KHA ri ri ni khou ṱalela muvi wa muthu a re na bvumo, khamusi ndi ramuzika ane na mu takalela. Wonoyo muvi u thoma nga u sumbedza onoyo muthu a tshee muṱuku, a tshi khou guda zwa muzika nahone a tshi ḓigudisa lunzhi-lunzhi. Nga murahu, ni vhona a tshi khou tshimbila na mashango o fhambanaho a tshi lidzela vhathu muzika nahone a thoma u ḓivhiwa hoṱhe. Hu sa athu fhela na tshifhinga, hu sumbedzwa musi o no vha mulala nahone a fa magumoni a wonoyo muvi.

Zwi re kha wonoyo muvi ndi zwithu zwo iteaho zwa vhukuma. Muthu muṅwe na muṅwe u a fa hu sa londwi uri ndi ramuzika, rasaintsi, ramitambo kana muthu a re na bvumo. Muthu a nga kha ḓi vha o ita zwithu zwinzhi vhutshiloni, fhedzi o vha a tshi nga ita zwi fhiraho zwenezwo arali a songo vha mulala a fheleledza o fa.

Zwenezwi zwi nga ri ṱungufhadza, fhedzi ndi zwine roṱhe ra ḓo ṱangana nazwo. (Muhuweleli 9:5) Ri nga si kone u ponya lufu na u vha vhalala hu sa londwi zwine ra ita. Vhulwadze kana khombo dza badani na zwone zwi nga ita uri ri ṱavhanye u fa. Samusi Bivhili yo zwi sumbedza, ri tou nga khuli “ine ya vha hone lwa tshifhinganyana nahone nga murahu ya ngala-ngala.”—Yakobo 4:14.

Nga nṱhani ha uri ri nga fa tshifhinga tshiṅwe na tshiṅwe, vhaṅwe vha humbula uri ndi khwine uri vha ‘ḽe vha nwe, ngauri matshelo vha ḓo fa.’ (1 Vhakorinta 15:32) Fhedzi vhathu vha humbula nga yeneyo nḓila ngauri a vha na fhulufhelo ḽa vhumatshelo. Nga tshiṅwe tshifhinga, zwihuluhulu musi no sedzana na zwithu zwine zwa ni pfisa vhuṱungu, ni nga ḓivhudzisa uri, ‘Naa ri tshilela u fa fhedzi?’ Ni nga wana ngafhi phindulo?

Vhathu vhanzhi vha fhulufhela uri vhorasaintsi ndi vhone vhane vha nga wana phindulo. Vhorasaintsi na madokotela vho wana nḓila ya u ita uri zwi konadzee uri vhathu vha tshile tshifhinga tshilapfu. Nahone vhaṅwe vhorasaintsi vha khou ita zwi fhiraho zwenezwo. Hu sa londwi uri vhorasaintsi vha a kona u ita uri vhathu vha tshile tshifhinga tshilapfu kana hai, vhathu vha kha ḓi ḓivhudzisa uri: Ndi ngani ri tshi vha vhalala ra fa? Naa lufu lune lwa vha swina ḽashu lu ḓo vhuya lwa fhela? Ri do haseledza dzenedzi mbudziso kha thero dzi tevhelaho nahone ri ḓo fhindula mbudziso ine ya ri: Naa ri tshilela u fa fhedzi?