19) Zwi tou pfala uri ri nga vha na vhungoho ha uri na miṅwahani ya maḓana u bva zwino, kana i nga vha ya zwigidi, ri ḓo kona u sedza murahu ra amba uri, “Ndo khetha buḓo ḽine ḽa ita uri ndi bvelele zwa vhukuma vhutshiloni!”

13. Yesu o ṋea nyeletshedzo ifhio nga ha u ḓivhulungela lupfumo?

¹³ Musi a tshi amba nga ha lupfumo, Yesu o ri: “Ni songo ḓi-kuvhanganyela lupfumo fhano shangoni, huné lwa ḽiwa nga tsole na nga vhulali, huné mbava dza pala dza tswa. Lupfumo ḓi-kuvhanganyeleni ngei ṱaḓulu, lu sá ḽiwiho nga tsole na nga vhulali, lu sá paliwi nga mbava dza tswa. Ngauri huné lupfumo lwau lwa vha hone, ndi huné mbilu yau ya ḓo vha hone-vho.”—Mat. 6:19-21.

14. Ndi ngani zwi vhutsilu u tovhola lupfumo lwa shango?

¹⁴ Lupfumo lune muthu a vha nalwo shangoni a si lwa tshelede fhedzi. Lu nga katela zwithu zwe Salomo a ṅwala nga hazwo zwine musi u nazwo vhathu vha zwi dzhia uri wo bvelela—zwithu zwi ngaho vhuimo ha nṱha, bvumo, kana maanḓa. Yesu o amba mbuno i fanaho na ya Salomo i re kha bugu ya Muhuweleli—ya uri lupfumo lwa shango ndi lwa tshifhinganyana. Samusi no no ḓi zwi vhona shangoni ḽine na khou tshila khaḽo, lupfumo lwonolwo lu a ṱavhanya u fhela nga hu leluwaho. Musi a tshi ṅwala nga ha lupfumo, Muphurofesa F. Dale Bruner o sumbedza uri bvumo ḽi a ṱavhanya u fhela. Muthu a re na bvumo ṋamusi, u a ṱavhanya u hangwiwa nga tsha matshelo. Muthu ane a ita tshelede nnzhi vhukuma uno ṅwaha, a nga kha ḓi xelelwa ngayo yoṱhe nga ṅwaha u tevhelaho. Yesu u funa vhathu. Ndi ngazwo o vha ṱuṱuwedza uri vha iledze makhaulambilu ane a ḓiswa nga bvumo ḽa tshifhinganyana. I ngoho, ḽi a ṱavhanya u fhela. Yesu ha ṱoḓi vhafunziwa vhawe vha tshi kulea nungo. Ḓuvha ḽiṅwe na ḽiṅwe vhathu vhane vha fulufhela tshelede vha a kulea nungo. Naho vhathu vhanzhi vha tshi tendelana na mafhungo enea, ndi vhangana vhane vha nga shandula vhutshilo havho u itela u a tevhedza? Naa inwi ni nga zwi ita?

15. Ri fanela u tovhola u bvelela ha mufuda-ḓe?

¹⁵ Vhaṅwe vharangaphanḓa vha vhurereli vha funza uri zwo khakhea u ita vhuḓidini ha u ṱoḓa u bvelela. Ṱhogomelani uri Yesu ho ngo sasaladza vhuḓidini hoṱhe ha u ṱoḓa u bvelela.  Nṱhani hazwo, o vha a tshi khou eletshedza vhafunziwa vhawe uri vha fanela u ita vhuḓidini ha u ṱoḓa u bvelela nga nḓila yo teaho. O vha ṱuṱuwedza uri vha ḓivhulungele lupfumo lu sa fheli “ngei ṱaḓulu.” Zwa ndeme nga maanḓa vhutshiloni ndi uri Yehova a vhe ene ane a humbula uri ro bvelela. Vhukuma, maipfi a Yesu a ri humbudza uri muṅwe na muṅwe washu u a khetha zwine a ḓo zwi tovhola vhutshiloni. Ngoho ndi ya uri muthu u tovhola zwi re mbiluni yawe, zwithu zwine zwa vha zwa ndeme nga maanḓa khae.

16. Ndi nyeletshedzo ifhio ine ra nga i fulufhela tshoṱhe?

¹⁶ Arali ri tshi ṱoḓa u takadza Yehova zwi tshi bva mbiluni, ri nga vha na vhungoho ha uri u ḓo ri ṋea zwine ra zwi ṱoḓa. A nga kha ḓi zwi tendela uri ri farwe nga nḓala kana nga ḓora lwa tshifhinganyana, sa zwe zwa tshenzhelwa nga muapostola Paulo. (1 Vha-Kor. 4:11) Naho zwo ralo, ri nga fulufhela tshoṱhe nyeletshedzo ya Yesu ya vhuṱali musi a tshi ri: “Ni songo vhilaela na ri: Ri ḓo ḽa’ni, ri ḓo nwa’ni, ri ḓo fuka’ni? Hezwo zwoṱhe zwi londiwa nga vha-nnḓa. Ngauri khotsi-aṋu wa ṱaḓulu u a zwi ḓivha zwauri hezwo zwoṱhe ni na mushumo nazwo’. Tsha phanḓa ṱoḓani muvhuso wa Mudzimu na u luga hawe; hezwo zwoṱhe zwi ḓo vha zwiné na ingiwa ngazwo’.”—Mat. 6:31-33.

17, 18. (a) U bvelela zwa vhukuma vhutshiloni zwo ḓitika nga mini? (b) U bvelela vhutshiloni a zwo ngo ḓitika nga mini?

¹⁷ Mbuno ya ndeme ndi heyi: U bvelela hashu zwa vhukuma a zwi ḓitiki nga zwine ra zwi swikelela vhutshiloni kana vhuimo vhune ra vha naho shangoni. Zwiṅwe hafhu, u bvelela zwa vhukuma a zwi tshimbidzani na vhuimo vhune ra vha naho tshivhidzoni. Naho zwo ralo, phaṱhutshedzo yeneyo i tshimbidzana na zwine zwa vha mutheo wa vhukuma wa u bvelela, samusi u bvelela zwo thewa kha u thetshelesa Mudzimu na u fulufhedzea khae, nahone u a ri khwaṱhisedza musi a tshi ri: “Hone tshiṅwe tshi ṱoḓwaho kha vhakoma ndi uri kha vha waniwe vha tshi fulufhedzea.” (1 Vha-Kor. 4:2) Ri fanela u konḓelela u itela uri ri fulufhedzee. Yesu o ri: “Ane a ḓo konḓelela a swika vhufheloni ndi ene ane a ḓo tshidzwa.” (Mat. 10:22) Musi vhathu vhane vha fulufhedzea vha tshi tshidzwa, zwi ḓo tou vha khagala uri ndi vhone vho bvelelaho vhukuma vhutshiloni.

¹⁸ Musi ri tshi elekanya nga zwi re afho nṱha, ri a kona u zwi vhona uri u fulufhedzea kha Mudzimu a zwi tshimbidzani na u vha muḓivhalea, u funzea, u vha na tshelede nnzhi, kana u vha na vhuimo ha nṱha tshitshavhani; nahone u fulufhedzea a zwi ḓitiki nga u vha na vhuṱali, vhutsila kana vhukoni. Hu sa londwi vhuimo vhune ra ḓiwana ro sedzana naho, ri nga dzula ri tshi fulufhedzea kha Mudzimu. Vhathu vha Mudzimu vha ḓanani ḽa u thoma ḽa miṅwaha vho vha vha tshi katela vhapfumi na vhashai. Nyeletshedzo ya Paulo ya uri vhapfumi “nga vha ite zwivhuya, vha pfume u ita zwo nakaho, vha vhe vhakovhi, vha u ita vhushaka na vhaṅwe” yo vha yo tea. Fhedzi vhapfumi na vhashai vho vha vha tshi nga kona “uri vha wane vhutshilo vhu re vhutshilo nangoho.” (1 Tim. 6:17-19) Zwo tou ralo na ṋamusi. Roṱhe ri wana tshibuli tshi fanaho ra dovha ra hwala vhuḓifhinduleli vhu fanaho ha uri: Ri fanela u dzula ri tshi fulufhedzea, na u “pfum[a] u ita zwo nakaho.” Arali ra ita zwenezwi, ri ḓo vha vho bvelelaho vhutshiloni phanḓa ha Musiki washu, ra dovha ra takalela u ḓivha uri ri khou takadza mbilu yawe.—Mir. 27:11.

19. Kha mafhungo a u bvelela vhutshiloni, no ḓiimisela u ita mini?

¹⁹ Ni nga si kone u langa tshoṱhe zwiimo zwine na sedzana nazwo vhutshiloni, fhedzi ni nga kona u langa nḓila ine na aravha ngayo. Lwelani u dzula ni tshi fulufhedzea hu sa londwi zwiimo zwe na sedzana nazwo. Ni nga si ḓisole nga u ita zwenezwo. Ivhani na vhungoho ha uri Yehova u ḓo ni fhaṱutshedza vhukuma—zwino na nga hu sa fheli. Ni songo vhuya na hangwa maipfi e Yesu a vhudza Vhakriste vho ḓodzwaho musi a tshi ri: “Ivhá a fulufhedzeaho Ú vhuye Ú swike lufuni, ndi hone ndi tshi ḓo U fha dzánga ḽa vhutshilo!” (Ndzumb. 2:10) Zwenezwo ndi hone u bvelela ha vhukuma vhutshiloni!