2 | “U Khuthadzwa Nga Maṅwalo”

TAMBANI

BIVHILI I RI: “Zwithu zwoṱhe zwo ṅwaliwaho kale zwo ṅwalelwa u ri funza, uri nga u konḓelela hashu na nga u khuthadzwa nga Maṅwalo ri vhe na fhulufhelo.”—VHAROMA 15:4.

Zwine Zwa Amba Zwone

Bivhili i a ri khwaṱhisa na u ri khuthadza musi mihumbulo yashu i tshi ita uri ri humbule zwithu zwi si zwavhuḓi. Mulaedza wa Bivhili u dovha wa ri ṋea fhulufhelo ḽa uri hu si kale vhuṱungu hoṱhe vhu ḓo vha vhu si tsheeho.

Zwenezwi Zwi Nga Ni Thusa Hani?

Roṱhe ri pfa ro tsikeledzea nga tshiṅwe tshifhinga, fhedzi vhane vha vha na mutsiko wa muhumbulo kana vhulwadze ha u vhilaela lwo kalulaho vha nga ḓipfa vha songo takala tshifhinga tshoṱhe. Bivhili i nga ri thusa hani?

Bivhili i amba nga ha zwithu zwinzhi zwavhuḓi zwine zwa nga dzhia vhudzulo ha zwithu zwi si zwavhuḓi. (Vhafilipi 4:8) I nga ḓadza mihumbulo yashu nga zwithu zwi khuthadzaho na zwi dzikisaho mihumbulo yashu, zwine zwa ḓo ri thusa uri ri kone u langa maḓipfele ashu.—Phisalema 94:18, 19.
Bivhili i nga ri thusa u lwisana na u humbula uri a ri vha ndeme.—Luka 12:6, 7.
Bugu nnzhi dza Bivhili dzi a ri thusa u vhona uri a ri roṱhe, na uri Mudzimu ane a vha Musiki washu u a pfesesa nga vhuḓalo nḓila ine ra ḓipfa ngayo.—Phisalema 34:18; 1 Yohane 3:19, 20.
Bivhili i fhulufhedzisa uri Mudzimu u ḓo fhelisa mihumbulo yoṱhe i ri pfisaho vhuṱungu. (Yesaya 65:17; Nzumbululo 21:4) Musi ri tshi khou dinwa nga mihumbulo na maḓipfele a si avhuḓi, ri nga wana uri zwe Mudzimu a fhulufhedzisa zwi ri ṋea maanḓa a u bvela phanḓa.

Nḓila Ine Bivhili Ya Khou Thusa Ngayo Vho Jessica

Nḓila Ye Mutsiko Wa Muhumbulo Wa Nkwama Ngayo

“Musi ndi na miṅwaha ya 25, madokotela vho wanulusa uri ndi khou vhaiswa nga mutsiko wo kalulaho wa muhumbulo. Ndo vha ndi tshi sokou ḓelwa nga mihumbulo ine nda si kone u i langa ya zwithu zwine zwa mmbaisa zwo iteaho kale. Madokotela vho nthusa u vhona uri mutsiko wanga wa muhumbulo wo vha u tshi itwa nga zwithu zwi si zwavhuḓi zwe nda vha ndi tshi zwi humbula zwo iteaho kale vhutshiloni hanga. U engedza kha mishonga ye nda vha ndi tshi i wana, ndo ṱoḓa thuso kha madokotela vhe vha nthusa u khakhulula kuhumbulele kwanga ku si kwavhuḓi.”

Nḓila Ine Bivhili Ya Nthusa Ngayo

“Musi ndo tsikeledzea vhukuma, ndo vha ndi tshi sokou pfa ndo tshuwa, ndi tshi khou vhilaela lwo kalulaho, ndi sa koni na u dzi bonya. Tshifhinga tshinzhi vhusiku, ndo vha ndi tshi diniwa nga mihumbulo i si yavhuḓi ye nda vha ndi sa koni u i langa. Samusi Phisalema 94:19 i tshi ṱalutshedza, Mudzimu u a ri khuthadza na u ri kwengweledza musi ro tsikeledzea. Tsini na mmbete wanga ndo vha ndi tshi vhea Bivhili na bugu yanga ya notsi ine ya vha na maṅwalo ane a nṱuṱuwedza. Musi khofhe dzi sa fari, ndo vha ndi tshi vhala vese dza Bivhili. Nga yeneyo nḓila, ndo vha ndi tshi khou tendela Yehova a tshi nkwengweledza.

“Bivhili i ri ṱuṱuwedza uri ri thudzele kule mihumbulo ine ya si tshimbidzane na Ipfi ḽa Mudzimu. Tshifhingani tsho fhiraho, ndo vha ndi tshi ḓipfa ndi si wa ndeme, hu si na muthu ane a mpfuna nahone ndi sa thusi tshithu. Fhedzi ndo guda uri zwe nda vha ndi tshi khou zwi humbula a zwi tshimbidzani na zwine Bivhili ya zwi amba ngauri Bivhili i amba uri Mudzimu ndi Khotsi a re na lufuno, ane a pfela vhuṱungu na ane a vha na ndavha na muṅwe na muṅwe washu. Nga zwiṱuku nga zwiṱuku ndo thoma u langa mihumbulo yanga madzuloni a uri i lange nṋe. Ndo guda u ḓidzhia nga nḓila ine Mudzimu a ndzhia ngayo. Ḽo vha ḽiga ḽa ndeme ḽe nda ḽi dzhia ḽe ḽa nthusa uri ndi kone u thudzela kule mihumbulo i si yavhuḓi nga ha nṋe muṋe.

“Ndo lavhelela tshifhinga tshi ḓaho tshine mihumbulo yoṱhe i si yavhuḓi i vhaisaho ya ḓo vha i si tsheeho. U ḓivha hanga uri tshifhingani tshi ḓaho vhulwadze ha muhumbulo vhu ḓo vha vhu si tsheeho, zwi nthusa u konḓelela zwino na uri ndi sedze tshifhingani tshi ḓaho tshine mutsiko wa muhumbulo wa ḓo vha u si tsheeho.”

TSHIINGAMO

“U Khuthadzwa Nga Maṅwalo”

Luvenda

“U Khuthadzwa Nga Maṅwalo”

https://cms-imgp.jw-cdn.org/img/p/2023006/univ/art/2023006_univ_sqr_xl.jpg

wp23 No. 1 masiaṱ. 8-9

Ṱhanzi dza Yehova

2 | “U Khuthadzwa Nga Maṅwalo”

Zwine Zwa Amba Zwone

Zwenezwi Zwi Nga Ni Thusa Hani?

“U Khuthadzwa Nga Maṅwalo”

NḒILA DZA U DOWNLOUDA

Zwine Zwa Amba Zwone

Zwenezwi Zwi Nga Ni Thusa Hani?

“U Khuthadzwa Nga Maṅwalo”

NḒILA DZA U DOWNLOUDA

Khethani Luambo Lwaṋu

Sherani