Vho Huwelela Ipfi Ḽa Mudzimu Nga Tshivhindi!

Vhakriste vha ngoho vha sumbedza tshivhindi musi vha tshi pikiswa. U fana na vhatendi nga riṋe vha ḓanani ḽa u thoma ḽa miṅwaha, ri humbela muya wa Yehova nga thabelo na uri a ri thuse uri ri ambe ipfi ḽawe nga tshivhindi.—Mish. 4:23-31.

Malugana na mushumo wa u huwelela tshifhingani tsha nndwa ya shango ya u thoma, muṅwe wahashu wa tshinnani o ṅwala uri: “Vhashumeli vha Mudzimu vho vha vha tshi phaḓaladza nga u fhisea volumu ya vhusumbe ya Studies in the Scriptures, i re na tshiṱoho tshine tsha ri The Finished Mystery. Yo phaḓaladzwa nga nḓila i mangadzaho vhukuma. Nga 1918, ho mbo ḓi bviswa tshibammbiri tsha Kingdom News No. 1. Ha tevhela Kingdom News No. 2, ye ya ṱalutshedza uri ndi ngani The Finished Mystery yo kandeledzwa nga vhavhusi. Yeneyi yo tevhelwa nga Kingdom News No. 3. Dzenedzi khandiso dzo phaḓaladzwa fhethu hoṱhe nga tshigwada tsha vhaḓodzwa tshi fulufhedzeaho. Zwo vha zwi tshi ṱoḓa lutendo na tshivhindi u itela u phaḓaladza tshibammbiri tsha Kingdom News.”

Ṋamusi vhahuweleli vhaswa vha Muvhuso vha anzela u gudiswa nḓila ya u huwelela vhuḓinḓani, fhedzi zwo vha zwi songo tou ralo kale. Musi a tshi elelwa ḓuvha ḽe a thoma ngaḽo u ya vhuḓinḓani ha tsimu nga 1922, muṅwe wahashu wa Mupolish wa ngei United States o ṅwala uri: “Ndo khokhonya ndi ndoṱhe muṋangoni wa ofisi ya dokotela ndi sa ḓivhi uri ndi ḓo tshimbidza hani bugu nahone ndi sa koni zwavhuḓi Luisimane. Ho mbo ḓi vula muongi. Ndi nga si vhuye nda hangwa yeneyo tshenzhelo ngauri ndo vha ndo takala nahone ndo tshuwa. Musi ndi tshi tou vula mukhwama wanga, bugu dzoṱhe dzo mbo ḓi wela milenzheni ya muongi. A thi ḓivhi uri ndo ri mini, fhedzi ndo mu ṋea khandiso. Musi ndi tshi bva henefho ndo vha ndi na tshivhindi nahone ndo ḓipfa ndo fhaṱutshedzwa nga Yehova. Nga ḽeneḽo ḓuvha ndo tshimbidza bugwana nnzhi kha tshenetsho tshiṱaraṱa tsha mabindu.”

Muṅwe wahashu wa tshisadzini o ri: “Nga vho-1933, vhahashu vhanzhi vho vha vha tshi shumisa goloi dzi re na khudzaipfi u itela u phaḓaladza mulaedza wa Muvhuso.” Kha tshiṅwe tshiitea, onoyo wahashu na vhaṅwe vhavhingani vha Dziṱhanzi vho huwelela thavhani dza ngei California, kha ḽa United States. O ri: “Wahashu wa tshinnani o gonyela nṱha thavhani nga goloi musi riṋe ro dzula ngeno fhasi ḓoroboni. Musi a tshi thoma u tamba mulaedza wo rekhodiwaho, wo vha u tshi pfala u nga u bva ṱaḓulu. Vhathu vha henefho ḓoroboni vho lingedza lunzhi-lunzhi u ṱoḓa onoyo wahashu wa tshinnani, fhedzi a vho ngo mu wana. Musi wonoyo mulaedza wo no fhela, ro mbo ḓi thoma u ṱanziela khavho. Ndo shumisa dziṅwe goloi mbili dzi re na khudzaipfi, fhedzi ngoho ndi ya uri vhathu vhanzhi vho vha vha sa takaleli u pfa mulaedza. Fhedzi ho vha hu si na zwine vha nga ita samusi wonoyo mulaedza u bvaho goloini wo vha u tshi pfala miḓini yavho. Nga zwenezwo, ro vha ri tshi zwi vhona uri tshifhinga tshoṱhe Yehova a nga shumisa nḓila yo teaho nga tshifhinga tsho teaho. Roṱhe ro vha ri tshi fanela u vha na tshivhindi u itela u  shumisa eneo maitele, fhedzi tshifhinga tshoṱhe o vha a tshi khunyeledza ndivho yao nahone dzina ḽa Yehova ḽi tshi rendiwa.”

Nga vho-1930 na mathomoni a vho-1940, ho vha hu tshi shumiswa giramafoni na nyambo dza Bivhili dzo rekhodiwaho vhuḓinḓani hashu. Muṅwe mufumakadzi wa Mukriste u ri: “Wahashu wa tshisadzini ane a kha ḓi vha muswa, o vha a tshi khou shuma nnḓu nga nnḓu e na giramafoni. Musi o no thoma u tamba rekhodo ya mulaedza kha muṅwe muḓi, munna wa henefho muḓini o sinyuwa vhukuma lwe a rahela yeneyo giramafoni kule. A hu na rekhodo na nthihi ye ya pwashea. Vhaṅwe vhanna vhararu vhe vha vha vha tshi khou ḽa tshiswiṱulo ngomu ṱhirakani, vho vhona zwe zwa itea nahone vha mu humbela uri a vha tambele yeneyo rekhodo, o vha ṋea na dziṅwe khandiso. Zwenezwo zwo ita uri a ḓipfe e khwine.” Hu ṱoḓea tshivhindi u itela u konḓelela milingo yo raloho.

Onoyo wahashu o dovha a ri: “Ndi humbula musi hu tshi thomiwa u tshimbidzwa magazini tshiṱaraṱani nga 1940. Mathomoni ho vha hu tshi tou matshiwa. Vhahashu vha tshinnani na vha tshisadzini vho vha vha tshi ita muduba nga thungo ha tshiṱaraṱa vho fara bodo dzo ṅwalwaho uri, ‘Vhurereli Ndi Tshikwekwe Na Mufhuri’ na uri, ‘Shumelani Mudzimu Na Kristo A Re Khosi.’ Nga tshenetsho tshifhinga ho vha hu tshi tshimbidzwa zwibammbiri vhathuni. Zwo vha zwi tshi ṱoḓa tshivhindi uri muthu a kone u ita wonoyu mushumo, fhedzi zwo vha zwi tshi thusa uri dzina ḽa Yehova na vhathu vhawe vha ḓivhee tshitshavhani.”

Muṅwe wahashu wa tshisadzini o ri: “U ita mushumo wa magazini ḓoroboni ṱhukhu zwo vha zwi tshi konḓa vhukuma. Zwenezwi zwo vha zwi tshi itiswa ngauri Ṱhanzi dzo vha dzi tshi tovholwa vhukuma. . . . Zwo vha zwi tshi ṱoḓa uri ri vhe na tshivhindi u ima khonani ro fara magazini na u huwelela zwo ṅwalwaho kha bodo. Naho zwo ralo, ro vha ri sa anzeli u pfukisa Mugivhela ri songo ya. Nga zwiṅwe zwifhinga, vhathu vho vha vhe na vhukonani. Nga zwiṅwe zwifhinga, ho vha hu tshi vha na zwigwada zwa vhathu vho sinyuwaho, nahone ro vha ri tshi anzela u bva henefho uri vha si ri fare luvhi.”

Ṱhanzi dza Yehova vho bvela phanḓa na vhuḓinḓa havho nga tshivhindi hu sa londwi u tovholwa he vha sedzana naho tshifhingani tsha Nndwa ya Shango ya Vhuvhili. Kha fulo ḽa maḓuvha a 43 ḽe ḽa thoma nga ḽa 1 December, 1940, u swika nga ḽa 12 January, 1941, vhahuweleli vha ṱoḓaho u vha 50 000 ngei United States vho phaḓaladza zwibugwana zwi ṱoḓaho u vha milioni dza malo.

Vhaaluwa vhanzhi vha re ndanguloni ya Mudzimu, vha kha ḓi humbula zwavhuḓi khaedu dze vha sedzana nadzo dze dza ita uri vha vhe na tshivhindi. Vhaṅwe vha kha ḓi humbula uri lwa miṅwaha minzhi vho vha vha tshi sumbedza uri vha na tshivhindi nga u amba maipfi ane a ri: Kha ri bvele phanḓa ri tshi huwelela nga u fhisea u swika mafheleloni! Ri kha ḓi ḓo vhona uri mulaedza we ra u ṋewa nga Mudzimu u ḓo vha hani musi ano maitele mavhi a zwithu a tshi fhela. Naho zwo ralo, ri tshi thuswa nga Mudzimu, ri ḓo bvela phanḓa ri tshi ḓivhadza ipfi ḽa Yehova nga lutendo na tshivhindi.

[Maipfi o ṱumbulwaho kha siaṱari 9]

Tshifhinga tshoṱhe hu ṱoḓea uri ri vhe na tshivhindi uri ri kone u ṱanganela kha mushumo wa u huwelela nga ha Muvhuso