MUDZIMU ane a vha Musiki washu o vha a tshi ṱoḓa uri ḽifhasini hu dzule vhathu vhane vha ṱoḓa u vhusiwa na u livhiswa ngae, vha re na lufuno na vhane vha edzisa zwine a vha zwone. Fhedzi zwithu zwi khou sokou sea zwi tshi ṱanama. Mudzimu o vha a tshi ṱoḓa uri vha tshile vho takala, vhe na miṱa yavho, vha tshi guda zwithu zwiswa na u ita uri ḽifhasi ḽoṱhe ḽi vhe paradiso.

• “U dzivhisa dzinndwa migumoni ya ḽifhasi.”​—Psalme ya 46:9.

• “Tshifhinga tsho vhewaho tsho swika tsha . . . u lozwa vha tshinyadzaho ḽifhasi.”​—Nzumbululo 11:18.

• “Kha vho dzulaho fhano a huna ane a ḓo ri: Ndi a lwala.”​—Yesaya 33:24.

• “Zwe vhanangiwa vhanga vha zwi wana nga mishumo yavho zwi ḓo ḽiwa nga vhone vhaṋe.”​—Yesaya 65:22.

Izwi zwithu zwi ḓo itea hani? Mudzimu o nanga Murwa wawe Yesu uri a vhuse ḽifhasi e ṱaḓulu. Bivhili i amba uri u ḓo vha e muvhusi wa Muvhuso wa Mudzimu. (Daniele 2:44) Musi Bivhili i tshi amba nga ha Yesu i ri: “Mudzimu u ḓo mu ṋea khuluṋoni . . . , u ḓo vhusa sa Khosi.”—Luka 1:32, 33.  

Yesu o ita vhuṱolo vhunzhi kana maḓembe musi e kha ḽifhasi u itela u sumbedza uri vhathu vha ḓo tshila zwavhuḓi musi e Khosi.

• O fhodza malwadze oṱhe u itela u sumbedza uri u ḓo fhelisa maṱungu oṱhe.​—Mateo 9:35.

• O dzikisa lwanzhe, zwine zwa sumbedza uri u ḓo tsireledza vhathu nga u langa mupo.​—Marko 4:36-39.

• O ṋea vhathu vhanzhi zwiḽiwa, zwine zwa sumbedza uri u ḓo ṋea vhathu zwine vha zwi shaya.​—Marko 6:41-44.

• O shandula maḓi a vha waini musi e munyanyani, zwine zwa sumbedza uri u ḓo ita uri vhathu vha ḓiphiṋe.​—Yohane 2:7-11.

Ni fanela u ita mini uri ni ḓiphiṋe nga vhutshilo vhune Mudzimu a ṱoḓa vhathu vhane vha mu funa vha tshi ḓiphiṋa ngaho? Hu na “nḓila” ine na fanela u tshimbila khayo. Bivhili i amba uri ndi nḓila “i yaho vhutshiloni” nahone “vha i wanaho a si vhanzhi.”—Mateo 7:14.

Nḓila i yaho vhutshiloni ndi mini? Mudzimu u ri: “Nṋe Yehova Mudzimu wau ndi U funza zwi farisaho; ndi U tshimbidza kha yau nḓila, ine wa pfi U fare yone.” (Yesaya 48:17) Arali na tshimbila kha yeneyi nḓila, ni ḓo vha na vhutshilo havhuḓi.   

Yesu o ri: “Ndi nṋe nḓila na ngoho na vhutshilo.” (Yohane 14:6) Arali ra ita zwe Yesu a amba na  u edzisa tsumbo yawe, ri ḓo sendela tsini na Mudzimu na u vha na vhutshilo havhuḓi.

Ni nga wana hani nḓila i yaho vhutshiloni? Vhurereli ndi phamu-phamu, fhedzi Yesu o ri luma nḓevhe a ri: “A si muṅwe na muṅwe ane a ri kha nṋe, ‘Murena, Murena,’ ane a ḓo dzhena Muvhusoni wa ṱaḓulu, fhedzi hu ḓo dzhena ane a ita zwi funwaho nga Khotsi anga wa ṱaḓulu.” (Mateo 7:21) O dovha a ri: “Ni ḓo vha ḓivha nga mitshelo yavho.” (Mateo 7:16) Bivhili i nga ni thusa uri ni ḓivhe vhurereli ha ngoho.—Yohane 17:17.

Ni nga thoma hani u tshimbila nḓilani i yaho vhutshiloni? Ni fanela u guda nga ha Muṋei wa vhutshilo, ni ḓivhudzise zwi tevhelaho: Muṋei wa vhutshilo ndi nnyi? U pfi nnyi? Ndi muthu wa hani? U khou ri itela mini? U ṱoḓa ri tshi ita mini? *

Mudzimu u ṱoḓa vhathu vha tshi shuma, u ḽa, u ḓiphiṋa na u vha na miṱa, fhedzi u dovha a ṱoḓa ri tshi mu ḓivha samusi e Musiki washu nahone ri vhe khonani dzawe. Musi ri tshi ita zwine a zwi funa, zwi ḓo sumbedza uri ri a mu funa. Yesu o ri: “Uri vha wane vhutshilo vhu sa fheli, vha fanela uri vha ḓivhe iwe Mudzimu wa ngoho u woṱhe.”—Yohane 17:3.

Ri nga kha ḓi tea u ita tshanduko musi ri tshi vho ḓivha zwine Mudzimu a ṱoḓa ri tshi zwi ita. Zwa nga ro fara ludongo nga hu fhisaho. Fhedzi musi ri tshi thoma u tshimbila kha nḓila i yaho vhutshiloni, vhutshilo hashu vhu ḓo vha havhuḓi. Ṱhanzi dza Yehova dzi nga ni thusa u wana phindulo dza mbudziso dza ndeme nga ha Mudzimu. Ni nga khetha tshifhinga na fhethu hune na ṱoḓa u gudiswa hone Bivhili. Ni nga dalela website yashu ya www.jw.org/ve u itela u wana nḓila dzine na nga ri kwama ngadzo.