Naa Ni A Zwi Humbula?

Naa no takalela u vhala thero dza zwenezwino dza Tshiingamo? Vhonani arali ni tshi nga fhindula mbudziso dzi tevhelaho:

• Ndi nnyi ane a fanela u gudisa vhana nga ha Mudzimu?

Naho vhaṅwe vha tshi nga thusa khotsi na mme u gudisa vhana, vhabebi ndi vhone vhane vha vha na vhuḓifhinduleli vhuhulwane ha u gudisa vhana vhavho nga ha Mudzimu na nḓila ine Mudzimu a ṱoḓa muṱa u tshi tshimbidzwa ngayo.—10/1, siaṱari 7.

• Mudzimu o vha a tshi khou amba mini musi a tshi vhudza Vhalevi uri: “Mukovhe wau . . . ndi Nṋe”?

Tshaka dzoṱhe dza Vhaisiraele dzo vha dzo wana mukovhe wa shango, fhedzi Yehova o vha e “mukovhe” wa Vhalevi. (Num. 18:20) Vho vha vha sa ḓo wana ifa ḽa shango, fhedzi vho ṋewa ndugelo yo khetheaho ya tshumelo. Naho zwo ralo, Yehova o ṱhogomela ṱhoḓea dzavho dza ṋama. Ṋamusi, vhane vha vha na ndugelo ya u tikedza zwithu zwine zwa tshimbidzana na Muvhuso, vha nga vha na vhungoho ha uri Yehova u ḓo vha ṋea ṱhoḓea dza vhutshilo.—9/15, masiaṱari 7-8,13.

• Ndi ngani zwi zwa ndeme u ṱhonifha mufarisi waṋu?

U ṱhonifha ndi tshiṅwe tsha zwithu zwine zwa ita uri mbingano i vhe ya tshoṱhe. Zwi ita uri mbingano i vhe i fushaho nahone i tsireledzee. Zwi a vhuyedza u ṱahulela u vha na ṱhonifho.—10/1, siaṱari 12.

• Ndi mini zwine zwa nga thusa Mukriste uri a kone u vhona arali vhuḓimvumvusi vhu tshi ḓo mu vhuyedza kana vhu sa ḓo mu vhuyedza?

U itela u vhona uri ndi vhuḓimvumvusi-ḓe vhune ha ḓo ri vhuyedza na u ṱanganedzwa nga Mudzimu, zwi ḓo vha zwavhuḓi u ḓivhudzisa uri: Ndi ḓimvumvusa nga mini? Ndi ḓimvumvusa lini? Ndi ḓimvumvusa na vhonnyi?—10/15, masiaṱari 9-12.

• Naa ri fanela u lifha mithelo?

Musi Yesu a tshi vhudziswa arali zwo vha zwo tea u lifha mithelo kha Muvhuso wa Roma wa tshenetsho tshifhinga, o fhindula nga maipfi a tevhelaho: “Khosi i ṋeeni-ha zwi re zwa khosi; Mudzimu ni mu ṋee zwi re zwa Mudzimu.” (Marko 12:13-17) Mivhuso—ine ya imelwa nga “Khosi,” i gandisa tshelede ya tsimbi kana ya bammbiri na u langa maanḓa ayo. I dovha ya itela lushaka tshumelo nnzhi. Ngauralo, u ya nga mavhonele a Mudzimu i na ndugelo ya u humbela uri yeneyo tshelede i badelwe sa mithelo.—10/1, masiaṱari 14, 15.

• Mafhungo ane a vha kha Mirero 7:6-23 a nga ri thusa hani u iledza u sedza zwifanyiso zwi karusaho maḓipfele a zwa vhudzekani?

Eneo mafhungo a amba nga ha muṅwe muṱhannga we a tshimbila mikotoni ine zwa ḓivhea uri hu na mufumakadzi wa u ḓifara luvhi. Onoyo mufumakadzi o mbo ḓi mu fhureledza. Ṋamusi zwi ḓo vha zwavhuḓi uri ri iledze web-site dza Inthanethe dzine dza vha na zwifanyiso zwi karusaho maḓipfele, nahone ndi zwa ndeme u ṱoḓa thuso ya Mudzimu nga thabelo musi ri sa athu thoma u vula zwenezwo zwifanyiso kha Inthanethe.—11/15, masiaṱari 9-10.

• Ni nga ṱalula hani vhurereli ha ngoho?

Vhagwadameli vha ngoho vha ṱhonifha Bivhili sa Ipfi ḽa Mudzimu. Vha hulisa dzina ḽa Mudzimu Yehova nahone vha huwelela nga ha Muvhuso wa Mudzimu. A vha tshipiḓa tsha ḽino shango ḽivhi nahone vha a funana vhukuma.—10/1, masiaṱari 16, 17.

• Naa Mudzimu u dzhiela nṱha tsinde ḽiṅwe u fhira maṅwe?

Hai. Bivhili i zwi vhea nga nḓila i pfalaho musi i tshi ri: “Mudzimu ha ṱaluli muthu. Atsina kha tshakha dzoṱhe, ané a mu ofha a ita zwo lugaho, u a mu funa.”—Mish. 10:34, 35. 10/1, siaṱari 26.