Mbudziso Dzi Bvaho Ha Vhavhali

Samusi Vha-Levi vho vha vha si na mukovhe wa ifa kha ḽa Isiraele ḽa kale, Hanamiele wa Mulevi o vha a tshi nga kona hani u rengisela tsimu Yeremia muzwala wawe wa Mulevi samusi zwo sumbedzwa kha Yeremia 32:7?

Malugana na Vha-Levi, Yehova o vhudza Aroni a ri: “A U nga ṋewi shango ḽine ḽa ḓo vha ifa ḽau na mukovhe wau vhukati ha vha haṋu [Vhaisiraele].” (Numeri 18:20) Naho zwo ralo, Vha-Levi vho vha vho ṋewa miḓi ya 48 u katela na pfulo dzayo, dze dza vha dzi Shangoni ḽo Fulufhedziswaho. Yeremia o vha a tshi bva Anathothe, muṅwe wa miḓi ye ya vha yo ṋewa “vhana vha Aroni vha vho-tshifhe.”—Yoshua 21:13-19; Numeri 35:1-8; 1 Koronika 6:54, 60.

Kha Levitiko 25:32-34, ri wana uri Yehova o ṋea vhulivhisi ho livhaho malugana na ‘thendelo ya u rengulula’ shango ḽi vhuswaho nga Vha-Levi. Nga hu re khagala, miṱa ya Vha-Levi yo vha i tshi ḓo vha i na ifa ḽa thundu, u shumisa na u rengisa miṅwe mikovhe. Zwenezwo zwo vha zwi tshi nga katela u rengisa na u rengulula shango. * Kha maṅwe masia manzhi, Vha-Levi vho vha vhe na ndugelo ya u vhusa na u shumisa shango nga nḓila i fanaho na ya Vhaisiraele vha dziṅwe tshaka.

Khamusi u vha muṋe wa zwenezwo zwipiḓa zwa shango zwa Vha-Levi zwo vha zwi tshi pfukiselwa sa ifa muṱani. Naho zwo ralo, zwi tshi ḓa kha ‘thendelo ya u rengulula’ na u rengiselana zwo vha zwo tendelwa fhedzi kha Vha-Levi nga tshavho. Hafhu, zwi vhonala zwi tshi nga u rengisa na u rengulula shango zwo vha zwi tshi tendelwa fhedzi kha ndaka i re miḓini, samusi “dzipfulo dza miḓini yavho” dzo vha dzi sa rengiswi, ngauri ‘dzo vha dzi dzavho lini na lini.’—Levitiko 25:32, 34.

Ngauralo zwi vhonala uri tsimu ye Yeremia a i rengulula kha Hanamiele yo vha i ya mufuda wo raloho ye ya vha i tshi nga fhiriselwa kha muṅwe muthu nga u tou i rengulula. I nga vha yo vha i vhukati ha miḓi. Yehova ene muṋe o khwaṱhisedza uri “tsimu” ine ra khou amba nga hayo yo vha i ya Hanamiele na uri zwo vha ‘zwo fanela i tshi rengululwa nga Yeremia.’ (Yeremia 32:6, 7) Yehova o shumisa honohu u rengiselana ha pfanyisedzo u itela u khwaṱhisa fulufhedziso ḽawe ḽa uri Vhaisiraele vho vha vha tshi ḓo vhuyelela vha dzhia ifa ḽavho ḽa shango musi vha tshi bva vhuthubwani ha Babele.—Yeremia 32:13-15.

A huna tshithu tshine tsha sumbedza uri Hanamiele o vha muṋe wa yeneyo tsimu ya ngei Anathothe zwi songo tea. A huna zwine zwa sumbedza uri o vunḓa mulayo wa Yehova nga u rengisela Yeremia yeneyo tsimu ya ngei Anathothe nahone a huna zwine zwa sumbedza uri Yeremia o shumisa ndugelo yawe ya u rengulula yeneyo tsimu nga nḓila i songo fanelaho.—Yeremia 32:8-15.

[Ṱhaluso dzi re magumoni a siaṱari]