1-2. Ndi tshiitisi tshifhio tshine tsha ita uri ri ṱoḓe u ḓivha nga ha bugu ya Nzumbululo?

 NAA muṅwe muthu o no vhuya a ni sumbedza zwinepe zwawe? Musi ni tshi sedza zwenezwo zwinepe, ni khou vhona hu na vhathu vhanzhi vhane na si vha ḓivhe. Fhedzi hu na tshiṅwe tshinepe tshine tsha khou ni kunga. Ndi ngani? Ndi ngauri na inwi ni kha tshenetsho tshinepe. Musi ni tshi tshi sedza, ni khou lingedza u humbula uri tsho fodiwa lini nahone ngafhi. Zwiṅwe hafhu, ni khou lingedza u ḓivha uri vhaṅwe vhathu vha re kha tshenetsho tshinepe ndi vhonnyi. Tshenetsho tshinepe ndi tsha ndeme vhukuma kha inwi.

² Bugu ya Nzumbululo i fana na tshenetsho tshinepe. Ndi ngani? Ndi nga nṱhani ha zwiitisi zwivhili. Tsha u thoma, yeneyi bugu yo ṅwalelwa riṋe. Ndimana ya u thoma i ri: “Heyi ndi nzumbululo ye Yesu Kristo a dzumbululelwa nga Mudzimu, uri a sumbedze vhalanda vhawe zwine zwa ḓo itea hu si kale.” (Nzumb. 1:1) Zwi re kha bugu ya Nzumbululo zwo ṅwalelwa riṋe vhashumeli vha Mudzimu, hu si vhaṅwe vhathu. Samusi ri vhashumeli vha Mudzimu, a ri mangali musi ri tshi ḓivha uri na riṋe ri khou shela mulenzhe kha u ita uri vhuporofita vhu mangadzaho vhu re kha yeneyo bugu vhu itee. Nga zwenezwo, musi ri tshi vhala bugu ya Nzumbululo, ri vha ri tshi khou vhala nga ha zwithu zwine zwa ri kwama.

3-4. U ya nga bugu ya Nzumbululo, vhuporofita vhu re kha yeneyi bugu ho vha vhu tshi ḓo itea lini nahone vhu tea u ri ṱuṱuwedza uri ri ite mini?

³ Tshiitisi tsha vhuvhili tshine tsha ita uri ri ṱoḓe u ḓivha nga ha vhuporofita vhu re kha Nzumbululo ndi nga nṱhani ha tshifhinga tshine honovhu vhuporofita ha ḓo itea ngatsho. Muapostola  Yohane we a vha o no vha mualuwa o amba uri honoho vhuporofita vhu ḓo itea lini. O ri: “Muya mukhethwa wo ita uri ndi vhone zwine zwa ḓo itea nga ḓuvha ḽa Murena.” (Nzumb. 1:10) Musi Yohane a tshi ṅwala eneo maipfi hu ṱoḓaho u vha nga 96 C.E., “ḓuvha ḽa Murena” ḽo vha ḽi kha ḓi vha kule. (Mat. 25:14, 19; Luka 19:12) U ya nga vhuporofita vhu re Bivhilini, ḽeneḽo ḓuvha ḽo thoma nga 1914 musi Yesu a tshi vhewa uri a vhe Khosi ya Muvhuso wa Mudzimu ngei ṱaḓulu. U bva nga 1914, vhuporofita vhu re kha bugu ya Nzumbululo vhune ha kwama vhathu vha Mudzimu, ho thoma u itea. Ngangoho ri khou tshila kha “ḓuvha ḽa Murena”!

⁴ Samusi ri tshi khou tshila kha tshenetshi tshifhinga tshi takadzaho, ndi zwa ndeme uri ri livhise ṱhogomelo kha nyeletshedzo i re kha Nzumbululo 1:3, ine ya ri: “Hu takala ane a vhalela nṱha na vhane vha pfa maipfi a honovhu vhuporofita, na vhane vha tevhedza zwo ṅwaliwaho khaho; ngauri tshifhinga tsho vhewaho tshi tsini.” Ngangoho ri tea u “vhalela nṱha,” u “pfa maipfi a honovhu vhuporofita” na u a “tevhedza.” Ndi afhio maṅwe maipfi ane ra tea u a tevhedza?

5. Bugu ya Nzumbululo i sumbedza hani uri ndi zwa ndeme u ita vhungoho ha uri ri gwadamela Yehova nga nḓila ine a i ṱanganedza?

⁵ U bva kha ndima ya u thoma ya bugu ya Nzumbululo, ri guda uri Yesu u ḓivha zwithu zwoṱhe zwine zwa khou itea zwivhidzoni. (Nzumb. 1:12-16, 20; 2:1) Zwenezwi zwi vhonala kha mafhungo e Yesu a a vhudza zwivhidzo zwa sumbe zwa Asia. O ṋea Vhakriste vha tshenetsho tshifhinga vhulivhisi vhune ha ḓo vha thusa uri vha shumele Yehova nga nḓila ine a i ṱanganedza. Zwe Yesu a zwi amba nga tshenetsho tshifhinga, zwi a shuma na kha vhashumeli vha Yehova ṋamusi. Ri guda mini? Kristo Yesu, ane a vha Murangaphanḓa washu, u a ḓivha arali ri na vhushaka havhuḓi na Yehova. U a ri livhisa na u ri tsireledza nahone u vhona zwoṱhe zwine zwa khou itea. U a ḓivha uri ri tea u ita mini uri ri dzule ri tshi takalelwa nga Yehova. Ndi vhulivhisi vhufhio he a ṋea zwenezwi zwivhidzo vhune na riṋe ra tea u vhu tevhedza?

6. (a) Samusi Yesu o amba kha Nzumbululo 2:3, 4, ndi thaidzo ifhio ye tshivhidzo tsha Efesa tsha vha tshi nayo? (b) Ndi zwifhio zwine ra zwi guda?

⁶ Vhalani Nzumbululo 2:3, 4. Ri tea u bvela phanḓa ri tshi funa Yehova nga nḓila ye ra vha ri tshi mu funa ngayo u thomani. Zwe Yesu a zwi vhudza tshivhidzo tsha Efesa zwi sumbedza uri vhenevho vhahashu vho vha vha tshi khou konḓelela na uri vho vha vha tshi khou bvela phanḓa vha tshi shumela Yehova hu sa londwi thaidzo dze vha vha vhe nadzo. Fhedzi vho vha vha sa tsha funa Yehova nga nḓila ye vha vha vha tshi mu funa ngayo u thomani. Yehova o vha a sa ḓo ṱanganedza nḓila ine vha mu gwadamela ngayo arali vha sa khou mu funa u fana na u thomani. Na riṋe a ro ngo tea u sokou konḓelela fhedzi, ri tea u konḓelela ri na zwiitisi zwo teaho. Mudzimu washu u na ndavha na zwine ra zwi ita na uri ndi ngani ri tshi khou zwi ita. Zwiitisi zwashu ndi zwa ndeme khae ngauri u ṱoḓa ri tshi mu gwadamela nga nṱhani ha uri ri a mu funa vhukuma na uri ri livhuwa zwe a ri itela zwone.—Mir. 16:2; Marko 12:29, 30.

7. (a) Samusi zwo sumbedzwa kha Nzumbululo 3:1-3, ndi thaidzo ifhio ye tshivhidzo tsha Saradesi tsha vha tshi nayo? (b) Ri tea u ita mini?

⁷ Vhalani Nzumbululo 3:1-3. Ri tea u dzula ro fhaṱuwa. Tshivhidzo tsha Saradesi tsho vha tshi na thaidzo yo fhambanaho na thaidzo ya tshivhidzo tsha Efesa. Naho vhenevha  vhahashu vho vha vha tshi shumela Yehova tshifhingani tsho fhiraho, vho vha vha sa tsha fhisea. Ndi ngazwo Yesu o vha vhudza uri vha ‘fhaṱuwe.’ Ri guda mini? Ndi ngoho uri Yehova ha nga hangwi mishumo yashu. (Vhahev. 6:10) Fhedzi a ro ngo tea u humbula uri nga nṱhani ha uri ro shumela Yehova tshifhingani tsho fhiraho, a zwi tsha ṱoḓea uri ri fhisee zwino. Naho zwino hu na zwithu zwinzhi zwine zwa nga ita uri ri si kone u shumela Yehova nga ho engedzeaho, ri tea u dzula ro farakanea “mushumoni wa Murena,” u itela uri ri kone u dzula ro fhaṱuwa u swika vhufheloni.—1 Vhakor. 15:58; Mat. 24:13; Marko 13:33.

8. Ri guda mini kha zwe Yesu a zwi vhudza vhahashu vha Laodikea zwine zwa wanala kha Nzumbululo 3:15-17?

⁸ Vhalani Nzumbululo 3:15-17. Ri tea u shumela Yehova nga u fhisea nahone ri zwi ite nga mbilu yoṱhe. Zwe Yesu a zwi vhudza Vhalaodikea zwi sumbedza uri na vhone vho vha vhe na thaidzo. Yesu o ri vha tou “dudela” ngauri vho vha vha sa khou shumela Yehova nga u fhisea. O vha vhudza uri a vho “ngo takala” na uri vha a “pfisa vhuṱungu” ngauri a vha na ndavha na nḓila ine vha gwadamela ngayo Yehova. Vho vha vha tshi tea u shumela Yehova nga u fhisea. (Nzumb. 3:19) Ri guda mini? Arali ri si tsha fhisea, ri tea u dzhiela nṱha zwithu zwavhuḓi zwine Yehova na ndangulo yawe vha ri itela zwone. (Nzumb. 3:18) A ro ngo tea u ṱoḓa u kapula mapfura nga lebula zwino lune u shumela Yehova zwa si tsha vha zwa ndeme vhutshiloni hashu.

9. Samusi zwo sumbedzwa kha zwe Yesu a zwi vhudza Vhakriste vha Peregamo na Thiathira, ri tea u iledza mini?

⁹ Ri tea u iledza pfunzo dza vhagunei. Yesu o kaidza vhaṅwe tshivhidzoni tsha Peregamo ngauri vho vha vha tshi khou ita uri tshivhidzoni hu si vhe na vhuthihi. (Nzumb. 2:14-16) O khoḓa vha tshivhidzoni tsha Thiathira vhe vha iledza “pfunzo dza mazwifhi dza Saṱhane” nahone a vha ṱuṱuwedza uri vha ‘farelele’ kha ngoho. (Nzumb. 2:24-26) Vhakriste vha henefho vhe vha vha vha si na vhushaka ho khwaṱhaho na Mudzimu, vhe vha vha vho kungiwa nga dzenedzi pfunzo dza mazwifhi, vho vha vha tshi tea u rembuluwa. Hu pfi mini nga riṋe? Ri tea u iledza pfunzo dzine dza si tshimbidzane na zwine Yehova a zwi funa. Vhagunei vha “ḓiita u nga vho ḓikumedzela kha Mudzimu,” fhedzi zwine vha ita zwi sumbedza uri a vha “fhulufheli maanḓa awe.” (2 Tim. 3:5) Zwo leluwa u ḓivha pfunzo dza mazwifhi na u dzi iledza arali ri tshi ḓigudisa Bivhili tshifhinga tshoṱhe.—2 Tim. 3:14-17; Yuda 3, 4.

10. Ndi zwifhio zwiṅwe zwine ra zwi guda kha zwe Yesu a zwi vhudza vhahashu vha Peregamo na vha Thiathira?

 ¹⁰ Ri tea u iledza mifuda yoṱhe ya u ḓifara luvhi. Hu na iṅwe thaidzo ye vhahashu vha Peregamo na Thiathira vha vha vhe nayo. Yesu o kaidza vhaṅwe vha zwenezwo zwivhidzo ngauri vho vha vha tshi khou ḓifara luvhi. (Nzumb. 2:14, 20) Ri guda mini? Naho hu kale ri tshi khou shumela Yehova nahone ri na ndugelo nnzhi, a zwi ambi uri Yehova u ḓo tsinya iṱo musi ri tshi ḓifara luvhi. (1 Sam. 15:22; 1 Pet. 2:16) U ṱoḓa ri tshi ḓifara zwavhuḓi naho vhathu vha ḽino shango vha sa ḓifari zwavhuḓi.—Vhaef. 6:11-13.

11. Ro guda mini u swika zwino? (Sedzani na bogisi “ Zwine Ra Zwi Guda.”)

¹¹ Ro guda mini u swika zwino? Ri tea u ita vhungoho ha uri ri gwadamela Yehova nga nḓila ine a i ṱanganedza. Arali ri tshi khou ita zwithu zwine zwa nga ita uri Yehova a si ṱanganedze nḓila ine ra mu gwadamela ngayo, ri tea u dzhia vhukando nga u ṱavhanya. (Nzumb. 2:5, 16; 3:3, 16) Fhedzi hu na zwiṅwe zwe Yesu a zwi vhudza zwenezwo zwivhidzo. Ndi zwifhio?

12. Ri guda mini kha zwe Yesu a zwi vhudza vha tshivhidzo tsha Simirina na tsha Filadelefia? (Nzumbululo 2:10)

¹² Zwino kha ri ambe nga ha zwe Yesu a vhudza vha tshivhidzo tsha Simirina na tsha Filadelefia. O vhudza Vhakriste vha zwenezwo zwivhidzo uri vha songo ofha u tovholwa ngauri Yehova o vha a tshi ḓo vha lambedza arali vha dzula vha tshi fhulufhedzea. (Vhalani Nzumbululo 2:10; 3:10) Ri guda mini? Ri tea u lavhelela uri ri ḓo tovholwa nahone ri ḓiimisele u konḓelela musi zwi tshi itea. (Mat. 24:9, 13; 2 Vhakor. 12:10) Ndi ngani zwi zwa ndeme?

13-14. Vhathu vha Mudzimu vho kwamea hani nga zwithu zwo iteaho zwo ambiwaho kha Nzumbululo ndima 12?

¹³ Bugu ya Nzumbululo i ri vhudza uri vhathu vha Mudzimu vho vha vha tshi ḓo tovholwa tshifhingani tshashu tshine tsha vha “ḓuvha ḽa Murena.” Nzumbululo ndima 12 i amba uri ho vha na nndwa ṱaḓulu musi Yesu a tshi tou vha Khosi ya Muvhuso wa Mudzimu. Yesu Kristo, we a vhidzwa Mikaele musi o no vhuyelela ṱaḓulu na vharuṅwa vhawe, vho lwa na Saṱhane na madimoni awe. (Nzumb. 12:7, 8) Eneo maswina a Mudzimu o kundiwa a poselwa kha ḽifhasi nahone a khou vhangela vhathu thaidzo khulu. (Nzumb. 12:9, 12) Zwenezwi zwo kwama hani vhathu vha Mudzimu?

¹⁴ Nzumbululo i dovha ya ri vhudza nga zwine Saṱhane a zwi ita. Samusi a si tsha kona u ya ṱaḓulu, u ṱhasela vhashumeli vha Mudzimu vho ḓodzwaho vha re kha ḽifhasi. Vhenevha ndi vhaimeleli vha Muvhuso wa Mudzimu nahone vha na “mushumo wa u huwelela nga ha Yesu.” (Nzumb. 12:17; 2 Vhakor. 5:20; Vhaef. 6:19, 20) Uvhu vhuporofita ho itea nga nḓila-ḓe?

15. Ndi vhonnyi vhane vha fanyiswa na ‘ṱhanzi mbili’ dzo ambiwaho kha Nzumbululo ndima 11 nahone ho itea mini khavho?

 ¹⁵ Saṱhane o ita uri maswina a Mudzimu a ṱhasele vhahashu vho ḓodzwaho vhe vha vha vha tshi khou ranga phanḓa kha mushumo wa u huwelela nga ha Muvhuso. Vhenevho vhanna vha fanyiswa na ‘ṱhanzi mbili’ dzo ambiwaho kha bugu ya Nzumbululo dze dza vhulawa. * (Nzumb. 11:3, 7-11) Nga 1918, vhahashu vha malo vhe vha vha vha tshi khou ranga phanḓa ndanguloni vho pomokwa ha pfi vha na mulandu, vha gwevhiwa uri vha ye u dzula dzhele lwa tshifhinga tshilapfu. Vhathu vhanzhi vho vha vha tshi vhona u nga mushumo wa vhenevha vhahashu vho ḓodzwaho wo imiswa.

16. Ho itea mini nga 1919 zwe zwa vha zwi songo lavhelelwa, fhedzi Saṱhane u khou bvela phanḓa a tshi ita mini u bva tsheetsho?

¹⁶ Vhuporofita vhu re kha Nzumbululo ndima 11 ho dovha ha amba uri dzenedzo ‘ṱhanzi mbili’ dzo vha dzi tshi ḓo vuswa nga murahu ha tshifhinganyana. Honoho vhuporofita ho itea nga nḓila i mangadzaho nga ṅwaha u tevhelaho musi vhenevho vhahashu vha tshi kha ḓi tou bva u valelwa dzhele. Nga March 1919, vhenevha vhahashu vho ḓodzwaho vho bviswa dzhele nahone milandu yavho ya phumulwa nga murahu. Nga u ṱavhanya, vhahashu vho mbo ḓi dovha vha ranga phanḓa kha mushumo wa u huwelela na u funza. Fhedzi Saṱhane o ḓi isa phanḓa na u ṱhasela vhathu vha Mudzimu. U bva tsheetsho, Saṱhane o ita uri vhathu vha Mudzimu vha tovholwe zwihulu, zwine zwa fanyiswa na u kumbiwa nga “mulambo.” (Nzumb. 12:15) Ndi ngazwo roṱhe ri tshi “fanela u konḓelela na u vha na lutendo.”—Nzumb. 13:10.

17. Naho vhathu vha Mudzimu vha tshi khou tovholwa nga Saṱhane, vho thuswa hani nga vhathu vhe vha vha vha songo lavhelela uri vha nga vha thusa?

¹⁷ Nzumbululo ndima ya 12 i sumbedza uri vhathu vha Mudzimu vha ḓo thuswa nga vhathu vhe vha vha vha songo lavhelela uri vha nga vha thusa. Zwo vha zwi tshi ḓo tou nga “ḽifhasi” ḽo vulea ḽa nwa “mulambo” une wa fanyisela u tovholwa. (Nzumb. 12:16) Zwo itea nga yeneyo nḓila. Nga zwiṅwe zwifhinga, vhaṅwe vhahaṱuli vha ḽino shango vhane vha langiwa nga Saṱhane vho no thusa vhathu vha  Mudzimu. Vhashumeli vha Yehova vho no kunda khothe lunzhi, zwa ita uri vha kone u shumela Yehova vho vhofholowa. Vho shumisa hani tshenetsho tshifhinga tsha mbofholowo? Vho tshi shumisa nga vhuṱali nga u ita mushumo we Yehova a vha ṋea wone. (1 Vhakor. 16:9) Yehova o vha ṋea mushumo ufhio?

18. Ndi ufhio mushumo washu wa ndeme kha ano maḓuvha a vhufhelo?

¹⁸ Yesu o dzula o amba uri vhathu vhawe vha ḓo ḓivhadza “mafhungo maḓifha a Muvhuso [wa Mudzimu]” u mona na shango ḽoṱhe musi vhufhelo vhu sa athu u ḓa. (Mat. 24:14) Musi vha tshi huwelela vha thuswa nga muruṅwa kana vharuṅwa vhe vha ambiwa uri vha khou “ḓivhadza mafhungo maḓifha a lini na lini kha vha dzulaho kha ḽifhasi, kha tshaka dzoṱhe, ndimi dzoṱhe na vhathu vhoṱhe.”—Nzumb. 14:6.

19. Ndi ufhio muṅwe mulaedza une vhathu vhane vha funa Yehova vha tea u u ḓivhadza?

¹⁹ Vhathu vha Mudzimu a vha tei u ḓivhadza mafhungo maḓifha a Muvhuso fhedzi, vha tea u tikedza na mushumo we vharuṅwa vha ṋewa wone wo ambiwaho kha Nzumbululo ndima 8 u swika kha ndima 10. Vhenevha vharuṅwa vha amba nga ha khombo dzine dza ḓo wela vhane vha si tikedze Muvhuso wa Mudzimu. Ndi ngazwo Ṱhanzi dza Yehova vha tshi huwelela mulaedza une wa nga “tshifhango na mulilo,” une wa ṱalusa nḓila ine Yehova a ḓo haṱula ngayo shango ḽivhi ḽa Saṱhane. (Nzumb. 8:7, 13) Vhathu vha tea u ḓivha uri vhufhelo ho no vha tsini uri vha kone u ita tshanduko uri vha ponyoke ḓuvha ḽa mbiti dza Yehova. (Tsef. 2:2, 3) Fhedzi vhathu a vha takaleli u pfa wonoyo mulaedza. Ndi ngazwo ri tshi tea u vha na tshivhindi uri ri kone u vhudza vhaṅwe wonoyo mulaedza. Nga maṱungu mahulu, mulaedza wa u fhedza wa khaṱhulo u ḓo ṋaṋa u sinyusa vhathu.—Nzumb. 16:21.

20. Ri ḓo amba nga mini kha thero mbili dzi tevhelaho?

²⁰ Na riṋe ri tea u tevhedza “maipfi a honovhu vhuporofita” ngauri na riṋe vhuporofita ha bugu ya Nzumbululo vhu a ri kwama. (Nzumb. 1:3) Fhedzi naho ri tshi tovholwa, ri nga dzula hani ri tshi fhulufhedzea na u dzula ri tshi huwelela nga tshivhindi yeneyi milaedza? Ri nga thuswa nga zwithu zwivhili. Tsha u thoma, ri ḓo khwaṱhiswa nga zwine bugu ya Nzumbululo ya zwi amba nga ha maswina a Mudzimu. Tsha vhuvhili, nga u humbula nga ha phaṱhutshedzo dzine ra ḓo dzi wana tshifhingani tshi ḓaho arali ra dzula ri tshi fhulufhedzea. Ri ḓo amba nga hazwo kha thero mbili dzi tevhelaho.