1-2. (a) Ndi mini zwine ra tea u zwi ita uri ri vhe khonani ya muṅwe muthu? (b) Ri ḓo haseledza mini kha ino thero?

 NAA ni na khonani ya tsini? Zwo ḓa hani uri ni vhe dzikhonani? Khamusi no fhedza tshifhinga noṱhe, na guda zwe zwa itea vhutshiloni hawe na u guda uri u takalela mini na zwine a si zwi takalele. Khamusi no dovha na guda na zwithu zwavhuḓi nga hae zwine na nga tama u zwi edzisa. Zwenezwo zwo ita uri ni thome u funa khonani yaṋu.

² Uri ni vhe khonani na muṅwe muthu ni tea uri ni fhedze tshifhinga nae. Ndi zwine ra tea u zwi ita arali ri tshi ṱoḓa u vha khonani ya Yehova. Kha ino thero, ri ḓo haseledza uri ri nga sendela hani tsini na Mudzimu washu na uri zwi ri vhuyedza hani u ita nga u ralo. Fhedzi kha ri thome ri haseledze uri ndi ngani zwi zwa ndeme uri ri vhe khonani dza Yehova.

3. Ndi ngani zwi zwa ndeme uri ri humbule uri u vha na vhushaka na Yehova zwi a ri vhuyedza? Fanyisani.

³ Ndi zwa ndeme u dzula ri tshi humbula uri u vha na vhushaka na Yehova zwi a vhuyedza. (Ps. 63:6-8) Ndi ngani? Sa tsumbo, vhathu vha a zwi ḓivha uri ndi zwa ndeme uri ri ḽe zwiḽiwa zwi re na pfushi, ri ite nyonyoloso, ri awele lwo linganelaho na uri ri nwe maḓi ḓuvha ḽiṅwe na ḽiṅwe. Fhedzi vhathu vhane vha sa zwi dzhiele nṱha, zwi a vha konḓela uri vha zwi ite. Fhedzi vhane vha anzela u humbula uri ndi ngani zwi zwa ndeme u zwi ita, zwi a vha lelutshela uri vha zwi ite. Nga hu fanaho, arali ri tshi dzula ri tshi humbula uri ndi ngani zwi zwa ndeme u vha khonani ya Yehova, zwi ḓo ri lelutshela uri ri bvele  phanḓa ri tshi ṱoḓa u sendela tsini nae.​—Ps. 119:27-30.

4. Muṅwali wa Phisalema 73:28 o ri mini?

⁴ Vhalani Phisalema 73:28. Muṅwali wa Phisalema 73 o vha e Mulevi we a vha a tshi imba thembeleni ya Yehova. Zwi nga kha ḓi itea uri o shumela Yehova lwa miṅwaha minzhi. Fhedzi o vha a tshi zwi ḓivha uri u tea u dzula a tshi humbula uri “u sendela tsini na Mudzimu” ndi zwone zwa ndeme. O vha a tshi ṱoḓa uri na vhaṅwe vha ḓivhe uri u vha na vhushaka na Mudzimu, ndi zwone zwine zwa vha zwa ndeme. Ndi mbuyelo dzifhio dzine dza nga vha hone nga u sendela tsini na Mudzimu?

“U SENDELA TSINI NA MUDZIMU” ZWI A RI TAKADZA

5. (a) Ndi ngani u sendela tsini na Mudzimu zwi tshi ita uri ri takale? (b) Vhuṱali ha Yehova vhu nga ni thusa na u ni tsireledza hani? (Mirero 2:6-16)

⁵ Musi ri tshi sendela tsini na Yehova, ri a takala na u fhirisisa. (Ps. 65:4) Hu na zwiitisi zwinzhi zwine zwa ita uri ri ambe nga u ralo. Sa tsumbo, musi ri tshi vhala zwine a ri vhudza zwone Bivhilini na u zwi tevhedza, ri a ṱalifha. Zwine Yehova a ri funza zwone zwi a ri tsireledza kha zwithu zwine zwa nga ri huvhadza na kha u ita vhukhakhi vhuhulwane. (Vhalani Mirero 2:6-16.) Ndi ngazwo Bivhili i tshi ri: “Hu takala muthu ane a wana vhuṱali na muthu ane a wana ṱhalukanyo.”​—Mir. 3:13.

6. Ndi mini tshe tsha ita uri muphisalema a si tsha takala?

⁶ Na vhathu vha Yehova vha a ṱungufhala nga zwiṅwe zwifhinga. Muṅwali wa Phisalema 73 na ene o vha na tshifhinga tshee a ṱungufhala nga nṱhani ha u humbula zwithu zwi si zwavhuḓi. O thoma u humbula uri vhathu vhavhi vha khou tshila vhutshilo havhuḓi naho vha si na ndavha na Mudzimu kana vha sa mu shumeli. Zwenezwi zwo mu sinyusa vhukuma lwe a thoma u vha na vivho. O humbula uri vhathu vhane vha ita zwa vhuvemu na vhane vha ḓikukumusa, vha khou wana zwoṱhe zwine vha zwi ṱoḓa nahone vha na mutakalo wavhuḓi, a hu na tshine vha tshi shaya. (Ps. 73:3-7, 12) Zwenezwo zwo ita uri a vhone u nga u shumela Yehova a zwi vhuyedzi tshithu. O vha o ṱungufhala lwe a amba uri: “Ngangoho u kunakisa mbilu yanga zwo vha mahandana, na u ṱamba zwanḓa zwanga uri zwi si vhe na mulandu.”​—Ps. 73:13.

7. Ri nga ita mini musi ro ṱungufhala? (Sedzani tshifanyiso.)

⁷ Naho muphisalema o vha o ṱungufhala, ha ngo zwi tendela zwi tshi mu kula nungo. O ita zwiṅwe zwithu nga hazwo. O “dzhena nḓuni khethwa ya Mudzimu,” Yehova a mu thusa u khakhulula mahumbulele awe. (Ps. 73:17-19) Musi ro ṱungufhala, Yehova khonani yashu u a zwi ḓivha. Arali ra rabela khae uri a ri livhise nahone ra ṱanganedza thuso yawe i bvaho Ipfini ḽawe na tshivhidzoni, ri ḓo wana maanḓa a u konḓelela. Naho ri tshi nga ḓipfa ro tsikeledzea nga nṱhani ha thaidzo dzine ri si vhe na thandululo nadzo, Yehova a nga ri thusa uri ri dzike.​—Ps. 94:19. a

“U SENDELA TSINI NA MUDZIMU” ZWI RI ṊEA FHULUFHELO NA U ITA URI RI ḒIVHE URI RI KHOU TSHILELA MINI

8. U sendela tsini na Mudzimu zwi dovha zwa ri vhuyedza hani?

⁸ U sendela tsini na Mudzimu zwi dovha zwa ri vhuyedza nga dziṅwe nḓila mbili dza ndeme. Ya u thoma, ri tshila ri tshi khou ḓivha uri ri khou tshilela mini. Ya vhuvhili, ri vha na  fhulufhelo ḽa vhumatshelo ḽine ḽa ḓo itea zwa vhukuma. (Yer. 29:11) Kha ri ṱolisise dzenedzo nḓila mbili nga vhuronwane.

9. U sendela tsini na Yehova zwi ita hani uri ri tshile vhutshilo vhu takadzaho?

⁹ U sendela tsini na Yehova zwi ita uri ri ḓivhe uri ri khou tshilela mini. Vhathu vhanzhi ṋamusi a vha tendi uri Mudzimu u hone. Ndi ngazwo vha sa ḓivhi uri ndi ngani vhathu vho sikwa, vha sa tendi uri ri nga tshila tshoṱhe. Fhedzi nga nṱhani ha uri riṋe ro guda Ipfi ḽa Mudzimu, ri na vhungoho ha uri Mudzimu “u hone na uri u lambedza vhane vha mu ṱoḓa zwi tshi bva mbiluni.” (Vhahev. 11:6) Na ṋamusi, ri khou tshila vhutshilo vhu takadzaho ngauri ri khou ita zwe Yehova a ri sikela zwone, zwine zwa vha u mu shumela.​—Dot. 10:12, 13.

10. Yehova u fhulufhedzisa mini vhathu vhawe? (Phisalema 37:29)

¹⁰ Vhathu vhanzhi a vha na fhulufhelo ḽa vhumatshelo. Vha sokou ḓitshilela. Zwine vha zwi ḓivha ndi u ya mushumoni, u vhinga kana u vhingwa, u vha na vhana na u lugiselela tshifhinga tshine vha ḓo vha vha si tsha shuma. A vha ḓivhi tshithu nga ha zwe Mudzimu a zwi fhulufhedzisa tshifhingani tshi ḓaho. Fhedzi vhathu vha Yehova vho vhea fhulufhelo ḽavho kha Yehova. (Ps. 25:3-5; 1 Tim. 6:17) Ri fhulufhela Mudzimu ane a vha khonani yashu. Ri a zwi ḓivha uri u ḓo ita zwe a ri fhulufhedzisa zwone. Hu na zwithu zwinzhi zwavhuḓi zwe ra zwi lavhelela nga maṱo matswuku zwine zwa katela u mu shumela lwa tshoṱhe Pharadisoni.​—Vhalani Phisalema 37:29.

11. U sendela hashu tsini na Mudzimu zwi ri vhuyedza hani nahone zwi ita uri Mudzimu a ḓipfe hani?

¹¹ U sendela tsini na Mudzimu zwi dovha zwa ri vhuyedza nga dziṅwe nḓila nnzhi. Sa tsumbo, Yehova o ri fhulufhedzisa uri u ḓo ri hangwela arali ra rembuluwa kha zwivhi zwashu. (Yes. 1:18) Nga zwenezwo, a ri bveli phanḓa ri tshi khou ḽa mbilu nga vhukhakhi he ra vhu ita kale. (Ps. 32:1-5) U sendela tsini na Yehova zwi ita uri ri takale zwa dovha zwa takadza na mbilu ya Yehova. (Mir. 23:15) Ndi ngoho uri hu na zwiṅwe zwithu zwinzhi zwavhuḓi zwine zwa ita uri ri takale nga nṱhani ha u vha khonani ya Yehova. Zwazwino kha ri vhone uri ri nga sendela hani tsini na Mudzimu.

RI NGA BVELA HANI PHANḒA RI TSHI “SENDELA TSINI NA MUDZIMU”?

12. Ndi mini zwine na tea u zwi ita u itela u sendela tsini-tsini Mudzimu?

¹² Arali ni Mukriste o lovhedzwaho, no ita zwithu zwinzhi uri ni vhe khonani ya Yehova. No guda nga hae na nga ha Yesu Kristo, no rembuluwa kha zwivhi zwaṋu, no sumbedza uri ni na fhulufhelo kha Yehova Mudzimu na u ita zwithu zwoṱhe zwine na nga kona u mu thetshelesa. U itela uri ri sendele tsini-tsini na Mudzimu, ri tea u bvela phanḓa ri tshi ita zwenezwo zwithu.​—Vhakol. 2:6.

13. Ndi zwifhio zwithu zwiraru zwine zwa nga ri thusa u bvela phanḓa ri tshi sendela tsini na Mudzimu?

¹³ Ndi mini zwine zwa nga ri thusa u bvela phanḓa ri tshi sendela tsini na Mudzimu? Tsha u thoma, ri tea u bvela phanḓa ri tshi guda na u vhala Ipfi lawe Bivhili. Musi ri tshi zwi ita, a ro ngo tea u sokou guda fhedzi nga ha Yehova, ri tea u dovha ra lingedza u pfesesa nḓila ine a humbula ngayo na zwine a zwi ṱoḓa kha riṋe na u zwi tevhedza. (Vhaef. 5:15-17) Tsha vhuvhili, ri tea u khwaṱhisa lutendo lwashu nga u elekanya nga ha nḓila nnzhi dze Yehova a ri sumbedza ngadzo uri u a ri funa. Tsha vhuraru, ri tea u bvela phanḓa ri tshi vhenga zwine a zwi vhenga na u iledza u konana na vhathu vhane vha ita zwenezwo zwithu.​—Ps. 1:1; 101:3.

14. Ndi mini zwine ra nga zwi ita ḓuvha ḽiṅwe na ḽiṅwe u itela u takadza Yehova? (1 Vhakorinta 10:31) (Sedzani zwifanyiso.)

 ¹⁴ Vhalani 1 Vhakorinta 10:31. Ndi zwa ndeme uri ri ite zwithu zwine zwa takadza Yehova. Ri tea u ya miṱanganoni ya tshivhidzo na u ya tsimuni. Fhedzi a si zwenezwo fhedzi zwine ra tea u zwi ita. Zwoṱhe zwine ra zwi ita ḓuvha ḽiṅwe na ḽiṅwe zwi tea u takadza Yehova. Sa tsumbo, musi ri tshi fhulufhedzea kha zwithu zwoṱhe na u kovhela vhaṅwe zwine ra vha nazwo, zwi ita uri Yehova a takale. (2 Vhakor. 8:21; 9:7) U dovha a ṱoḓa ri tshi dzhiela nṱha vhutshilo he a ri ṋea hone, nga zwenezwo, ri tea u vha na vhulondi kha zwine ra zwi ḽa na u zwi nwa, ri dovhe ri ite zwithu zwine zwa ḓo ita uri ri vhe na mutakalo wavhuḓi. Musi Yehova a tshi vhona vhuḓidini vhune ra khou vhu ita u itela u mu takadza, u ḓo ri funa na u fhirisisa.​—Luka 16:10.

15. Yehova u lavhelela uri ri fare vhaṅwe nga nḓila-ḓe?

¹⁵ Yehova u sumbedza vhathu vhoṱhe vhuthu hu sa londwi uri vha a mu shumela kana a vha mu shumeli. (Mat. 5:45) U lavhelela uri na riṋe ri ite zwi fanaho. Sa tsumbo, Bivhili i ri vhudza uri a ro ngo tea u ‘amba vhaṅwe luvhi kana u hanedzana navho, fhedzi ri tea u vha humbulela, ri sumbedze u vuḓa kha vhathu vhoṱhe.’ (Tito 3:2) Naho vhaṅwe vha sa tendi kha Yehova, a ro ngo tea u ḓidzhia ri khwine u vha fhira. (2 Tim. 2:23-25) Ri ḓo bvela phanḓa ri tshi sendela tsini na Mudzimu musi ri tshi fara vhaṅwe nga vhuthu.

RI NGA “SENDELA TSINI NA MUDZIMU” NAHO RI TSHI ITA RI TSHI KHAKHA

16. Muṅwali wa Phisalema 73 o ḓipfa hani musi o no fhedza tshifhinga tshilapfu a tshi khou shumela Yehova?

¹⁶ Nga zwiṅwe zwifhinga, ri nga pfa u nga Yehova ha tsha ri funa nga nṱhani ha vhushayanungo  hashu. Fhedzi kha ri humbule nga ha tsumbo ya we a ṅwala Phisalema 73. O ri: “A vha nṋe, milenzhe yanga yo ṱoḓou pambuwa; milenzhe yanga yo ṱoḓou suvha.” (Ps. 73:2) O dovha a amba uri mbilu yawe yo vha i tshi khou “vhavha,” a “sa ṱalukanyi,” a “tshi nga tshivhanda tshi sa humbuli” phanḓa ha Yehova. (Ps. 73:21, 22) Fhedzi naa o vhona u nga Yehova ha tsha mu funa na uri a nga si mu hangwele nga nṱhani ha vhushayanungo hawe?

17. (a) Naho muphisalema o vha o kulea nungo, o ita mini? (b) Ri nga guda mini kha tsumbo yawe? (Sedzani zwifanyiso.)

¹⁷ Arali muphisalema o pfa u nga Yehova o mu laṱa, a nga vha o zwi pfa lwa tshifhinganyana. Naho o vha o kulea nungo, o vha a tshi zwi ḓivha uri u tea u sendela tsini na Yehova. O ṅwala uri: “Fhedzi zwino ndi na iwe tshifhinga tshoṱhe; wo fara tshanḓa tshanga tsha u ḽa. Iwe u nndivhisa nga nyeletshedzo yau, nga murahu u ḓo nnyisa vhugalani.” (Ps. 73:23, 24) Na riṋe ri tea u humbela Yehova uri a ri khwaṱhise musi ri tshi ḓipfa ro kulea nungo nga nṱhani ha vhukhakhi he ra vhu ita. (Ps. 73:26; 94:18) Naho ra ita vhukhakhi vhuhulwane, ri nga dovha ra sendela tsini na Yehova ri na vhungoho ha uri o ‘ḓiimisela u ri hangwela.’ (Ps. 86:5) Arali ra ḓipfa ro kulea nungo, ndi zwa ndeme uri ri sendele tsini na Mudzimu.​—Ps. 103:13, 14.

‘SENDELANI TSINI NA MUDZIMU’ LWA TSHOṰHE

18. Ndi ngani ri tshi nga bvela phanḓa ri tshi sendela tsini na Yehova?

¹⁸ Ri nga bvela phanḓa ri tshi sendela tsini na Yehova na u guda nga hae lwa tshoṱhe. A zwi na magumo. Bivhili i amba uri nḓila dza Yehova, vhuṱali hawe na nḓivho yawe “ndi zwihulu.” (Vharoma 11:33) Ri ḓo bvela phanḓa ri tshi guda nga ha Yehova u ya nga hu sa fheli.

19. Bugu ya Phisalema i ri ṋea vhungoho ha mini?

¹⁹ Phisalema 79:13 i ri: “Riṋe ri vhathu vhau na nngu dza pfulo yau, ri ḓo u livhuwa lini na lini; ri ḓo ḓivhadza thendo dzau kha murafho na murafho.” Musi ni tshi khou bvela phanḓa na u sendela tsini na Yehova na inwi ni nga vha na vhungoho ha uri u ḓo ni fhaṱutshedza lwa tshoṱhe. Zwenezwi zwi nga ita uri ni ambe uri: “Mudzimu ndi tombo ḽa mbilu yanga na mukovhe wanga lini na lini.”​—Ps. 73:26.