Vhabebi vhane vha vha tsumbo, vha tshila u tendelana na zwine vha funza vhana vhavho. Sa tsumbo, ni nga si lavhelele uri ṅwana waṋu a ambe ngoho arali nga tshiṅwe tshifhinga ho ḓa mueni ni tshi mu vhudza uri: “Vha vhudzeni uri a thi ho.”

David o amba uri: “Hu na ḽiambele ḽine ḽa ri: ‘Itani zwine nda amba hu si zwine nda ita.’ Fhedzi zwenezwi a zwi shumi kha vhana. Vha fana na tshipontshi tshine tsha tsonzwa zwoṱhe, nahone vha ḓo ri vhudza musi zwine ra ita zwi sa tshimbidzani na zwine ra vha vhudza zwone.”

ZWINE BIVHILI YA AMBA: “Iwe ane wa vhudza muṅwe wa ri, ‘U songo tswa,’ naa u a tswa?”​—Vharoma 2:21.

Vhana na vhaswa, vha ṱuṱuwedzwa nga maanḓa nga tsumbo ya vhabebi vhavho, hu si nga muṅwe muthu kana thangana dzavho. Vhabebi, ni kha vhuimo ha khwinesa ha u gudisa vhana vhaṋu arali ni tshi ita zwine na vha gudisa zwone.

Nicole o amba uri: “Ni nga dovholola tshithu tshithihi lunzhi lunzhi na vhona u nga ṅwana waṋu ha khou ni pfa, fhedzi na tou khakha na si ite zwe na mu gudisa zwone, u ḓo ni humbudza. Vhana vha dzhiela nṱha zwoṱhe zwine ra ita naho ri tshi vhona u nga a vha zwi vhoni.”

ZWINE BIVHILI YA AMBA: “Vhuṱali vhu bvaho ṱaḓulu . . . vhu ita uri muthu . . . a si vhe na muhoyo.”​—Yakobo 3:17.

Ṱolisisani nḓila ine na ita ngayo zwithu. Ndi mini zwine inwi na zwi ṱalela? Ni fara hani na mufarisi waṋu na vhana vhaṋu? Khonani dzaṋu ndi vhathu-ḓe? Naa ni a humbulela vhaṅwe? Nga maṅwe maipfi, naa ni muthu ane na ṱoḓa vhana vhaṋu vha tshi vha ene?

Christine o amba uri: “Nṋe na mukalaha wanga a ri vhudzi vhana vhashu uri vha tshile nga nḓila ine ra si tshile ngayo.”

Humbelani pfarelo musi no khakha. Vhana vhaṋu vha a zwi ḓivha uri ni a khakha. Musi ni tshi humbela mufarisi waṋu na vhana vhaṋu pfarelo zwo tea, ni vha ni tshi khou vha gudisa u fhulufhedzea na u ḓiṱukufhadza.

Robin o amba uri: “Vhana vhashu vha tea u ri pfa ri tshi tenda uri ro khakha nahone vha tea u dovha vha ri pfa ri tshi humbela pfarelo. Arali zwa sa ralo, vha nga si gude u tenda musi vho khakha.”