Arali zwenezwi zwi ngoho, humbulani nga ha nḓila ine zwa nga kwama ngayo vhutshilo hashu. Sa tsumbo, muṅwe wahashu we murwa wawe a ḓivhulaha o ri: ‘Naa Yehova o dzula o zwi vhona hu tshee nga phanḓa uri nṋe na mufumakadzi wanga ri ḓo kona u konḓelela musi murwa washu a tshi ḓivhulaha? Naa zwenezwi zwo itea ngauri Mudzimu o dzula o zwi dzudzanya uri ri ḓo kona u sedzana nazwo?’ Naa zwi a pfala u tenda uri Yehova u langa tshiṅwe na tshiṅwe tshine tsha itea vhutshiloni hashu?

Musi ri tshi dovha ra ṱolisisa maipfi a Paulo o ṅwalwaho kha 1 Vhakorinta 10:13, zwo ita uri ri phethe nga ḽa uri: A huna tshiitisi tshi re Maṅwaloni tshine tsha ita uri ri tende uri Yehova o dzula o dzudzanya hu tshee nga phanḓa zwine ra ḓo kona u zwi konḓelela na u khetha milingo ine ra ḓo kona u sedzana nayo. Kha ri ṱolisise zwiitisi zwiṋa zwine zwa ita uri ri phethe nga yeneyo nḓila.

Tsha u thoma, Yehova o ṋea vhathu tshifhiwa tsha mbofholowo ya u ḓikhethela. U ṱoḓa ri tshi ḓidzhiela phetho. (Doit. 30:19, 20; Yosh. 24:15) Arali ra khetha nḓila yavhuḓi, ri nga ḓitika nga Yehova uri a ri livhise. (Mir. 16:9) Fhedzi arali ra khetha nḓila i si yavhuḓi, ri ḓo sedzana na masiandoitwa a si avhuḓi. (Vhagal. 6:7) Arali Yehova a khetha milingo ine ra fanela u sedzana nayo, naa zwenezwi zwi ḓo amba uri ri na mbofholowo ya u ḓikhethela?

Tsha vhuvhili, Yehova ha ri tsireledzi kha zwithu zwine ra sokou “ṱangana nazwo’ nga tshifhinga tshazwo.” (Muh. 9:11) Muthu a nga ṱangana na khombo ngauri a nga kha ḓi vha e fhethu hu songo teaho nga tshifhinga tshi songo teaho. Yesu o amba nga ha vhathu vha 18 vhe vha welwa nga mutsheṱo vha fa nahone o zwi vhea zwa vha khagala uri a si Mudzimu we a ita uri vhenevho vhathu vha fe. (Luka 13:1-5) Naa zwenezwo zwi a pfala u phetha nga ḽa uri Mudzimu o dzula o dzudzanya hu tshee nga phanḓa uri musi hu na khombo ndi vhafhio vhane vha ḓo tshila na vhane vha ḓo fa?

Tsha vhuraru, muṅwe na muṅwe washu u fanela u fulufhedzea kha Yehova. Sathane o amba uri vhashumeli vha Yehova vha mu shumela nga nṱhani ha uri hu na zwine a vha ṋea zwone nahone o dovha a amba uri vha nga si dzule vha tshi fulufhedzea khae arali vho  sedzana na milingo. (Yobo 1:9-11; 2:4; Nzumb. 12:10) Arali Yehova a ri tsireledza kha miṅwe milingo nga nṱhani ha uri u vhona u nga ri nga si kone u i konḓela, naa zwenezwo zwi nga vhonala u nga Sathane o vha a tshi khou amba ngoho musi a tshi ri ri shumela Mudzimu nga nṱhani ha u ṱoḓa u ḓivhuyedza?

Tsha vhuṋa, Yehova ha khethi u ḓivha zwithu zwoṱhe zwine zwa ḓo itea kha riṋe hu tshee nga phanḓa. U humbula uri Mudzimu u khetha u ḓivha milingo ine ra sedzana nayo hu tshee nga phanḓa zwi amba uri u fanela u ḓivha tshiṅwe na tshiṅwe nga ha vhumatshelo hashu. Fhedzi mavhonele o raloho ho ngo ṅwalwa Bivhilini. Arali a tshi funa, Yehova a nga khetha u ḓivha zwine zwa ḓo itea tshifhingani tshi ḓaho. (Yes. 46:10) Bivhili i sumbedza uri hu na zwine a khetha u zwi ḓivha hu tshee nga phanḓa. (Gen. 18:20, 21; 22:12) Nga zwenezwo, Mudzimu u na lufuno nahone o luga, ha dzheneleli kha mbofholowo yashu ya u ḓikhethela.—Doit. 32:4; 2 Vhakor. 3:17.

Nga zwenezwo, Paulo o vha a tshi khou amba mini musi a tshi ri, “Mudzimu. . . ha nga ḓo tenda ni tshi lingwa lune na sa ḓo kona u konḓelela”? Paulo u khou amba nga ha zwine Yehova a zwi ita zwino musi no sedzana na milingo, hu si zwine a zwi ita hu sa athu u vha na milingo. Maipfi a muapostola Paulo a ri khwaṱhisedza uri hu sa londwi milingo ine ra sedzana nayo vhutshiloni, Yehova u a ri tikedza arali ri tshi mu fulufhela. (Ps. 55:22) Ri ḓo haseledza zwiitisi zwivhili zwi sumbedzaho uri ndi ngani Paulo a tshi amba nga yeneyi nḓila.

Tsha u thoma, milingo ine ra sedzana nayo na ‘vhaṅwe vha sedzana nayo.’ Nga zwenezwo, milingo ine ra sedzana nayo yo ḓowelea kha vhathu vhoṱhe. Yeneyo milingo a si milingo ine ra kundelwa u i konḓelela arali ri tshi ḓitika nga Mudzimu. (1 Pet. 5:8, 9) Kha lwonolwu luṅwalo lwa 1 Vhakorinta 10:13, Paulo o vha a tshi khou amba nga ha milingo ye Vhaisiraele vha sedzana nayo sogani. (1 Vhakor. 10:6-11) Vhaisiraele vha fulufhedzeaho vho vha vha tshi kona u konḓelela milingo ye vha vha vho sedzana nayo. Paulo o amba luṋa lwoṱhe maipfi ane a ri “vhaṅwe vhavho” vho vha vha sa thetshelesi. Zwi ṱungufhadzaho ndi uri, vhaṅwe Vhaisiraele vho vha vhe na nyemulo dza ṋama ngauri vho vha vha sa ḓitiki nga Mudzimu.

Tsha vhuvhili, “Mudzimu u a fulufhedzea.” Nḓila ye Mudzimu a tikedza ngayo vhathu vhawe i sumbedza nḓila ine a funa ngayo “vhane vha mu funa [na u] tevhedza dzindaelá dzawe.” (Doit. 7:9) Zwenezwo zwi dovha zwa sumbedza nḓila ine Mudzimu a dzula ngayo a tshi ita zwe a fulufhedzisa. (Yosh. 23:14) Ri nga vha na vhungoho ha uri vhane vha mu funa na u mu thetshelesa, vha nga fulufhela uri u ḓo dzula a tshi ita zwe a fulufhedzisa musi vho sedzana na milingo: (1) Yehova a nga si tendele milingo naho i ifhio i tshi ri konḓela lune ra sa kone u i konḓelela, nahone (2) ‘u ḓo vula nḓila ine ra ḓo kona ngayo u konḓelela.’

Yehova u vula hani nḓila kha vhane vha ḓitika ngae musi vho sedzana na milingo? Vhukuma, arali hu lutamo lwawe, a nga bvisa mulingo une ra sedzana nawo. Humbulani maipfi a Paulo ane a ri: “[Yehova] u ḓo dovha a ni vulela nḓila ine na ḓo bva ngayo uri ni kone u konḓelela.” Zwiṅwe hafhu, kha vhuṅwe vhuimo, u ‘vula nḓila’ nga u ri ṋea zwine ra zwi ṱoḓa u itela uri ri kone u konḓelela milingo nga nḓila i bvelelaho. Kha ri ṱolisise dziṅwe nḓila dzine Yehova a ri vulela ngadzo nḓila:

• U “a ri khuthadza kha vhuṱungu hashu hoṱhe.” (2 Vhakor. 1:3, 4) Yehova a nga fhodza mihumbulo yashu, mbilu dzashu na nḓila ine ra ḓipfa ngayo a tshi shumisa Ipfi ḽawe, muya wawe mukhethwa na zwiḽiwa zwa muya zwine ra zwi wana kha mulanda a fulufhedzeaho.—Mat. 24:45; Yoh. 14:16, Vharoma 15:4.

• A nga ri livhisa na nga muya wawe mukhethwa. (Yoh. 14:26) Musi ri tshi sedzana na milingo, muya mukhethwa u nga ri thusa u humbula dziṅwe ndimana dzi re Bivhilini na zwiṅwe zwilinganyo u itela uri ri kone u dzhia vhukando ho teaho.

• A nga shumisa vharuṅwa u itela uri vha ri thuse.—Vhaheb. 1:14.

• A nga shumisa vhahashu uri vha ri ‘khuthadze’ nga maipfi na nga zwine vha zwi ita.—Vhakol. 4:11.

Ri nga guda mini kha maipfi a Paulo a wanalaho kha 1 Vhakorinta 10:13? Yehova ha khethi milingo ine ra sedzana nayo. Fhedzi musi ri tshi sedzana na milingo, ri nga vha na fulufhelo ḽa uri: Arali ri tshi ḓitika nga Yehova, a nga si tendele milingo i tshi ri linga lune ra ḓo kundelwa u i konḓelela; u ḓo dzula a tshi vula nḓila ine ra ḓo bva ngayo uri ri kone u konḓelela. Zwenezwi zwi a khuthadza vhukuma!