THERO I GUDWAHO 14
Naa Ni Khou Shumela Mudzimu Nga Vhuḓalo?
“Ita mushumo wa muevangeli, khunyeledza vhuḓinḓa hau nga vhuḓalo.”—2 TIM. 4:5.
LUIMBO 57 U Huwelela Kha Vhathu Vha Mifuda Yoṱhe
MANWELEDZO *
Nga murahu ha musi Yesu a tshi vuswa, o ṱangana na vhafunziwa vhawe nahone a vha laedza uri ‘iyani ni ite vhafunziwa’ (Sedzani phara 1)
1. Ndi mini zwine vhashumeli vhoṱhe vha Mudzimu vha ṱoḓa u zwi ita nahone ndi ngani? (Sedzani tshifanyiso tshi re kha gwati.)
KRISTO YESU o vhudza vhatevheli vhawe uri “iyani ni ite vhathu vha tshaka dzoṱhe vhafunziwa.” (Mat. 28:19) Vhashumeli vhoṱhe vha Mudzimu vha fulufhedzeaho vha ṱoḓa u guda nḓila ya u “khunyeledza” wonoyu mushumo wa u huwelela we vha ṋewa wone. (2 Tim. 4:5) Ngoho ndi ya uri a hu na mushumo une wa vha wa ndeme, une wa takadza na wo ṱavhanyiswaho u fhira wonoyu. Naho zwo ralo, zwi nga vha khaedu u fhedza tshifhinga tshine ra nga takalela u tshi fhedza vhuḓinḓani.
2. Ndi khaedu dzifhio dzine ra sedzana nadzo musi ri tshi khou shumela Mudzimu?
2 Hu na miṅwe mishumo ya ndeme ine ra i ita ine ya ṱoḓa tshifhinga na nungo dzashu. Ri nga vha ri tshi shuma awara nnzhi mushumoni wa u ḓitshidza u itela u ṱunḓela miṱa yashu. Zwi nga vha zwi tshi ri konḓela u hwala vhuḓifhinduleli vhune ra vha naho muṱani, ri na mutakalo u si wavhuḓi, ri tshi ḓipfa ro tsikeledzea kana ri na thaidzo dzine dza ḓiswa nga u vha mulala. Ri nga shumela hani Mudzimu nga vhuḓalo hu sa londwi honoho vhuimo vhu konḓaho vhune ra khou sedzana naho?
3. Ri guda mini kha maipfi a Yesu a re kha Mateo 13:23?
3 A ro ngo fanela u kulea nungo arali vhuimo hashu vhu sa ri tendeli uri ri fhedze tshifhinga tshinzhi ri tshi khou shumela Yehova. Yesu o vha a tshi zwi ḓivha uri ri nga si aṋwe mitshelo nga nḓila i fanaho tshumeloni ya Mudzimu. (Vhalani Mateo 13:23.) Yehova u dzhiela nṱha zwoṱhe zwine ra zwi ita tshumeloni yawe, tenda ri tshi zwi ita zwi tshi bva mbiluni. (Vhaheb. 6:10-12) Kha ḽiṅwe sia, ri nga pfa u nga vhuimo hashu vhu nga ri tendela u ita zwo engedzeaho. Kha ino thero, ri ḓo ṱolisisa nḓila ya u ita uri u huwelela zwi ḓe u thoma vhutshiloni hashu, u leludza vhutshilo na nḓila ine ra nga khwinisa ngayo vhutsila hashu ha u huwelela na u funza. Kha ri thome nga u ṱolisisa zwine u shumela Mudzimu nga vhuḓalo zwa amba zwone!
4. Zwi amba mini u shumela Mudzimu nga vhuḓalo?
4 U itela u khunyeledza vhuḓinḓa hashu nga vhuḓalo, ri fanela u shela mulenzhe kha mushumo washu wa u huwelela na u funza nga hune zwa nga konadzea ngaho. Naho zwo ralo, a hu ṱoḓei tshifhinga fhedzi. Tshiitisi tshashu tsha u huwelela ndi tsha ndeme kha Yehova. Nga nṱhani ha uri ri funa Yehova na vhahura vhashu, ri shumela Mudzimu nga vhuḓalo. * (Marko 12:30, 31; Vhakol. 3:23) U shumela Mudzimu nga mbilu yoṱhe zwi amba u ḓiṋekedzela na u shumisa nungo dzashu u itela u ita zwoṱhe zwine ra nga kona tshumeloni yawe. Musi ri tshi dzhiela nṱha ndugelo ine ra vha nayo ya u huwelela, ri ḓo ita zwoṱhe zwine ra nga kona u itela u vhudza vhathu vhanzhi mafhungo maḓifha nga hune zwa nga konadzea ngaho.
5-6. Ṋeani tsumbo ya nḓila ine muthu ane a si vhe na tshifhinga tshinzhi a nga ita ngayo uri u huwelela zwi ḓe u thoma vhutshiloni hawe.
5 Vhonani nga maṱo a muhumbulo munna ane a kha ḓivha muswa ane a takalela u lidza kaṱara. U takalela u lidza kaṱara musi a tshi wana tshifhinga. Nga u ya ha tshifhinga, u wana mushumo wa u lidza kaṱara khifini nga mafhelo a vhege. Naho zwo ralo, u lidza kaṱara a zwi vali tshinyalelo dzawe dzoṱhe. Nga zwenezwo, u shuma u badelisa kha vhengele ḽa u rengisa zwiḽiwa u bva nga Musumbuluwo u swika nga Ḽavhuṱanu. Naho a tshi fhedza tshifhinga tshinzhi e vhengeleni, mbilu yawe i kha muzika. U ṱoḓa u khwinisa vhutsila hawe na u vha ramuzika wa tshifhinga tshoṱhe. Naho zwo ralo, u ṱoḓa tshibuli tshiṅwe na tshiṅwe tshine a nga tshi wana u itela u lidza naho hu zwa tshifhinganyana.
6 Nga nḓila i fanaho, naho ni tshi takalela u huwelela, ni nga vha ni tshi kundelwa u fhedza tshifhinga tshinzhi kha mushumo wa u huwelela. Ni lwela u khwinisa vhutsila haṋu ha u swikelela mbilu dza vhathu nga mafhungo maḓifha. Nga nṱhani ha uri ni na zwithu zwinzhi zwine na funa u zwi ita, ni nga ḓivhudzisa uri ni nga ita hani uri u huwelela hu ḓe u thoma vhutshiloni haṋu.
NḒILA YA U ITA URI U HUWELELA ZWI ḒE U THOMA
7-8. Ri nga edzisa hani mavhonele e Yesu a vha e nao nga ha mushumo wa u huwelela?
7 Yesu o vhea tsumbo i swayeaho nga nḓila ye a vha a tshi dzhia ngayo mushumo wa u huwelela. O ita uri u amba nga ha Muvhuso wa Mudzimu zwi ḓe u thoma vhutshiloni hawe. (Yoh. 4:34, 35) O tshimbila khilomithara dza maḓana u itela u swikelela vhathu vhanzhi nga hune zwa nga konadzea ngaho. O vha a tshi dzulela u ṱoḓa zwibuli zwa u amba na vhathu fhethu ha vho muthumunzhi na mahayani avho. U huwelela zwo vha zwi tsha ḓa u thoma vhutshiloni ha Yesu.
8 Ri nga edzisa Kristo nga u ṱoḓa nḓila dzine ra nga huwelela ngadzo musi hu tshi vulea tshibuli. Ro ḓiimisela u ḓidzima zwiṅwe zwithu zwine ra zwi ṱoḓa u itela u huwelela. (Marko 6:31-34; 1 Pet. 2:21) Vhuimo ha vhaṅwe tshivhidzoni hu vha tendela uri vha shume sa vhavulanḓila vho khetheaho, vha tshifhinga tsho ḓalaho kana vha u thusa. Vhaṅwe vho guda luṅwe luambo kana u pfulutshela hu re na ṱhoḓea khulwane ya vhahuweleli. Naho zwo ralo, mushumo munzhi wa u huwelela u itwa nga vhahuweleli vhane vha ita zwoṱhe zwine vha nga kona naho vha sa koni u ita mishumo yo bulwaho afho nṱha. Hu sa londwi uri ri ita zwifhio, Yehova ha ri humbeli uri ri ite zwithu zwine ri si kone u zwi ita. U ṱoḓa roṱhe ri tshi ḓifhelwa kha tshumelo yawe khethwa samusi ri tshi khou ḓivhadza “mafhungo maḓifha a vhugala a Mudzimu o takalaho.”—1 Tim. 1:11; Doit. 30:11.
9. (a) Paulo o ita hani uri u huwelela zwi ḓe u thoma vhutshiloni hawe naho o vha a tshi tea u ita mushumo wa u ḓitshidza? (b) U ya nga Mishumo 28:16, 30, 31, Paulo o vha a tshi dzhia hani mushumo wa u huwelela?
9 Muapostola Paulo o vhea tsumbo yavhuḓi ya u ita uri vhuḓinḓa vhu ḓe u thoma vhutshiloni hawe. Musi e kha lwendo lwawe lwa vhuvhili lwa vhurumiwa ngei Korinta, o vha e na tshelede ṱhukhu nahone a tshi tea u luka madennde. Naho zwo ralo, wonoyo mushumo wo vha u sa ḓi u thoma kha Paulo. O ita wonoyo mushumo u itela u ḓitshidza musi e kha mushumo wa u huwelela uri a kone u huwelela kha Vhakorinta vha songo ‘bvisa tshithu.’ (2 Vhakor. 11:7) Naho Paulo o vha a tshi tea u shuma mushumo wa u ḓitshidza, o bvela phanḓa a tshi ita uri u huwelela zwi ḓe u thoma vhutshiloni hawe nahone o vha a tshi funza nga Sabatha iṅwe na iṅwe. Musi zwiimo zwawe zwi tshi mu tendela u ita zwo engedzeaho, o kona u livhisa ṱhogomelo kha mushumo wa u huwelela nga ho engedzeaho. O “thoma u farekanea vhukuma nga u huwelela ipfi, a tshi ṱanziela kha Vhayuda u itela u vha sumbedza uri Yesu ndi Kristo.” (Mish. 18:3-5; 2 Vhakor. 11:9) Musi Paulo o valelwa nḓuni ngei Roma lwa miṅwaha mivhili, o vha a tshi huwelela kha vhane vha mu dalela nahone a tshi ṅwala na marifhi. (Vhalani Mishumo 28:16, 30, 31.) Paulo o vha o ḓiimisela uri a si tendele na tshithu na tshithihi tshi tshi vha tsha ndeme u fhira mushumo wa u huwelela. O ri: “Samusi ri na vhuḓinḓa honovhu . . . , a ri neti.” (2 Vhakor. 4:1) U fana na Paulo, naho ri tshi tea u fhedza tshifhinga tshinzhi mushumoni wa u ḓitshidza, ri nga ita uri u huwelela zwi ḓe u thoma vhutshiloni hashu.
Hu na nḓila nnzhi dzine ra nga khunyeledza ngadzo vhuḓinda hashu nga vhuḓalo (Sedzani dziphara 10-11)
10-11. Ri nga shumela hani Mudzimu nga vhuḓalo hu sa londwi thaidzo dza mutakalo?
10 Arali ri sa koni u ya nnḓu nga nnḓu nga nṱhani ha u vha mulala kana u vha na mutakalo u si wavhuḓi, ri nga shumisa dziṅwe nḓila u itela u huwelela. Vhaṅwe Vhakriste vha ḓanani ḽa u thoma vho huwelela huṅwe na huṅwe he vha wana vhathu. Vho vha vha tshi huwelela nnḓu nga nnḓu, fhethu ha vhomuthumunzhi na u huwelela lu songo dzudzanywaho na kha vhathu vhane vha “ṱangana navho ngei makete.” (Mish. 17:17; 20:20) Arali ri sa koni u tshimbila tshikhala tshilapfu, ri nga dzula fhethu ha vhomuthumunzhi nahone ra huwelela kha vhathu vhane vha khou fhira. Kana ri nga huwelela lu songo dzudzanywaho, u ṅwala marifhi kana u huwelela nga luṱingo. Vhahuweleli vhanzhi vha sa koni u huwelela nnḓu nga nnḓu nga nṱhani ha mutakalo u si wavhuḓi kana dziṅwe thaidzo vha nga takala musi vha tshi shumisa dziṅwe nḓila dza u huwelela.
11 Ni nga shumela Mudzimu nga vhuḓalo hu sa londwi thaidzo dza mutakalo. Kha ri dovhe ri ṱolisise tsumbo ya muapostola Paulo. O ri: “Ngauri zwithu zwoṱhe ndi zwi koniswa nga ane a nṋea maanḓa.” (Vhafil. 4:13) Musi Paulo e kha lwendo lwawe lwa vhurumiwa o vha a tshi ṱoḓa eneo maanḓa musi a tshi khou lwala. O ṱalutshedza Vhagalata uri: “Ndi vhulwadze he ha nṋea tshibuli lwa u thoma tsha uri ndi ni ḓivhadze mafhungo maḓifha.” (Vhagal. 4:13) Nga hu fanaho, thaidzo dza mutakalo dzi nga ni vulela tshibuli tsha u huwelela kha madokotela, manese na vhane vha khou ni ṱhogomela. Vhunzhi ha vhenevho vhathu vha vha vhe mushumoni musi vhahuweleli vha tshi ya miḓini yavho.
NḒILA YA U LELUDZA VHUTSHILO
12. U vha na ḽiṱo ḽo ‘tshaho’ zwi amba mini?
12 Yesu o ri: “Luvhone lwa muvhili ndi ḽiṱo. Arali ḽiṱo ḽau ḽo tsha, na muvhili wau woṱhe u ḓo vha wa tshedza.” (Mat. 6:22) O vha a tshi khou amba uri mini? O vha a tshi khou amba uri ri fanela u livhisa ṱhogomelo kha tshipikwa tshithihi nahone ri songo khakhiswa khatsho. Yesu o ri vhetshela tsumbo nga u livhisa ṱhogomelo kha u shumela Mudzimu nahone o funza vhafunziwa vhawe uri vha bvele phanḓa vha tshi shumela Yehova na u livhisa ṱhogomelo kha Muvhuso wawe. Ri edzisa Yesu nga u ita uri mushumo wa u huwelela u ḓe u thoma vhutshiloni hashu na nga u “ṱoḓa Muvhuso wa Mudzimu na u luga hawe u thoma.”—Mat. 6:33.
13. Ndi mini zwine zwa nga ri thusa u livhisa ṱhogomelo kha vhuḓinḓa hashu?
13 Iṅwe nḓila ine ra nga livhisa ngayo ṱhogomelo kha vhuḓinḓa hashu ndi u leludza vhutshilo uri ri kone u fhedza tshifhinga tshinzhi ri tshi khou thusa vhaṅwe uri vha ḓivhe na u funa Yehova. * Sa tsumbo, naa ri nga fhungudza tshifhinga tshine ra tshi fhedza ri kha mushumo washu wa u ḓitshidza uri ri kone u fhedza tshifhinga tsho engedzeaho ri vhuḓinḓani vhukati ha vhege? Naa ri nga fhungudza tshifhinga tshine ra tshi fhedza ri tshi khou ḓimvumvusa?
14. Ndi tshanduko dzifhio dze dza itwa nga vhaṅwe vhavhingani uri vha kone u livhisa ṱhogomelo na u fhedza tshifhinga tsho engedzeaho vhuḓinḓani?
14 Zwenezwi ndi zwe zwa itwa nga muhulwane wa tshivhidzo ane a pfi Elias na mufumakadzi wawe. O ri: “Vhuimo hashu ho vha hu sa ri tendeli u vha vhavulanḓila, fhedzi ho vha hu na zwiṅwe zwe ra vha ri tshi nga zwi ita u itela u fhedza tshifhinga tsho engedzeaho ri tshi khou huwelela. Nga zwiṱuku nga zwiṱuku, ro thoma u fhedza tshifhinga tsho engedzeaho vhuḓinḓani. Sa tsumbo, ro thoma u sa shumisesa tshelede. Ro fhungudza tshifhinga tshe ra vha ri tshi tshi fhedza kha vhuḓimvumvusi nahone ra humbela vhane ra shuma khavho uri vha fhungudze tshifhinga tsha u shuma uri ri kone u fhedza tshifhinga tshinzhi ri tshi khou huwelela. Nga nṱhani ha zwenezwo, ro vha ri tshi kona u huwelela nga madekwana, u fara pfunzo nnzhi dza Bivhili na u huwelela vhukati ha vhege luvhili nga ṅwedzi nahone zwenezwo zwo ita uri ri takale.”
NḒILA YA U KHWINISA VHUTSILA HA U HUWELELA NA U FUNZA
U shumisa zwine ra guda miṱanganoni ya vhukati ha vhege zwi ḓo ri thusa u ri ri bvele phanḓa ri tshi khwinisa nḓila ine ra huwelela na u funza ngayo (Sedzani dziphara 15-16) *
15-16. U ya nga 1 Timotheo 4:13, 15, ri nga khwinisa hani vhutsila hashu ha u huwelela? (Sedzani bogisi “ Zwipikwa Zwine Zwa Ḓo Nthusa U Khunyeledza Vhuḓinḓa Hanga Nga Vhuḓalo.”)
15 Iṅwe nḓila ya u khunyeledza vhuḓinḓa hashu nga vhuḓalo ndi nga u khwinisa vhutsila hashu ha u huwelela. Vhathu kha miṅwe mishumo ya u ḓitshidza vha fanela u dzula vha tshi khou gudiswa u itela uri vha kone u ḓivha na u vha na vhutsila ho engedzeaho. Zwo tou ralo na nga vhahuweleli vha Muvhuso wa Mudzimu. Ri fanela u bvela phanḓa ri tshi guda nḓila ine ra nga khwinisa ngayo vhutsila hashu vhuḓinḓani.—Mir. 1:5; vhalani 1 Timotheo 4:13, 15.
16 Naho zwo ralo, ri nga ita hani mvelaphanḓa vhuḓinḓani hashu? Nga u livhisa ṱhogomelo kha vhulivhisi vhune ra vhu wana kha Muṱangano Wa Vhutshilo Na Vhuḓinḓa wa vhege iṅwe na iṅwe. Wonoyu muṱangano uri gudisa uri ri khwinise vhutsila hashu vhuḓinḓani. Sa tsumbo, musi mudzulatshidulo a tshi ṋea nyeletshedzo vhe vha ṋea nyambo dza vhagudiswa, ri nga guda zwithu zwine zwa nga ri thusa uri ri khwinise nḓila ine ra huwelela ngayo. Ri nga shumisa zwenezwo musi ri tshi ya u huwelela tshifhingani tshi ḓaho. Ri nga humbela mulavhelesi wa tshigwada tshashu tsha tsimu uri a ri thuse kana uri a shume na riṋe tsimuni kana ra shuma na muhuweleli a re na tshenzhelo, muvulanḓila kana mulavhelesi wa ḽiisela. Musi ri tshi shumisa nga vhutsila tshishumiswa tshiṅwe na tshiṅwe tshi re kha Bogisi Ḽa Zwishumiswa Zwa U Funza, ri ḓo ḓiphina vhukuma musi ri tshi huwelela na u funza.
17. Ni ḓo ḓipfa hani musi ni tshi khunyeledza vhuḓinḓa haṋu nga vhuḓalo?
17 Ndi ndugelo khulwane vhukuma u vha “vhashumisani na Mudzimu.” (1 Vhakor. 3:9) Musi ni tshi ‘ṱhogomela zwithu zwa ndeme vhukuma’ na u livhisa ṱhogomelo kha u shumela Mudzimu ni ḓo ‘luvha Yehova nó takala.’ (Vhafil. 1:10; Ps. 100:2) Ri nga vha na vhungoho ha uri Mudzimu u ḓo ri ṋea maanḓa u itela u khunyeledza vhuḓinḓa hashu hu sa londwi khaedu dzine ra nga sedzana nadzo samusi ri vhaḓinḓa vhawe. (2 Vhakor. 4:1, 7; 6:4) Hu sa londwi uri vhuimo haṋu vhu ni tendela uri ni huwelele tshifhinga tshingafhani, musi ni tshi huwelela nga hune na nga kona ngaho, ni nga vha na “tshiitisi tsha u takala.” (Vhagal. 6:4) Musi ni tshi khunyeledza vhuḓinḓa haṋu nga vhuḓalo, ni vha ni tshi khou sumbedza uri ni funa Yehova na vhathu. ‘Nga u ita zwenezwo ni ḓo ḓitshidza nahone na tshidza na vhane vha ni thetshelesa.’—1 Tim. 4:16.
LUIMBO 58 U Ṱoḓa Vha Funaho Mulalo
^ phar. 5 Yesu o ri vhudza uri ri huwelele mafhungo maḓifha a Muvhuso wa Mudzimu na u ita vhafunziwa. Ino thero i ḓo ṱolisisa nḓila ine ra nga shumela ngayo Mudzimu nga vhuḓalo hu sa londwi thaidzo dzine ra nga sedzana nadzo. Ri ḓo dovha ra guda nḓila ya khwine ine ra nga huwelela ngayo na u wana dakalo musi ri tshi khou ita wonoyu mushumo.
^ phar. 4 ṰHALUTSHEDZELO YA MAIPFI: U shumela Mudzimu zwi katela u huwelela na u funza, u fhaṱa na u vusulusa zwifhaṱo zwa ndangulo na u thusa vho welwaho nga khombo.—2 Vhakor. 5:18, 19; 8:4.
^ phar. 13 Sedzani nḓila dza sumbe dzine dza wanala kha bogisi “Nḓila Ine Na Nga Leludza Ngayo Vhutshilo Haṋu” kha Tshiingamo tsha July 2016, siaṱ. 10.
^ phar. 62 ṰHALUSO YA TSHIFANYISO: Wahashu wa tshifumakadzini a tshi khou ita nyambo ya lwendo lwa u vhuyelela kha muṱangano wa vhukati ha vhege. Nga murahu, u nwala fhasi kha bugwana U Funza nyeletshedzo ine a khou ṋewa nga mudzulatshidulo. Musi e vhuḓinḓani nga mafhelo a vhege, u shumisa zwe a zwi guda miṱanganoni.
