U Ita Zwivhuya Musi Hu Na Ṱhoḓea

MUAPOSTOLA PAULO o ṱuṱuwedza a ri: “Nga ri ite zwivhuya ri tshi itela vhoṱhe, zwihulu-hulu ri tshi itela vha re vha nnḓu nthihi na riṋe nga lutendo.” (Vha-Galata 6:10) Ṱhanzi dza Yehova mashangoni oṱhe dzi lwela u tevhedza eneo maitele vhutshiloni hadzo, dzi tshi itela vhathu vhoṱhe zwivhuya, zwihulu-hulu vhane vha vha na lutendo luthihi nadzo. Hezwi zwo vhonala vhukuma tshifhingani tsha musi hu na ṱhoḓea ya u ita nga u ralo. Kha ri ṱhogomela tsumbo dza zwenezwino kha mashango mararu.

Nga December 2002, ḓumbumazikule ḽi re na maanḓa ḽo tshinyadza vhupo ha ngei Guam nga muya we wa vha u tshi khou gidima khilomithara dza 300 nga awara. Mahaya manzhi o ṱhaṱhamulwa nahone maṅwe a tshinyadzwa lwa tshoṱhe. Zwivhidzo zwa henefho zwo ṱavhanya zwa dzudzanya zwigwada zwine zwa ḓo kunakisa u itela u thusa miṱa ya Ṱhanzi dze dza tshinyalelwa vhukuma. Davhi ḽa ngei Guam ḽo ṋekedza zwishumiswa na vhashumi hu u itela uri vha kone u lugisa mahaya o tshinyadzwaho, nahone davhi ḽa ngei Hawaii na ḽone ḽo ṋekedza thuso. Hu sa athu u fhela vhege ho mbo ḓi swika vhaḓivhi vha mabulannga vha bvaho ngei Hawaii u itela u thusa kha mushumo wa u fhaṱa na u vha thusa, vhaṅwe vhahashu vha henefho tsini vho dzhia maḓuvha avho a vhuawelo mishumoni hu u itela uri vha kone u thusa. Muya wavho wa u shumisana nga dakalo wo shuma sa vhuṱanzi kha vhoṱhe vhe vha vha vha tshi dzula henefho.

Kha iṅwe ḓorobo ya ngei Mandalay, Myanmar, ho mbo ḓi takuwa mulilo tsini na Holo ya Muvhuso. Nga henefho tsini ho vha hu na nnḓu ya wahashu wa tshisadzini we a vha a sa tsha fhisea na muṱa wahawe. Muya wo vha u tshi khou vhudzulela thungo ya nnḓu yawe, ngauralo a gidimela holoni u itela u wana thuso. Nga tshenetsho tshifhinga, holo yo vha i tshi khou vusuluswa, nga zwenezwo ho vha hu na vhahashu vha tshinnani vhanzhi henefho holoni. Vho vha vho mangala vhukuma u vhona onoyo wahashu wa tshisadzini ngauri vho vha vha sa zwi ḓivhi uri u dzula vhuponi honoho. Nga u ṱavhanya vhahashu vha mu thusa nga u pfulusela thundu dzawe fhethu ho tsireledzeaho. Musi munna wawe ane a sa vhe Ṱhanzi a tshi pfa nga ha wonoyo mulilo, a ṱavhanya a gidimela hayani nahone a wana vhahashu vha tshi khou ṱhogomela muṱa wawe. O vha o takala vhukuma nahone o vhofholowa ngauri o vha a tshi zwi ḓivha uri thundu dzi anzela u tswiwa nga tshifhinga tsha musi dzi tshi khou pfuluswa. Wonoyo musumbedzo wa vhahashu wa vhuthu wo ṱuṱuwedza onoyo wahashu wa tshisadzini na murwa wawe uri vha dovhe vha ṱanganele tshivhidzoni tsha Vhukriste, nahone zwa zwino vha a ṱanganela kha miṱangano yoṱhe ya tshivhidzo.

Tshumeloni ya ṅwaha yo fhelaho, vhathu vhanzhi vha ngei Mozambique vho sedzana na nḓala nga ṅwambo wa gomelelo na u sa vha hone ha khaṋo. Davhi ḽa henefho tsini ḽa Ṱhanzi dza Yehova ḽo mbo ḓi dzhia vhukando nga u ṱavhanya nga u ṋea vha shayaho zwiḽiwa. Vhathu vho vha vha  tshi kovhelwa zwiḽiwa Holoni ya Muvhuso, tshiṅwe tshifhinga zwenezwo zwo vha zwi tshi itwa nga murahu ha miṱangano. Muṅwe wahashu wa tshisadzini ane a vha mubebi a re eṱhe o ri: “Ndo ḓa muṱanganoni ndo tsikeledzea, ndi sa ḓivhi uri vhana vhanga ndi ḓo vha fha mini tsha u ḽa musi ndi tshi swika hayani.” Thuso ya lufuno yo ṋekedzwaho nga vhahashu yo mu ṱuṱuwedza vhukuma. O ri: “Yo vha i tshi tou fana na mvuwo kha nṋe!”

Ṱhanzi dzi dovha dza “ita zwivhuya” nga nḓila ya muya nga u amba mulaedza wa Bivhili wa khuthadzo na wa fulufhelo. Vha tenda kha zwe muṅwe munna wa kale wa vhuṱali a vhuya tenda khazwo musi a tshi ri: “Hone ane a pfa [vhuṱali ha Mudzimu], u ḓo dzula ó takala; u ḓo fhaṱa á sa ofhi khombo.”—Mirero 1:33.

[Zwifanyiso kha siaṱari 31]

1, 2. U ṋekedzwa ha zwiḽiwa kha vha shayaho ngei Mozambique

3, 4. Ḓumbumazikule ḽe ḽa tshinyadza mahaya manzhi ngei Guam

[Ṱhaluso ya Vhubvo ha Tshifanyiso]

Child, left: Andrea Booher/FEMA News Photo; woman, above: AP Photo/Pacific Daily News, Masako Watanabe