“AA/NDAA! Hurini?”

A zwi timatimisi uri kanzhi ni lumelisa nga u ralo. Ni nga vha ni tshi dovha na lumelisa nga u khaḓa muthu kana nga u mu kuvhatedza. Nḓila ya u lumelisa na maipfi ane a shumiswa zwi nga fhambana zwi tshi ya nga fhethu, fhedzi a zwo ngo fhambana nga u tou ralo. U sa lumelisa kana u sa fhindula musi u tshi lumeliswa, zwi nga dzhiiwa sa u sa funa vhaṅwe kana u sa vha na mikhwa.

Fhedzi a si vhathu vhoṱhe vhane vha funa u lumelisa. Vhaṅwe vha itwa nga uri vha na ṱhoni kana vha ḓivhona vhe si vha ndeme. Vhaṅwe vha wana zwi tshi vha konḓela u lumelisa vhathu vha luṅwe lushaka, vhane vha vha na mvelele i sa fani na yavho kana vha vhuṅwe vhubvo. Naho zwo ralo, u lumelisa nga ndumeliso pfufhi zwi nga vha na mvelelo dzavhuḓi vhukuma.

Ḓivhudziseni: ‘U lumelisa zwi nga kwama hani muṅwe muthu? Nahone Bivhili i nga mpfunza mini nga ha u lumelisa?’

Musi muapostola Petro a tshi ṱanganedza Koronelio we a vha e wa Nnḓa tshivhidzoni tsha Vhukriste, o ri: “Mudzimu ha ṱaluli.” (Mish. 10:34) Nga murahu, Petro o ṅwala uri Mudzimu u “tama vhoṱhe vha tshi rembuluwa.” (2 Pet. 3:9) Ri nga shumisa enea mafhungo kha muthu ane a kha ḓi guda ngoho. Fhedzi Petro o dovha a ṱuṱuwedza Vhakriste a ri: “Hulisani vhathu vha mifuda yoṱhe, ni fune vhatendi nga inwi vhoṱhe.” (1 Pet. 2:17) Naa zwi nga si vhe zwavhuḓi arali ri tshi lumelisa vhaṅwe hu sa lwondwi lushaka, mvelele kana vhubvo havho? Zwenezwo zwi ḓo vha zwi tshi khou sumbedza u vha funa na u vha ṱhonifha.

Muapostola Paulo o ṱuṱuwedza tshivhidzo musi a tshi ri: “Ni ṱanganedzane, vhunga na Kristo o ri ṱanganedza.” (Vharoma 15:7) Paulo o vha a tshi dzhiela nṱha vhahawe vhe vha vha vha tshi mu ‘khuthadza.’ Vhahashu ṋamusi vha ṱoḓa u ṱuṱuwedzwa u fhira vha tshifhingani tsha Paulo nga nṱhani ha uri Sathane u khou tou u ṋaṋa u vutshela vhathu vha Mudzimu.—Vhakol. 4:11; Nzumb. 12:12, 17.

Tsumbo dzi bvaho maṅwaloni dzi sumbedza uri u lumelisa ndi zwa ndeme u fhira u sokou ita uri muthu a pfe o ṱanganedzea.

Musi hu tshi swika tshifhinga tsha uri Mudzimu a fhirisele vhutshilo ha Murwa wawe kha mbumbelo ya Maria, o ruma muruṅwa wawe uri a ye u amba nae. Muruṅwa o thoma nga uri: “Ri a vusa, iwe a takalelwaho, Yehova u na iwe.” Maria o vha o “mangala” a sa pfesesi uri ndi ngani muruṅwa a tshi khou amba nae. Musi muruṅwa a tshi vhona zwenezwo, a amba nae a ri: “Maria, u songo ofha, ngauri Mudzimu o u tonda.” O mu ṱalutshedza uri Mudzimu u ṱoḓa uri a bebe Messia. Nṱhani ha uri a bvele phanḓa o mangala, o fhindula nga u ḓiṱukufhadza a ri: “Tshukhwi! Nṋe mulanda wa Yehova! Zwe wa amba kha zwi itee.”—Luka 1:26-38.

Muruṅwa o ṋewa ndugelo khulwane ya u vha muambeli wa Yehova nahone ha ngo zwi dzhia zwi zwithu zwa fhasi u rumiwa uri a ambe na muthu a songo fhelelaho. O thoma nga u lumelisa. Naa ri nga guda kha yeneyi tsumbo? Ri tea u ḓiimisela u lumelisa vhaṅwe na u vha ṱuṱuwedza. Nga maipfi a si gathi fhedzi, ri nga thusa vhaṅwe na u vha ṋea fhulufhelo ḽa uri Yehova u vha dzhia vhe vha ndeme.

Paulo o vha a tshi ḓivha vhathu vha zwivhidzo zwinzhi zwa Asia Minor na Yuropa. Marifhi awe a katela na ndumeliso dzi yaho kha vhathu nga ho livhaho. Zwenezwi ri zwi vhona kha Vharoma ndima ya 16. Paulo o rumela ndumeliso kha Vhakriste ngae vhanzhi. O amba nga ha “khaladzi yashu” Foivhe nahone a ṱuṱuwedza vhahawe uri vha “mu ṱanganedze Murenani nga nḓila yo fanelaho vhakhethwa, na uri [vha] mu thuse musi a tshi ṱoḓa thuso.” Paulo o lumelisa Prisika na Akwila a  ri “a vha livhuhiwi nga nṋe ndi ndoṱhe, fhedzi nga zwivhidzo zwoṱhe zwa vha dzitshaka.” O lumelisa na vhane ra sa vha ḓivhe ṋamusi—“Epaineto a funwaho” na “Tirifena na Tirifosa, vhafumakadzi vhe vha shuma nga maanḓa Murenani.” Ri nga amba uri Paulo o lumelisa vhahawe nga u ḓifunela.—Vharoma 16:1-16.

Humbulani nḓila ye vha vha vho takala ngayo musi vha tshi ḓivha uri a vho ngo hangwiwa na uri vha kha ḓi funiwa. U funa havho Paulo na u funana nga tshavho ho mbo ḓi engedzea! Zwi tou vha khagala uri u lumeliswa havho nga lufuno zwo ṱuṱuwedza vhaṅwe Vhakriste na u vha thusa uri vha dzule vha tshi fhulufhedzea. Ndumeliso dzine dza sumbedza u dzhiela vhahashu nṱha na u vha khoḓa, dzi khwaṱhisa vhushaka nahone dza ita uri hu vhe na vhuthihi vhukati ha vhashumeli vha fhulufhedzeaho vha Mudzimu.

Musi Paulo e nḓilani ya u ya Roma, o mbo ḓi swika ngei Puteoli nahone Vhakriste vha henefho vho mbo ḓi ḓa u mu vhona vha tshi bva thungo ya tshipembe. Musi Paulo a tshi vha vhona vha tshi kha ḓi vha kule, a “livhuha Mudzimu nahone a vha na tshivhindi.” (Mish. 28:13-15) Nga zwiṅwe zwifhinga, ri nga kona u lumelisa muthu fhedzi nga u mu imisela tshanḓa kana u ṅwethuwa. Ni nga wana uri khamusi onoyo muthu o kulea nungo kana o ṱungufhala, zwino u ita nga u ralo zwi nga ita uri a ḓipfe a khwine.

Vhaṅwe Vhakriste vho vha vha tshi khou thoma u sa fhulufhedzea kha Mudzimu nga u vha na vhukonani na vhathu vha shango. Ndi ngazwo mufunziwa Yakobo o vha a tshi tea u vha kaidza lu vhavhaho. (Yak. 4:4) Fhedzi ṱhogomelani maipfi e Yakobo a thoma ngao kha vhurifhi hawe:

“Nṋe Yakobo, mulanda wa Mudzimu na wa Murena Yesu Kristo, ndi lumelisa tshaka dza fumi-mbili (12) dzo balanganaho.” (Yak. 1:1) A zwi timatimisi uri vho wana zwi tshi vha lelutshela u ṱanganedza ndayo yawe ngauri nḓila ye a lumelisa ngayo yo sumbedzisa uri na ene ndi mulanda wa Mudzimu u fana navho. Ndi ngoho uri u lumelisa nga vhulenda zwi nga ita uri zwi leluwe u amba mafhungo u katela na mafhungo a ndeme.

U lumelisa zwi tshi bva mbiluni zwi sumbedza uri ri funa vhaṅwe hu sa londwi uri ndumeliso yashu ndi pfufhi lungafhani, naho ane a khou lumeliswa a tshi nga vhonala u nga ha zwi dzhieli nṱha. (Mat. 22:39) Ḽiṅwe ḓuvha, muṅwe wahashu wa tshisadzini wa ngei Ireland o swika miṱangano i tsini na u thoma. Musi a tshi khou u gidimela u dzula fhasi, muṅwe wahashu wa tshinnani o mbo ḓi mu sedza a ṅwethuwa nahone a ri: “Ndaa. Ndi zwavhuḓi u vha vhona.” Wahashu wa tshifumakadzini o mbo ḓi dzula fhasi.

Ho no fhela vhege dzi si gathi, wahashu wa tshifumakadzini o ya kha wahashu wa tshinnani nahone a mu vhudza uri ho fhela tshifhinga tshilapfu ndo sedzana na thaidzo hayani. O ri “Hovhuḽa vhusiku ndo vha ndo khukhulisea lwe nda vha ndi tshi khou u timatima na u ḓa pfunzoni. Zwe ha ambiwa nga ha zwo vhunzhi hazwo a thi tsha zwi humbula, fhedzi zwine nda humbula zwone ndi uri vho nndumelisa. Zwo ita uri ndi ḓipfe ndo ṱanganedzea vhukuma. Ndi a livhuwa.”

Wahashu wa tshinnani o vha a songo ṱhogomela nḓila ye ndumeliso yawe pfufhi ya kwama ngayo onoyo wahashu wa tshifumakadzini. Wahashu wa tshinnani o amba uri “Musi a tshi mmbudza nḓila ye a kwamea ngayo nga maipfi maṱuku-ṱuku e nda a amba, ndo pfa ndo takala vhukuma uri ndo kona u ita vhuḓidini ha uri ndi mu lumelise.”

Salomo o ṅwala uri: “Laṱela zwiḽiwa zwau maḓini; U ḓo dovha wa zwi wana hó fhela maḓuvha manzhi.” (Muh. 11:1) Musi ri tshi dzhia u lumelisa vhaṅwe zwi zwa ndeme, zwihuluhulu vhahashu vha Vhakriste, ri ḓo vhuyelwa nahone ra vhuyedza na vhaṅwe. Nga zwenezwo, ri songo vhuya ra dzhiela fhasi ndeme ya u lumelisa.