Nḓila Dzine Ra Nga Dzi Shumisa Kha Vhurabeli Ha Muṱa Na Pfunzo Ya Muthu Nga Eṱhe

MATHOMONI a ṅwaha wa 2009, zwivhidzo zwa Ṱhanzi dza Yehova shangoni ḽoṱhe zwo shandula mbekanyo yazwo ya u fara miṱangano. Miṱangano mivhili ye ya vha i tshi farwa vhukati ha vhege yo ṱanganyiswa ya vha muṱangano muthihi, nahone roṱhe ro ṱuṱuwedzwa uri ri shumise madekwana a ḓuvha ḽithihi a vhege ane ra sa vhe na muṱangano u itela vhurabeli ha muṱa kana pfunzo ya muthu nga eṱhe. Naa ni khou shumisa yeneyi ndugiselelo ntswa zwavhuḓi? Naa i khou ni vhuyedza nga vhuḓalo?

Vhaṅwe vho ḓivhudzisa uri vha nga haseledza nga ha mini kha vhurabeli ha muṱa. Tshigwada tshi Langaho a tshi ṱoḓi uri miṱa yoṱhe i tevhedze nḓila nthihi ya u guda. Samusi zwiimo zwi sa fani, zwi ḓo vha zwo tea uri ṱhoho ya muṱa kana uri muthu nga eṱhe a vhone uri ndi zwifhio zwine zwa nga haseledzwa vhege iṅwe na iṅwe.

Vhaṅwe vho vha vha tshi vho lugiselela miṱangano ya tshivhidzo kha vhurabeli ha muṱa, fhedzi vhurabeli ha muṱa a ho ngo itelwa zwenezwo. Vhaṅwe vha a vhala, u haseledza, na u ita matambwa a re Maṅwaloni, zwihuluhulu vha tshi itela vhana vhaṱuku. A zwi ṱoḓei uri tshifhinga tshoṱhe hu vhudziswe mbudziso na u fhindulana sa zwine zwa itiswa zwone miṱanganoni. Musi vhathu vho ḓigeḓa vha a kona u haseledza zwavhuḓi na u khuthadzana. Zwenezwo zwi ita uri vhathu vha kone u humbula, zwine zwa nga ita uri hu takadze na uri yeneyo pfunzo i si hangwee.

Muṅwe khotsi a re na vhana vhararu o ri: “Zwine ra zwi ita zwo thewa nga maanḓa kha Bivhili. Roṱhe ri vhala ndimana hu tshee nga phanḓa, vhana vhashu vha ita ṱhoḓisiso kha mafhungo ane vha ḓo a vhala, nahone vha amba zwe vha zwi wana. Michael [a re na miṅwaha ya sumbe] u anzela u ola tshifanyiso kana a ṅwala phara ine ya amba nga ha Bivhili. David na Kaitlyn [vha re na miṅwaha ya 13 na ya 15] vha nga kha ḓi ṅwala nga ha mafhungo a re Bivhilini sa muṅwe wa vhathu vha re henefho. Sa tsumbo, musi ri tshi khou vhala nga ha musi Yosefa a tshi ṱalutshedza miloro ya mubiki na ndumi ya Farao, Kaitlyn o ṅwala maanea sa muṅwe we a vha e dzhele a tshi khou vhona zwenezwi zwi tshi khou itea.”—Gen., ndim. 40.

Nga lwa nzulele, zwiimo zwi nga si fane. Zwine zwa shuma kha muṅwe muṱa zwi nga si fane na zwine zwa ḓo shuma kha muṅwe. Bogisi ḽi tevhelaho ḽi na nḓila dzo vhalaho dzine na nga kha ḓi dzi shumisa kha vhurabeli ha muṱa kana pfunzo ya muthu nga eṱhe. Hu nga kha ḓi vha na dziṅwe nḓila dzine na nga dzi humbula.

[Bogisi/Tshifanyiso kha masiaṱari 6, 7]

 Miṱa i re na vhaswa vha re miṅwahani ya vhufumi:

• Vhalani ni dovhe ni haseledze bugu Mbudziso Dzine Vhaswa Vha Dzi Vhudzisa—Phindulo Dzi Shumaho.

• Ḓiḓowedzeni nḓila ya u sedzana na zwiimo zwo fhamba-fhambanaho nga u vhudzisana uri “Ho vha hu tshi ḓo itea mini arali . . . ?” (Sedzani Tshiingamo tsha ḽa 15 May, 1996, siaṱari 14, phara 17-18.)

• Ambani nga ha zwipikwa zwa tshifhinga tshilapfu na zwa tshifhinganyana.

• Nga zwiṅwe zwifhinga ṱalelani vidio dzo thewaho Bivhilini ni dovhe ni haseledze nga hadzo.

• Haseledzani thero i re kha Tshiingamo ine ya ri “Vhaswa.”

Vhavhingani vha si na vhana:

• Haseledzani dzindima 1, 3, 11-16 dza bugu Tshiphiri tsha Dakalo ḽa Muṱa.

• Haseledzani mbuno dze na dzi wana musi ni tshi khou ita ṱhoḓisiso ya muvhalo wa Bivhili.

• Lugiselelani Pfunzo ya Bivhili ya Tshivhidzo kana Pfunzo ya Tshiingamo.

• Haseledzani nḓila dzine na nga ṱanḓavhudza ngadzo vhuḓinḓa ha vhoiwe sa vhavhingani.

Vhahashu vha siho mbinganoni:

• Gudani khandiso ntswa dzo bvaho mabuthananoni a zwiṱiriki.

• Vhalani Yearbook dza zwino na dza miṅwaha yo fhelaho.

• Itani ṱhoḓisiso nga ha mbudziso dzo ḓoweleaho tsimuni ya vhoiwe.

• Lugiselelani maambele ane na ḓo a shumisa vhuḓinḓani ha tsimu.

Miṱa i re na vhana vhaṱuku:

• Tambani matambwa a zwiitea zwi re Bivhilini.

• Tambani mitambo ine ya ḓo ita uri vha humbule, i ngaho i re kha masiaṱari 30 na 31 kha Awake!

• Nga zwiṅwe zwifhinga, itani zwiṅwe zwithu zwi songo ḓoweleaho zwe na zwi humbula (Sedzani “Studying the Bible—In the Zoo!” kha Awake! ya ḽa 8 March, 1996, masiaṱari 16-19.)

• Ṱhogomelani thero ine ya ri “Gudisani Vhana Vhaṋu” kha Tshiingamo.