Bivhili I Ri Ṋea Vhulivhisi Havhuḓi

TAMBANI

Ri nga si kone u vha na vhungoho ha uri phetho dzine ra dzhia dzi ḓo vha dzavhuḓi arali ra ḓitika nga maḓipfele ashu fhedzi na nḓila ine vhaṅwe vha ḓipfa ngayo. Bivhili i a ri vhudza uri ndi ngani, fhedzi i a dovha ya ri vhudza na zwiṅwe zwo engedzeaho. I ri thusa u ḓivha uri zwo lugaho na zwi songo lugaho ndi zwifhio nahone zwenezwo zwi ita uri ri takale.

RI ṰOḒA VHULIVHISI VHU BVAHO KHA MUDZIMU

Bivhilini Yehova a Mudzimu u ri vhudza uri tshipikwa tshawe ndi uri vhathu vha ṱoḓe vhulivhisi khae, nṱhani ha uri vha ḓilivhise vhone vhaṋe. (Yeremia 10:23) Ndi ngazwo o ri ṋea vhulivhisi vhu re Bivhilini. Mudzimu u a funa vhathu nahone ha ṱoḓi ri tshi ita phetho dzi si dzavhuḓi dzine dza ḓo ri vhaisa na u ri konḓisela vhutshilo. (Dotoronomio 5:29; 1 Yohane 4:8) Zwiṅwe hafhu, samusi e Musiki washu, u na vhuṱali na nḓivho zwine zwa ita uri vhulivhisi hawe vhu vhe ha khwine u fhira hoṱhe. (Phisalema 100:3; 104:24) Naho zwo ralo, Mudzimu ha kombetshedzi vhathu uri vha tevhedze vhulivhisi hawe.

Yehova o ṋea vhathu vha u thoma, Adamu na Eva, zwoṱhe zwe vha vha vha tshi zwi ṱoḓa uri vha takale. (Genesi 1:28, 29; 2:8, 15) O dovha a vha ṋea na vhulivhisi vhu sa konḓi, he vha vha vha tshi tea u vhu tevhedza. Naho zwo ralo, o tenda vha tshi ḓikhethela arali vha tshi ḓo tevhedza honoho vhulivhisi kana hai. (Genesi 2:9, 16, 17) Zwi ṱungufhadzaho ndi uri, Adamu na Eva vho khetha u tshila nga nḓila ine vha funa nṱhani ha u tshila nga vhulivhisi ha Yehova. (Genesi 3:6) Mvelelo dzo vha dzifhio? Naa zwi vha zwi khwine musi vhathu vha tshi ḓikhethela uri zwo lugaho na zwi songo lugaho ndi zwifhio? Hai. Ro zwi vhona uri u sa tevhedza vhulivhisi ha Mudzimu a zwi iti uri vhathu vha vhe na mulalo na uri vha takale.—Muhuweleli 8:9.

Bivhili i ri ṋea vhulivhisi vhune ha nga ri thusa uri ri ite phetho dzavhuḓi hu sa londwi hune ra dzula hone kana uri ri bva kha muṱa wa hani. (2 Timotheo 3:16, 17; vhalani bogisi “ Bugu Yo Itelwaho Vhathu Vhoṱhe.”) Kha ri vhone uri i zwi ita hani.

Gudani zwo engedzeaho nga ha uri ndi ngani zwo tea uri Bivhili i pfi “ipfi ḽa Mudzimu.”—1 Vhathesalonika 2:13. Ṱalelani vidio ine ya ri Bivhili Yo Ṅwalwa Nga Nnyi? kha jw.org.

NDI NGANI VHAṄWE VHA TSHI VHONA U NGA BIVHILI I NGA SI KONE U VHA THUSA?

Vhaṅwe vha amba uri Bivhili i nga si vha thuse muthu u ita phetho dzavhuḓi vhutshiloni. Vha nga amba zwi tevhelaho.

Zwine vhathu vha amba: “Bivhili i a ḓihanedza.”

Mbuno: Musi ni tshi thoma u vhala zwi nga vhonala u nga tshiṅwe tshipiḓa tsha Bivhili tshi a hanedzana na zwiṅwe zwipiḓa zwayo. Fhedzi arali na ḓiṋea tshifhinga tsha u guda uri yo ṅwalwa lini na uri yo ṅwalwa hani ni ḓo zwi vhona uri zwipiḓa zwoṱhe zwa Bivhili zwi a tendelana.

U itela u vhona dziṅwe tsumbo dza uri Bivhili a i ḓihanedzi vhalani thero ine ya ri “Naa Bivhili I A Ḓihanedza?” kha jw.org.

Zwine vhathu vha amba: “Vhathu vhane vha amba uri vha tevhedza vhulivhisi vhu re Bivhilini vha ita zwithu zwi si zwavhuḓi, ngauralo i nga vha i si bugu yo teaho ine ya nga thusa vhathu u ita phetho dzavhuḓi.”

Mbuno: A ro ngo tea u vhona Bivhili mulandu nga nṱhani ha vhuḓifari vhu si havhuḓi ha vhathu vhane vha si tevhedze zwine ya zwi funza. Bivhili yo dzula yo amba uri vhathu vhanzhi u katela na vharangaphanḓa vha vhurereli vhane vha amba uri vha tevhedza Bivhili vha ḓo ita zwithu zwi sa tshimbidzani na zwine ya zwi amba. Yo dovha ya amba uri nga nṱhani ha zwenezwo, vhathu vha ḓo ‘sasaladza’ zwine Bivhili ya zwi amba.—2 Petro 2:1, 2.

U itela u vhona tsumbo ya uri vharangaphanḓa vha vhurereli a vha tevhedzi zwine Bivhili ya zwi funza, ṱalelani vidio ine ya ri “Ndo Ṱutshela Vhurereli” kha jw.org.

Zwine vhathu vha amba: “Vhathu vhane vha tevhedza zwine Bivhili ya zwi amba a vha ṱhonifhi vhaṅwe vhane vha si fane navho.”

Mbuno: Bivhili i ṱuṱuwedza uri vhathu vha ṱhonifhane. A i ṱuṱuwedzi. . .

uri muthu a ḓidzhie e wa khwine u fhira vhaṅwe.—Vhafilipi 2:3.
uri vhathu vha si ṱhonifhe vhane vha tshila nga nḓila yo fhambanaho na yavho kana vhane vha tenda kha zwithu zwo fhambanaho na zwine vha zwi tenda.—1 Petro 2:17.
u kombetshedza vhaṅwe u vha na mavhonele a fanaho na ashu.—Mateo 10:14.

Bivhili i sumbedza uri Mudzimu u dzulela u fara vhathu nga nḓila ya vhuthu na uri ha na tshiṱalula na uri u ṱoḓa na riṋe ri tshi ita zwi fanaho.—Vharoma 9:14.

U itela u wana mafhungo o engedzeaho vhalani thero ine ya ri “Tolerance—How the Bible Can Help” kha jw.org.

BIVHILI I RI VHUDZA ZWINE MUDZIMU A ṰOḒA RI TSHI ZWI ITA

Bivhili i ri vhudza nga ha nḓila ye Mudzimu a shumisana ngayo na vhathu u bva mathomoni. Zwi re khayo zwi ri thusa u pfesesa uri Mudzimu u ri ndi zwifhio zwo lugaho na zwi songo lugaho, zwine zwa ḓo ri vhuyedza na zwine zwa nga vha khombo kha riṋe. (Phisalema 19:7, 11) Zwine ra zwi guda khayo zwi dzula zwi tshi shuma tshifhinga tshoṱhe nahone zwi ri thusa u ita phetho dzavhuḓi vhutshiloni.

Sa tsumbo, ṱhogomelani zwine Bivhili ya zwi amba kha Mirero 13:20, i ri: “Ane a tshimbila na vhaṱali u ḓo ṱalifha, fhedzi ane a konana na matsilu zwi nga si mu tshimbilele zwavhuḓi.” Honovhu vhulivhisi vhu kha ḓi shuma na ṋamusi u fana na nḓila ye ha vha hu tshi shuma ngayo tshifhingani tsha kale. Bivhili i na vhulivhisi vhunzhi ho raloho vhune ha nga ri thusa.—Vhalani bogisi “ Vhulivhisi Vhu Re Bivhilini Vhu Kha Ḓi Shuma Na Ṋamusi.”

Fhedzi ni nga ḓivhudzisa uri: ‘Ndi nga vha hani na vhungoho ha uri Bivhili i nga nthusa ṋamusi?’ Thero i tevhelaho i ḓo haseledza dziṅwe dza tsumbo dza vhathu vhe vha thuswa nga Bivhili.

a Yehova ndi dzina ḽa Mudzimu.—Phisalema 83:18.

VHULIVHISI VHU RE BIVHILINI VHU KHA ḒI SHUMA NA ṊAMUSI

Naho Bivhili yo fhela u ṅwalwa miṅwaha i ṱoḓaho u vha 2 000 yo fhiraho, i kha ḓi shuma na ṋamusi. Ndi kale vhathu vha tshi ṱoḓa u tshila vhutshilo havhuḓi vho takala. (Muhuweleli 1:9) Vhulivhisi vhu re Bivhilini vhu sa fhelelwi nga tshifhinga vhu nga ri thusa u swikelela tshenetsho tshipikwa.

U Fhulufhedzea

‘Ri tama u fhulufhedzea kha zwithu zwoṱhe.’—Vhahevheru 13:18.
“Ane a tswa a songo tsha tswa; nṱhani hazwo nga a shume nga maanḓa.”—Vhaefesa 4:28.

U Vha Na Vhushaka Havhuḓi Na Vhaṅwe

“Muṅwe na muṅwe nga a ṱoḓe zwi vhuyedzaho muṅwe, hu si zwi vhuyedzaho ene muṋe fhedzi.”—1 Vhakorinta 10:24.
“Bvelani phanḓa ni tshi konḓelelana na u hangwelana zwi tshi bva mbiluni.”—Vhakolosa 3:13.

Ni Nga Ita Hani Phetho?

“Tsilu ḽi tenda zwoṱhe zwine zwa ambiwa, fhedzi wa vhuṱali u elekanya nga ha zwine a ḓo zwi ita.”—Mirero 14:15.
“O ṱalifhaho u vhona khombo a khuda, fhedzi a si na tshenzhelo u fhirela phanḓa a wela khomboni.”—Mirero 22:3.

TSHIINGAMO