Ndi mini zwine zwa nga ni thusa u takalela u vhala Bivhili na u vhuyelwa nga zwine na zwi vhala? Ṱhogomelani nyeletshedzo ṱhanu dze dza thusa vhathu vhanzhi.

Wanani fhethu ho teaho. Lingedzani u wana fhethu hu si na phosho. Iledzani zwithu zwine zwa nga ni thithisa uri ni kone u livhisa ṱhogomelo kha zwine na khou zwi vhala. U dzula fhethu hune ha vha na tshedza tshavhuḓi na muya u rotholelaho zwi nga ni thusa uri ni vhuyelwe nga zwine na zwi vhala.

Ivhani na mavhonele o teaho. Samusi Bivhili i tshi bva ha Khotsi ashu wa ṱaḓulu, ni nga vhuyelwa vhukuma arali na vha na mavhonele a fanaho na a ṅwana o ḓiimiselaho u guda kha vhabebi vhawe. Arali ni na mavhonele a si avhuḓi nga Bivhili, lingedzani u sa humbula nga hao, u itela uri Mudzimu a kone u ni funza.—Psalme ya 25:4.

Rabelani ni sa athu u thoma u vhala. Mafhungo a re Bivhilini ndi mihumbulo ya Mudzimu, nga zwenezwo, a zwi mangadzi uri ri ṱoḓa uri Mudzimu a ri thuse u i pfesesa. Mudzimu u fulufhedzisa u ṋea “muya mukhethwa vhane vha mu humbela.” (Luka 11:13) Muya mukhethwa u nga ni thusa u pfesesa nḓila ine Mudzimu a humbula ngayo. Nga u ya ha tshifhinga, ni ḓo pfesesa “na zwiphiri zwo dzikaho zwa Mudzimu.”—1 Vhakorinta 2:10.

Vhalani u itela u pfesesa. Ni songo sokou vhala u itela u fhedza. Humbulani nga ha zwine na khou zwi vhala. Ḓivhudziseni mbudziso dzi ngaho: ‘Ndi pfaneleo dzifhio dzine nda khou dzi vhona kha muthu ane nda khou vhala nga hae? Ndi nga shumisa hani zwenezwi vhutshiloni hanga?’

Ḓivhetsheleni zwipikwa. U itela uri ni vhuyelwe nga zwine na zwi vhala Bivhilini, ḓivhetsheleni tshipikwa tsha u guda zwithu zwine zwa ḓo ni thusa u ita tshanduko vhutshiloni haṋu. Ni nga ḓivhetshela zwipikwa zwi tevhelaho: ‘Ndi ṱoḓa u guda zwo engedzeaho nga ha Mudzimu.’ ‘Ndi ṱoḓa u vha muthu wa khwine, munna kana mufumakadzi wa khwine.’ Nga zwenezwo, khethani zwipiḓa zwa Bivhili zwine zwa ḓo ni thusa u swikelela zwenezwo zwipikwa. *

Dzenedzi nyeletshedzo ṱhanu dzi ḓo ni thusa uri ni kone u thoma u vhala Bivhili. Fhedzi ni nga ita hani uri u vhala Bivhili zwi takadze? Thero i tevhelaho i sumbedza nḓila ine na nga zwi ita ngayo.