1, 2. (a) Elifasi na Bilidada vho ri mini nga ha nḓila ine Mudzimu a dzhia ngayo u mu shumela hashu? (b) Yehova o sumbedza hani nḓila ine a ḓipfa ngayo?

“NAA Mudzimu u na mushumo na muthu? Naa u a vhuyelwa nga muthu a re na ṱhalukanyo? Naa Ramaanḓaoṱhe u a zwi londa uri wo luga, kana naa u a vhuyelwa nga nṱhani ha uri iwe u a fulufhedzea?” (Yobo 22:1-3, NW.) Naa no no vhuya na humbula nga ha phindulo dza dzenedzi mbudziso? Musi Elifasi wa Themani a tshi vhudzisa Yobo zwenezwo, Elifasi o vha a sa timatimi uri phindulo ndi hai. Khonani yawe Bilidada wa Sua o amba uri a zwi konadzei uri muthu a vhe o lugaho phanḓa ha Mudzimu.—Vhalani Yobo 25:4.

² Elifasi na Bilidada vho lingedza u ita uri Yobo a vhone u nga Yehova ha dzhieli nṱha u mu shumela hawe nga u fulufhedzea, vho vha vha tshi ṱoḓa uri a tende uri a ri vha ndeme u fhira tsole na mbungu. (Yobo 4:19; 25:6) Mathomoni, ri nga phetha nga ḽa uri Elifasi na Bilidada vho vha vha tshi khou sumbedza muya wa u ḓiṱukufhadza. (Yobo 22:29) Naho zwo ralo, musi ri nṱha ha thavha kana ri kha bufho, ri nga vhona zwithu zwi re fhasi zwi zwiṱuku nahone zwi si zwa ndeme. Naho zwo ralo, naa yeneyo ndi nḓila ine Yehova a vhona ngayo tshumelo yashu musi a tshi ri sedza e  ṱaḓulu? Yehova o sumbedza nḓila ine a ḓipfa ngayo musi a tshi kaidza Elifasi, Bilidada na Tsofari nge vha amba mazwifhi nahone o amba uri u takalela Yobo nahone o mu vhidza “mulanda wanga.” (Yobo 42:7, 8) Nga zwenezwo, “Mudzimu u na mushumo na muthu.”

3. Elihu o ri mini nga ha tshumelo yashu kha Yehova, nahone o vha a tshi khou amba uri mini?

³ Elihu ho ngo kaidzwa nga Yehova musi a tshi vhudzisa uri: “[Arali] Ú mulugi, U mu ṋea ’ni [Mudzimu]? [Mudzimu] u ṱanganedza mini tshi bvaho tshanḓani tshau?” (Yobo 35:7) Naa Elihu o vha a tshi khou amba uri u shumela hashu Mudzimu ndi mahandana? Hai. O vha a tshi khou amba uri Yehova ha ḓitiki nga vhurabeli hashu. Yehova o fhelela. Ri nga si kone u ita uri a pfume kana a vhe na maanḓa. Zwo fhambanaho na zwenezwo, pfaneleo dzavhuḓi dzine ra vha nadzo, vhutsila kana nungo zwi bva ha Mudzimu nahone u ṱhogomela nḓila ine ra zwi shumisa ngayo.

4. Yehova u ḓipfa hani musi ri tshi sumbedza vhaṅwe tshilidzi?

⁴ Musi ri tshi funa vhaṅwe, Yehova u zwi dzhia ri tshi khou itela ene. Mirero 19:17 i ri: “Mu-tonda-vhaṱoma o adzima Yehova; u ḓo mu fha zwe a ṋea vhaḽa.” Naa lwonolu luṅwalo lu amba uri tshifhinga tshoṱhe Yehova u a ṱhogomela musi ri tshi sumbedza vhaṅwe tshilidzi? Naa ri nga phetha nga ḽa uri Musiki wa fhethu hoṱhe u ṱoḓa uri ri sumbedze vhaṅwe tshilidzi uri a kone u ri fhaṱutshedza? Ee, Yesu Murwa wa Mudzimu o tendelana nazwo.—Vhalani Luka 14:13, 14.

5. Ndi mbudziso dzifhio dzine ra ḓo haseledza nga hadzo?

⁵ Yehova o vhudza muporofita Yesaya uri a vhe muambeli wawe, zwenezwi zwo vha zwi tshi sumbedza uri u ṱoḓa vhathu vha fulufhedzeaho vha tshi shela mulenzhe kha u ḓadzisa ndivho yawe. (Yes. 6:8-10) Yesaya o tenda u ita nga u ralo. Ṋamusi, vhathu vhanzhi vha sumbedza zwi fanaho nga u ṱanganedza mushumo u konḓaho tshumeloni ya Yehova nahone vha amba uri, “Ndi nṋe, nthume.” Naho zwo ralo, muthu a nga amba uri: ‘Ndi a dzhiela nṱha vhukuma ndugelo ya u shumela Yehova nga u ḓifunela, fhedzi naa vhuḓidini vhune nda vhu ita ndi ha ndeme? Hu sa londwi uri ndi hone kana a thi ho, naa Yehova a nga si ite vhungoho ha uri mushumo wawe u bvelele?’ Kha ri ṱolisise tsumbo ya Debora na Baraka vhashumeli vha Yehova vha tshifhingani tsho fhiraho nahone ri vhone nḓila ine ra nga fhindula ngayo dzenedzo mbudziso.

6. Ndi ifhio phambano ye ya vha i hone vhukati ha Vhaisiraele na mmbi ya Yabini?

⁶ Yabini Khosi ya Kanana o “ṱhupha” Vhaisiraele lwa miṅwaha ya 20. Vhaisiraele vho vha vha tshi ofha u bva mahayani avho. Vhaisiraele vho vha vhe si na zwihali zwo teaho zwa u lwa kana zwithu zwine zwa nga vha tsireledza, ngeno mmbi ya Yabini yo vha i na zwihali na dzigoloi dza nndwa dza 900 dze dza vha dzi na zwihali zwa tsimbi.—Vhahaṱ. 4:1-3, 13; 5:6-8. *

7, 8. (a) Yehova o ṋea Baraka vhulivhisi vhufhio? (b) Vhaisiraele vho kunda hani mmbi ya Yabini? (Sedzani tshifanyiso tsha u thoma.)

⁷ Naho zwo ralo, Yehova o shumisa Debora muporofita wa musadzi uri a vhudze Baraka uri: “Tshimbila U gonye thavha ya Thaboro u ye na vhanna vha ná maḓana a ná ḓana vha Vha-Sebuloni na Vha-Nafutali! Ndi kone u ḓisa Sisera nduna ya Yabini ha iwe, a ḓe mulamboni wa Kisoni, a ḓe na dzigoloi dzawe, uri ndi mu kumedzele zwanḓani zwau.”—Vhahaṱ. 4:4-7.

 ⁸ Zwenezwo zwo phaḓalala. Vhanna vha 10 000 vho kuvhangana Thavhani ya Thaboro. Baraka o ṱavhanya a ita zwe Yehova a mu vhudza zwone. (Vhalani Vhahaṱuli 4:14-16.) Musi hu tshi khou lwiwa ngei Thaanake, ho thoma u na mvula khulu nahone fhethu hoṱhe ha ḓala matope. Baraka o gidima khilomithara dza 24 a tshi khou pandamedza mmbi ya Sisera a i swikisa Harosethe. Musi vha tshi khou shavha, Sisera o tsa kha goloi yawe ye ya vha yo phirimela matopeni nahone a shavhela Tsaananimi hune khamusi ha vha tsini na Kedese. Sisera o humbela Yaele mufumakadzi wa Habere wa Mukeni uri a mu dzumbe denndeni ḽawe nahone Yaele a mu dzumba. Sisera o vha o neta nahone a eḓela. Musi Sisera o eḓela, nga tshivhindi Yaele o mu vhulaha. (Vhahaṱ. 4:17-21) Maswina a Vhaisiraele o vha o kundwa! *

9. Ndi zwidodombedzwa zwifhio zwe zwa sumbedzwa kha Vhahaṱuli 5:20, 21 zwa nḓila ye Sisera a kundwa ngayo?

⁹ Vhahaṱuli ndima ya 4 na 5 dzi fanela u gudwa dzoṱhe khathihi, ngauri ndima iṅwe na iṅwe i na zwidodombedzwa zwi siho kha iṅwe. Sa tsumbo, Vhahaṱuli 5:20, 21 i ri: “Dziṋaledzi ṱaḓulu dzo bva pfumo, dzo lwa na Sisera dzi nḓilani dzadzo. Vha kumbiwa nga kudambo kwa Kisoni.” Naa zwenezwi zwi sumbedza uri Vhaisiraele vho thuswa nga vharuṅwa kana vho thuswa nga mvula? Bivhili a i zwi ambi. Fhedzi zwi a pfala u humbula uri Yehova o tshidza vhathu vhawe nga u ṋisa mvula khulu henefho fhethu nga tshenetsho tshifhinga u itela uri goloi dza nndwa dza 900 dzi phirimele. Vhahaṱuli 4:14, 15 yo sumbedza luraru lwoṱhe uri Yehova o thusa Vhaisiraele uri vha kunde. Vhanna vha 10 000 vha Vhaisiraele a vho ngo kunda nga maanḓa avho.

10, 11. “Merosi” ho vha hu mini, nahone ndi ngani wo semiwa?

¹⁰ Zwi mangadzaho ndi uri musi Vhaisiraele vho kunda, Debora na Baraka vho renda Yehova nga nyimbo, vha imba vha ri: “Semani Merosi! U ralo muḓinḓa wa Yehova. Semani ni seme vhe vha fhaṱa hone, nga u vha si ḓe vha lwela Yehova, vha si mu phalalele na vhahali.”—Vhahaṱ. 5:23.

¹¹ Merosi o semiwa nahone zwi a konḓa u ḓivha uri Merosi ho vha hu mini. Naa Merosi ho vha hu muḓi we vhadzulapo vhawo vha hana u ya nndwani na Baraka? Khamusi Merosi ho vha hu muḓi we Sisera a pfuka khawo musi a tshi khou shavha Baraka? Naa zwi nga vha zwo itea uri a vho ngo pfa uri Yehova u ṱoḓa vhathu vha tshi ya nndwani? Vhanna vha 10 000 vha bvaho fhethu ho fhamba-fhambanaho, vho ya u lwa na Vhakanana nga u ḓifunela. Edzani u vhona nga maṱo a muhumbulo vhadzulapo vha Merosi vha tshi khou vhona swole ḽa muhali ḽi ḓivheaho vhukuma ḽi tshi khou pfuka wonoyo muḓi ḽi ḽoṱhe ḽi tshi khou shavha u itela u tsireledza vhutshilo haḽo. Vhadzulapo vha Merosi vho vha vhe na tshibuli tsha u tikedza ndivho ya Yehova nahone vho vha vha tshi ḓo wana phaṱhutshedzo. Naho zwo ralo, musi vhe na tshibuli tsha u itela Yehova zwiṅwe zwithu, a vho ngo zwi ita. Vhadzulapo vha Merosi vho vha vho fhambana vhukuma na Yaele ngauri o vha e na tshivhindi!—Vhahaṱ. 5:24-27.

12. Kha Vhahaṱuli 5:9, 10, vhathu vho vha vhe na mavhonele afhio a sa fani, nahone zwi fanela u ri kwama hani ṋamusi?

¹² Kha Vhahaṱuli 5:9, 10, ri vhona uri hu na phambano vhukati ha mavhonele a vhathu vhe vha ya nndwani na Baraka na mavhonele a vhathu vhe vha si ye. Debora na Baraka vho khoḓa “vhahali vha Vha-Israele, vhathu vhe vha ḓi-ramba.” Vho vha vho fhambana  vhukuma na ‘vhagonyi vha mbongola tshena’ vhe vha vha vha tshi ḓikukumusa vhukuma na vhe vha vha vha tshi funesa vhutshilo ha maṱhakheni, vhe vha vha vho “dzula kha dzithovho.” Vhathu vhe vha vha vha tshi khou tshimbila nḓilani, vho vha vha tshi funesa vhutshilo ho leluwaho ngeno vhathu vhe vha ya nndwani na Baraka vho vha vho ḓiimisela u tshimbila thavhani ya Thaboro ye ya vha i na matombo na u tshimbila muedzini wa ngei Kisoni we wa vha u na matope! Vhenevho vhathu vhe vha vha vha tshi funa vhutshilo ho leluwaho, vho vhudzwa uri “imbani!” Vho vha vha tshi fanela u elekanya nga ha tshibuli tshe vha vha vhe natsho tsha u ita mushumo wa Yehova. Na riṋe ṋamusi ri fanela u ṱolisisa mavhonele ashu a nḓila ine ra shumela ngayo Mudzimu.

13. Mavhonele a lushaka lwa Rubeni, Dani na Asere, o vha o fhamba hani na mavhonele a Sebuloni na Nafutali?

¹³ Vhathu vhe vha ya nndwani vho vhona vhuhulwane ha Yehova. Vho vha vha tshi vho kona u vhudza vhaṅwe zwe vha zwi vhona musi vha tshi amba nga ha “zwivhuya zwa Yehova.” (Vhahaṱ. 5:11) Kha ḽiṅwe sia, vhathu vha lushaka lwa Rubeni, Dani na Asere vho vha vha tshi livhisa ṱhogomelo kha lupfumo lwavho, zwithu zwi fanaho na masambi avho, nngu na vhuimazwikepe havho u fhira u shumela Yehova. (Vhahaṱ. 5:15-17) Fhedzi vhathu vha lushaka lwa Sebuloni na Nafutali vho vhea vhutshilo havho khomboni u itela u tikedza Debora na Baraka. (Vhahaṱ. 5:18) Ri nga guda ngudo ya ndeme vhukuma kha mavhonele a vhenevha vhathu.

14. Ri sumbedza hani uri ri tikedza vhuvhusahoṱhe ha Yehova ṋamusi?

¹⁴ Ṋamusi a ri ṱuṱuwedzwi uri ri dzhenele dzinndwa, fhedzi ri na ndugelo ya u sumbedza u fhisea kha mushumo washu wa u huwelela. Hu na ṱhoḓea khulwane ya vhashumi vha u ḓifunela ndanguloni ya Yehova u fhira naho hu lini. Vhahashu vhanzhi u katela na vhaswa, vha shuma nga u ḓifunela tshumeloni dzo fhamba-fhambanaho dza tshifhinga tsho ḓalaho dzi ngaho, u vula nḓila,  u vha muraḓo wa Bethele, u fhaṱa Holo dza Muvhuso na u shuma maguvhanganoni na mabuthanoni. Humbulani nga ha vhahulwane vhane vha hwala vhuḓifhunduleli ha Komiti ya Vhulamukanyi ha Vhuongelo na vhadzudzanyi vha buthano. Ivhani na vhungoho ha uri Yehova u dzhiela nṱha vhukuma muya washu wa u ḓiṋekedzela nahone a nga si hangwe vhuḓidini hashu.—Vhaheb. 6:10.

15. Ri nga vha hani na vhungoho ha uri u fhisetshela hashu mushumo wa Yehova a zwi khou fhungudzea?

¹⁵ Zwi nga vha zwavhuḓi uri muṅwe na muṅwe washu a ḓivhudzise uri: ‘Naa ndi tendela vhaṅwe vha tshi ita mushumo wo engedzeaho? Naa ndi vhilaedziswa nga u wana zwithu zwinzhi zwi vhonalaho u fhira u shumela Yehova? Naa ndi khou edzisa lutendo na tshivhindi tsha Baraka, Debora, Yaele na vhanna vha 10 000, nga u shumisa zwoṱhe zwine nda vha nazwo u shumela Yehova? Naa ndi khou humbula nga ha u pfulutshela huṅwe fhethu u itela uri ndi hole tshelede nnzhi kana u wana vhutshilo ha khwine? Arali zwo ralo, naa ndi khou rabela kha Yehova nga ha nḓila ine u pfuluwa hanga zwa ḓo kwama ngayo muṱa wanga na tshivhidzo?’ *

16. Naho Yehova e na zwithu zwoṱhe, ndi mini zwine ra nga mu ṋea zwone?

¹⁶ Yehova u a ri hulisa nga u ri tendela ri tshi shela mulenzhe kha u tikedza vhuvhusahoṱhe hawe. Samusi Diabolo a tshi kunga vhathu uri vha mu tikedze, u tikedza haṋu vhuvhusahoṱhe ha Yehova zwi sumbedza uri ni khou lwisana na Sathane Diabolo. U vha na lutendo na u fulufhedzea zwe zwa ni ṱuṱuwedza uri ni shumele Yehova nga u ḓifunela, zwi a mu takadza. (Mir. 23:15, 16) Mudzimu u shumisa u fulufhedzea na u thetshelesa haṋu u itela u fhindula Sathane ane a mu nyadza. (Mir. 27:11) Nga zwenezwo, musi ni tshi thetshelesa ni vha ni tshi khou ṋea Yehova zwithu zwine a zwi dzhia zwi zwa ndeme nahone u a takala vhukuma.

17. Vhahaṱuli 5:31 i ri gudisa mini nga ha zwine zwa ḓo itea tshifhingani tshi ḓaho?

¹⁷ Hu si kale, ḽifhasi ḽi ḓo ḓala vhathu vhane vha tikedza vhuvhusahoṱhe ha Yehova u fhira zwiṅwe zwithu. Ri lavhelela zwenezwo nga maṱo matswuku! Ri ḓipfa u fana na Debora na Baraka vhe vha imba uri: “O lovha maswina au oṱhe, hee Yehova! Vhane vha U funa vha fana na ḓuvha vhuhalini haḽo.” (Vhahaṱ. 5:31) Zwenezwo zwi ḓo itea musi Yehova a tshi fhelisa shango ḽivhi ḽa Sathane! Musi nndwa ya Haramagedo i tshi thoma, hu ḓo vha hu si tshee na vhathu vhane vha fanela u fhelisa maswina. Nṱhani hazwo, hu ḓo vha hu tshifhinga tsha uri ri ‘ime ri lavhelese, ri vhone Yehova a tshi ri lamulela.’ (2 Koron. 20:17) Fhedzi zwino ri na zwibuli zwinzhi zwa u tikedza vhuvhusahoṱhe ha Yehova nga tshivhindi na nga u fhisea.

18. Tshumelo yaṋu ya u ḓifunela i nga kwama hani vhaṅwe vhathu?

¹⁸ “Vhathu vho ḓa vho ḓi-ramba; khoḓani Yehova.” Nga zwenezwo, Debora na Baraka vho thoma luimbo lwavho lwa gundo lwa u hulisa wa Ṱaḓulu-ṱaḓulu, hu si vhathu. (Vhahaṱ. 5:1, 2) U fana na ṋamusi, u nga ri u shumela haṋu Yehova nga u ḓifunela zwi nga ṱuṱuwedza vhaṅwe uri na vhone vha rende Yehova!