“Arali na humbela Khotsi tshithu naho tshi tshini u ḓo ni ṋea tshone nga dzina ḽanga.”​—Yohane 16:23.

Maipfi a Yesu a zwi sumbedza zwavhuḓi uri Yehova u ṱoḓa ri tshi mu rabela nga dzina ḽa Yesu Kristo, hu si nga zwifanyiso, vhakhethwa (saints), vharuṅwa kana nga vhafhasi. Musi ri tshi rabela Mudzimu nga dzina ḽa Yesu, ri vha ri tshi khou sumbedza uri ri pfesesa uri Mudzimu u pfa thabelo dzashu nga nṱhani ha zwe Yesu a ri itela zwone. Yesu o ri: “A hu na ane a ḓa kha Khotsi a songo fhira kha nṋe.”—Yohane 14:6.

“Mu shululeleni zwi re mbiluni dzaṋu.”​—Phisalema 62:8.

Musi ri tshi rabela Yehova ri fanela u amba nae sa zwine ra ambisa zwone na khotsi ane a ri funa. Ri tea u amba nae nga ṱhonifho nahone zwi tshi bva mbiluni. Ri songo tou vhala kana ra amba maipfi e ra a tou a rwela ngomani.

“Arali ra humbela zwine zwa tshimbidzana na zwine a zwi funa, u ḓo ri pfa.”​—1 Yohane 5:14.

Yehova Mudzimu u shumisa Bivhili u itela u ri vhudza zwine a ḓo ri itela zwone na zwine a ṱoḓa riṋe ri tshi mu itela zwone. Ri tea u rabela Mudzimu u “tshimbidzana na zwine a zwi funa” uri a ṱanganedze thabelo dzashu. Ri tea u vhala Bivhili uri ri mu ḓivhe zwavhuḓi. Ndi hone thabelo dzashu dzi tshi ḓo mu takadza.

Rabelani Nga Ha Zwithu Zwine Na Zwi Shaya. Ri nga humbela Mudzimu zwithu zwine ra zwi shaya ḓuvha na ḓuvha zwi ngaho zwiḽiwa, zwiambaro na vhudzulo. Ri nga dovha ra humbela vhuṱali ha u ita phetho dzavhuḓi na maanḓa a u konḓela milingo. Ri nga humbela Mudzimu uri a ri fhe lutendo, a ri hangwele na uri a ri thuse.—Luka 11:3, 4, 13; Yakobo 1:5, 17.

Ni Rabelise Vhaṅwe. Vhabebi vha funaho vhana vhavho vha a takala musi vhenevho vhana vha tshi funana. Samusi ri vhana vha Yehova, u ṱoḓa ri tshi funana na u ṱhogomelana. U ṱoḓa ri tshi rabelisa mufarisi washu, vhana vhashu, mashaka ashu, na khonani dzashu. Mufunziwa Yakobo o ri: “Ni rabelelane.”—Yakobo 5:16.

Ni Livhuwe. Mudzimu ndi Musiki washu. Bivhili i ri: “U ni itela zwithu zwavhuḓi, o ni nisela mvula, a ita uri ni kaṋe zwinzhi nga tshifhinga tsha hone, a ni ṋea na zwiḽiwa, a takadza na mbilu dzaṋu.” (Mishumo 14:17) Musi ri tshi humbula zwithu zwoṱhe zwe Mudzimu a ri itela zwone, zwi ḓo ita uri ri mu livhuwe nga thabelo. Ri tea u livhuwa Mudzimu na nga u mu thetshelesa.—Vhakolosa 3:15.

Nga zwiṅwe zwifhinga ri nga ṱungufhala ngauri ri nga vhona u nga Mudzimu ha khou fhindula thabelo dzashu nga u ṱavhanya. Naa zwi amba uri Mudzimu ha na ndavha na riṋe? Hai! Kha ri vhone zwe vhaṅwe vha ṱangana nazwo zwine zwa sumbedza uri ri tea u dzula ri tshi rabela.

Steve we ra amba nga hae u ri: “Ndo vha ndi tshi ḓo vha ndi songo vhuya nda vha na fhulufhelo ḽa uri ndi ḓo dovha nda takala arali ndi songo bvela phanḓa ndi tshi rabela.” Ndi mini zwe zwa mu thusa uri a rabele? O thoma u guda Bivhili nahone a ḓivha uri u dzula u tshi rabela ndi zwa ndeme. Steve u ri: “Ndi rabela Mudzimu nda mu livhuwa nge a shumisa khonani dzanga u ntikedza. Zwa zwino ndo takala u fhirisa u thomani.”

Hu pfi mini nga Jenny we a vhona u nga ha fanelei uri Mudzimu a mu pfe? U ri: “Musi ndi tshi ḓipfa ndi si muthu wa tshithu, ndo humbela Mudzimu uri a nthuse uri ndi pfesese uri ngani ndi tshi ḓipfa nga u rali.” Zwenezwo zwo mu thusa hani? U ri: “U amba na Mudzimu zwo nthusa uri ndi ḓidzhie nga nḓila ine Mudzimu a ndzhia ngayo na u vhona uri naho nṋe ndi tshi ḓihaṱula, Mudzimu ha nkhaṱhuli. Zwo dovha zwa nthusa uri ndi dzule ndi tshi rabela.” Ha bvelela mini? U ri: “Thabelo yo nthusa uri ndi dzhie Yehova sa Mudzimu a re hone, wa lufuno na a re na ndavha. Na u mu dzhia sa Khotsi na Khonani ine ya ntikedza tshifhinga tshoṱhe arali nda dzula ndi tshi ita zwine ya funa.”

Kha ri vhone na zwe Isabel a ṱangana nazwo. Musi o vhifha muvhilini, madokotela awe o mu vhudza uri ṅwana wawe u ḓo bebwa o holefhala. Zwa mu vhaisa vhukuma. Vhaṅwe vho ita na u mu eletshedza uri a bvise yeneyo thumbu. U ri: “Mbilu yanga yo vhavha lwe nda vhona u nga ndi ḓo fa.” A ita mini? U ri: “Ndo rabela Mudzimu lunzhi-lunzhi uri a nthuse.” O fhedza o beba ṅwana wa mutukana ane a pfi Gerard nahone o vha o holefhala. Naa Isabel u vhona u nga Mudzimu o fhindula thabelo dzawe? Ee! Nga nḓila-ḓe? Isabel u ri: “Musi ndi tshi vhona ṅwananga a re na miṅwaha ya 14 a tshi khou ḓiphiṋa nga vhutshilo naho o holefhala, ndi a zwi vhona uri i tou vha phindulo ya thabelo dzanga nahone ndi phaṱhutshedzo khulwane ye Yehova a mpha yone.”

Maipfi o raloho a bvaho mbiluni a ita uri ri humbule maipfi a muphisalema we a ri: “Iwe Yehova u ḓo thetshelesa khumbelo ya o vuḓaho. Iwe u ḓo khwaṱhisa mbilu dzavho wa livhisa ṱhogomelo khavho.” (Phisalema 10:17) Ndi zwiitisi zwavhuḓi vhukuma zwa uri ri dzule ri tshi rabela.

Ri wana thabelo nnzhi dza Yesu Bivhilini. Ine ya ḓivhiwa nga vhathu vhanzhi ndi ye a i funza vhafunziwa vhawe. Ri nga guda mini khayo?