1. Ndi zwifhio zwine Yehova a ṱoḓa ri tshi zwi ita?

 TSHIṄWE tsha zwithu zwine zwa ita uri vhavhingani vha takale nga maanḓa ndi musi vha tshi vha na ṅwana a re na mutakalo wavhuḓi. Fhedzi naho vhabebi vha tshi funa onoyo ṅwana, a vha ṱoḓi a tshi dzula e lushie a sa aluwi. Zwavhuḓivhuḓi, vha nga vhilaela arali ṅwana wavho a sa khou aluwa. Na Yehova u a takala musi a tshi vhona ri tshi thoma u guda nga hae, fhedzi ha ṱoḓi ri tshi guma henefho. (1 Vhakor. 3:1) Nṱhani hazwo, u ṱoḓa ri tshi bvela phanḓa ri tshi vha “na lutendo lwo khwaṱhaho.”—1 Vhakor. 14:20.

2. Ndi mbudziso dzifhio dzine ra ḓo dzi fhindula kha ino thero?

² Zwi amba mini u vha Mukriste o vhibvaho? Ri tea u ita mini uri ri vhe Vhakriste vho vhibvaho? U guda ngoho dzo dzikaho dzi re Bivhilini zwi nga ri thusa hani uri ri vhe Vhakriste vho vhibvaho? Nahone ndi ngani ri songo tea u ḓifhulufhela nga ho kalulaho? Ri ḓo fhindula dzenedzo mbudziso kha ino thero.

ZWI AMBA MINI U VHA MUKRISTE O VHIBVAHO?

3. Zwi amba mini u vha Mukriste o vhibvaho?

³ Bivhilini ipfi ḽa Tshigerika ḽo ṱalutshedzelwaho nga uri u vha “na lutendo lwo khwaṱhaho” ḽi nga ambela kha u vha “muthu o vhibvaho.” a (1 Vhakor. 2:6) Samusi ṅwana a tshi aluwa u vhuya u swika a tshi vha mualuwa, na riṋe ri fanela u bvela phanḓa ri tshi vha na vhushaka ho khwaṱhaho na Yehova. Nga yeneyi nḓila ri vha ri tshi khou vha Vhakriste vho vhibvaho. Zwi tou pfala uri naho ro no swikelela tshenetsho tshipikwa, a ro ngo tea u litsha u khwinisa. (1 Tim. 4:15) Roṱhe u katela na vhane vha kha ḓi vha vhaṱuku nga miṅwaha, ri nga kona u vha Vhakriste vho vhibvaho.  Fhedzi ndi mini zwine zwa sumbedza uri muthu ndi Mukriste o vhibvaho?

4. Ni nga ṱalusa hani Mukriste o vhibvaho?

⁴ Mukriste o vhibvaho ndi muthu ane a tevhedza zwoṱhe zwine Yehova a ri a zwi ite. Ha ḓikhetheli uri u ḓo tevhedza zwifhio a litsha zwifhio. Ndi ngoho uri, u ḓo ḓi ita a tshi khakha sa izwi e na tshivhi. Fhedzi ḓuvha ḽiṅwe na ḽiṅwe u lingedza nga nḓila dzoṱhe u humbula na u ita zwithu nga nḓila ine Yehova a i funa. O ambara vhumuthu vhuswa nahone u dzula a tshi lingedza u humbula nga nḓila ine Yehova a humbula ngayo. (Vhaef. 4:22-24) O ḓigudisa u ita phetho dza vhuṱali dzo thewaho kha milayo na vhulivhisi ha Yehova, nga zwenezwo a zwi ṱoḓei uri a ṋewe milayo minzhi-minzhi ya zwine a tea u ita na zwine a si tee u zwi ita. Musi a tshi ita phetho, u shuma nga nungo dzoṱhe uri a ite zwe a phetha.—1 Vhakor. 9:26, 27.

5. Hu nga itea mini kha Mukriste a songo vhibvaho? (Vhaefesa 4:14, 15)

⁵ Kha ḽiṅwe sia, Mukriste a songo vhibvaho zwi nga mu lelutshela uri a fhurwe nga vhathu vhane vha shumisa “maano a vhukwila.” A nga fhurwa nga vhathu vhane vha phaḓaladza mafhungo a mazwifhi kana mavharivhari kana a fhurwa nga vhagunei. b (Vhalani Vhaefesa 4:14, 15.) A nga anzela u vha na vivho, u vusa dzikhakhathi, a ṱavhanya u khukhulisea kana zwa mu lelutshela u ita zwithu zwo khakheaho musi a tshi lingiwa.—1 Vhakor. 3:3.

6. Ndi ngani ri tshi nga fanyisa Mukriste ane a khou khwaṱhisa lutendo uri a vhe Mukriste o vhibvaho na ṅwana ane a khou aluwa? (Sedzani tshifanyiso.)

⁶ Samusi ro zwi haseledza mathomoni, Bivhili i fanyisa nḓila ine ṅwana a aluwa ngayo u vhuya u swika a tshi vha mualuwa na nḓila ine Mukriste a khwaṱha ngayo lutendoni u vhuya u swika a tshi vha Mukriste o vhibvaho. Hu na zwithu zwinzhi zwine ṅwana a si zwi ḓivhe, nga zwenezwo u ṱoḓa u tsireledzwa na u livhiswa nga muthu muhulwane. Sa tsumbo, mme a nga vhudza ṅwananyana wawe uri a mu fare nga tshanḓa musi a tshi khou pfuka bada. Musi onoyo ṅwananyana a tshi khou ḓi aluwa, mme awe vha nga mu tendela u pfuka bada e eṱhe, fhedzi vha nga mu humbudza uri musi a sa athu pfuka bada, a thome a sedze thungo dzoṱhe uri a vhone arali hu sa khou ḓa goloi. Musi onoyo ṅwana o no vha muhulwane, u vha a tshi vho ḓivha uri u fanela u ita  mini musi a tshi pfuka bada. Samusi vhana vha tshi ṱoḓa thuso ya vhaaluwa uri vha si wele khomboni, na Vhakriste vha songo vhibvaho vha ṱoḓa thuso ya Vhakriste vho vhibvaho uri vha iledze zwithu zwine zwa nga tshinya vhushaka havho na Yehova na uri vha ite phetho dza vhuṱali. Kha ḽiṅwe sia, musi Vhakriste vho vhibvaho vha tshi ita phetho, vha thoma vha humbulisisa nga ha zwine Bivhili ya zwi amba u itela u vhona uri Yehova u dzhia hani eneo mafhungo, nga murahu vha kona u dzhia phetho ya vhuṱali.

7. Naa Vhakriste vho vhibvaho vha a ṱoḓa thuso kha vhaṅwe?

⁷ Naa zwenezwi zwi amba uri Mukriste o vhibvaho ha ṱoḓi thuso kha vhaṅwe? Hai. Vhakriste vho vhibvaho vha tea u humbela thuso nga tshiṅwe tshifhinga. Fhedzi muthu a sa athu vhaho Mukriste o vhibvaho a nga ṱoḓa uri vhaṅwe vha mu vhudze uri a ite mini kana uri vha mu itele phetho ine ya tea u itwa nga ene muṋe. Kha ḽiṅwe sia, musi Mukriste o vhibvaho a tshi humbela thuso kha vhaṅwe vha re na vhuṱali na tshenzhelo, u a zwi ḓivha uri u tea u ḓiitela phetho ene muṋe na uri u ḓo “hwala vhuḓifhinduleli hawe.”—Vhagal. 6:5.

8. Vhakriste vho vhibvaho vha nga vha vho fhambanaho nga nḓila-ḓe?

⁸ Samusi vhathu vha si na mbonalo i fanaho, na Vhakriste vho vhibvaho a vha sumbedzi u vha na nḓivho, tshivhindi, mafunda na u pfela vhuṱungu nga nḓila i fanaho. Zwiṅwe hafhu, naho Vhakriste vhavhili vho vhibvaho vhe kha vhuimo vhu fanaho, vha nga ita phetho dzi sa fani, fhedzi dzi tshi tendelana na vhulivhisi vhu re Bivhilini. Zwenezwi zwi anzela u itea nga maanḓa-maanḓa kha mafhungo a kwamaho luvalo. U ḓivha zwenezwi zwi nga ita uri vha si haṱulane musi vha tshi ita phetho dzi sa fani. Nṱhani hazwo, vha dzula vho livhisa ṱhogomelo kha uri hu vhe na vhuthihi.—Vharoma 14:10; 1 Vhakor. 1:10.

RI TEA U ITA MINI URI RI VHE VHAKRISTE VHO VHIBVAHO?

9. Naa zwi sokou itea uri ri ḓiwane ri Vhakriste vho vhibvaho? Ṱalutshedzani.

⁹ Nga u ya ha tshifhinga ṅwana u a aluwa a songo ita vhuḓidini, fhedzi muthu u tea u ita vhuḓidini uri a vhe Mukriste o vhibvaho. Sa tsumbo, vhahashu vha ngei Korinta vho ṱanganedza mafhungo maḓifha, vha lovhedzwa, vha wana muya mukhethwa nahone vha guda zwinzhi kha muapostola Paulo. (Mish. 18:8-11) Naho zwo ralo, nga murahu ha miṅwaha musi vho no lovhedzwa, vhunzhi havho vho vha vha sa athu vha Vhakriste vho vhibvaho. (1 Vhakor. 3:2) Zwenezwi ri nga zwi iledza hani?

10. Ri tea u ita mini uri ri vhe Vhakriste vho vhibvaho? (Yuda 20)

¹⁰ Uri ri vhe Vhakriste vho vhibvaho ri tea u thoma nga u vha na lutamo lwazwo. Vhane vha funa “u sa vha na tshenzhelo,” nahone vha tshi ṱoḓa u dzula vho ralo, vha nga si kone u vha Vhakriste vho vhibvaho. (Mir. 1:22) A ri ṱoḓi u fana na vhathu vho no vhaho vhahulwane fhedzi vha tshi kha ḓi itelwa phetho nga vhabebi vhavho. Nṱhani hazwo, ri khou ṱoḓa u dzhia vhuḓifhinduleli ha u khwaṱhisa vhushaka hashu na Yehova. (Vhalani Yuda 20.) Arali ni tshi kha ḓi shumela kha u vha Mukriste o vhibvaho, rabelani uri Yehova a ite uri “ni tame u ita zwine a funa na u vha na maanḓa a u ita.”—Vhafil. 2:13.

11. Yehova u ri ṋea mini u itela u ri thusa uri ri vhe Vhakriste vho vhibvaho? (Vhaefesa 4:11-13)

¹¹ Yehova u a ri thusa uri ri vhe Vhakriste vho vhibvaho. O ri ṋea vhalisa na vhagudisi tshivhidzoni vhane vha ri thusa u vha ‘vhathu vho vhibvaho vhane vha fana na Kristo nga nḓila dzoṱhe.’ (Vhalani Vhaefesa 4:11-13.) Yehova u dovha a ri ṋea muya wawe mukhethwa une wa ri thusa uri ri ‘humbule u fana na Kristo.’ (1 Vhakor. 2:14-16) Zwiṅwe hafhu, Mudzimu o dovha a ri ṋea bugu dza Evangeli u itela u ri sumbedza nḓila ye Yesu a vha a tshi humbula, u amba na u  ita zwithu ngayo musi e kha ḽifhasi. U edzisa nḓila ye Yesu a vha a tshi humbula na u ita ngayo zwithu, zwi nga ni thusa uri ni swikelele tshipikwa tshaṋu tsha u vha Mukriste o vhibvaho.

U GUDA MAFHUNGO O DZIKAHO A RE BIVHILINI ZWI NGA RI THUSA HANI?

12. Ndi dzifhio “pfunzo dza mutheo dza Kristo”?

¹² U itela uri ri vhe Vhakriste vho vhibvaho, ri tea u guda zwi fhiraho “pfunzo dza mutheo dza Kristo.” Dziṅwe tsumbo dza dzenedzi pfunzo dza mutheo dzi katela pfunzo dzi ngaho u rembuluwa, lutendo, u lovhedzwa na pfunzo ya mvuwo. (Vhahev. 6:1, 2) Zwenezwi ndi zwiṅwe zwa zwithu zwa mutheo zwine Vhakriste vhoṱhe vha ngoho vha zwi tenda. Ndi ngazwo muapostola Petro o amba nga ha zwenezwi zwithu musi a tshi huwelela kha vhathu nga Pentekoste. (Mish. 2:32-35, 38) U itela uri ri kone u vha vhafunziwa vha Kristo ri tea u tenda kha dzenedzi pfunzo dza mutheo. Sa tsumbo, Paulo o sumbedza uri arali ri sa tendi kha mvuwo ri nga si kone u vha vhafunziwa vha Kristo. (1 Vhakor. 15:12-14) Naho zwo ralo, a ro ngo tea u fushea nga u ḓivha pfunzo dza mutheo fhedzi.

13. Ri tea u ita mini uri ri vhuyelwe nga zwiḽiwa zwo dziaho zwo ambiwaho kha Vhahevheru 5:14? (Sedzani tshifanyiso.)

¹³ Zwiḽiwa zwo dziaho a zwi fani na pfunzo dza mutheo, ngauri a zwi kateli fhedzi milayo ya Yehova, fhedzi zwi katela na vhulivhisi vhu re Bivhilini vhune ha ri thusa u pfesesa nḓila ine Yehova a humbula ngayo. U itela uri ri vhuyelwe nga zwenezwi zwiḽiwa zwo dziaho, ri tea u vhala Bivhili, ri humbulisise nga ha zwe ra zwi vhala nahone ri ite zwoṱhe zwine ra nga zwi kona uri ri shumise zwe ra zwi guda. Musi ri tshi ita nga u ralo, ri vha ri tshi khou ḓigudisa u ita phetho dzine dza takadza Yehova. c—Vhalani Vhahevheru 5:14.

14. Paulo o thusa hani Vhakorinta uri vha vhe Vhakriste vho vhibvaho?

¹⁴ Vhakriste vha songo vhibvaho zwi a vha konḓela u ita phetho yo teaho musi hu si na mulayo wo livhaho Bivhilini. Arali hu si na mulayo wo tou livhaho Bivhilini, vhaṅwe vha nga pfa u nga vha nga ita zwiṅwe na zwiṅwe zwine vha funa. Vhaṅwe vha nga ṱoḓa uri hu vhe na mulayo naho  u sa ṱoḓei. Sa tsumbo, zwi vhonala uri Vhakriste vha ngei Korinta vho humbela Paulo uri a vha vhetshele mulayo wa uri naa vho vha vho tendelwa u ḽa zwiḽiwa zwo ṋekedzwaho midzimu ya mazwifhi kana hai. Nṱhani ha u vha vhudza uri vha ite mini, Paulo o vha sumbedza uri muṅwe na muṅwe wavho o vha a tshi nga ‘khetha zwine a ḓo zwi ita’ zwi tshi ya nga zwine luvalo lwawe lwa mu tendela zwone. O vha vhudza nga ha vhulivhisi vhu re Bivhilini he ha vha vhu tshi nga vha thusa u ita phetho ye ya vha i tshi ḓo ita uri vha sale vhe na luvalo lwo kunaho na ye ya vha i sa ḓo khukhulisa vhaṅwe. (1 Vhakor. 8:4, 7-9) Paulo o vha a tshi khou gudisa Vhakorinta u shumisa maanḓa avho a u ṱalukanya musi vha tshi ḓiitela phetho, nṱhani ha u ḓitika nga muṅwe muthu kana uri hu vhewe mulayo. Nga yeneyo nḓila o vha a tshi khou vha thusa uri vha vhe Vhakriste vho vhibvaho.

15. Paulo o thusa hani Vhakriste vha Vhahevheru u khwaṱhisa vhushaka havho na Yehova?

¹⁵ Ri wana ngudo ya ndeme kha zwe Paulo a zwi ṅwalela Vhakriste vha Vhahevheru. Vhaṅwe vhavho vho litsha u khwaṱhisa vhushaka havho na Yehova; zwa tou nga vho ‘humela murahu vha vho ṱoḓa mafhi, hu si zwiḽiwa zwo dziaho.’ (Vhahev. 5:12) Vho kundelwa u guda na u ṱanganedza zwithu zwiswa zwe Yehova a vha a tshi khou vha gudisa tshivhidzoni. (Mir. 4:18) Sa tsumbo, vhunzhi ha vhatendi vha Vhayuda vho vha vha tshi kha ḓi ṱoḓa hu tshi tevhedzwa Mulayo wa Mushe naho ho vha ho no fhela miṅwaha ya 30 wonoyo Mulayo wo fheliswa nga nṱhani ha tshiṱhavhelo tsha Kristo. (Vharoma 10:4; Tito 1:10) Yeneyo miṅwaha ya 30 tsho vha tshi tshifhinga tsho eḓanaho tsha uri vhenevho Vhakriste vha pfesese uri vho vha vha si tsha tea u tevhedza Mulayo wa Mushe. Nga zwenezwo, Paulo o vha a tshi khou lingedza u vha thusa uri vha tende ngoho yo dzikaho ye a vha a tshi khou vha gudisa yone. Vhurifhi he a vha ṅwalela hone ho vha thusa u vhona uri nḓila ntswa ya u gwadamela Yehova hu tshi shumiswa Yesu yo vha i ya khwine. Ho dovha ha vha ṱuṱuwedza u bvela phanḓa vha tshi huwelela hu sa londwi u pikiswa nga Vhayuda.—Vhahev. 10:19-23.

ILEDZANI U ḒIFHULUFHELA LWO KALULAHO

16. Naa ri tea u guma kha u vha Mukriste o vhibvaho fhedzi?

¹⁶ Ri tea u shuma nga maanḓa uri ri vhe Vhakriste vho vhibvaho na u dzula ro ralo. Zwenezwi zwi ṱoḓa uri ri iledze u ḓifhulufhela lwo kalulaho, na u iledza u humbula uri sa izwi ro no vha  Vhakriste vho vhibvaho a ri tsha tea u bvela phanḓa ri tshi khwaṱhisa vhushaka hashu na Yehova. (1 Vhakor. 10:12) Ri tea u ‘dzula ri tshi ḓiṱolisisa’ u itela u vhona arali ri tshi kha ḓi ita mvelaphanḓa.—2 Vhakor. 13:5.

17. Vhurifhi he Paulo a vhu ṅwalela Vhakolosa vhu sumbedza hani uri ri tea u bvela phanḓa ri Vhakriste vho vhibvaho?

¹⁷ Vhurifhi he Paulo a vhu ṅwalela Vhakolosa, vhu sumbedza uri ndi zwa ndeme u bvela phanḓa ri Vhakriste vho vhibvaho. Naho Vhakolosa vho vha vho no ḓi vha Vhakriste vho vhibvaho, Paulo o vha vhudza uri vha tea u ṱhogomela uri vha si fhurwe nga mihumbulo ya vhathu vha shango. (Vhakol. 2:6-10) Nahone Epafra we a vha a tshi ḓivha vhaṅwe vha tshenetsho tshivhidzo zwavhuḓi, o dzula a tshi rabela uri ‘vha ime vho khwaṱha’ kana uri vha vhe vho vhibvaho. (Vhakol. 4:12) Ndi mini zwine ra zwi guda? Paulo na Epafra vho vha vha tshi zwi ḓivha uri ri ṱoḓa thuso ya Mudzimu uri ri dzule ri Vhakriste vho vhibvaho, fhedzi ri tea u dovha ra ita na vhuḓidini ha uri vhushaka hashu nae vhu khwaṱhe vhu tshi ya. Vho vha vha tshi ṱoḓa uri Vhakolosa vha bvele phanḓa vhe Vhakriste vho vhibvaho hu sa londwi thaidzo dze vha vha vha tshi khou sedzana nadzo.

18. Ndi mini zwine zwa nga itea kha Mukriste o vhibvaho? (Sedzani tshifanyiso.)

¹⁸ Paulo o ṅwalela Vhahevheru uri zwi nga itea uri Mukriste o vhibvaho a si tsha takalelwa nga Yehova lwa tshoṱhe arali a sa ṱhogomela. Arali a hana u thetshelesa Yehova, a nga sendela kule nae lune a si tsha kona u rembuluwa na u hangwelwa ngae. Ri livhuwa uri Vhakriste vha Vhahevheru vho vha vha sa athu vha kha honoho vhuimo. (Vhahev. 6:4-9) Hu pfi mini nga vhane vha fhola kana vha bviswa tshivhidzoni fhedzi nga murahu vha rembuluwa? U rembuluwa havho hu sumbedza uri vho fhambana na vhe Paulo a vha a tshi khou amba nga havho. Fhedzi musi vha tshi vhuyelela kha Yehova vha ḓo tea u ṱanganedza thuso ine a ḓo vha ṋea yone. (Hesek. 34:15, 16) Vhahulwane vha tshivhidzo vha nga humbela wahashu ane a vha Mukriste o vhibvaho uri a thuse onoyo wahashu o rembuluwaho uri a dovhe a khwaṱhise vhushaka hawe na Yehova.

19. Ri tea u ḓivhetshela tshipikwa tshifhio?

¹⁹ Arali ni tshi khou shumela kha u vha Mukriste o vhibvaho, ni nga swikelela tshipikwa tshaṋu. Bvelani phanḓa ni tshi guda mafhungo o dzikaho a re Bivhilini na u humbula nga nḓila i fanaho na ine Yehova a humbula ngayo. Arali no no vha Mukriste o vhibvaho, itani zwoṱhe zwine na nga kona uri ni bvele phanḓa ni Mukriste o vhibvaho u ya nga hu sa fheli.