Naa no vhala thero dza magazini dza Tshiingamo dza uno ṅwaha? Kha ri vhone arali ni tshi nga fhindula mbudziso dzi tevhelaho:

Ri tea u fara hani vhaḓodzwa?

Ri takalela lutendo lwavho, fhedzi a ri vha khoḓi lwo kalulaho. (Yuda 16) A ro ngo tea u vha vhudzisa mafhungo ane ri si tee u ḓidzhenisa khao.​—w20.01, masiaṱ. 28-29.

Ni nga vha hani na vhungoho ha uri Yehova u a ni vhona?

Bivhili i ri Yehova o ni ḓivha na musi ni sa athu u bebwa nahone u thetshelesa thabelo yaṋu iṅwe na iṅwe. U a ḓivha zwine zwa vha mbiluni yaṋu na zwine na humbula nahone u a kwamea nga nḓila ine na ḓifara ngayo. (1 Koron. 28:9; Mir. 27:11) O ni kokodzela khae.​—w20.02, siaṱ. 12.

Ndi tshifhio tshifhinga tsho teaho tsha u amba na tsha u fhumula?

Ri amba musi ri tshi vhudza vhaṅwe nga ha Yehova. Ri amba musi ri tshi vhona wahashu a tshi khou ita tshithu tshine tsha ḓo mu itisa tshivhi. Vhahulwane vha amba musi vha tshi kaidza muthu. Ri tea u fhumula musi ri tshi lingea u amba (kana u vhudzisa) nga ha nḓila ine mushumo washu wa khou itwa ngayo kha mashango e wa thivhelwa. Ri tea u fhumula musi ri tshi ḓivha mafhungo a sa ḓivhiwiho nga vhomuthumunzhi.​—w20.03, masiaṱ. 20-21.

Nzie dzi re kha Yoele ndima 2 dzo fhambana hani na dzi re kha Nzumbululo ndima 9?

Yoele 2:20-29 i amba uri Mudzimu u ḓo pandela dzenedzo nzie nahone u fhulufhedzisa uri u ḓo lifha zwe dza ḽa. Nga murahu ha zwenezwo, Mudzimu u shululela muya wawe. Zwenezwo zwo itea musi Vhababele vha tshi ṱhasela Yerusalema na nga Pentekoste ya 33 C.E. Nzie dzi re kha Nzumbululo 9:1-11 dzi imela vhaḓodzwa vhane vha huwelela mulaedza wa khaṱhulo nga tshivhindi nahone zwenezwi a zwi takadzi vhatikedzi vha shango na luthihi.​—w20.04, masiaṱ. 2-6.

Khosi ya devhula ndi nnyi ṋamusi?

Ndi muvhuso wa Russia na mashango ane a u tikedza. Wo vutshela vhathu vha Mudzimu musi u tshi thivhela mushumo wavho wa u huwelela na u tambudza Ṱhanzi nnzhi dzine dza dzula hune wa vhusa. Khosi ya devhula i lwa na khosi ya tshipembe.​—w20.05, siaṱ. 13.

Naa hu na zwiṅwe “zwi aṋwiwaho nga muya mukhethwa” nga nnḓa ha zwa ṱahe zwo ambiwaho kha Vhagalata 5:22, 23?

Ee! Muya mukhethwa u ri thusa u bveledza zwiṅwe zwiaṋwiwa zwavhuḓi zwi ngaho u konḓelela. (1 Tim. 6:11)​—w20.06, siaṱ. 17.

U dzhenisa zwithu nga ha inwi muṋe kha social media zwi na khombo ifhio?

Zwithu zwine na zwi dzhenisa kha social media zwi nga sumbedza uri ni khou ṱongisa zwine na vha nazwo na uri a ni ḓiṱukufhadzi.​—w20.07, masiaṱ. 6-7.

Vhahuweleli vha nga guda mini kha vharei vha khovhe vha re na vhutsila?

Vharei vha khovhe vha re na vhutsila vha shuma nga tshifhinga na fhethu hune vha nga wana hone khovhe. Vho gudiswa u shumisa zwishumiswa zwa u rea khovhe zwo teaho. Vha shuma nga tshivhindi naho zwiimo zwi tshi shanduka. Na riṋe ri nga ita zwenezwo musi ri vhuḓinḓani.​—w20.09, siaṱ. 5.

Ri nga ita hani uri vhagudiswa vha fune Mudzimu nga ho engedzeaho?

Ri nga vha ṱuṱuwedza uri vha vhale Bivhili ḓuvha na ḓuvha na u elekanya nga ha zwine vha vhala. Ri nga vha gudisa u rabela.​—w20.11, siaṱ. 4.

Aya maipfi a ambela kha vhonnyi: “Roṱhe ri ḓo vuswa nga nṱhani ha Kristo”?—1 Vhakor. 15:22.

Muapostola Paulo o vha a sa khou amba uri muṅwe na muṅwe u ḓo vuswa nga yeneyi nḓila. O vha a tshi khou ambela kha Vhakriste vho ḓodzwaho vhe vha ‘nangiwa uri vha vhe na vhuthihi na Kristo Yesu.’ (1 Vhakor. 1:2; 15:18)​—w20.12, masiaṱ. 5-6.

Vhaḓodzwa vha ḓo ita mini musi vho no ‘shandukiswa nga u poidza ha ḽiṱo, musi hu tshi lila phalaphala ya u fhedza’?—1 Vhakor. 15:51-53.

Vha ḓo tevhela Kristo kha mushumo wa u lisa dzitshaka nga lubaḓa lwa tsimbi. (Nzumb. 2:26, 27)​—w20.12, masiaṱ. 12-13.