Zwe Ra Zwi Vhulunga

U Vhulunga Zwithu Zwa Ndeme Zwa Ḓivhazwakale Yashu

VHATHU vha Yehova vha na ḓivhazwakale i nyanyulaho ine ya amba nga ha nḓila ye vha mu shumela ngayo. Mafhungo a takadzaho a ḽeneḽo ifa ha wanali khandisoni dzashu fhedzi, fhedzi a dovha a wanala na kha zwinepe, marifhi, nganeavhutshilo, zwithu zwi tshimbidzanaho na vhurabeli hashu, mushumo washu wa u huwelela na ḓivhazwakale yashu. Ndi ngani ri tshi fanela u vhulunga zwenezwo zwithu na u ṱolisisa ḓivhazwakale yashu? Ṱhoho dza miṱa kha ḽa Isiraele dzo vha dzi tshi fanela u vhudza vhana vhadzo milayo na mishumo ya Yehova i mangadzaho u itela uri vha “fulufhedze Mudzimu.”—Ps. 78:1-7.

Ndi kale u ita ṱhoḓisiso kha zwithu zwo vhulungwaho zwi tshi thusa kha u ḓadzea ha ndivho ya Yehova. Sa tsumbo, musi vhapikisi vha tshi lingedza u thivhela mushumo wa u vusulusa thembele ngei Yerusalema, u ṱoḓiwa ha maṅwalo mbulungeloni dza musanda wa Ahametha kha ḽa Meda zwo ita uri hu waniwe ḽiṅwalwa ḽa Khosi Korese ḽa u ṋea thendelo ya uri wonoyo mushumo u bvele phanḓa. (Esera 6:1-4, 12) Nga zwenezwo, u tendelana na zwine Mudzimu a zwi funa, ho mbo ḓi vusuluswa thembele. Na muṅwali wa Evangeli Luka o ita ṱhoḓisiso kha maṅwalwa e a vhulungwa, ó “ranga u vhudzisesa nḓila dzazwo he zwa simuluwa hone.”—Luka 1:1-4.

Tshigwada tshi Langaho tshi na dzangalelo ḽihulwane kha ḓivhazwakale yashu ya lwa ṱaḓulu. Malugana  na ṱhoḓea ya u vhulunga, u ṅwala, na u vhudza vhaṅwe ifa ḽashu ḽa lwa muya, muṅwe muraḓo wa Tshigwada tshi Langaho o ri: “U itela u ḓivha hune ra khou ya hone, ri fanela u ḓivha hune ra bva hone.” Nga zwenezwo, ho dzudzanywa Mbulungelo ya Muhasho wa Vhuṅwaleli ofisini khulwane ya shango ḽoṱhe ngei Brooklyn kha ḽa New York, nahone u livhiswa nga Komiti ya Vhuṅwaleli.

“ALIBAMU YASHU YA MUṰA” NA “THAKHA”

Musi tshifhinga tshi tshi khou ḓi ṱanḓulukana tshi tshi ya, kanzhi vhunzhi hashu ri tama arali ri vhe ro vhulunga zwithu nnzhi zwa muṱa washu. Mbulungelo ya Muhasho wa Vhuṅwaleli i khou shuma nga u fhisea u itela u vhulunga na u ṅwala nga ha ifa na ndaka yashu ine ya khou engedzea. Zwinepe zwo vhewaho zwavhuḓi Mbulungeloni zwi dzhiiwa sa tshipiḓa tsha “alibamu ya muṱa” washu. Khandiso dzashu dza u thoma, nganeavhutshilo dzi takadzaho, na zwithu zwa ndeme zwa ndangulo zwi a katelwa kha zwithu zwine zwa vhewa Mbulungeloni. Zwithu zwo raloho ndi “thakha” ine ya ri funza nga ha ifa ḽashu ḽa lwa ṱaḓulu na u ri thusa u lavhelela vhumatshelo ha muṱa washu wa muya ri na fulufhelo.

Ri ni ramba uri ni sedze Mbulungelo ya Muhasho wa Vhuṅwaleli kha thero yashu ntswa ine ya ri “Zwe Ra Zwi Vhulunga.” I ḓo vha hone nga zwiṅwe zwifhinga kha magazini u gudwaho wa Tshiingamo. Sa tsumbo, khandisoni dzi tevhelaho ro dzudzanya u gandisa thero i re na zwifanyiso ine ya ḓo fhindula mbudziso dzi tevhelaho: Gariki ya Dzibugu ndi mini? Yo vha i tshi shumiswa nga vhonnyi? Yo shumiswa lini, nahone yo vha i tshi shumiselwa mini?

U fana na alibamu ya muṱa i re na zwinepe zwa kale, zwithu zwi re Mbulungeloni zwi ri vhudza zwinzhi nga ha riṋe vhane na vhomakhulukuku washu vha muya—nga ha lutendo na tshivhindi zwa vhathu vhe vha tshila phanḓa hashu, nga ha zwithu zwi takadzaho na khaedu dza u shumela Khotsi ashu wa ṱaḓulu wa lufuno, na nga vhulivhisi ha Mudzimu na nḓila ine a tikedza ngayo vhathu vhawe zwifhinga zwoṱhe. (Doit. 33:27) Ri na vhungoho ha uri Yehova u ḓo fhaṱutshedza vhuḓidini hashu ha u vhulunga ḓivhazwakale yashu ya lwa muya u itela uri ri vhe na vhuthihi na nungo dza u ita zwine a zwi funa.

[Bogisi/Tshifanyiso kha siaṱari 31]

Kha Ri Ṱolisise Wonoyu Muhasho

Musi hu tshi itwa khandiso dza Vhukriste, dzi-DVD, na dziṅwe khandiso dzo thewaho Bivhilini, vhaṅwali, vhaoli, vhaṱoḓisisi vhashu na vhaṅwe, vha shumisa zwithu zwe ra zwi vhulunga. Vha Mbulungelo ya Muhasho wa Vhuṅwaleli vha vha na vhulondi musi vha tshi kuvhanganya na u vhulunga zwithu zwo fhamba-fhambanaho zwa ḓivhazwakale zwi bvaho ofisini dza madavhi, mihashoni ya Bethele, zwivhidzoni, kha vhathu na kha madzangano a shango. Ṱolisisani wonoyu mushumo nga u tou angaredza:

U Zwi Kuvhanganya Na U Zwi Ṱolisisa: Tshifhinga tshoṱhe hu dzheniswa zwithu zwo khetheaho Mbulungeloni. Vhunzhi ha zwenezwi zwithu zwi tou ṋeelwa kana zwa hadzimiswa nga vhathu vhe miṱa yavho ya shumela Yehova nga u fulufhedzea u bva kale. U elekanya na u vhambedza zwithu zwo raloho zwi engedza nḓila ine ra pfesesa ngayo ḓivhazwakale yashu na vhathu vhe vha tshila nga tshenetsho tshifhinga.

U Zwi Dzudzanya: Mbulungeloni ya Muhasho wa Vhuṅwaleli hu na zwithu zwa zwigidi-gidi, nahone zwiṅwe zwi na miṅwaha i fhiraho ḓana. Hu na zwithu zwo fhamba-fhambanaho Mbulungeloni nahone zwi fanela u dzudzanywa zwavhuḓi u itela u zwi shumisa tshifhingani tshi ḓaho.

U Zwi Vusulusa Na U Zwi Londota: Dzibugu na zwithu zwine zwa ṱoḓa u farwa nga vhulondi zwi a vusuluswa na u londotwa hu tshi shumiswa vhomakone. Maṅwalwa, zwinepe, zwibammbiri zwa mafhungo, dzifilimu, na zwithu zwo rekhodiwaho zwi a vhulungwa kha khomphyutha. Nga zwenezwo, zwi nga wanala kha khomphyutha u iledza u tshinya eneo maṅwalwa kana zwiṅwe zwithu zwa ndeme.

U Zwi Vhulunga Na U Zwi Wana Hafhu: Zwithu zwo vhulungwaho zwi vhewa nga nḓila yo dzudzanyeaho na yo tsireledzeaho u itela uri zwi songo xela na u zwi tsireledza kha tshedza na mugugumela. Hu khou itwa phurogireme ya khomphyutha ya u thusa u ita ṱhoḓisiso na u wana zwithu zwa ndeme zwa kale.

[Zwifanyiso kha siaṱari 32]

1. Bammbiri ḽa “Photo-Drama of Creation.” 2. Madzina a muṅwaliso. 3. Goloi ya u huwelela. 4. Gwati ḽa Tshiingamo tsha Luisimane tsha ḽa 15 April, 1912. 5. Ṱhanziela ya u farwa ya J. F. Rutherford. 6. Khudzaipfi ya WBBR. 7.  Giramafoni. 8. Phuthumennde ya u hwala bugu. 9. Dzinotsi. 10. Thelegiramu ye ya ṅwalelwa J. F. Rutherford.