1. Ndi ifhio phetho yavhuḓisa ine muṅwe na muṅwe a nga i ita?

KANZHI phetho dzine vhabebi vha dzi ita dzi kwama vhana vhavho lwa tshifhinga tshilapfu. Arali vhabebi vha ita phetho dzi si dzavhuḓi, zwi nga kwama vhana vhavho nga nḓila i si yavhuḓi. Fhedzi arali vha ita phetho dzavhuḓi, vha ita uri vhana vhavho vha vhe na tshibuli tsha u tshila vhutshilo havhuḓi vho takala. Fhedzi vhana na vhone vha tea u ita phetho dzavhuḓi. Phetho yavhuḓisa ine muṅwe na muṅwe a nga i ita ndi ya u shumela Yehova.—Ps. 73:28.

2. Yesu na vhabebi vhawe vho ita phetho dzifhio dzavhuḓi?

² Yosefa na Maria vho vha vha tshi ṱoḓa u thusa vhana vhavho u shumela Yehova nahone zwenezwo zwo sumbedzwa nga phetho dze vha dzi ita vhutshiloni. (Luka 2:40, 41, 52) Na Yesu o ita phetho dzavhuḓi dze dza mu thusa u ita zwi funwaho nga Yehova. (Mat. 4:1-10) Musi Yesu a tshi aluwa, o vha munna a re na vhuthu, a fhulufhedzeaho na a re na tshivhindi. O vha e ṅwana ane vhabebi vhoṱhe vha Vhakriste vha nga takala na u ḓirwa kana arali a vhe e wavho.

3. Ri ḓo fhindula mbudziso dzifhio kha ino thero?

³ Kha ino thero, ri ḓo fhindula mbudziso dzi tevhelaho: Yehova o ita phetho dzifhio dzavhuḓi dzi kwamaho Yesu? Vhabebi vha Vhakriste vha nga guda mini kha phetho dze Yosefa na Maria vha dzi ita? Nahone vhaswa vha nga guda mini kha phetho dze Yesu a dzi ita?

4. Yehova o ita phetho ifhio ya ndeme i kwamaho Murwa wawe?

⁴ Yehova o khetha vhabebi vhonevhone uri vha aluse Yesu.  (Mat. 1:18-23; Luka 1:26-38) Maipfi e Maria a a amba a bvaho mbiluni o ṅwalwaho Bivhilini a sumbedza uri o vha a tshi funa Yehova na Ipfi ḽawe. (Luka 1:46-55) Nahone nḓila ye Yosefa a thetshelesa ngayo vhulivhisi ha Yehova i sumbedza uri o vha a tshi funa Mudzimu, a tshi ṱoḓa u mu takadza.—Mat. 1:24.

5-6. Yehova o tendela Murwa wawe a tshi sedzana na mini?

⁵ Ṱhogomelani uri Yehova ho ngo khethela Yesu vhabebi vho pfumaho. Tshiṱhavhelo tshe Yosefa na Maria vha tshi ita musi Yesu o no bebwa tshi sumbedza uri vho vha vhe si na zwavho. (Luka 2:24) Khamusi Yosefa o vha e na vhengele tsini na muḓi wawe ngei Nazaretha he a vha a tshi vhaḓela hone. Khamusi vho vha vhe si na tshelede nnzhi kana thundu nnzhi ngauri vho vha vhe na vhana vha 7 kana u fhira.—Mat. 13:55, 56.

⁶ Naho Yehova o tsireledza Yesu nga zwiṅwe zwifhinga, ho ngo mu thivhela uri a sedzane na dziṅwe dza dzithaidzo. (Mat. 2:13-15) Sa tsumbo, maṅwe a mashaka awe vho vha vha sa mu tendi. Edzani u humbula uri a nga vha o kulea hani nungo musi u thomani maṅwe mashaka awe vha songo tenda uri ndi ene Messia. (Marko 3:21; Yoh. 7:5) Zwiṅwe hafhu, khamusi Yosefa o fa musi Yesu a tshi kha ḓi vha muṱuku nahone a nga vha o pfa vhuṱungu vhukuma. Samusi Yesu o vha e ene tanzhe, khamusi ndi ene we a vha a tshi tea u bvela phanḓa na bindu samusi khotsi awe vho fa. (Marko 6:3) Musi Yesu a tshi khou aluwa, o kona u ṱhogomela muṱa wa hawe. Khamusi o vha a tshi tea u shuma vhukuma uri a vha ṱhogomele. Zwi amba uri na ene o ḓipfa o neta musi ḽi tshi kovhela.

7. (a) Ndi mbudziso dzifhio dzine dza nga thusa vhavhingani u alusa vhana vhavho? (b) Mirero 2:1-6 i nga thusa hani vhabebi u gudisa vhana vhavho?

⁷ Vhavhingani vhane vha khou ṱoḓa u vha na vhana vha nga ḓivhudzisa mbudziso dzi tevhelaho: ‘Naa ri a ḓiṱukufhadza na u funa Yehova na Ipfi ḽawe? Naa Yehova a nga khetha riṋe uri ri ṱhogomele lushie?’ (Ps. 127:3, 4) Arali ni mubebi, ḓivhudziseni uri: ‘Naa ndi khou gudisa vhananga uri ndi zwavhuḓi u shuma nga maanḓa?’ (Muh. 3:12, 13) ‘Naa ndi ita zwoṱhe zwine nda nga kona u itela u tsireledza vhananga kha khombo dza ḽino shango?’ (Mir. 22:3) A zwi konadzei u tsireledza vhana vhaṋu kha thaidzo dzoṱhe dzine vha nga  sedzana nadzo. Fhedzi ni nga vha thusa uri vha sedzane na thaidzo dza vhutshilo nga u vha gudisa uri vha ḓitike nga nyeletshedzo i re Bivhilini. (Vhalani Mirero 2:1-6.) Sa tsumbo, arali shaka ḽaṋu ḽa litsha u shumela Yehova, thusani ṅwana waṋu ni tshi shumisa Bivhili uri a vhone uri ndi zwa ndeme u bvela phanḓa a tshi fhulufhedzea kha Yehova. (Ps. 31:23) Kana arali na felwa nga shaka, sumbedzani ṅwana waṋu maṅwalo ane a ḓo mu thusa u konḓelela na u vha na mulalo.—2 Vhakor. 1:3, 4; 2 Tim. 3:16.

8. U ya nga Dotoronomio 6:6, 7, Yosefa na Maria vho vha vha tshi tea u ita mini?

⁸ Yosefa na Maria vho thusa Yesu uri a takalelwe nga Mudzimu ngauri vho tevhela vhulivhisi he vha ṋewa hone nga Mudzimu. (Vhalani Dotoronomio 6:6, 7.) Yosefa na Maria vho vha vha tshi funa Yehova nahone vho thusa na vhana vhavho uri vha mu fune nga nḓila i fanaho.

9. Yosefa na Maria vho ita phetho dzifhio dza ndeme?

⁹ Yosefa na Maria vho khetha u gwadamela Yehova na vhana vhavho tshifhinga tshoṱhe. Zwi tou pfala uri vho vha vha tshi ya miṱanganoni vhege iṅwe na iṅwe ngei sinagogoni ya Nazaretha na uri ṅwaha muṅwe na muṅwe vho vha vha tshi ya kha vhuṱambo ha Paseka ngei Yerusalema. (Luka 2:41; 4:16) Khamusi musi vha tshi khou ya Yerusalema vho vha vha tshi funza Yesu na vharathu vhawe nga ha zwe zwa itea kha vhathu vha Mudzimu tshifhingani tsho fhiraho. Khamusi vho vha vha tshi ya na fhethu ho ambiwaho Maṅwaloni. Musi muṱa wavho u tshi khou ḓi aluwa, zwi nga vha zwo konḓela Yosefa na Maria uri vha gwadamele Yehova tshifhinga tshoṱhe na muṱa wavho. Fhedzi vho lambedzwa nge vha zwi ita. Ngauri u gwadamela Yehova zwo vha zwi tshi ḓa u thoma khavho, muṱa wavho wo dzula u na vhushaka havhuḓi na Yehova.

10. Vhabebi vha Vhakriste vha nga guda mini kha Yosefa na Maria?

¹⁰ Vhabebi vha Vhakriste vha nga guda mini kha Yosefa na Maria? Tsha ndemesa ndi uri ni sumbedze vhana vhaṋu nga zwine na amba na u zwi ita uri ni funa Yehova. Tshifhiwa tshihulwanesa tshine na nga vha ṋea tshone ndi u vha thusa u funa Yehova. Tshiṅwe tshithu tsha ndeme tshine na nga vha gudisa tshone ndi uri  vha gude Bivhili, u rabela, u ya miṱanganoni na tsimuni tshifhinga tshoṱhe. (1 Tim. 6:6) Zwi tou pfala uri ni tea u ṱunḓela vhana vhaṋu. (1 Tim. 5:8) Fhedzi ni songo hangwa uri tshine tsha ḓo thusa vhana vhaṋu u dzhena shangoni ḽiswa ndi u vha na vhushaka havhuḓi na Yehova, hu si thundu ine vha vha nayo. *—Hesek. 7:19; 1 Tim. 4:8.

11. (a) Maipfi a 1 Timotheo 6:17-19 a ḓo thusa hani vhabebi uri vha ite phetho dzavhuḓi musi vha tshi khou alusa vhana vhavho? (b) Muṱa waṋu u nga ḓivhetshela zwipikwa zwifhio nahone ni nga fhaṱutshedzwa hani? (Sedzani bogisi “ Ni Nga Ḓivhetshela Zwipikwa Zwifhio?”)

¹¹ Zwi a takadza u vhona vhabebi vhanzhi vha Vhakriste vha tshi ita phetho dzavhuḓi u itela u thusa vhana vhavho uri vha vhe tsini na Yehova. Vha dzula vha tshi gwadamela Yehova vhoṱhe sa muṱa. Vha ya miṱanganoni na mabuthanoni. Vha huwelela mafhungo maḓifha. Vhaṅwe vha ita na u shuma kha tsimu i sa anzeli u shumiwa. Vhaṅwe vha dalela Bethele kana u thusa kha u fhaṱa zwifhaṱo zwa ndangulo. Zwenezwi zwithu zwi nga vha konḓela ngauri zwi ṱoḓa tshelede. Fhedzi Yehova u ḓo vha lambedza. (Vhalani 1 Timotheo 6:17-19.) Vhana vhane vha aluswa kha yeneyi miṱa, vha bvela phanḓa vha tshi ita zwenezwi zwithu na musi vho no aluwa nahone vha a livhuwa vhukuma uri vhabebi vhavho vho vha alusa nga yeneyi nḓila. *—Mir. 10:22.

12. Yesu o vha a tshi tea u ita mini musi a tshi khou ḓi aluwa?

¹² Yehova ane a vha Khotsi a Yesu u dzula a tshi ita phetho dzavhuḓi. Vhabebi vha Yesu vha kha ḽifhasi na vhone vho ita phetho dzavhuḓi. Fhedzi musi Yesu a tshi khou aluwa, o vha a tshi tea u ḓiitela phetho. (Vhagal. 6:5) O vha e na mbofholowo ya u ḓikhethela u fana na riṋe. O vha a tshi nga khetha u ita zwithu zwine zwa takadza ene muṋe nṱhani ha u ita zwine Mudzimu a zwi funa. Nṱhani hazwo, o khetha u dzula e na vhushaka havhuḓi na Yehova. (Yoh. 8:29) Vhaswa vha nga guda mini kha tsumbo yawe ṋamusi?

13. Yesu o ita phetho ifhio ya ndeme musi a tshi kha ḓi vha muṱuku?

¹³ Musi Yesu a tshi kha ḓi vha muṱuku, o khetha u thetshelesa vhabebi vhawe. Ho ngo nyadza vhabebi vhawe nge a humbula u nga u ḓivha zwithu zwinzhi u vha fhira. Nṱhani hazwo, o “dzula a tshi ḓiṱukufhadza khavho.” (Luka 2:51) Samusi o vha e tanzhe, Yesu o dzhiela nṱha vhuḓifhinduleli he a vha e naho. Zwi tou pfala uri o finya dza khwaṱha u itela u guda u vhaḓa kha Yosefa uri a kone u ṱhogomela muṱa wa hawe.

14. Ri zwi ḓivha hani uri Yesu o vha e mugudi wa biko wa Ipfi ḽa Mudzimu?

 ¹⁴ Khamusi vhabebi vha Yesu vho mu vhudza nga ha u bebwa hawe nga lwa vhuṱolo na zwe vharuṅwa vha amba nga hae. (Luka 2:8-19, 25-38) Yesu ho ngo fushea nga zwe a vhudzwa fhedzi, o guda Maṅwalo ene muṋe. Ri zwi ḓivha hani uri Yesu o vha e mugudi wa biko wa Ipfi ḽa Mudzimu? Ndi ngauri musi a tshee mutukana, vhagudisi vha ngei Yerusalema vho “mangadzwa nga nḓila ine a pfesesa na u fhindula ngayo.” (Luka 2:46, 47) Musi Yesu a tshi kha ḓi tou vha na miṅwaha ya 12 fhedzi, o vha e na vhungoho ha uri Yehova ndi Khotsi awe.—Luka 2:42, 43, 49.

15. Yesu o zwi sumbedza hani uri o vha a tshi ṋanga u ita zwine Yehova a zwi funa?

¹⁵ Musi Yesu a tshi vho ḓivha zwine Yehova a ṱoḓa a tshi zwi ita, o khetha u ita zwine Yehova a zwi funa. (Yoh. 6:38) Yesu o vha a tshi zwi ḓivha uri u ḓo vhengwa nga vhathu vhanzhi. Fhedzi naho o vha a sa zwi funi u vhengwa, o khetha u thetshelesa Yehova. Musi Yesu a tshi lovhedzwa nga 29 C.E., tshithu tsha ndeme khae ho vha hu u ita zwine Yehova a zwi ṱoḓa. (Vhahev. 10:5-7) Na musi a tshi khou fa kha danda, o vha o ḓiimisela u ita zwine Khotsi awe a zwi funa.—Yoh. 19:30.

16. Vhana vha nga guda mini kha Yesu?

¹⁶ Thetshelesani vhabebi vhaṋu. Vhabebi vhaṋu vha na tshivhi u fana na Yosefa na Maria. Naho zwo ralo, Yehova o ṋea vhabebi vhaṋu mushumo wa uri vha ni tsireledze, vha ni gudise na u ni dededza. Arali na thetshelesa musi vha tshi ni eletshedza na u vha ṱhonifha, zwi ḓo ni ‘tshimbilela.’—Vhaef. 6:1-4.

17. U ya nga Yoshua 24:15, vhaswa vha tea u ḓiitela phetho ifhio nga vhone vhaṋe?

¹⁷ Ḓiiteleni phetho ya ane na ḓo mu shumela. Ni fanela u vha na vhungoho ha uri Yehova ndi nnyi, zwine a zwi ṱoḓa ndi zwifhio na u ri ni nga zwi ita hani vhutshiloni haṋu. (Vharoma 12:2) Ndi hone ni tshi ḓo kona u ita phetho ya ndeme vhutshiloni haṋu, phetho ya u shumela Yehova. (Vhalani Yoshua 24:15; Muh. 12:1) Arali na vha na mbekanyamushumo ya u vhala Bivhili na u ḓigudisa yone ni ḓo funa Yehova nga ho engedzeaho nahone lutendo lwaṋu khae lu ḓo ya lu tshi khwaṱha.

18. Ndi phetho ifhio ine vhaswa vha tea u i ita nahone hu ḓo vha na mvelelo dzifhio?

¹⁸ Khethani u ita zwine Yehova a zwi funa  u thoma. Shango ḽa Saṱhane ḽi fhulufhedzisa uri ni ḓo takala arali na shumisa vhukoni haṋu uri ni ḓivhuyedze. Ri tshi tou amba ngoho, vhane vha funesa tshelede “vha ḓivhangela maṱungu” zwa tou nga vha khou ḓiṱhavhekanya. (1 Tim. 6:9, 10) Fhedzi arali na thetshelesa Yehova na khetha u ita zwine a funa u thoma, vhutshilo haṋu vhu ḓo vha havhuḓi nahone ni ḓo “ita zwithu nga vhuṱali.”—Yosh. 1:8.

19. Vhabebi vha tea u humbula mini?

¹⁹ Vhabebi vha tea u ita zwoṱhe zwine vha nga kona u itela u thusa vhana vhavho u shumela Yehova. Ḓitikeni ngae nahone u ḓo ni thusa u ita phetho dza vhuṱali. (Mir. 3:5, 6) Humbulani uri vhana vhaṋu vha ḓo ṱuṱuwedzwa nga zwine na ita, hu si nga zwine na amba. Nga zwenezwo, itani phetho dzine dza ḓo thusa vhana vhaṋu uri vha takalelwe nga Yehova.

20. Vhaswa vha ḓo wana phaṱhutshedzo dzifhio arali vha khetha u shumela Yehova?

²⁰ Vhaswa, vhabebi vhaṋu vha nga ni thusa u ita phetho dza vhuṱali. Fhedzi inwi ni tea u ita phetho dzavhuḓi uri ni takadze Yehova. Ngauralo, edzisani Yesu nga u khetha u shumela Khotsi aṋu wa ṱaḓulu a re na lufuno. Na ita zwenezwo, vhutshilo haṋu ha zwino vhu ḓo vha vhu fushaho na vhu takadzaho. (1 Tim. 4:16) Nahone tshifhingani tshi ḓaho ni ḓo ḓiphina nga vhutshilo vhu fushaho.