U VHILAELA zwi lemedza mbilu. (Mir. 12:25) Naa no no vhuya na ḓiwana ni tshi khou vhilaela? Naa ni a swika hune na pfa u nga a zwi tsha konḓelelea? Arali zwo ralo, a ni noṱhe. Vhunzhi hashu ri nga vhilaedziswa, u tsikeledzwa na u netiswa nga zwithu zwo fhambananaho. Sa tsumbo, vhaṅwe vha khou ṱhogomela muraḓo wa muṱa ane a khou lwala, vhaṅwe vho lovhelwa nga muthu ane vha mu funa nahone vhaṅwe vho welwa nga khombo ya mupo. Ndi mini zwine zwa nga ri thusa u konḓelela musi ri tshi khou vhilaela? *

Ri nga guda zwinzhi kha Khosi Davida nga ha zwine ra nga zwi ita uri ri kone u konḓelela musi ri tshi khou vhilaela. Davida o vha e na thaidzo nnzhi nahone nga zwiṅwe zwifhinga vhutshilo hawe ho vha vhu khomboni. (1 Sam. 17:34, 35; 18:10, 11) Ndi mini zwe zwa thusa Davida uri a kone u konḓelela musi a tshi khou vhilaela? Ri nga mu edzisa hani?

Davida o vha na thaidzo nnzhi nga khathihi. Sa tsumbo, humbulani nga ha zwe zwa itea khae musi a tshi khou shavha Khosi Saulo, we a vha a tshi khou ṱoḓa u mu vhulaya. Musi Davida na vhanna vhe a vha e navho vha tshi humela hayani kha ḽa Zikilaga, vho wana uri maswina avho o tswa thundu yavho, o fhisa nnḓu dzavho na u thuba miṱa yavho. Davida o ita mini? “Davida na vhanna vhe a vha e navho vha vusa tshililo tshihulu, u swika vha tshi fhelelwa nga nungo dza u lila.” O vhilaela nga ho engedzeaho ngauri vhanna vhe a vha e navho “vho vha vha tshi khou ṱoḓa u mu kanḓa nga matombo.” (1 Sam. 30:1-6) Davida o vha o sedzana na thaidzo tharu khulwane nga tshifhinga tshithihi: Muṱa wawe wo vha u khomboni, vhanna vhe a vha e navho vho vha vha tshi khou ṱoḓa u mu vhulaya na Khosi Saulo o vha a tshi khou ṱoḓa u mu vhulaya. Humbulani nga ha nḓila ye Davida a vha a tshi khou vhilaela ngayo!

Davida o ita mini? “O wana nungo a tshi thuswa nga Yehova Mudzimu wawe.” A nga vha o zwi ita hani? Ri a zwi ḓivha uri Davida o vha a tshi dzula a tshi rabela na u humbula nga ha nḓila ye Yehova a mu thusa ngayo tshifhingani tsho fhiraho. (1 Sam. 17:37; Ps. 18:2, 6) O vha a tshi zwi ḓivha uri u tea u humbela thuso kha Yehova. Nga zwenezwo, o vhudzisa Yehova uri u fanela u ita mini. Musi Yehova o no mu vhudza zwine a fanela u zwi ita, o ṱavhanya a zwi ita. Zwenezwo zwo ita uri Yehova a fhaṱutshedze ene na vhanna vhe a vha e navho na uri vha kone u tshidza miṱa yavho na u dzhiulula thundu yavho. (1 Sam. 30:7-9, 18, 19) Naa no zwi vhona zwithu zwiraru zwe Davida a zwi ita? O rabela kha Yehova uri a mu thuse, a humbula nga ha nḓila ye a mu thusa ngayo tshifhingani tsho fhiraho na u tevhedza vhulivhisi he Yehova a mu ṋea hone. Riṋe ri nga edzisa hani Davida? Kha ri ambe nga ha nḓila tharu dzine ra nga zwi ita ngayo.

1. Rabelani. Musi ri tshi tou thoma u vhilaela, ri nga humbela Yehova uri a ri thuse na u ri ṋea vhuṱali. Musi ri tshi mu vhudza nga ha zwithu zwoṱhe zwine zwa khou ri vhilaedzisa, zwi ḓo ita uri ri rudze mbilu. Kana ri nga rabelela mbiluni thabelo pfufhi arali hu zwone fhedzi zwine ra nga ita nga tshenetsho tshifhinga. Tshifhinga tshoṱhe musi ri tshi humbela Yehova uri a ri thuse, ri vha ri tshi khou sumbedza uri ri a mu fhulufhela u fana na Davida we a ri: “Yehova ndi tombo ḽanga  ḽihulu, ndi vhushavhelo hanga, ndi mutshidzi wanga. Mudzimu wanga ndi tombo ḽanga, ndi khuda ngae.” (Ps. 18:2) Naa u rabela zwi a thusa? Muṅwe wahashu wa tshifumakadzini wa muvulanḓila ane a pfi Kahlia o ri: “Ndi vha na mulalo musi ndi tshi rabela. Zwi nthusa uri ndi humbule u fana na Yehova na u mu fhulufhela nga ho engedzeaho.” Thabelo ndi tshifhiwa tshi re na maanḓa tshi bvaho kha Yehova, tshine tsha ri thusa u konḓelela musi ri tshi khou vhilaela.

2. Humbulani nga ha nḓila ye Yehova a ni thusa ngayo tshifhingani tsho fhiraho. Musi ni tshi humbula nga ha zwithu zwe zwa itea kha inwi, naa hu na milingo ye Yehova a ni thusa uri ni i konḓelele? Musi ri tshi humbula nga ha nḓila ye Yehova a thusa ngayo riṋe na vhaṅwe vhashumeli vhawe tshifhingani tsho fhiraho, zwi ḓo ita uri ri vhe na mulalo na uri ri fhulufhele Yehova nga ho engedzeaho. (Ps. 18:17-19) Muṅwe muhulwane ane a pfi Joshua o ri: “Ndo ṅwala fhasi thabelo dzanga dzoṱhe dze dza fhindulwa. Zwenezwi zwo ita uri ndi humbule nga ha zwe nda zwi humbela Yehova na zwe a nnyitela zwone.” Musi ri tshi humbula nga ha nḓila dze Yehova a ri thusa ngadzo tshifhingani tsho fhiraho, ri vha na maanḓa a u lwisana na mbilaelo dzashu.

3. Tevhedzani vhulivhisi. Musi ri sa athu u ita phetho, ri tea u ṱoḓa vhulivhisi Ipfini ḽa Mudzimu. (Ps. 19:7, 11) Vhathu vhanzhi vho wanulusa uri musi vha tshi ita ṱhoḓisiso ya luṅwalo lukene, vha kona u vhona uri lwonolo luṅwalo lu nga vha thusa hani. Muṅwe muhulwane ane a pfi Jarrod o ri: “Musi ndi tshi ita ṱhoḓisiso, zwi ita uri ndi gude zwo engedzeaho nga ha luṅwalo na u pfesesa zwine Yehova a ṱoḓa ndi tshi zwi ita. Zwenezwi zwi nthusa uri ndi kone u tenda zwine nda khou zwi vhala na u tevhedza honoho vhulivhisi.” Musi ri tshi ṱoḓa vhulivhisi ha Yehova Ipfini ḽawe na u vhu tevhedza, zwi ḓo ri lelutshela u takala na u vha na mulalo musi ri tshi khou vhilaela.

Davida o vha a tshi zwi ḓivha uri u tea u thuswa nga Yehova uri a kone u konḓelela musi a tshi vhilaela. O livhuwa vhukuma nḓila ye Yehova a mu thusa ngayo lwe a ri: “Maanḓa a Mudzimu a nga nthusa u gonya luvhondo. Mudzimu wa ngoho ndi ene ane a nṋea maanḓa.” (Ps. 18:29, 32) Nga zwiṅwe zwifhinga, ri nga vhona u nga thaidzo dzashu a dzi konḓelelei kana u tandululea. Fhedzi Yehova a nga ri thusa. Musi ri tshi rabela kha Yehova uri a ri thuse, u humbula nga zwoṱhe zwe a ri itela zwone na u tevhedza vhulivhisi hawe, ri nga vha na vhungoho ha uri u ḓo ri ṋea maanḓa na vhuṱali zwine zwa ḓo ri thusa u konḓelela musi ri tshi khou vhilaela.