Ndi ngani musi Yesu a sa athu u fa o amba maipfi a Davida a re kha Phisalema 22:1?

Musi Yesu a sa athu u fa, o amba maipfi a re kha Mateo 27:46 ane a ri: “Mudzimu wanga, Mudzimu wanga, ndi ngani wo nṱutshela?” Musi Yesu a tshi amba zwenezwi ho vha hu tshi khou itea zwo ambiwaho nga Davida kha Phisalema 22:1. (Marko 15:34) Ri ḓo vha ri tshi khou khakha arali ra humbula uri Yesu o amba enea maipfi nga nṱhani ha uri o vha a tshi khou vhona Mudzimu a si tsha mu funa kana ngauri nga tshenetsho tshifhinga o vha a si na lutendo. Yesu o vha a tshi pfesesa uri ndi ngani a tshi tea u fa nahone o vha o ḓiimisela u zwi ita. (Mat. 16:21; 20:28) O vha a tshi ḓivha na uri nga tshenetsho tshifhinga Yehova u ḓo tea u litsha u mu “tsireledza.” (Yobo 1:10) Musi Yehova a tshi litsha u tsireledza Yesu, o vha a tshi khou ṱoḓa uri Yesu a sumbedze uri u ḓo dzula a tshi fhulufhedzea naho a tshi ḓo fa lu vhavhaho.—Marko 14:35, 36.

Ndi ngani Yesu o amba maipfi a re kha yeneyi phisalema? Naho ri sa ḓivhi uri ndi ngani Yesu o amba eneo maipfi, kha ri ambe nga ha zwine zwa nga vha zwo ita uri a a ambe. *

Musi Yesu a tshi amba enea maipfi, khamusi o vha a tshi khou ombedzela uri Yehova a nga si thivhele lufu lwawe. Yesu o vha o tea u fa uri ene muṋe a vhe tshirengululi a sa thusiwi nga Yehova. O vha e muthu wa ṋama nahone a tshi tea u fa uri “a fele vhoṱhe.”—Vhahev. 2:9.

Musi Yesu a tshi amba mafhungo a si gathi kha yeneyi phisalema, khamusi o vha a tshi  khou ṱoḓa uri vhathu vha humbule nga phisalema yoṱhe. Vhayuda nga eneo maḓuvha vho vha vho ḓowela u rwela ngomani vhunzhi ha dziphisalema. Musi vha tshi pfa ndimana nthihi ya phisalema vho vha vha tshi mbo ḓi humbula phisalema yoṱhe yo fhelela. Arali zwi zwone zwe Yesu a vha a tshi ṱoḓa uri vha zwi ite, zwo vha zwi tshi ḓo thusa vhatevheli vhawe vha Vhayuda uri vha humbule vhuporofita vhunzhi vhu re kha yeneyi phisalema vhu ambaho nga zwe zwa vha zwi tshi ḓo itea musi a tshi fa. (Ps. 22:7, 8, 15, 16, 18, 24) Zwiṅwe hafhu, ndimana dza u fhedza dza yeneyi phisalema dzi renda Yehova na u mu ṱalusa uri ndi Khosi ya ḽifhasi ḽoṱhe.—Ps. 22:27-31.

Musi Yesu a tshi amba enea maipfi a Davida, khamusi o vha a tshi khou sumbedza uri ha na mulandu. Musi Yesu a sa athu u vhulawa, khothe ya Sanihedrini yo mu sengisa zwi siho mulayoni nahone ya mu vhona mulandu wa u sema Mudzimu. (Mat. 26:65, 66) Yeneyo khothe ya Sanihedrini yo kuvhangana nga tshihaḓu vhukati ha vhusiku ya mu sengisa zwi siho mulayoni. (Mat. 26:59; Marko 14:56-59) Khamusi Yesu a tshi ri “Mudzimu wanga, Mudzimu wanga, ndi ngani wo nṱutshela?” o vha a tshi khou ita uri vhathu vha ḓivhe uri a hu na tshithu tsho khakheaho tshe a tshi ita tshine tsha ita uri a vhulawe.

Musi Yesu a tshi amba enea maipfi, khamusi o vha a tshi khou sumbedza uri naho Davida, muṅwali wa yeneyi phisalema o tambula, zwo vha zwi sa ambi uri Yehova o vha a sa mu funi. Maipfi a Davida o vha a sa sumbedzi uri ha na lutendo. Musi o no bula eneo maipfi o amba uri o vha a tshi fhulufhela uri Yehova u ḓo tshidza vhathu vhawe na uri u ḓo bvela phanḓa a tshi mu fhaṱutshedza. (Ps. 22:23, 24, 27) Ngauralo, naho Yesu “Murwa wa Davida” o vha a tshi khou pfa vhuṱungu e kha danda, zwo vha zwi sa ambi uri Yehova ha mu takaleli.—Mat. 21:9.

Khamusi Yesu o vha a tshi khou sumbedza uri o ṱungufhala ngauri Yehova o vha o litsha u mu tsireledza uri ene Yesu a sumbedze uri u a fhulufhedzea. Yehova o vha a songo zwi dzudzanya u bva mathomoni uri murwa wawe a tambule nahone a fe. Zwo ṱoḓea musi Adamu na Eva vho no shandukela Mudzimu. Yesu o vha e si na mulandu, fhedzi zwo ṱoḓea uri a tambule na u fa uri a sumbedze uri Saṱhane ndi muzwifhi na uri a ri rengulule kha tshivhi na lufu. (Marko 8:31; 1 Pet. 2:21-24) Zwo vha zwi tshi nga konadzea fhedzi arali Yehova a litshe u tsireledza Yesu lwa tshifhinganyana lwa u tou thoma vhutshiloni hawe.

Khamusi Yesu o vha a tshi khou lingedza u thusa vhatevheli vhawe uri vha humbule uri ndi ngani Yehova o mu litsha a tshi fela kha danda. * Yesu o vha a tshi zwi ḓivha uri vhanzhi vho vha vha tshi ḓo khukhuliswa nga u vhulawa hawe kha danda sa muitazwivhi. (1 Vhakor. 1:23) Arali vhatevheli vhawe vha humbule tshiitisi tsha vhukuma tsha uri a fe, vho vha vha tshi ḓo pfesesa uri zwo vha zwi zwa ndeme uri a fe. (Vhagal. 3:13, 14) Vho vha vha tshi ḓo zwi ḓivha uri ndi Mutshidzi wavho, hu si mutshinyi.

Hu sa londwi uri ndi ngani Yesu o amba enea maipfi, o vha a tshi zwi ḓivha uri musi a tshi fela kha danda, o vha a tshi khou ita zwine Mudzimu a zwi funa. Musi Yesu a tshi kha ḓi bva u amba maipfi a re kha phisalema, o ri: “Zwo itea.” (Yoh. 19:30; Luka 22:37) Yesu o kona u ita zwithu zwoṱhe zwe a vha o ḓela zwone kha ḽifhasi nge Yehova a litsha u mu thusa lwa tshifhinganyana. Zwo ita uri a kone u ita zwoṱhe zwe zwa vha zwo ambiwa kha “Mulayo wa Mushe na kha maṅwalo a Vhaporofita na kha Dziphisalema.”—Luka 24:44.