Ṱhogomelani uri ho vha ho itea mini musi Yesu a tshi amba nga ha eneo maipfi a u sa dzhenela mbingano. Musi Vhafarisei vha tshi ḓa u amba nae nga ha ṱhalano, Yesu o vha vhudza nga ha zwilinganyo zwa Yehova zwa mbingano nga nḓila i pfalaho. Naho Mulayo wa Mushe wo vha u tshi tendela uri munna a ṋee mufumakadzi wawe luṅwalo lwa u mu ṱala arali a “sa ḓivhalei,” zwo vha zwi so ngo tou ralo mathomoni. (Doit. 24:1, 2) Yesu o ri: “Ané a vhuya a ṱala musadzi wawe nga tshiṅwe arali hú si vhupombwe, a dzea muṅwe, u ita vhupombwe.”—Mat. 19:3-9.

Musi vhafunziwa vha tshi pfa zwenezwo vho ri: “Arali mafhungo a munna na musadzi ó ralo, hu nga vha khwine arali muthu a sa dzei.” Yesu o vha fhindula a ri: “Fhungo ngeḽi, ḽine ḽi si ṱalukanywe nga vhoṱhe, ḽi ṱalukanywaho nga vho fhiwaho: Hu na khombe dzo bebwaho dzí khombe; hu na khombe dzo itwaho khombe nga vhathu; hu na dziṅwe khombe dzo ḓi-itaho khombe dzi tshi itela muvhuso wa ṱaḓulu. A konaho u zwi ṱalukanya a ṱalukanye.”—Mat. 19:10-12.

Zwi re zwone ndi uri khombe dza vhukuma ndi vhathu vhe vha bebwa vho tou ralo nga nṱhani ha vhuhole, kana vhe vha huvhala nga khombo. Naho zwo ralo, hu dovha ha vha na vhe vha tou ḓikhethela uri vha vhe dzikhombe. Naho vha tshi nga kona u vhinga, vha a ḓilanga uri vha kone u dzula vha songo vhinga vha tshi “itela muvhuso wa ṱaḓulu.” U fana na Yesu, vha khetha u sa vha mbinganoni u itela uri vha kone u ḓikumedza tshumeloni ya Muvhuso. A vho ngo bebwa vhe na tshifhiwa tsha u sa vha mbinganoni kana uri u tou ṋewa tshenetsho tshifhiwa. Ngoho ndi ya uri vho tou ḓikhethela uri vha vhe na tshenetsho tshifhiwa.

A tshi engedza kha zwe zwa ambiwa nga Yesu, muapostola Paulo o ṱalutshedza uri Vhakriste vhoṱhe—vha re mbinganoni, na vha siho mbinganoni—vha nga shumela Mudzimu nga nḓila i ṱanganedzeaho, nahone vha siho mbinganoni vho tou ḓivhudzaho ‘mbiluni dzavho’ uri a vha nga vhi mbinganoni vha ita zwo ‘nakaho.’ Nga nḓila-ḓe? Vhavhingani vha fanela u khethekanya tshifhinga tshavho na nungo dzavho u itela u takadza na u ṱhogomela vhafarisi vhavho. Kha ḽiṅwe sia, Vhakriste vha siho mbinganoni vha nga ita tshumelo ya Murena vha si na vhuḓifhinduleli ho raloho. Vha dzhia vhuimo havho sa ‘tshifhiwa’ tshi bvaho ha Mudzimu.—1 Vha-Kor. 7:7, 32-38.

Nga zwenezwo, Maṅwalo a ri vhudza uri Mukriste ha wani tshifhiwa tsha u sa vha mbinganoni nga lwa vhuṱolo. Nṱhani hazwo, u tou ṱahulela tshifhiwa tshenetsho nga u dzula e siho mbinganoni a tshi itela uri a si thithiswe musi a tshi shumela Mudzimu. Musalauno, hu na vhanzhi vho dzhiaho phetho ya u dzula vhe siho mbinganoni nga nṱhani ha tshenetsho tshiitisi, nahone zwi ḓo vha zwavhuḓi uri ri vha ṱuṱuwedze.